Read Bandi KƆ́L̃E GƆ́LƆI HELE KÉLEI 2 Bible Online

KƆ́L̃E GƆ́LƆI HELE KÉLEI 2 - Bandi bible

KƆ́L̃E GƆ́LƆI HELE KÉLEI 2

¹Faalɔ, ngí kpátɛa naá gi má ngáá ngɛ́i mɔ́ɔ́ va wú héi heima ngáá ngí wú lííỹaani.

²Ná wɔ́lii ngáá wú lííỹaani, kɛ ele lɔ náa hɔ́ɔ́ áá ndúwuh̃ulɛ ngáá ngé? Kɛ nɔ́ɔ léi wɛ́i nɔ́ɔ ngí wú lííỹaaningɔ.

³Ná lɔ́ í kɛ́ngɔ ngí kɔlɔí ná vɔ́nɛngɔ wú yéle. Ngáá loí ngɔ́ɔ́ vá wú yéle wɛ́i kule í wú w̃a wú kóóh̃unɛɛ, wɔ́ɔ́ liiỹááni. Laáva ndángɔɔ lé lá ngáá ná kóóh̃u áá nɛ́ɛ́ aa wú kpɛ́lɛɛ kóóh̃unɛɛ wá bɛ́lɛ nɔ́.

⁴Ná h̃ú ngí kɔlɔí vɔ́nɛni wú yéle, háwui ngí pɔ́nɛni ma wú yéle, maa hái í mááw̃aanuni í ndííỹaani ngwala, í kɛ ngí wɔ́lɔ ká ká. Ngáá ɣɛ́ngɔ loí wú líí ɔ́ɔ́ ỹááni, kɛ́ aá ɣéle, ngí ɣɛ́ngɔ nɔ́ɔ loí wú ɣɛ́ kɔ́lɔ ngáá ndóngɔɔ lé ngáá wú yé ngwala.

⁵Ná nuu fíli áá ɣɛ́ wú tá fíli ndiiỹááningɔ, aa kɛngɔ́ ngáá ngé. Ngáá loí ngɔ́ɔ́ maa hái laa víli, kɛ́ i kɛ́ngɔ ngáá wú kpɛ́lɛɛ.

⁶Faa bángi sí wú bíh̃iw̃aa wáá ɣɛ́ ndái maa w̃ɔ́i w̃a kulaɣɛngɔ́ áá ɣɛ́ lá faaw̃a.

⁷Kɛ́ ná fíli sú, a suuhaaló ɛ́ɣɛ wú ndiiyapɔ́pɔ kɛinɔɔ́ ndii ɔ́ɔ́ ỹááni ngwala í bɔwɔ́ gúla yaa fó fóndei.

⁸Faalɔ, nyá ngáá wú w̃áánɛɛnɛ ngáá wú ngákɛ lá múl̃ɔ í ɣɛ́ kɔ́lɔ ngáá kɛ wú lóngɔɔ lé la.

⁹Ngí kɔlɔí ná vɔ́nɛngɔ wú yéle sífaa ngí ɣɛ́ngɔ loí ngí nga kpɛ́ kpɛ́ ngí ɣɛ́ kɔ́lɔ ngáá kɛ kíya wú hómbongɔ wú lííbangɔ suugɔvɔ́ngi yáa, ná vólu, ná wɔ́lii wú w̃ááhei wóngɔ áá ɣɛ́ la hɔ́wɔ fíli ngáá wu híya ngáá sítii ngáá ndé wú w̃a.

¹⁰Ná wáá nuu fíli suuhaaló ngi háá ỹɔí hááw̃a í kɛ́a, nyá bɛ́lɛ ngáá suuhaaló. Laáva ná faa fíli áá ɣɛ́ na ngáá ngí suuhaaló ngí suuhaalónga wú hááw̃a aáva Kílisitii lɔ í ngáá maa heelé

¹¹kɛinɔɔ́ Setána álaa ɣɛ́ mu w̃áá velé la, sífaa a mú ngi háá h̃uubatɛngítii kɔlɔ́.

¹²Ná ngí fóloi Túlowa taa h̃u ngáá ngí Ngalángi gééla woo vandaí lé kɔwɔ́ato Kílisitii wa, ngí ngátɔni mba ngáá kɛ Ndemɔí Ngalá i pele laawónga ngi yéngengi hááw̃a na.

¹³Kɛ́ ndííhɛlɛngɔ í ɣɛi la ngwala bɔw̃álale ngáá ɣɛi ngáá mu mbála Yalá fɛ́li mɔ́i Táitɔ lɔ́. Ná hááw̃a, ngí hɛ́lini mu mbála Yalá fɛ́li mbélaitii ma tí Túlowa taa h̃u ngí vá Mɛsedóniya lataí h̃u.

¹⁴Kɛ́ sɛ́ɣɛɛ gulama í ɣɛ́ Ngalá mbɛ́ lɛ́i áá ni wúto í kɛ ngáá háwu ni ndái í ndó ma hɔ́wɔ fíli kɔwɔ́ato kpahaí wa ní su Kílisitii wa. Ngalá ngí naa gúlanga kɛ́lɛma ni yɛ ngáá ni Kílisitii w̃áá woo híya kíya nɔ́ɔ sɛ́ndi w̃aaku nɛ́ɛ́ nɛɛ ngáá híya ỹandá kpɛ́lɛɛ.

¹⁵Sífaa ni gúlangɔɔ lé ngáá ngɛ́i w̃ááku nɛɛ nɛɛngí sí taá tolí ngáá ísɛngi Kílisitii áá fé Ngalá mbɛ́, sí maakungí áá híya híya nungái sítii ndowah̃u táá ngumááwongi w̃aahɔ́lɔ ɛ́ɣɛ sítii ti wu ngáá ló su.

¹⁶Maakungí gúlangɔɔ lé ngáá sái ɣɛ́ kíli aáva aa va ngáá sái sítii faaw̃a ti wú ngáá ló su. Laáva múl̃ɔ, maakungí gúlangɔɔ lé ngáá ndɛɛh̃úi aáva aa va ngáá ndɛɛh̃ú sítii mbɛ táá ngumaawóngi w̃ááhɔlɔ. Faalɔ, ele gíte lɔ áá hómbo Ngala ngóó le ngéngengi sí la?

¹⁷Naá ngáá kɛ kíya nuu bíh̃iw̃aa vékani tí na taá Ngalángi gééla woí léndai yeɣé nɔ́ɔ ngáá yawo ɣɛndáa. Kɛ́ Ngala kítei í ni lɔ́vengɔ ná hááw̃a, aá lɔ́ɔ ni yasɔ́bɛ kíya níwaa ngi gééla woí lé ngáá tɔɔỹaá véle Kílisitii yákpangi w̃áá véle w̃a.