Read Bandi KƆ́L̃E GƆ́LƆI HELE KÉLEI 1 Bible Online

KƆ́L̃E GƆ́LƆI HELE KÉLEI 1 - Bandi bible

KƆ́L̃E GƆ́LƆI HELE KÉLEI 1

¹Nyɛ́i ngí ngáá Pɔ́ɔ, ngí ngáá Jísu Kílisitii géélai áá gúla Ngala ngí háá h̃uubatɛ su, nyá lɔ́ ngáá kɔlɔí sí vɔ́nɛ náa mú mbála Yalá fɛ́li mɔ́i Tímoti. Kɔlɔí sí lɔɔ vá wú yéle wɛ́i wú ngáá Ngala fɛ́li mbélaitii wú taí sí h̃u taá náá lolí ngáá Kɔ́l̃e í báha náá Ngalángi vóngaitii kpɛ́lɛɛ mbá tí Akáya lataí h̃u hááli hááli.

²Bɛlɛ́ a mu Kɛ́ɛ́ɣɛ Ngalá ɛ́ɣɛ Ndemɔí Jísu Kílisitii ti háá bɔwɔí ɛ́ɣɛ ti lííhei ti ɣɛ́ wú yɛ́.

³A mú sɛ́ɣɛɛ gulá Ngalá má lɛ́i í ngáá Ngalángi ɛ́ɣɛ Kɛɛɣɛí mu Lemɔ́i Jísu Kílisitii hááw̃a, lɛ́i í ngáá Kɛɛɣɛí áá nuu yááh̃u w̃ááw̃aanu hóu, ná vólu, í ngáá Ngalángi kpɔ́mbai kpɛ́lɛɛ áá gúla ngeyá.

⁴Aa ni liiyápɔpɔ ni háá bɔlundaí kpɛ́lɛɛ sú kɛinɔɔ́ ni hómbo ni sítii ndiiyápɔpɔ faa bɔ́lundaa híí fíli áá ɣɛ́ ti w̃a ngáá ndiiyapɔpɔ́ngi sí ní mááhɔlɔngɔ laá Ngalá ngeyá.

⁵Kɛ kíya nɔ́ɔ Kílisitii í maanɔw̃ɔ́ bíh̃i bih̃ingí yéɣeni níwaa ngéɣe, ngimɔ́ɔ́ nɔ́ɔ ngi lííyapɔpɔ ngwalaí áá fólo ni w̃a.

⁶Ná náa faa bɔ́lundaa w̃ááhɔlɔ aá lɔ na ngáá wú lííyapɔpɔ taa ngumaawó wú hááw̃a. Aáva ná naá ndiiyapɔpɔ́ mááhɔlɔ aá lɔ́ ngáá wú lííyapɔpɔ. Ná aa bɔ wú wá wú ndiibángi sí w̃ááhɔlɔ ná wáá maanɔw̃ɔ́i sí w̃ááhɔlɔ ní ngéɣengɔ.

⁷Aáva ni gitómai wú hááw̃a ɛi hiɣéma kúnafɔ bɔw̃álale, ní kɔ́lɔ ngáá maanɔw̃ɔ́i ní ngeɣéngɔ wúndai wúl̃a wáá ngeɣé wá bɛ́lɛ aáva ndiiyapɔpɔ́ngi náa maahɔ́lɔ, wá bɛ́lɛ wá lɔ́ɔ wúndai w̃aahɔ́lɔ.

⁸Mu mbála Yalá fɛ́li mbélai, naá lói wɔ́ɔ́ bááh̃aa ɣɛmá faa wɔ́lɔ kɔwɔ́ato faa bámai wa í láni ni w̃a Ésiya lataí ná h̃u. Faa bámai í láni ni w̃a suuwɔ́ɔ́lɔngɔ i ɣɛi lá ngwála ngáá naa í lói té ngáá ní gíkula ni lɛ́ɛ́h̃ui volú.

⁹I ɣɛi gíte ni gi má ngáá kɛ ni háá l̃aíngi i folóa ma. Kɛ́ sí i hiyaní kɛinɔɔ́ nálaa lókola bɔwɔ́ yákpa ma kɛ́ ní lokola Ngalá ma lɛ́i áá sáa yeláitii mbuyoɣé sái h̃u.

¹⁰I ni w̃ááhaalongɔ sái yáa í ɣɛ́ngɔ náa ni bɛ́ɛ́ngɔ aáva aa tɔɔ vá mɔ́ɔ ni w̃ááhaaloma. Ni langɔ́ɔ́ lé lá Ngalá tɔɔ́ ndi ngu ma ngáá ni w̃ááhaalondai.

¹¹Wáá bɔ́ ni wa ngáá ná wááyaa Ngala fɛ́li ni haáw̃a. Ná ná áá ɣɛ́, nuu bíh̃iw̃aa taá sɛ́ɣɛɛ gula Ngalá ma kíya í nɛ́ɛ́ma yénga ni w̃a ngáá wú hɛ́li ngoí nátii kpɛ́lɛɛ í ngápotenga ni haáw̃a.

¹²Sí naa maayónga tevé aá wáá ngáá ni gi má ɣɛ́ngɔ lé kpál̃au ngáá ni lúva veléi i ɣɛ́i vaní ngeleí sí wúú hááw̃a ɛ́ɣɛ wá bútei wú hááw̃a. Ní ndɛɛh̃ú w̃aaw̃úỹangɔ ɛ́ɣɛ tɔɔỹáá gele h̃uuhíyanga kɛ kíya Ngalá ndóngɔ ní kɛ. Naa ná ɣɛ́ni nuu búsa géle ɣele maa véle w̃a kɛ́ Ngalángi háá bɔwɔí w̃áá véle w̃a.

¹³Nɛí ŋáni fíli pɔ́nɛ wú yéle ngáá sí wɔ́i hómbo wɔ́ɔ́ kalá kɛlaa wɔ́ɔ́ ngátɔ mba. Aá lɔ kí ma wá lɔɔ vá kpɛ́lɛɛ ngátɔma mba kpál̃au,

¹⁴kíya bɛ́lɛ ta lɔ nɔ́ɔ waa ngatɔ́ mba sí h̃úi. Ná náa wáá kpɛ́lɛɛ ngátɔ mba kpál̃au, wáá ni w̃ááyonga tevé kɛ kíya nɔ́ɔ náa wú w̃ááyonga tevé folói ná w̃a mu Lemɔ́i Jísu áá vá vaamá ma.

¹⁵Ngí ɣɛ́ngɔ laí ngáá sí kpɛ́lɛɛ, faalɔ, ngí kpatɛní hése gi má ngáá ngí wú héi heí kɛinɔɔ́ wú kulasuunúma félengɔ w̃ááhɔlɔ.

¹⁶Ngí kpatɛní gi má ngáá ngí wú héi heí ndííw̃ai Mɛsedóniya lataí h̃u ɛ́ɣɛ múl̃ɔ ngángaimaw̃ai kɛinɔɔ́ ngí kpɔmba w̃ááhɔlɔ wú yáá ní híyangi hááw̃a ngáá lí Judíya lataí h̃u.

¹⁷Aá lɔ́ wú gí ma ngáa ngáá ɣɛ́i kɔ́lɔ sí ngí ɣɛ́i suubátɛni gi má téɣele? Ɔɔ ngáá ní háá h̃uubatɛngítii mbo gi má kɛ kíya nɔ́ɔ ngáá ɣɛ́ nɔ́ɔ béɣei ngáá ngí lúw̃a fáá w̃a ngaa ngáá ɣɛ́ loí ngí léle mba?

¹⁸Ná nɔ́ɔ kái Ngalá ngɛ́i láa wóó w̃áálovi toví, ngimɔ́ɔ́ nɔ́ɔ nɛí laa wóó w̃áálovi toví,

¹⁹sífaa Ngalángi H̃íỹɛndou Loí Jísu Kílisitii lɛ́i Sáilɔ ɛ́ɣɛ Tímoti kpahangɔ́ náa mbá ní kééla woó vánda lengɔ́ wú w̃á kɔwɔ́ato mba, ngi hái lɔ kɔ́wɔ yílaa ngá. Jísu Kílisitii lɔ́ í ngáá Ngalángi gúúlongi hítɛngɔi nga,

²⁰sífaa laa lɔ́ Ngalángi gúúlongi kpɛ́lɛɛ í hítɛngɔ ngá laa maa véle w̃a. Ná lɔ́ í kɛ́a faa fíli a maá lúw̃a ma ngáá í ɣɛ́ maa ndé Kílisitii laahéingi h̃u ngáá Ngalá ngí tɛ mááhɔlɔ su.

²¹Ngalá kpútei lɔ áá kɛ ngáá háwu a maa wúyeni maa báha su kpáŋ Kílisitii wa. Laáva laá gítei lɔ í mu ɣɛ́a ngáá ngi lókolo mba yélaa,

²²ɛ́ɣɛ i lokovo ndónga mu w̃a ngáá kɛ muỹá lɔ ngáá ngi vóngaa. Ngalá tɔ í kɛ́a ngáá háwu ngi H̃ɛ́ɛ́ma Ỹínangi í mu volu ngakɛ́ fááw̃a ngáá kuulóngitii mbóngɔ ngáá mu ye tiyá lɔ́ɔ vá hítɛma nga.

²³Ngalá tɔ ngáá maa hééle ngáa ngáá váángɔ Kɔ́l̃e taa h̃u bɔw̃álale, ngáá ɣɛ loí ngɔ́ɔ́ wú lííỹaani.

²⁴Naa loí nɔ́ɔ kpa wú w̃a ngáá kule ngáá sí kule í wú w̃á wú la la. Kɛ́ laá ɣéle, niỹá lɔɔ yénge a maa wúyeni ngáá kɛinɔɔ́ wú ɣɛ́ kooh̃unɛɛ h̃u, sífaa wú h̃úubangɔɔ lé náa sí h̃u wú lángɔ la.