Read Bandi KƆ́L̃E HESENDAA GƆLƆÍ 8 Bible Online

KƆ́L̃E HESENDAA GƆLƆÍ 8 - Bandi bible

KƆ́L̃E HESENDAA GƆLƆÍ 8

¹Bɛlɛ́ náa ngí yɛ́pɛ kɔwɔ́ato mɛɛníí wa taá kula ngáá saáɣa kɔɔ kɔɔ́ ŋániaitii mbɛ taa ti yeɣé ngáá ngalángaa. Aá ɣéle tɔɔỹaá le ngáá mu kpɛ́lɛɛ mu faa gálangɔ kíya ndengɔ, maa háá galangɔi va, aa nuu h̃úu ɣɛ́ wɔɔlɔ. Kɛ́ ndóngi lɔ aa nuu h̃úúba.

²Faalɔ, nuí fíli áá gisíya ngáá i faa tá wɔlɔ́, tɔɔỹaá hááw̃a aa faa fíli kɔ́lɔ kɛ kíya maanɛ́ɛ́ngɔ í ɣɛ́ kɔlɔ́.

³Kɛ́ nuí sí ndongɔ́ ngáá Ngalá, Ngalá ngí nuí ná wɔ́lɔ.

⁴Faalɔ, mɔɔningí kɔwɔ́ato mɛɛníí wa taa kula ngáá saáɣa kɔɔ kɔɔ́ ŋániaitii mbɛ taa ti yeɣé ngáá ngalángaa, ngí yápotengi lɔ. Mú kɔ́lɔ ngáá kɔɔ kɔɔ́ ŋániaitii nungái taá gíto ti wa, taa ngáá ŋani fíli ngeleí sí wu. Ná vólu, mu kɔ́lɔ nɔ́ɔ ngáá Ngalángi i yíla kpé nɔ́ɔ.

⁵Kíya bɛ́lɛ nungáá lɛ́ingaa taá ndé ngáá ngalángaa bih̃íw̃aa lɔ́ na ngéleya ɛ́ɣɛ ngelewu, aa ɣéle nátii tɔɔ bɔ́ɔ́ ɣɛ́ na bɛ́lɛ taa ngákpa ŋánia bih̃íw̃aa,

⁶kɛ́ muỹa mu haáw̃a, Ngalángi i yíla kpé nɔ́ɔ. Laá vá tɔ í ngáá mu Kɛ́ɛ́ɣɛ ɛ́ɣɛ ŋani kpɛ́lɛɛ kpátɛ mɔ́i, ngi háwui h̃úú lɔ́ í kɛngá mú ndɛɛh̃úi h̃u. Aáva múl̃ɔ Ndemɔí í yíla kpé, aáva laá wáá ngáá Jísu Kílisitii, lɛ́i Ngalá ngí ŋani kpɛ́lɛɛ kpátɛngɔ maa véle w̃a, aáva laa vá tɔ nɔ́ɔ mɔ́ɔ́ mú ndɛɛh̃úi h̃u maa véle w̃a.

⁷Kɛ́ Ngala fɛ́li mbélaitii kpɛ́lɛɛ táá le tɔɔ ɣɛ́ fái sítii kɔlɔ. Ti lɛ́ingaa kɔɔ kɔɔ́ ŋániai taa ti yeɣé ngáá ngalángaa ti hɛ́lindai gumbongɔ́ɔ́ lé ti h̃u. Ná lɔ́ í kɛ́nga sí h̃úi bɛ́lɛ ná taá mɛɛníí sí ỹɛ taá kula ngáá saáɣa kɔɔ kɔɔ́ ŋániaitii mbɛ taa ti yeɣé ngáá ngalángaa, taá gísiya nɔ́ɔ lá ngáá maaỹɛɛ́ mbá ỹɛ́ɛ́ni. Aáva sífaa ti h̃úúbangɔ ɛ́i ɣɛ́ la Ngalá fɛ́lindai h̃u, aa ɣɛ ti gi má ngáá ná taá mɛɛníí ná ỹɛ, kɛ tí faa ỹɔ́u ɣɛ́a.

⁸Ná fíli sú, mɛɛníi laa le áá kɛ́ ngáá háwu maa báha Ngala mbá ngwala. Mu maa ỹɛ́ɛ́nii ná ỹɛ́ni maá mɛ́ɛ́ni, ná ɛí mu gulah̃uunúma kɛlaa mɔɔ́ wala kulasuunúma fíli ma.

⁹Kɛ́ ná fíli su, a w̃aah̃ú belé ngáá pangɔ́, wálaa kɛ sí wú kɔ́lɔ ngáá wɔ́ɔ́ bɔ́ɔ́ kɛ, aa wú wá ngáá faá, ná ɔ́ɔ́ kɛ ngáá háwu sítii ti h̃úúbangɔ láá lé Ngalá fái h̃u, tɔɔ́ víli faa ỹɔú h̃u.

¹⁰Wɛ́i wú kɔlɔ́ ngáá wú bɔ́ɔ́ mɛɛníí sí ỹɛ kɔɔ kɔɔ́ ŋániai ti wɔ pɛ́lɛi wu, aa ngáá faa fíli wú wa, kɛ faa áá wú wa. Kɛ́ ná nuí sí suubangɔ́ ɛ́i ɣɛ́ la Ngala fɛ́lindai h̃u áá wú lɔ́ wáá mɛɛní sí ỹɛ pɛlɛ́i ná wu, aa kɛ nduwúh̃u í lɛ́ lá í pɛlɛ ná ɣɛmá.

¹¹Ná ná áá ɣɛ́, wú mbála Yalá fɛ́li mɔ́i sí suu áá bái Ngala fái h̃u lɛ́i laá bɛ́lɛ Kílisitii í háángɔ faaw̃a, aa ha ngi háá ỹɔi h̃u kɔwɔ́ato wú háá lɔɔỹaí wa wú kɔ́lɔ.

¹²Ná yáá lúva h̃íí ná, yáá ɣɛ yáá faa ỹɔú ɣɛ ngáá Kílisitii ngáá faa ỹɔ́u ɣɛ́ndai ngáá í mbála Yalá fɛ́li mɔ́i. Ná wáá ngáá suuba kúloi ɣéle tɔ áá ɣɛ́ mbɛ́ Ngala fái h̃u, ɛi mɔɔ ɣɛ su.

¹³Faalɔ, ná wɔ́lii sí ngáá mɛ aá lɔ áá kɛ ní mbála Yalá mɔ́i áá víli faa ỹɔ́u h̃u, kɛ ngɛ́i mɔɔ ná ỹɛ í lí bɛ́lɛ í tó suwa wa kúnafɔ kɛinɔɔ́ ngɔ́ɔ́ kɛ ngáá háwu ní mbála Yalá fɛ́li mɔ́i ɔ́ɔ́ gúla volú Ngala fái h̃u.