Read Bandi KƆ́L̃E GƆ́LƆI HELE KÉLEI 13 Bible Online

KƆ́L̃E GƆ́LƆI HELE KÉLEI 13 - Bandi bible

KƆ́L̃E GƆ́LƆI HELE KÉLEI 13

¹Ní héi heingí háwa kélei lɔ́ ngáá sí ngáá vá mbóma ngáá wú ye. Nuu fíli pá áá faa vɛ́lɛ nuu wa, kɛ héélea tí ɣɛ mba féle ɔɔ sáwa kɛ kíya Ngalá Kɔ́lɔi í ndéngɔ ngáá kule í ma í ɣɛ́.

²Ngí wú lááhia náa kílii ná h̃u ngí ɣɛ́ngɔ wú lóów̃a ni héi heíngi héle kéle h̃u. Nyá lɔ́ɔ ɣɛ́ mɔ́ɔ́ ngí ndé wú w̃a ngáá kíya bɛ́lɛ ngáá wú lóów̃a kɛ́ ná ngáá vá, wɛ́i wú ɣɛ́ngɔ faa ỹɔ́i h̃u ɛ́ɣɛ mataitii ngáá sí h̃úi ngɛ́i mɔ́ɔ́ wú tá fíli mááhaalo, kɛ náá ngí maa háá ba nda wú w̃a.

³Nyá lɔɔ sí ɣɛ bɔw̃álale wú lóngɔ lé wú ɣɛ́ kɔ́lɔ ná wɔ́lii Kílisitii laa wóó lɔɔ ngáá nde. Kílisitii yɔ́ njɔ́ngɔ láá lé ná ááyaa faa ɣɛ́ kɔwɔ́ato wú háá ỹɔítii mba máá véle w̃a, kɛ́ áa ɣéle, aa ngi yákpangi yaah̃ú ɣɛ́ ngáá wú ye.

⁴Kíya bɛ́lɛ njɔ njɔngɔ́ í ɣɛ́i lá ná h̃ú tí kpakpáni kulɔ́sii w̃a í hááni ma, kɛ́ aa lɔ́ náa ndɛɛh̃ú h̃ú Ngalángi yákpangi w̃áá véle w̃á. Kíya Kílisitii yɔ́ njɔ́ngɔ í ɣɛ́i la ngimɔ́ɔ́ niỹá bɛ́lɛ ni yɔ́ njɔ́ngɔ kɔwɔ́ato kpahaí wa ní su mba, kɛ́ ná náa vá wú yéle, niỹá lɔ́ɔ vá baháma Kílisitii wá. Faalɔ, náa ɣɛ́ naá Ngalá ngí yákpangi yakɛ́ ni lɛ́ɛ́h̃ui h̃ú.

⁵A gísiya gíte ngáá bɔwɔ́ ngáá pangɔ́ wú tɔ́ ná wɔ́lii Jísu lángi áá ɣɛ́ wú h̃u. Wú ɣɛ́ kɔ́lɔ gíte ngáá Jísu Kílisitii háá lɔ wú líí h̃u. Ná wɔ́lii nga ngáá ɣɛ́ kpál̃au ngáá kɛ Jísu aa wú líi h̃u, kɛ wú bááh̃anga bɔ́wɔ wu.

⁶Aáva ndangɔ́ɔ́ lé lá ngáá waa lɔɔ vá ngátɔma mba ngáá kɛ naá baah̃ángɔ bɔ́wɔ wu ngáá Ngala kéélaa.

⁷Niỹá lɔ́ɔ Ngala fɛ́li ngáá wálaa faa fíli kɛ́ áá péle w̃a. Naá Ngala fɛ́lima h̃íí ngáá kɛinɔɔ́ nungáá ti tɔ́ ngáá kɛ naá baah̃ángɔ bɔ́wɔ wú, kɛ́ kɛinɔɔ́ wú sí ɣɛ í péle w̃a kíya bɛ́lɛ ni gúlangɔi ngáá kpaah̃á yélaa,

⁸sífaa nɛí faa fíli kɛ́ áá tɔɔỹái ya nyááni, kɛ́ aa ɣéle, naá sítii kɛ táá ndi ngu ma ngáá tɔɔỹái.

⁹Ní góóh̃unɛɛngɔ aa ɣɛ lá ná ni h̃úúbangɔ ɛ́i ɣɛ́ la kɛ́ wáá va wú h̃úúbangɔ, faalɔ, niỹá lɔ́ɔ Ngala fɛ́li kɛinɔɔ́ faa fíli álaa ɣɛ́ wú wa Ngala fɛ́lindai h̃u.

¹⁰Ná lɔ í kɛ́ngɔ ngáá faí sítii pɔ́nɛ wú yéle ná nɛ́nɛ ngáá wú lóów̃a, kɛinɔɔ́ ná ngáá ɣɛ́ vaí wú yéle, ngálaa ló wú h̃úúhouma ngáá kpáu kpáu. Ndemɔí Jísu i ngakpángi sí héngɔ ngéya ngáá ngí wú ɣɛ́ kíli batɛ́ lá, kɛ́ aa ngáá ngí wú ɣɛ́ kíli ỹaaní la.

¹¹Faalɔ, mu mbála Yalá fɛ́li mbélai, ní yákɛɛlɛ ngoí waa ngáá a maá lɔ́. A yakpá ngáá faa fíli álaa ɣɛ́ wú gɛ́ɛ́hɔngitii mba. A wolílo ní lááhi ngoítii ma, a ɣɛ́ ngoo yílaa su ɛ́ɣɛ wú ɣɛ́ ndiiheí h̃u. Ngalangí sí áá ndongíni ngaa ndiihéi he í ɣɛ wú lóów̃a.

¹²A há ỹɔw̃ɔ́ ỹɔ́w̃ɔ w̃a ngáá ndiiwolé.

¹³Ngalángi vóngaitii kpɛ́lɛɛ tí hááni wú w̃á.

¹⁴Bɛlɛ́ Ndemɔí Jísu Kílisitii háá bɔwɔí í ɣɛ́ wú yɛ́ ɛ́ɣɛ Ngalángi lóngi í ɣɛ́ wú yɛ́ ɛ́ɣɛ wú kpɛ́lɛɛ wú háá í ɣɛ́ su yíla wáá Hɛ́ɛ́ma Ỹínangi.