Read Bandi KƆ́L̃E GƆ́LƆI HELE KÉLEI 11 Bible Online

KƆ́L̃E GƆ́LƆI HELE KÉLEI 11 - Bandi bible

KƆ́L̃E GƆ́LƆI HELE KÉLEI 11

¹Ngáá ɣɛ́ loí wú wolílo tamál̃a ngóó gúlo w̃a ngáá vá ndéma. Wú véle háále kái a ná ɣɛ́ mbɛ́!

²Nyáá ngáá wú w̃áálolo gúla kíya nɔ́ɔ Ngalá ngáá wú w̃áálolo gúla. Wú gúlangɔɔ lé ngáá kpelaniiná ɛ́i ɣɛ́ nɛ́nɛ siỹɛ fáá wɔlɔ́ aáva ngí kúúlo mbónga wú wála fááw̃a kɛmbɛhéi h̃u siỹɛ ngílaa ngéya, aáva maa h̃íỹɛngi sí vá taá ɣɛ́ ma Kílisitii.

³Kɛ́ nyá lɔ́ lúwa ngáá sí í ɣɛ́i ngáa Ádau ỹah̃a Íífi ɔ́ɔ́ ɣɛ́ ngáá wú ye. Ná wáá ngáá kíya kaalií í Ádau ỹah̃aí Íífi yakpólowani ngáá ndɛɛ géle ɣélengi ná í fáa ỹɔ́u ɣɛ́i, ngimɔ́ɔ́ nɔ́ɔ tɛ́ingaa h̃u tíwaa vá wú yákpolowama ngáá wɔ́i mɔ́ɔ́ bɔwɔ́ gúla fó fóndei kɛ́lɛma Kílisitii yɛ́.

⁴Nyáá ngáá sí lé sífaa wáá lokohéi nuu fíli mbú ngáá kooh̃unɛɛ áá vá í kééla woó le kɔwɔ́ato Jísu veka wa í síɣe Jísui sí wa ní kééla wóo léa kɔwɔ́ato mba, ɔɔ wú lókohei ỹína peka wu í síɣe Hɛ́ɛ́ma Ỹínangi wa, ɔɔ wú lókohei keela woó véka wu í síɣe sí wa ní ndéa wú w̃a.

⁵Aá lɔ kí ma ngáá kɛ nungái nátii wáá ti lolí ngáá Ngalángi gééla wala wala ngufema áá ti yɛ ɔ́ɔ́ lɔ́ve mbá.

⁶Tɔɔỹaá lé ngáá kálambongɔ láá lé yɛ́pɛ ma, kɛ́ kele ɣeléngi kɔwɔ́ato keela woó vándai léndai wa aa lɔ́ ngéya. Aáva ni sí yakɛ́a kpál̃au wú yáa pele kpɛ́lɛɛ sú.

⁷Ngáá wú gákala lángɔ ngáá ŋani fíli ná ngí ɣɛ́i ngáá Ngalángi gééla woo vandaí lé wú w̃á aáva ngí bɔ́wɔ wú nganjéini kɛinɔɔ́ wú wú nga ngí yóóɣe. Laá lɔ wú gí ma ngáá kɛ faa ỹɔ́u lɔ ngí kɛ́a?

⁸Ná h̃u ngí ɣɛ́i ngáá yénge wú lííwaa, ngí ɣɛ́i ngáá kpɔ́mba w̃ááhɔlɔ Ngala fɛ́li mbélaa vekaítii ngeyá. Aáva kulangɔ́ í ɣɛ́i lá ngáá kɛ kahá wúl̃a ngí ɣɛ́i ngáá kúla ngáá ti ye kɛinɔɔ́ ngí bɔ́ wú wa.

⁹Táingi ná h̃u ngí ɣɛ́i wú lóów̃a ngí ɣɛ́i beɣéi kpɔ́mba hááw̃a, kɛ́ nyáá vá ngáá kɛ́i ngáá wú wú mbaa gásɔ. Ngala fɛ́li mbélai sítii ti gúlai Mɛsedóniya lataí h̃u, tiyá lɔ́ tí kpɔ́mba héi mbɛ́ ngáá sí kpɛ́lɛɛ í ɣɛ́i ngáá kpéɣema wɔ́lingaitii. Ngáá kasɔ́ lái wú wú mba laáva kíya bɛ́lɛ suu í na ngɛ́i kɛ ngɔ́ɔ́ kasɔ́ la wú wú mba sí h̃úi ɔɔ kúnafɔ kpɔmba hááw̃a.

¹⁰Ná nɔ́ɔ fɔ́ Kílisitii lɔ́ɔ́ỹai lɔ́ sú, nuu fíli aa na Akáya lataí kpɛ́lɛɛ su áá hómbo í kpé yóngangi sí lévendai wa.

¹¹Taá ɣɛ́i ngáá loí ngáá wú ye ná lɔ́ í kɛ́a ngáá sí lé, bɔw̃álale Ngála kítei í kɔlɔ́ ngáá kɛ ndóngɔɔ lé ngáá wú ye.

¹²Sí ngí lóa kɛma nyáá ngáá ndi ngu ma ngáá kɛndáá, sífaa nungái sítii taá bɔ́wɔ gúla ngáá Ngala kééla tiyá lɔ́ɔ bɔ́wɔ lɛ́nga táá nde ngáá kɛ ti gúlangɔɔ lé ngáá ni ye. Kɛ́ ná ngáá sí ɣɛ, ná lɔ́ áá ngákɛ kpál̃au ngáá kɛ taá gulaí ngáá ni ye,

¹³sífaa siỹɛngáá laalií sítii taa ngáá Ngalángi géélaa, taá ndɛ́i gɔ́ɔ́la kɔwɔ́ato ngengengí wa táá mbo ɛ́ɣɛ taá bɔwɔ́ gúla ngáá Ngala kééla ɣɛ kíli Kílisitii hááw̃a.

¹⁴Laáva sí áa ngáá kindaa vilí fáa, sífaa, Setána ɣele tɔ aa bɔwɔ́ gúla ngáá maléka w̃aanɛ́ɛ́ngɔ ɣɛ kíli áá hólo.

¹⁵Faalɔ, aa ngáá kɔ́ɔ́la mba háá ná ngi yénge mbelái tiyá bɛ́lɛ taá yákpa ngáá ti bɔ́wɔ gula ngáá telembó ngénge mbélaa. Laáva ti yapúmai taá fáa báma w̃aahɔ́lɔ jɔ́ kíya kule í ma ti maahɔ́lɔ kɔwɔ́ato ti lúva velé ỹɔ́i wa.

¹⁶Nyá lɔ́ɔ nde mɔ́ɔ volú, ngáá nuu fíli álaa gisíya ngáá ngé ngáá kɛ támal̃angɔɔ lé. Kɛ́ ná wáá ná w̃aa gisíya wo ngáá ngé, kɛ a lokohéi hɔ́ɔ́ mbú ngáá tamál̃a mɔ́ɔ kɛinɔɔ́ ngí yónga téve kulo.

¹⁷Tɔɔỹaá le sí ngíwaa nde kíya suu í na aa ngáá sí Ndemɔí lóngɔ ngáá ngí nde. Yongangí sí lévendai h̃u nyáá ngáá yɛ́pɛ gíte kɛ kíya ngáá ɣɛ́ ngáá tamál̃a mɔ́ɔ ɣɛ́ kíli.

¹⁸Nuu bíh̃iw̃aa taá yónga téve ngeleí sí wu háitii su, faalɔ nyá bɛ́lɛ, bɛlɛ́ ngí ná tá ɣɛ́.

¹⁹Wú géle ɣelengɔɔ lé wa gíte, faalɔ, wáá lókohei tamál̃a mbélaitii mbu wú woliló ti w̃a.

²⁰Séimil̃a p̃ɛ́ɛ́, wáá lókohei nuu fíli mbú áá wú ɣɛ́ ngáá nduwɔ lopóa ɣɛ kíli, áá tókohiya ngu maah̃ú háá ɣɛ́ ngáá wú yé, í kɛ́ ngáá háwu wú víli faa h̃u ɔɔ í tɛ́ɣɛsu háá ɣɛ́ ngáá wú ye ɔɔ í wú yɛ́ɛ́li.

²¹Ngufé tɔ́ má ngáá ngí nde ngáá ngɛ́i béle hómbo ngɔ́ɔ́ ná ɣɛ́ ngáá wú ye. Kɛ́ ná nuu fíli áá ɣɛ́ í yónga téve faa tá hááw̃a, kɛ nyá bɛ́lɛ faa tá lɔ́ na ngáá maayónga tevé. Nyá lɔ́ɔ yɛ́pɛ náá ngáá tamál̃a péle.

²²Taá ɣɛ́ ta tiyá lɔ́ ngáá Híbulu yelaa, nyá bɛ́lɛ ngí ɣɛ́ ta nyá lɔ́ ngáá ta. Ti mɔ́ɔ́ ɣɛ́ ta tiyá lɔ́ ngáá Ísulɔ yelaa, nyá bɛ́lɛ ngí ɣɛ́ ta nyá lɔ́ ngáá ta ɛ́ɣɛ ti ɣɛ́ ta tiyá lɔ́ ngáá Lébilah̃au laala lengaa, nyá bɛ́lɛ nɔ́ɔ ngí ɣɛ́ ta nyá lɔ́ ngáá Lébilah̃au laala lou.

²³Taa ɣɛ́ ta tiyá lɔ́ ngáá Kílisitii yénge mbelaa, nyá bɛ́lɛ ngí ɣɛ́ ta nyá lɔ́ ngáá Kílisitii yénge mɔɔ vanda í lɔ́ve ti wa. Nyá lɔ́ yɛ́pɛ náa ngáá bólowa w̃ɔ́ɔ́ ɣɛ́ kíli. Ngí yéngenga ngwala í lɔ́ve ti wa, ti píli kpindi vɛlɛ́ wu ká ká í lɔ́ve ti wa, tí ndéve bih̃í bíh̃i mboá ngáá ngé, ná vólu, kuu bíh̃iw̃aa w̃ááh̃u ngí ɣɛ́i saa lowá la.

²⁴Naa héi h̃u i ɣɛa náá lɔɔ́lu Júsuai ti wútuwɔai táá faa bá nda má ngáá ndeve vuú sáángɔ maah̃úú táávungɔ wóndaa ngáá ngé táingi fíli má.

²⁵Naa héi h̃uu i ɣɛa náá sáwa Lóómingai ti wútuwɔaitii táá súúh̃andɛ ɛ́ɣɛ naa héi h̃u í ɣɛa yíla táa ɣɛ́ ti páá ngáá sɔ́ɔ́ndaa ngáá kɔtu. Naa héi h̃úú i ɣɛa sáwa kelé ngáá vú ngáá ngé ɛ́ɣɛ ngí fólo yílaa kɛ́nga taá kpíndi yílaa njɛ ya.

²⁶Ngí síya kpíh̃iw̃aa wónga aáva ngí faa bɔ́lunda w̃aahɔ́lɔnga njɛ ỹɔu ỹɔungaa ya, ɛ́ɣɛ ŋúỹa yélaa yaa ɛ́ɣɛ ní mbála Júsuaitii ngeya ɛ́ɣɛ sítii taa ngáá Júsua. Ngí fáá bɔlúndani maahɔ́lɔ taa walá wálaitii su ɛ́ɣɛ ngaalaítii su ɛ́ɣɛ yívoitii nga ɛ́ɣɛ sítii ngeyá tí kúlangɔ ngáá kɛ tiyá lɔ́ ngáá ní mbála Yála fɛ́li mbélaa.

²⁷Ngí yéngea ngwala ngi bɔ́lɔnga. Kuu bíh̃iw̃aa haaw̃a ngɛ́i belé lóko w̃ááhɔlɔ ngɔ́ɔ́ ỹíí, ndɔlɛ í sóu taa njɛ w̃ɔni, ngɛ́i belé mɛɛní bih̃íw̃aa w̃aahɔ́lɔ mɛ fááw̃a, ɛ́ɣɛ kɔɔlɛ́ áa sóu sífaa kula áá ɣɛ́i má ɛ́ɣɛ ndaaw̃aá áá ɣɛi mbɛ́.

²⁸I síɣe bɛ́lɛ faa vékaitii kpɛ́lɛɛ mbá, ndiihɛ́lɛngɔɔ lé ngáá Ngala fɛ́li mbélaitii kpɛ́lɛɛ, sí vá tɔ í ngáá kasɔ́ ngáá ngeɣé fólo fíli má.

²⁹Faalɔ, ná nuu tá áá yéi volú, nyá bɛ́lɛ nɔ́ njéingɔ áá ɣɛ lá vólu. Ná nuu tá áá víli faa ỹɔ́u h̃u aa kɛ ndíí í báálɛ.

³⁰Faalɔ, ná wɔ́lii áá ɣɛ́ ngáá kɛ ngáá yónga téve bɔ́wɔ hááw̃a, ngáá yónga téve fái sítii fááw̃a taá ngákɛ ngáá kɛ súu áá bái.

³¹Ngalá lɛ́i í ngáá Ngalángi ɛ́ɣɛ Kɛɛɣɛí mu Lemɔ́i Jísu hááw̃a, lɛ́i mɔ́ɔ́ ndaaw̃áá áá lɛ́ kúnafɔ fááw̃a, í kɔlɔ́ ngáá ngáá ndɛɛ wɔ́ɔ́la ma.

³²Ná h̃u ngí ɣɛ́ngɔ Damásikɔ taa h̃u, nuí sí í ɣɛ́i Masangí Alítɔ wú ngáá masa taí ná h̃u i nungáá loí taí w̃aa bákii la kɛinɔɔ́ ti sóu.

³³Kɛ́ ní mbála Yalá fɛ́li mbélaitii ti séini kambálingi h̃u, ti kúla kpakii ná búta mái wa í ɣɛ́i taa walaí sí w̃a ti njéi kpákii vólu véle, ngí véla ngeya.