Read Bandi KƆ́L̃E GƆ́LƆI HELE KÉLEI 12 Bible Online

KƆ́L̃E GƆ́LƆI HELE KÉLEI 12 - Bandi bible

KƆ́L̃E GƆ́LƆI HELE KÉLEI 12

¹Yonga tévendai sí ɛi faa vánda fíli kɛ́, kɛ́ nyá ngáá ndí ngú ma ngáá yonga tévendai. Kɛ kíya suú í na nyá ngáá yɛ́pɛ naa kɔwɔ́ato faítii mba Ndemɔí í kúlai ngááh̃u ɛ́ɣɛ sítii ngɔ́ɔ́ gélu ngí náá lɔ.

²Fowó púúngɔ maah̃úú nááningɔ gulangɔ́ w̃a náá su siỹɛ́ ngílaa[2] lɛ́i láá bɛ́lɛ í ngáá Kílisitii vólu w̃ɔ́i ta Ngalá ngí ngeɣeí í lɛ́ɛ́ lá ngelegóóh̃u hawa kélei[3] ŋál̃a. Kɛ́ ngáá kɔ́lɔ ná wɔ́lii áá ɣɛ́ lɛ́ɛ́ngɔ na ngáá h̃uuyáfuw̃angi w̃áá véle ɔɔ ngáá busaí. Ngalá ngílaa kpé tɔ́ í ná wɔ́lɔ.

³Nyá lɔ́ɔ mɔ́ɔ́ lɛ woo w̃a, ngí kɔ́lɔ nɔ́ɔ ngáá tí lɛ́ɛ́ngɔ ngáá siỹɛ́ngi ná ngelegóóh̃u. Laáva mɔ́ɔ ngáá kɔ́lɔ ná wɔ́lii áá ɣɛ́ lɛ́ɛ́ngɔ na ngáá h̃uuyáfuw̃angi w̃áa véle ɔɔ ngáá busaí, kɛ́ Ngalá ngílaa kpé tɔ́ í ná wɔ́lɔ. Naa vá tɔ́ í fáitii mɛ́nini na naa gúlangɔ láá lé nuu búsa yɛ́ ɔ́ɔ́ yɛ́pɛ kɔwɔ́ato ti wa kɛlaa kule ɔ́ɔ́ ɣɛ́ nuu búsa w̃a ɔ́ɔ́ ndé.

⁵Faalɔ ngáá yongá téve kɔwɔ́ato siỹɛ́ngi sí wa, kɛ́ ngɛ́i bɔwɔ w̃ááyonga tevé kɛ léi ngí yɛ́pɛ ní h̃úúba talaí wa Ngala fái h̃u.

⁶Ná wɔ́lii ngɔ́ɔ́ ɣɛ́ loí ngí yónga téve, ngɛ́i belé ɣɛ ngáá kutɔ mɔ́ɔ́, bɔw̃álale ngɔ́ɔ́ ɣɛ́ ngáá tɔɔỹái le. Kɛ́ ngáá loí ngɔ́ɔ́ yónga téve sífaa ngáá loí nuu fíli ɔ́ɔ́ gísiya ngáá ngé ngwala vaí ɔ́ɔ́ lɔ́ve kɛ́ kíli wa ɛ́ɣɛ sí wa ngáá ndé.

⁷Ngalá ngí kɛí ngáá háwu nduwu ya fuulɛ́ wála í ɣɛ́ ndúwu h̃ú kɛinɔɔ́ ngálaa bakí tówa ngáá suuwɔɔlɔ́ kindaa vilí fáá wala walaí sítii fááw̃a ngí súúlɔngɔ. Aáva nduwu ya fuulɛ́i sí va kulangɔ́ɔ́ lé ngáá Setána bɔílopo ndéve fááw̃a kɛinɔɔ́ súú ɔ́ɔ́ vá ɣɛ́ wɔ́ɔ́lɔ.

⁸Ngí Ndemɔí Jísu hɛ́lindaa ɣɛní sáwa faí sí h̃u ngáá í kúla ná h̃u.

⁹Kɛ́ i ngóó yápoteni, i ɣɛ ta, “Ní háá bɔwɔí gúla ɣɛngɔ́ɔ́ lé í hááw̃a, sífaa, ná í h̃úú yɔ́ njɔ́ngɔ áá ɣɛ́ lá naa h̃uu lɔ́ ní yákpangi ya ngáá yénge ngwala í h̃u.” Faalɔ, ngáá yónga téve njɔ njɔí hááw̃a ngí su kɛinɔɔ́ Kílisitii yákpangi í ɣɛ́ su.

¹⁰Faalɔ, ndíílɛingɔɔ lé ngáá njɔ́ njɔ́ngɔ ngíwaa ngɛɛlí mááhɔlɔ, ngí híya faa báma h̃u, ɛ́ɣɛ faa bɔlúndani su, ná vólu, tí faa báma la má Kílisitii hááw̃a, sífaa, ná njɔ́ njɔ́ngɔɔ áá ɣɛ́ la, kɛ súúbangɔɔ lé Kílisitii yákpangi h̃u.

¹¹Nyá ngáá lúva kɛ kíya tamál̃a mɔ́ɔ́, kɛ́ wá vá tɔ wú kɛ́a ngíwaa ná ɣɛ́ h̃íí, sífaa, wá lɔ kule í wú w̃a wú njɛ́pɛ vandá vú kɔwɔ́ato mbá. Kíya bɛ́lɛ ngáá ngáá ŋani fíli, kɛ́ nungái nátii wáá tí lolí ngáá Ngalángi gééla wala wala taá lɔ́vei mbá.

¹²Sífaa, faí sítii taá ngákɛ ngáá kɛ nyá lɔ́ ngáá Ngalangí gééla gite, ngí líílɔlɔngɔ ngá ngí tí ɣɛ́ wú yááh̃u w̃a ná wáá ngáá, kááma haa laali taalingáitii.

¹³Ngí wú kpɛ́lɛɛ suuhóuni kíya nɔ́ɔ ngí kɛ́ni ngáá Ngala fɛ́li mbélaa vekaítii, kɛ nɔ́ɔ wá ngáá ní hái ɣɛí ngáá wú wú mbáa gásɔ. Wú véle háále kái a súúhaalo náá hááw̃a.

¹⁴Kɛ kíya súú í na, séi gilí bátɛngɔ lé ní híyangi háwa kélei hááw̃a wú yéle wú héi heí fááw̃a. Aáva ngáá waa háá fíli kɛ́ma ngáá wú wú mbáa gásɔ sífaa, wá búte lɔ́ kpéɣengɔ ngáá wú yé kɛ́ ngáá béɣei wú yáá gápa faaw̃a. Aa pele w̃a ngáá ndoú lé mbélai ti waa háá ɔ́ɔ́ ɣɛ́ ndéngaitii mba, kɛ́ aa ɣéle, ndengáitii ti háa aa ɣɛ ti lé mbélaitii mba.

¹⁵Aa kóóh̃unɛɛ ngáá ngí sí kpɛ́lɛɛ mbála wú vólu véle h̃u ngu ngí nda mɛ́ɛ́ nyá gíte w̃a ngáá kɛinɔɔ́ ngí bɔ́ wú wa. Ná ngáá ló ngáá wú ye ngwala, wáá ló ngáá ngé kulo nɔ́ɔ?

¹⁶Wá búte wú súúwɔlɔ ngáá kɛ ngáá ɣɛ́ngɔ ngáá wú wú mbáa gásɔ. Kɛ́ wú lɛ́ingaa wáá ɣɛ́ ta, ngí wú yákpolowangɔ ngí ndɛɛ gɔ́ɔ́la wú yáá.

¹⁷Baa ngí wú yáá gúlangɔ siỹɛngái sítii ti tá fíli máá véle w̃á ngí ti lɔ́vengɔ wú yéle?

¹⁸Ngí Táitɔ w̃aanɛ́ɛ́nɛni ngáá í vá wú yéle aáva ngí a mu mbála Yalá fɛ́li mɔ́i ná vɛ́lɛi mba. Táitɔ i ŋani gúlai wú yáá? Náa láa ni lúva veléi ɣɛ kíli i yíla, ni híya veléi ɣɛ kíli í yíla.

¹⁹Wá lɔ́ɔ gísiya ngáá kɛ ni ɣɛ́ngɔ nɔ́ɔ́ fɔ́ naa bɔwɔ́ w̃áá haalé wú gákala? Mu mbála vandáitii, Ngalá tɔ́ɔ ni yasɔ́bɛ ngáá niỹá lɔ́ɔ tɔɔỹaá wói le kíya nɔ́ɔ Kílisitii lóngɔ ní ndé aáva sí kpɛ́lɛɛ náá kɛ aá lɔ na wu h̃úúba fááw̃a.

²⁰Maa gísiya lɔ́ má ngáá ná ngáá vá tɛingaa ngɛ́i wú w̃áále wɔ́ɔ́ ɣɛ́ kíya ndóngɔ wú ɣɛ́ na, aáva wɔ́i tɔ́ ngɔ́ɔ́ ɣɛ́ kíya wú lóngɔ ngí ɣɛ́ na. Nyá lɔɔ gisíya ngáá ná ngáá vá, ngáá kpɔɔlɔ́ w̃áále wú lííwaa ɛ́ɣɛ tolóma ɛ́ɣɛ ndiibandí ɛ́ɣɛ maalií ɛ́ɣɛ ngɛɛlí ɛ́ɣɛ njɛpɛ mba ɛ́ɣɛ ndiiwɔɔlɔ́ ɛ́ɣɛ ngoo ya fahá.

²¹Aáva nyá lɔ́ɔ gísiya ngáá ná ngáá vá Ngalá lɛ́i ngíwaa fɛ́li aa kɛ ngáá háwu ngí wúfe wú gákala. Nyá lɔ́ɔ gísiya ngáá maaw̃aanú áá ɣɛ má wú bíh̃iw̃aa hááw̃a wɛ́i wúwaa ndí ngu ma ngáá faa ỹɔ́itii kɛ́ndaa wú tɔ́kula héingɔ wɔ́lɔ aáva wáá nɛ́ɛ́ vólu yáfei maa háá ỹɔu ɣɛndái wa ná wáá ngáá, kɔlɔsiyángi ɛ́ɣɛ njeé sína w̃áá lúva wóndai ɛ́ɣɛ njɔlɔ haa ɣɛ́ndaitii.