Read Bandi KƆ́L̃E HESENDAA GƆLƆÍ 5 Bible Online

KƆ́L̃E HESENDAA GƆLƆÍ 5 - Bandi bible

KƆ́L̃E HESENDAA GƆLƆÍ 5

¹Nungáá tí ndénga má gíte ngáá kɛ kɔlɔsiyángi lɔ wú lííwaa ngwala ngáá ngi híí ɣele tɔ aa sítii ndowah̃u taa ngáá Ngala fɛ́li mbélaa. Ngí mɛ́ningɔ ngáá siỹɛndópo yiláá i ngi kɛ́ɛ́ɣɛ ỹáh̃ai ta yéɣenga ngáá ngi ỹáh̃a.

²Ndee h̃úúwɔɔlɔ lɔ wú su náá? Aá ɣelé maanɛ́ɛ́ngɔɔ lé wú w̃ááw̃aanungɔ í ɣɛ́ la, nuí ná va í fái ná ɣɛ́ngɔ wú kpetéve vaamá wú Yalá maakpɔí h̃úú wá.

³Kíya bɛ́lɛ ngáá wú lóów̃a wɔ́ɔ́ ɣɛ́ wáá tɔ́, kɛ́ nyá lɔ gíte wú lííwa. Aáva mu Lemɔ́i Jísu laahéingi h̃u, nuí sí í faa ỹɔ́u ỹɔ́ungi sí ɣɛ́ngɔ ngí mbaalévenga naá kílii ngáá aa veléi. Kulangɔ́ɔ́ lé ngáá kíya kpéi ngáá ɣɛ́ ɣɛ́ngɔ na. Ná wáá yatɛ́ mba ỹanda yílaa, ngáá ɣɛ́ wú lííwaa, aáva a mu Lemɔ́i Jísu yákpangi i mu liiwáá,

⁵a nuí sí lɔ́ve Setána yelé kɛinɔɔ́ kpúsai í ỹááni, suuyáfuw̃angi wúmaa í wó Ndemɔí Jísu vaa holói w̃a.

⁶Wú h̃úúwɔɔlɔngɔɔ lé, aáva ná aa vaní. Taá ndé ngáá faanɛ́ɛ́, ti ɣɛ́ ta, “Ngɛí gúloi ná taá tolí ngáá yíísii taá pu biléi h̃u áá tɛ́nga, kulo kw̃ɛ́ɛ́ te nɔ́ɔ léi taá pu fuláwai h̃u í tɛ́nga.”

⁷Faalɔ, a volú yáfe faa ỹɔ́i wa, wú w̃ááw̃uỹangɔ í ɣɛ́ la fó kíya nɔ́ɔ́ nuu áá yíísi vɔ́lɔi wúya fó nyaakái h̃u. Ná ná áá ɣɛ́, wáá ɣɛ́ náá ngáá bilé bátɛ fúlawai ɣɛ kíli yíísi ɛ́i ɣɛ́ su. Aáva ngí kɔ́lɔ ngáá ngimɔ́ɔ́ wú na, sífaa Ngumaawó Kúi w̃ááhei wongɔ́ɔ́ lé náa kíli, ná naá Kílisitii gúlangɔ ngáá saáɣa a mu haáw̃a lɛ́i í ngáá Ngumaawó Kúi w̃aa wáálai ɣɛ́ kíli.

⁸Kɛ a mú mú gúi sí wúya hɔ́ɔ́ ngáá bílei sí yíísi ɛ́i ɣɛ́ su. Maa bílei waa ngáá telembongí ɛ́ɣɛ tɔɔỹái. Kɛ́ málaa kúya ngáá biléi sí yíísi áá ɣɛ́ su. Ná wáá ngáá, faa ỹɔ́i ɛ́ɣɛ nyaamái.

⁹Ngí pɔ́nɛngɔ wú yéle ní gɔ́lɔi h̃u ngáá wálaa báha kpahá kɔlɔsiyá mbélaa wa.

¹⁰Ngáá yɛ́pɛma kɔwɔ́ato sítii mba taa ngáá Ngala fɛ́li mbélaa, ti gɔ́lɔsiyangɔ, ti ngáá mɔní mɔ́ni mbélaa, ti ngáá ŋuỹá yélaa, ti ngáá kɔɔ kɔɔ́ ŋániaitii fɛ́li mbélaa taa ti yeɣé ngáá ngálangaa. Sí áá kɛ wɔ́i báha kpaha ti wa, aá wáá ngáá, kɛ wú gúla ngetéyangi sí h̃úú wá fo fóndei.

¹¹Kɛ́ sí gíte ngí ma aá wáá ngáá, wálaa báha kpahá nuí sí wá áá bɔ́wɔ yéɣe ngáá Ngala fɛ́li mɔ́ɔ kɛ́ i ngáá kɔlɔsiyá mɔ́ɔ́, ɔɔ i ngáá mɔní mɔ́ni mɔ́ɔ, ɔɔ í ngáá kɔɔ kɔɔ́ ŋániaitii hɛ́li mɔ́ɔ táá ti yéɣe ngáá ngalángaa, ɔɔ í ngáá ngi mbálangaa w̃ááboo mɔ́ɔ, ɔɔ í ngáá nuí sí í ngáá ndɔɔ bɔ́le mɔ́ɔ í ndɔɔ hóu h̃u nɔ́ɔ fɔ́, ɔɔ i ngáá ŋuỹá w̃ɔ́ɔ́. Wálaa héi kpú ỹanda ỹílaa wáá ná ỹɔ́kɔ mɔ́i wɔ́ɔ́ laaỹɛ́.

¹²Ndeé lɔ náa áá kɛ ngáá lókovili sítii kɔsɔndáá h̃u taá ngáá Ngala fɛ́li mbélaa? Ngalá tɔ́ áá va nátii kɔ́sɔma. Kɛ́ a sítii kɔ́sɔ ti ngáá wú tá Ngala fɛ́lindai h̃u, kíya pɔnɛngɔ́ Ngala Kɔ́lɔi h̃u, aá vá mbaa ngáá sí í ɣɛ́ngɔ ta, “A faa ỹɔ́u w̃ɔ́i betéve wa.”