Read Bandi KƆ́L̃E HESENDAA GƆLƆÍ 3 Bible Online

KƆ́L̃E HESENDAA GƆLƆÍ 3 - Bandi bible

KƆ́L̃E HESENDAA GƆLƆÍ 3

¹Mu mbála Yalá fɛ́li mbélai, ngɛ́i belé yɛpɛ wú yéle kíya ngáá yɛ́pɛ sítii ngelé Hɛ́ɛ́ma Ỹínangi í ti volú. Kɛ ngɔ́ɔ́ yɛ́pɛ wú yéle kíya ngeleí sí wuu yélai gítei tí na. Ná vólu, kíya nɔ́ɔ sítii ti langɔ ngáá Jísu Kílisitii kɛ́ tí h̃úúbangɔ ɛ́i ɣɛ́ la nɛ́nɛ ti lángi h̃u kíya ndoú lálaitii tí na.

²Kɛ́ maa hái gúlangɔɔ lé ngáá wá lɔ ngáá ndengáá nɛ́nɛ. Faalɔ, ngɛ́i mɛ́ɛ́ni h̃úúbangɔ hé wú yáá kɛ nyiní yɛ́i, sífaa, wáá nɛ́ɛ́ foloí mɛɛni h̃úúbangɔ ỹɛ́maa. Aáva kíya bɛ́lɛ suu í na, wáá nɛ́ɛ́ foloní mɛɛni h̃úúbangɔ ỹɛ́maa,

³bɔw̃álale wá lɔ nɛ́nɛ ngáá ngeleí sí wú yélaitii kɛ kíli. Tolómai ɛ́ɣɛ kpɔɔlɔ kpɔɔlɔ́ngi taá ɣɛ́ wú lówah̃u, aáva ná vá tɔ áá ngakɛ́ ngáá kɛ wá lɔ́ nɛ́nɛ ngáá ngeleí sí wu yélai kɛ kíli.

⁴Sífaa, ná wú tá yílaa ngáá ɣɛ́ ta, “Nyá lɔ Pɔ́ɔ volú,” pekaí i ɣɛ ta, “Nyá lɔ Apólo volú,” kɛ wá lɔɔ lúva nɔ́ɔ kíya ngeleí sí wuu yélai taá lúva.

⁵Kɛ elení mbáá ngáá Apólo ɛ́ɣɛ nyá Pɔ́ɔ? Kɛ́ niỹa lɔ nɔ́ɔ ngáá Ngalángi yénge mbélaa, ní bɔ́nga wú wá wú lá ngáá Jísu Kílisitii. Niỹá lɔɔ́ ni yéngengi wo bɛ́kpɛ Ndemɔí Ngála ngí féngɔ ni yilá ngíla ngéya.

⁶Maa hái gulangɔ́ɔ́ lé nɔ́ɔ ngáá, sii híí ŋáni gáálɛ lɔ ngí síngɔ, Apólo íwaa njɛ vú ma, kɛ́ Ngalá tɔ í kɛngɔ́ í hálengɔ.

⁷Kɛ ná ɣɛngɔ́ nuí áá sii híí ŋáni hi, ɛ́ɣɛ nuí áá njɛ́i vú ma, tiyá láá le tɔɔ́ ɣɛ́ ngáá faí. Kɛ́ kɛ léi Ngalá ngilaá kpé ngi hái í ngáá faa lɛ́i íwaa kɛ ngáá háwu sii híí ŋáni áá hále.

⁸Nuí sí áá sii híí ŋáni hi ɛ́ɣɛ nuí sí áá njɛ́i vú ma ti yénge sawuí i yíla kpé nɔɔ́ aáva Ngalá tɔɔ vá tí w̃ááỹa féma bɛ́kpɛ ngáá nuí fíli ngi ndá yéngengi l̃ɔ́ingi áá ɣɛ́ mbóni.

⁹Niỹá lɔ́ ngáá Ngalángi yénge mbelaa náá yénge ỹanda yílaa, wáá vá wú gúlangɔɔ lé ngáá Ngalángi báála. Wú gúlangɔɔ lé mɔ́ɔ ngáá Ngalángi vɛ́lɛ.

¹⁰Sí Ngalá ngí féngɔ mbɛ́ ngi háá bɔwɔí w̃áá véle w̃a, í kɛ́a ngáá háwu ngí Ngala ngénge panda wo wú lííwaa kíya nɔ́ɔ́ pɛ́lɛ ló mɔ́ɔ́ vanda í na. Ngí pɛ́lɛ gɔ́wɔi hítɛnga aáva nuu vékaa tiyá lɔ́ɔ pɛlɛ́ ló náa pɛlɛ́ gɔ́wɔi ná w̃a. Kɛ́ kɛ nuu fíli í ndá ma kíya áá pɛlɛ́i ló ma.

¹¹Nuu fíli ɛi mɔɔ pɛlɛ́ gɔ́wɔ véka hitɛ́ í gúla sí volú Ngala ngí sítɛnga náa kílii, ná vá mbaa ngáá Jísu Kílisitii.

¹²Ti lɛ́ingaa taá pɛlɛ lo maa vɛ́lɛ gɔwɔí sí w̃a ngáá góólii, ti lɛ́ingaa va tí tó ngáá kɔ́lu wolé ɔɔ kɔtu vangɔ́. Ti lɛ́ingaa tí tó ngáá njataí ɔɔ ná láá le muỹɛí.

¹³Aáva folói ná Jísu íwaa vá vááma ma, nuí fíli ngi yéngengi w̃aa áá ɣɛ kpál̃au tí tɔ́ kíya ngangáá ɣɛ́ mba. Aáva maa hóloi ná w̃a, ngɔmbuí aa nuí kpɛ́lɛɛ ngi ndá yéngengi ɣɛ kíli ɣɛ, tí ɣɛ́ kɔ́lɔ kíya ngangáá ɣɛ́ mba.

¹⁴Aáva ná wɔ́lii pɛ́lɛi nuí áá ɣɛ́ tóni ɛ́i ɣɛ́ w̃ɔ́ni, maa w̃ɔ́i aa maaỹá sɔ́lɔ faaw̃a.

¹⁵Kɛ́ ná wɔ́lii áá w̃ɔ́, kɛ maa w̃ɔ́i i walaá ma. Maa w̃ɔ́i gítei ngumáá áá wo, kɛ́ aa ɣɛ nɔ́ɔ kíya nuu áá víliỹɛ ngɔmbu hó su í véla mɔ mbá.

¹⁶Wáá kɔlɔ́ ngáá kɛ wá lɔ ngáá Ngalángi hɛ́ɛ́ma vɛ́lɛ, aáva ngi Hɛ́ɛ́ma Ỹínangi lɔ wú vólu?

¹⁷Ná nuu fíli áá Ngalángi hɛ́ɛ́ma vɛ́lɛi ɣɛ kíli ỹááni, Ngalá ngáá maa w̃ɔ́i ɣɛ kíli ỹaaní. Sífaa Ngalángi vɛ́lɛi lɔ na léélaa faaw̃a. Wáa vá tɔ wú ngáá maa vɛ́lɛi ná ɣɛ́ kíli.

¹⁸A wálaa bɔwɔ́ vɛ́lɛ! Ná nuu fíli áá ɣɛ́ wú lííwaa i ki má ngáá kɛ kele ɣelengɔɔ lé ngeleí sí wu háitii su, kule lɔ́ maa w̃ɔ́i w̃a í gútɔ kɛinɔɔ́ kele ɣeléngɔ í ɣɛ́ la gíte.

¹⁹Sífaa ngeleí sí wu géle ɣelengí lɔ́ ngáá faa ỹááka Ngalá ngeyá. Sí pɔnɛngɔ́i Ngalá Kɔ́lɔi h̃u, aa vá mbaa ngáá sí, “Sítii ti géle ɣelengɔ́ ngeleí sí wu, Ngala ngáá ti hóu ti bɔwɔ́ bɔ́wɔ gí maa gulaí wa.”

²⁰Aáva múl̃ɔ pɔnɛngɔ́ɔ́ lé Ngala Kɔ́lɔi h̃u sí vá pɔnɛngɔ́ aá wáá ngáá sí, “Ndemɔí Ngalá ngí kɔlɔ́ ngáá sítii ti géle ɣélengɔ ngeleí sí wúú háitii su, ti gísiyai lɔ́ ngáá faa ỹááka.”

²¹Náá hááw̃a, nuu fíli álaa yonga téve kɔwɔ́ato sí wa nuu búsa áá kɛ, sífaa kpɛ́lɛɛ tɔ́ na wú hááw̃a.

²²Ɔ́ɔ bɔ́ɔ́ ɣɛ bɛ́lɛ ngáá Pɔ́ɔ ɔɔ Apólo ɔɔ Pítɛ ɔɔ ngeleí sí wu ɔɔ ndɛɛh̃úi ɔɔ sái ɔɔ sí h̃úu hái ɔɔ naa wutúwɔɔ, kpɛ́lɛɛ tɔ́ wú hááw̃a.

²³Aáva wá lɔ na Kílisitii hááw̃a, Kílisitii va aá lɔ na Ngalá fááw̃a.