Read Bandi KƆ́L̃E HESENDAA GƆLƆÍ 2 Bible Online

KƆ́L̃E HESENDAA GƆLƆÍ 2 - Bandi bible

KƆ́L̃E HESENDAA GƆLƆÍ 2

¹Mu mbála Yalá fɛ́li mbélai, ná ngí vááni wú yéle ngáá ngí Ngalángi lɔ́ɔ́wu h̃u hái nuu fíli áá ɣɛ́ngɔ faa wɔ́lɔ mba faa léma wú w̃á kɔwɔ́ato mba, ngáá ndéni wú w̃a kɔlɔ galá ngóó wála wálani su ɛ́ɣɛ nuu búsa ndá géle ɣéle su.

²Ná ngí ɣɛ́ni wú lóów̃a, ngí kúlai ngáá ngáá faa fíli ngákɔlɔ, sí nɔ́ɔ léi ngí ɣɛ́i faa wɔ́lɔ mba i ɣɛi ngáá Jísu Kílisitii ɛ́ɣɛ sái í mbóni kulɔ́sii w̃a.

³Ná ngí vááni wú yéle súú áá ɣɛ́i baní, ɛ́ɣɛ súú i ɣɛi áá bɛ́li í tó nduwái wa í ɣɛ́i sú.

⁴Kalambongí ngí mbóni ɛ́ɣɛ kééla wói ngí ndéni kɔwɔ́ato Ngalá mba, ngáá ndéni kɔlɔ galá ngóó wala wala h̃u. Kɛ́ ngí tí ɣɛní peleí sí w̃a áá ngákɛ kíya Hɛ́ɛ́ma Ỹínangi yákpangɔ.

⁵Ngí ná ɣɛ́ni kɛinɔɔ́ wú lángi wú su ngáá Ngala álaa gúla nuu búsa géle ɣele su, kɛ́ wú lángi í gúla Ngalangí yákpangi h̃u.

⁶Kɛ́ ná fíli sú, ngáá kele ɣéle kééla woó le sítii ma ti h̃uubangɔ́ náa Ngala fái h̃u, kɛ́ ɛi ɣɛ ngáá ngeleí sí wu géle ɣele ɔɔ ngeleí sí wu w̃ásangaitii ti géle ɣele su, tiyɛ́i ti yákpangi áá yéi vólu.

⁷Kele ɣelé ngói ngíwaa nde aá wáá ngáá Ngalángi géle ɣélengi maa lɔ́ɔ́wungɔ nuu búsa wa, Ngalá ngɔ́ɔ́ ɣɛ́ p̃ɛ́ɛ́ í ngeleí sí wu bátɛ, kele ɣelengi ná lɔ́ í lókoloi mba ngáá a mú kulasuunúma w̃ááhɔlɔ maa véle w̃a.

⁸Masangái sítii tí ngélewu ti tá fíli taá kele ɣélengi ná yátɔi mba. Kɛbei ti ɣɛ́i ngatɔ́i mba, tɛ́i belé ɣɛ́ Ndemɔí Jísu bakpái kulɔ́sii w̃a ɔ́ɔ́ há, lɛ́i í Ngalángi yákpangi yakɛ́ngɔ kpál̃au.

⁹Kɛ́ ná fíli sú, sí pɔnɛngɔ́ Ngalá Kɔ́lɔi h̃u aá wáá ngáá sí, “Sí nuu fíli áá nɛ́ɛ́ tɔí kɛlaa ɔ́ɔ́ maa woo ỹɛ́ni, sí nuu fíli áá nɛ́ɛ gísiyani la ngáá aa ɣɛ, maa hái kái kái tɔ́ Ngala ngí kɛ kíli batɛngɔ́ sítii mbɛ ti longɔ́i ngáá laá Ngála.”

¹⁰Kɛ́ Ngalá ngí ngi lɔ́ɔ́wu h̃u hái kpɛ́lɛɛ kpɛ́lɛɛ ngákɛa ngáá mu ye kpál̃au ngi Hɛ́ɛ́ma Ỹínangi w̃áá véle w̃a. Hɛ́ɛ́ma Ỹínangi aa faí kpɛ́lɛɛ ngákula mba í lí bɛ́lɛ í to Ngalángi háá h̃uubatɛngítii mba tí ndɔ́ɔ́wu h̃u.

¹¹Nuu ɛ́i ɣɛ́ ngi mbála gi máá haa wɔlɔ́, kɛ léi maa w̃ɔ́ɔ bútei. Ngimɔ́ɔ́ nɔɔ́ jɔ́ í ná, kɛ léi Ngalángi Hɛ́ɛ́ma Ỹínangi í Ngalá ki máá haa wɔ́lɔ.

¹²Ngala ngí kɛ́a ngáá háwu Hɛ́ɛ́ma Ỹínangi í ɣɛ́ mu volú. Ná vá tɔ í kɛ́a a mɔ́i gísiya kíya ngeleí sí wu yélaitii taá gisíya. Aáva i ná ɣɛ́ngɔ kɛinɔɔ́ mu ɣɛ́ kɔ́lɔ, mú ngátɔ mba sí kpɛ́lɛɛ Ngala ngí fengá mu yɛ.

¹³Faalɔ, nɛí yɛ́pɛ nuu búsa géle ɣele su kɛ́ naa yɛ́pɛ H̃ɛ́ɛ́ma Ỹínangi géle ɣelengí h̃u, ná naayáá tɔɔỹaá gééla woí lé sítii ma H̃ɛ́ɛ́ma Ỹínangi í ti volú.

¹⁴Nuí fíli Hɛ́ɛ́ma Ỹínangi ɛ́i ɣɛ́ polú, ɛi lokohéi sítii mbu taa gúla Hɛ́ɛ́ma Ỹínangi yaa, sífaa taá ɣɛ ngáá faa ỹááka laá ngeyá. Aáva ɛi ti yatɔ́ mbá sífaa Hɛ́ɛ́ma Ỹínangi ɛi ɣɛ́ polú ɔ́ɔ́ kɛ́ ngáá háwu ɔ́ɔ́ ti yatɔ́ mba.

¹⁵Nuí fíli Hɛ́ɛ́ma Ỹínangi í polú, aa faítii kpɛ́lɛɛ ngátɔ mba, kɛ́ laa bútei nuu fíli ɛi faa vɛ́lɛ mba.

¹⁶Maa hái wáá nɔ́ɔ ngáá kíya pɔnɛngɔ́ Ngalá Kɔ́lɔi h̃u, sí vá pɔnɛngɔ aá wáá ngáá sí, “Ele lɔ í Ndemɔí Ngalá ki má haa wɔ́lɔ? Ele lɔ áá hómbo í ndaahí?” Kɛ́ ná fíli sú, niỹá lɔ ní Kílisitii gi ma gísiyai wɔ́lɔ.