Read Bandi KƆ́L̃E GƆ́LƆI HELE KÉLEI 10 Bible Online

KƆ́L̃E GƆ́LƆI HELE KÉLEI 10 - Bandi bible

KƆ́L̃E GƆ́LƆI HELE KÉLEI 10

¹Nyɛ́i ngí ngáá Pɔ́ɔ, nyá lɔ́ wú w̃áánɛɛnɛ gíte ngáá wumaá nyɛ́i nungái taá ndé ngáá ná ngáá ɣɛ́ wú lóów̃a ngáá wú nganjéi, kɛ́ ná ngɛ́i ɣɛ́ wú lóów̃a, ngáá faa hóu kpáŋ. Nyá lɔ́ɔ wú w̃áánɛɛnɛ Kílisitii w̃áá véle w̃a lɛ́i ngandɛ́ingɔ kɛngɔ́ lúúỹaa.

²Faalɔ, wú velé háále kái waa kpánda nga ngáá ngɔ́ɔ́ faa hóu kpáŋ wú yáá ná ngáá ɣɛ́ vaáni wú yéle, sífaa ná ngáá vá, ngáá faa hóu kpáŋ sítii ngeyá taá nde ngáá niỹá lɔ́ɔ lúva kíya nɔ́ɔ ngeleí sí wuu yélai tuva veléi ɣɛ́ kíli í na.

³Tɔɔỹaá lé! Niỹá lɔ sítii ndiiwáá ti ngáá ngeleí sí wu yélai kái kái, kɛ́ ná vá ngáá kulaí yɛ́ɛ ngáá kɛ niỹá lɔɔ faa w̃ááɣawo kíya taá kɛ.

⁴Maa hái gúlangɔɔ lé ngáá ni gɔ́ɔ́ wɔ́ nyaakaítii náá lápi la ti ɣɛ kíli aa ngáá ngeleí sí wu gɔ́ɔ́ wɔ́ nyáákaitii, kɛ́ tiyá lɔ́ ngáá Ngalángi yákpa kɔ́ɔ wɔ́ nyáákani naa nga ngénge ni faa ỹɔ́u yákpa ngwala walaítii suuỹááni la. Naá ndɛ́ɛ lááhasaitii kpɛ́lɛɛ súúỹaani la.

⁵Ná vólu, naá núu fíli ngánjei la áá yóóɣe í ló ngáá ndiiwɔɔlɔ́ tɔɔỹaá gééla woí láá wú kɔwɔ́ato Ngalá mba. Ná vólu, naá kɛ ngáá háwu nungáitii tíwaa gísiya kíya Kílisitii áá ɣɛ́ loí taayaa gisíya.

⁶Faalɔ, ná nɔ́ɔ léi wáá ngákɛ ngáá kɛ wú gólongɔ ni yɛ, ni w̃ááhei wongɔ́ɔ́ lé faa bánda fááw̃a nuu fíli má áá kólo lála gúla ngáá ni ye.

⁷Wáá wɔ́lɛ faítii mba ngáá kɔma véle. Ná wɔ́lii nuu fíli ndangɔ́ áá ɣɛ́ la ngáá kɛ laá lɔ Kílisitii hááw̃a, maa w̃ɔ́i í ɣɛ́ nɔ́ɔ kɔ́lɔ ngáá kíya nɔ́ɔ í Kílisitii hááw̃a ngimɔ́ɔ́ nɔ́ɔ jɔ́ ni Kílisitii hááw̃a.

⁸Ndemɔí Jísu i ngakpá féa ngéya wú w̃ááh̃u. Maa yákpangi aa ná ngáá ngí wú ɣɛ́ kíli ỹaaní la kɛ́ ngí wú ɣɛ́ kíli batɛ́ lá. Aáva kíya bɛ́lɛ ngí maayónga tévenga ngwála ná fíli sú ngɛ́i wúfe.

⁹Ngáá loí maa hái ɔ́ɔ́ gúla ngáá kɛ ndóngɔɔ lé ngí ndúwa vú wú h̃u ngáá ní gɔ́lɔitii ngáá pɔ́nɛ wú yéle,

¹⁰sífaa, tɛingaa nuu tá áá nde, i ɣɛ ta, “Pɔ́ɔ gɔ́lɔ vɔnɛngɔ́itii ndáá wóó wuu ỹííngɔɔ lé ɛ́ɣɛ suu haítii ngakpángɔ múl̃ɔ. Kɛ́ ná laá bútei áá ɣɛ́ mu loow̃á ngi háá ɛi nuu líígula nuu wá, ndaa wói ɣéle tɔ ɛi nuu w̃áá w̃ɔ́.”

¹¹Faalɔ, nuu láálii nátii tí ngátɔ mba ngáá sí náa pɔ́nɛ kɔlɔ w̃a ná nɛí ɣɛ́ na laá lɔ nɔ́ɔ naá kɛ ná naa ɣɛ́ wú lóów̃a.

¹²Aa ɣéle nɛí hómbo p̃ɛ́ɛ́ nɔɔ́ bɔ́wɔ h̃uw̃á sítii ma taá bɔ́wɔ háa yeɣé ngáá faa wála. Taá bɔ́wɔ h̃úw̃a ỹɔw̃ɔ́ ỹɔ́w̃ɔ w̃a ngáá tí ngákɛ ngáá kíya ngá ngí tí wa. Ná ná áá ɣɛ́, tiyá lɔ́ ngáá kutɔ́ mbélaa.

¹³Kɛ́ niỹá láa nɛí yónga téve sí hááw̃a kule áá ni w̃a nɔɔ́ yónga téve fááw̃a, kɛ́ ni yónga tevéndai aa gɛɛlɛ nɔ́ɔ ngengengí sí wa Ngalá ngí féngɔ ní yaá ngáá ní mbo. Ta vá mbáá ngáá ngengengí sí náá mbo wú lííwa.

¹⁴Wá vá tɔ kuuwuí sí h̃u Ngalá ngí féa ní yaá. Faalɔ, naá vílingɔ ni gúúwui vólu ná ní fólongɔ wú w̃a ngáá keela woó vándai kɔwɔ́ato Kílisitii wa.

¹⁵Faalɔ, nɛí yónga téve nungáá véka ti yénge mbongɔ́ hááw̃a kíya áá ɣɛ́ ngáá ni yénge mbongɔ́. Kɛ́ ní gitómai waa ngáá wú lá ngáá Kílisitii ngwala kɛinɔɔ́ ní ngénge kpíh̃iw̃aa wó wú lííwaa ni gúúwui h̃u Ngala ngí féngɔ ní yaá.

¹⁶Ná ná áá ɣɛ́, naá lí náa tatá vékaitii su naa volú véle, ní kééla woó vándai lé. Nɛí yónga téve ngenge fááw̃a mbongɔ́ áá ɣɛ́ náa la nuu véka yɛ ỹánda véka.

¹⁷Kɛ́ pɔ́nɛngɔɔ lé Ngalá Kɔ́lɔi h̃u ngáá sí, “Nuí fíli áá ɣɛ́ loí í yónga téve í yónga téve sí hááw̃a Ndemɔí Ngala ngí kɛ́a.”

¹⁸Nuí áá bɔ́wɔ háa lɛ́nga ná aa ngáá faa fíli, kɛ́ ná Ndemɔí Ngalá ngáá nuu lɛ́, ná lɔ́ í ngáá faa gíte.