Read Bandi KƆ́L̃E HESENDAA GƆLƆÍ 9 Bible Online

KƆ́L̃E HESENDAA GƆLƆÍ 9 - Bandi bible

KƆ́L̃E HESENDAA GƆLƆÍ 9

¹Ngáá nduwɔ laá h̃u, nyá lɔ́ ngáá Ngalángi gééla. Aáva ngí a mu Lemɔ́i Jísu lɔngá. Aáva ngengengí sí ngíwaa mbo Ndemɔí Jísu yɛ, wá lɔ́ Ngalá ngí wú w̃ááhɔlɔngɔ ngengeí sí h̃u ngí mbóngɔ.

²Bele pá nungáá vékaa tɛí ngéɣe ngáá Ngalángi gééla, kɛ́ wá laá fɔ́ wáá ngéɣe ngáá Ngalángi gééla. Sífaa wú Ndemɔí Jísu haaw̃a, ná aa ngakɛ́ ngáá kɛ nyá lɔ́ ngáá Ngalángi gééla.

³Ná nungáá taa mbáágula, kɛ ngimɔ́ɔ́ ngáá bɔwɔ́ w̃aahaalé.

⁴Ná ná áá ɣɛ́, kɛ́mbɛ aá lɔ́ pele w̃a ngáá ngí mɛɛní w̃ááhɔlɔ ní yéngengi hááw̃a?

⁵Kɛ aa pele w̃a fááw̃a ngáá ngí sí ɣɛ Ngalángi gééla vekaítii táá kɛ? Ná wáá ngáá kíya Pítɛ ɛ́ɣɛ Ndemɔí Jísu ndéɣei ɛ́ɣɛ Ngalángi gééla vékaitii tí Ngala fɛ́li nyáh̃aa héinga bɛ́kpɛ aáva ná taa ɣɛ́ taa lí Ngala ngénge siyama taá lí taá tí ỹáh̃aitii.

⁶Ɔɔ naá Bánaba lɔ nɔ́ɔ léi kule í ní w̃a ni yénge ni bɔwɔ́ laaỹɛ́ɛ́nii hááw̃a?

⁷Ele lɔ áá ɣɛ́ ngáá sóya w̃ɔɔ mbaa hái kpɛ́lɛɛ áá ɣɛ́ bɔ́wɔ wa? Ele lɔ áá ɣɛ́ ngáá sii hií ŋáni belé la mɔ́ɔ́ maa w̃ɔ́i ɛ́i ngámba súú ỹɛ? Ele lɔ áá ɣɛ́ ngáá toŋaní ló mɔ́ɔ́ kɛ́ ɛ́i maa gúlasuunuma ta w̃ááhɔlɔ?

⁸Taá ɣɛ́i sítii ngí ndéa tiyá lɔ́ nɔ́ɔ́ taá faí sí yákɛ kpál̃au, kɛ́ Ngala sávai ɣéle tɔ i yɛpɛngɔ́ kɔwɔ́ato mba.

⁹Savaí sí Ngalá ngí féni Muusé yáa i ndengɔ́, i ɣɛ ta, “Wálaa toŋaní laa yíli ná áá ɣɛ́ áá mɛɛni sí yándiɣa taa tolí ngáá wíítii.” Aá lɔ́ wú gí ma ngáá kɛ toŋanía lɔ́ Ngalá ngí ɣɛ́i beɣéi kɔwɔ́ato ti wa ná í fái ná léi?

¹⁰Niyá gíte lɔ́ Ngalá ngí ɣɛ́i beɣéi ni w̃a ná h̃u í fái ná léni. Kulangɔ́ɔ́ lé nɔ́ɔ ngáá sii híí ŋáni hí mɔ́ini ngaa kula mɔ́i, ti lɔ́ngɔ ti gíngi aa ɣɛ maa hii híí ŋáni ta hɔ́lɔ fáá wa bɛ́kpɛ.

¹¹Ní Ngala ngói léa wú w̃á aáva maa hái gulangɔ́ɔ́ lé nɔ́ɔ ngáá kíya nuu áá ŋáni hi. Aa ngáá faa yásaangɔ ná náá ɣɛ́a ŋani wɔlí wú yáá ngáá maa gúlasuunuma.

¹²Ná wɔ́lii áá ɣɛ́ pele w̃a ngáá nungáá vékaitii ti maa gúlasuunuma w̃aahɔ́lɔ wú yáá, kɛ aá lɔ́ pele w̃a aá ɣéle ngwala ni haáw̃a ngáá ní maa gúlasuunuma w̃ááhɔlɔ wú yáa. Kɛ́ aá ɣéle, ní liilɔ́lɔnga faa kpɛ́lɛɛ ngá kɛinɔɔ́ ná laá faa fíli ndá keela woo vándai sí lúwɔ kɔwɔ́ato Kílisitii wa. Ná lɔ í kɛa ní lókogulangɔ nátii su tí péle w̃a ngáá ní maahɔ́lɔ.

¹³Tɔɔỹaá le wú suuwɔ́lɔ ngáá sítii taa yénge Hɛ́ɛ́ma Yála Pɛ́lɛi wu, taá ti ndá ỹɛ́ɛ́ni w̃ááhɔlɔ Hɛ́ɛ́ma Yála Pɛ́lɛi wu. Sítii pa taá Ngala sááɣai gula Ngala sááɣa gula tútui w̃a, maa hááɣa wɔlingáitii su taa tá w̃ááhɔlɔ ngáá ti ndá.

¹⁴Ngimɔ́ɔ́ nɔ́ɔ jɔ́ maa hái í na, Ndemɔí Jísu í ndéngɔ ngáá sítii tíwaa Ngalángi gééla woí le, kulé lɔ́ ti w̃a ti ɣɛ́ taa beɣéma wɔ́lingaitii maahɔ́lɔ ná h̃u.

¹⁵Kɛ́ laá vá ngáá nɛ́ɛ́ ní lɔ́ɔ́ỹai sítii ta fíli máá ỹɛní, aáva ngáá kɔ́lɔi sí vɔ́nɛma wú yéle ngáá kɛinɔɔ́ ngí ɣɛ́ náá ngáá tí w̃áá ỹɛ. Maa í nɛ́ɛ́ni laá ɣéle ngí há í lɔ́ve sí wá nuu yáá kɛ ngáá háwu ngɛ́i mɔɔ yonga téve kɔwɔ́ato ní háá lɔɔỹaí sí wa ngí lókogulangɔ su.

¹⁶Kule fíli aa má ngɔ́ɔ́ yónga téve Ngalángi gééla woo vandaí lé fááw̃a. Sífaa, aá lɔ́ má p̃ɛ́ɛ́ ngáá kpama kule ngáá ngí ndé. Aá ɣéle p̃ɛ́ɛ́, aa ɣɛ má ngáá faa h̃úú ỹɔúngɔ ná ngɛ́i ɣɛ́ ndéni.

¹⁷Bele nyá gíte lɔ ngí ɣɛ́i ndaí gí sú ngáá ngí ngengengí sí wo, ná ná ɔ́ɔ́ ɣɛ́, ngɔ́ɔ́ ɣɛ́ ta ngáá kɛ wáá páva náá hááw̃a. Kɛ́ fengɔ́ lé ngéya ngáá ngenge ngáá kule í má ngáá ngí mbo. Aáva sí i ɣɛngɔ́ bɔw̃álale Ngalá ngí lókolonga mbá ngengengí sí wó fááw̃a.

¹⁸Ná ná áá ɣɛ, kɛ bɛɛ lɔ́ náá hɔ́ɔ́ ngíwaa maahɔ́lɔ ngáá ní pávai? Aá wáá ngáá, Ngala ngói ngíwaa nde pava haá áá mba. Ná lɔ́ í kɛ́a ngí lokogulanga sítii sú tí péle w̃a ngáá ngí mááhɔlɔ Ngala ngóó lendái h̃u.

¹⁹Nuu háá aa mbá aáva ngáá ngáá nduwɔ́ nuu fíli mbú. Kɛ́ ngí bɔwɔ́ ɣɛ́a ngáá nungáá kpɛ́lɛɛ tí lúwɔ kɛinɔɔ́ sítii kínɛi áá hólowo ti haáw̃a, ti wumáá í wó.

²⁰Ná naá ɣɛ́ w̃a naá Júsuaitii, ngáá bɔ́wɔ ɣɛ́ kíli gula ngáá Júsuai kɛ kíli. Aáva kíya bɛ́lɛ nyá gíte ngáá savaí sí wú Ngalá ngí féni Muusé yaa, ngáá bɔ́wɔ gula ngáá savái wuu w̃ɔ́ɔ́ ngáá kɛinɔɔ́ ngí kɛ ngáá háwu Júsuai ti wumáá í wó.

²¹Ná naa ɣɛ́ ỹanda yílaa naa sítii taa ngáá Júsua tiyɛ́i taa Ngala sávai wu Ngalá ngí féni Muusé yáá, ngáá bɔ́wɔ gúla ngáá ti ɣɛ kíli kɛinɔɔ́ ngí kɛ ngáá háwu ti wumáá í wó. Kɛ́ ná aa gulaí ngáá kɛ ngáá Ngala sávai wu. Kɛ́ nyá lɔ́ hítɛ Kílisitii hávai vólu.

²²Ná naa ɣɛ́ ỹánda yílaa naá sítii tí h̃úúbangɔ láá le Ngalá fái h̃u, ngáá bɔ́wɔ ɣɛ́ kíli gula ngáá ti ɣɛ kíli kɛinɔɔ́ ngí kɛ ngáá háwu ti wumáá í wo. Ngundamái waa ngaá ngáá bɔ́wɔ ɣɛ́ kíli gula ngáá nuu híí kpɛ́lɛɛ kɛ kíli kɛinɔɔ́ ngí kɛ ngáá háwu tí lɛ́ingaa ti wumáá í wó pele fíli sú nɔ́ɔ áá hólowo.

²³Ngáá sí kpɛ́lɛɛ kɛ́ Ngalángi gééla woo vandaí hááw̃a nɔ́ɔ kɛinɔɔ́ ngí maa gúlasuunumai tá w̃ááhɔlɔ í pólu.

²⁴Wú kɔ́lɔ ngáá maaɣaalí víliỹɛi h̃u, nuu yíla kpé tɔ nɔ́ɔ áá piliỹɛ́ wó mááỹangi w̃ááhɔlɔ ti kpɛ́lɛɛ su. Faalɔ, Ngala fái ɣɛ ngáá hɛ́mbɛi kpɛ́lɛɛ kíya nɔ́ɔ nuu áá ɣɛ́ áá víliỹɛ ngáá í maaɣaalí víliỹɛ w̃ááỹangi w̃ááhɔlɔ.

²⁵Sí fíli áá ɣɛ́ ngáá maaỹangi maaɣaalí ná h̃u, nuí yíla ngílangi fíli áá ɣɛ́ maa w̃ááɣaali ná wa, aa luw̃á ma ngáá faa fíli í lá ma í kɛ kíli bátɛ kɛinɔɔ́ í maa w̃ááỹangi ná w̃aahɔ́lɔ, kíya bɛ́lɛ maa w̃ááỹangi ná ɛ́i lɛ́mbi. Kɛ́ mu ndái sí múwaa maa yákpa mbo, ɛi ỹaaní kúnafɔ.

²⁶Ná lɔ́ í kɛ́a ngíwaa yakpá kíya nɔ́ɔ nuu áá ɣɛ́ áá wɔ́lɛ maaɣaalí víliỹɛii yapúmai wa. Ná vólu, kíya nɔ́ɔ ndapi wɔ mɔ́ɔ í ná ɛ́i ngí bɔ́taingi víli bɔw̃áá fúŋ.

²⁷Ná lɔ́ í kɛ́a tóko i bɔwɔ́ w̃ááh̃u, aáva ngáá bɔ́wɔ bánda ngá kpé kɛinɔɔ́ ngɔ́ɔ́ va ló vólo h̃u nyɛ́i ɣélengi ngíwaa nungáá vékaa lolí Ngala fái sí h̃u.