Read Bandi KƆ́L̃E GƆ́LƆI HELE KÉLEI 3 Bible Online

KƆ́L̃E GƆ́LƆI HELE KÉLEI 3 - Bandi bible

KƆ́L̃E GƆ́LƆI HELE KÉLEI 3

¹Aá lɔ wú gí ma ngáá niỹá lɔɔ tɔkúla héi múl̃ɔ ngáá bɔwɔ́ lɛ́ndaa? Taa ɣɛ́i kɛ naá kɔ́lɔ w̃ááhɔlɔ ni lówawo fááw̃a wú w̃a kɛlaa tɔɔ́ ɣɛ́ kɛ naá kɔ́lɔ w̃ááhɔlɔ wú yáa ni lówawo fááw̃a nungáá vékaa w̃a kíya nungáá vékaa taa kɔlɔ w̃ááhɔlɔ.

²Wá gíte lɔ wú gúlangɔi ngáá ni gɔ́lɔ vɔnɛngɔ́i ni líítii su, wáá kɛ nungáá táa ɣɛ́ faa wɔ́lɔ kɔwɔ́ato ni wa.

³Ngakɛngɔ́ɔ́ lé gíte kpál̃au ngáá kɛ Kílisitii gíte lɔ í maa gɔlɔí ná vɔ́nɛngɔ í tɔ́ve ngáá ni ye. Pɔnɛngɔ́ láá lé ngáá kɔlɔ vɔ́nɛ kpáku kɛlaa pɔnɛngɔ́ ɔ́ɔ́ ɣɛ́ la kɔtu w̃a, kɛ́ Ngala lɛ́i í ndɛ́ɛ́h̃u h̃u kúnafɔ ngi Ỹínangi lɔ́ í pɔ́nɛngɔ nuu búsa líitii su.

⁴Niỹá lɔɔ sí le bɔw̃álale ni langɔ́ɔ́ lé ngáá Ngalá Kílisitii w̃áá véle w̃a.

⁵Ní kɔ́lɔ ngáá kɛ ngakpa fíli áá ni yaá ngáá wumaa ngáá naa hómbo ní ngéngengi sí wo la. Ngakpángi sí í ní yaá, i gulangɔ́ Ngalá ngeyá.

⁶Ngalá tɔ í ngákpa fénga ni yaá ní ɣɛ́ ngáá ngenge mbélaa kɛ́lɛ niinaí háá h̃u. Kɛ́lɛ niinaí sí aa ngáá sava vɔ́nɛngɔ ngáá mɔɔ gólo mbú múl̃ɔ, kɛ́ aá lɔ́ ngáá sí Hɛ́ɛ́ma Ỹínangi áá mú wúto la. Ngala sáva vɔnɛngɔ́i va áá kɛ ngáá háwu nuu í sáá gítei w̃ááhɔlɔ kɛ́ Hɛ́ɛ́ma Ỹínangi aa ndɛɛh̃úu gítei he nuu yáa.

⁷Savaí sí í vááni ngáá saí pɔ́nɛngɔ i ɣɛ́i lá kɔlɔ wóitii su kɔtu hɛvɛ́itii ma. Ngalángi múw̃a muw̃angí i ɣɛi áá hólo ngwala mbéinda savaí í héni na Muusé yaá. Ná i kɛ́ni Ísulɔ yeláitii tɛ́i belé hómbo tɔɔ wɔ́lɛ Muusé yaah̃ú bɔw̃álale ngaah̃úi i ɣɛi áá hólo ngwala kɛ kíya bɛ́lɛ maa hólongi í ɣɛ́i áá ỹɛ́ɛ́nɛ nyɛɛnɛ́ ngaah̃ú. Ná ɣéle sávai ná í vááni ngáá saí Ngalángi yákpa maanɛ́ɛ́nɛngɔi i ɣɛ́i femái

⁸kɛlaa maa Hɛ́ɛ́ma Ỹínangi ndá yénge tokóitii, laá ɣéle p̃ɛ́ɛ́ suulɔ́vengɔ aa ɣɛ láa.

⁹Ná wɔ́lii savaí sí í vááni ngáá saá nuu búsa w̃á femái í ɣɛ́i ngáá ngakpa fáa w̃áánɛɛnɛ ngwala, ná ná áá ɣɛ́, kɛlaa maa Hɛ́ɛ́ma Ỹínangi yénge tokoítii lɛ́i áá kɛ ngáá háwu nuu áá ngumaawóngi w̃ááhɔlɔ.

¹⁰Faalɔ, sí wɔ́lɔ hése í ɣɛ́ngɔ áá hólo ngwala aa mɔɔ holóma bɔw̃álale ŋani tá lɔ́ ná náa áá hólo ngwala í lɔ́ve mba.

¹¹Ná wɔ́lii sí ɛ́i ló na kúnafɔ ngi hái í ɣɛ́i ngáá ngakpa fáá w̃áánɛɛnɛɛ ngwala, kɛlaa maa sí áá ɣɛ́ na kúnafɔ, laá ɣéle p̃ɛ́ɛ́, ngi ndái h̃uu áá ɣɛ́ wɔɔlɔ ngwala.

¹²Faalɔ, kitomái sí í ní yɛ aá lɔ́ í kɛ́a ndúwa fíli áá ní h̃u.

¹³Naá ngáá kíya Muusé ɣɛ kíli í ɣɛ́i na ná í kúlai vɛ́lɛi yaah̃ú kɛinɔɔ́ Ísulɔ yeláitii tálaa maa hólongi ná lɔ í ɣɛ́i áá ỹɛ́ɛ́nɛ nyɛɛnɛ ngááh̃u.

¹⁴Kɛ́ tí gi máitii ngásaangɔɔ lé kɛ kíya bɛ́lɛ suu í na. Ti gi máitii kúlangɔɔ lé ngáá kíya nɔ́ɔ ŋani w̃áá vɛ́lɛngɔɔ áá ɣɛ́ la ngáá kulaí ná Muusé ɔ́ɔ́ pɛlɛ́ yááh̃u. Ná hááw̃a, tɛ́i kɛ́lɛ pɔlɔí yátɔ mba ná taa kála. Kulaí sí aa hiɣé nɔ́ɔ léi nuu gí mai la ná nuu báhangɔ áá ɣɛ́ la Kílisitii wa.

¹⁵Kɛ kíya bɛ́lɛ sí h̃úi í na ná taá savaí sí galá Ngalá ngí féni Muusé yaá, maa hái gúlangɔɔ lé ngáá kulaí ná vɛ́lɛngɔɔ lé nɛ́nɛ ti gi máitii nda.

¹⁶Kɛ́ nuí fíli áá vóte Ndemɔí wa, kɛ kulangɔ́ɔ́ lé ngáá kulaí ná í híɣenga gí mái la.

¹⁷Aáva lɛ́i máá tolí mbéinda ngáá Ndemɔí aá wáá ngáá Hɛ́ɛ́ma Ỹínangi aáva mbéi Hɛ́ɛ́ma Ỹínangi áá ɣɛ́ na, ngumaawó tɔ́ na.

¹⁸A muỹɛ́i maa hái gúlangɔ ngáá kulaí ná í híɣenga mu gi maitii nda, nungáitii taá Ndemɔí Ngalá ngí háá w̃áánɛɛnɛngi tá lɔ mu h̃u aáva maá ɣɛ nɔ́ɔ maa ɣɛ́ ngáá kɛ kíli kélei kélei. Ndemɔí Ngalá lɛ́i í ngáá Hɛ́ɛ́ma Ỹínangi aá lɔ áá sí ɣɛ.