Read Bandi KƆ́L̃E GƆ́LƆI HELE KÉLEI 4 Bible Online

KƆ́L̃E GƆ́LƆI HELE KÉLEI 4 - Bandi bible

KƆ́L̃E GƆ́LƆI HELE KÉLEI 4

¹Ngalángi yááh̃u w̃aaw̃aanuí w̃áá véle w̃á ni haáw̃a, i ngengengí sí hénga ní yaá, ná hááw̃a, nɛ́i yɔ́ njɔ.

²Ní lókogulanga ndɔɔwu h̃ú háitii kpɛ́lɛɛ sú taá ngufe tála háitii. Nɛí núu yákpolowa kɛlaa maa nɔ́ɔ Ngalángi gééla woí w̃áálovi. Ngalá tɔ ngáá maa heelé ngáá niỹá lɔ́ɔ ngi gééla woí le kpál̃au sí í ngáá tɔɔỹaá. Naa sí ɣɛ́ sífaa, niỹá lɔ́ɔ yákpa ngáá nungáá kpɛ́lɛɛ ti gi má í ɣɛ́ kpál̃au kɔwɔ́ato ni wa.

³Ngalángi gééla woí náá nde, ná nga ngɛ́i ɣɛ́ kpál̃au nungáá yaa, kɛ sítii ti wú ngáá ló su tiyá lɔ́ nga ngáá kpál̃au tí yaá.

⁴Taá laí ngáá Ngala kééla woí sífaa, Setána lɛ́i í ngáá ngalángi ngeleí sí wu, i ti gi máitii ndaavɛ́lɛnga. I kɛ́a ngáá háwu keela woó vándai lɛ́i kulangɔ́ ngáá lámbo kɛ kíli áá hólo ti w̃a, taá tɔmá. Keela wói sí lɔ na kɔwɔ́ato Kílisitii yákpa maanɛɛnɛɛ ngwalaí wa lɛ́i í ngáá kíya nɔ́ɔ jɔ́ Ngalá ngí na.

⁵Keela woí náá nde, naá ndéma kɔwɔ́ato bɔwɔ́ wa. Kɛ́ niỹá lɔ nde kɔwɔ́ato Jísu Kílisitii wa í ngáá a mu Lemɔ́i. Sí náá nde kɔwɔ́ato bɔwɔ́ wa laá waa ngáá niỹá lɔ́ɔ ngáá wú yénge mbelaa Kílisitii hááw̃a.

⁶Ngalangí sí í ndéni ngáá bɛ́lɛ folo hólongi í hólo kpindíí h̃u, láa lɔ nɔ́ɔ múl̃ɔ áá ndé ngáá maa hólo folongí í hólo ni liítii su, í vá ngáá kele ɣelé ní yɛ kɔwɔ́ato Ngalángi yákpa maanɛ́ɛ́nɛɛngɔi wa nuu áá tɔ Kílisitii h̃u.

⁷Ná fíli sú, niỹɛ́i Hɛ́ɛ́ma Ỹínangi í kɛ́nga ngáá háwu ní fáa vánda wálai sí w̃ááhɔlɔ, ni ɣɛ ngɔ́ɔ́ lé bɛ́ɣɛ bɛɣɛ kíya nɔ́ɔ fɛɛtóa tí na. Ná lɔ́ áá ngákɛ ngáá kɛ Ngála ngílaa kpé tɔ́ nɔ́ɔ ngakpá súúlɔvengɔ wálai í ngéya kɛ́ aa ni yaa.

⁸Maanɔw̃ɔ́ bíh̃iw̃aa aa ni w̃áále, kɛ́ ná fíli sú, nɛí gúla yaá. Hɔ́wɔ ta, naa ɣɛ́ nɔ́ɔ́ tíɣilakpo kɛ́ nɛí lokogula sí h̃u í ngáá ni gitómai.

⁹Taá fáá bá ndá ni w̃a, kɛ́ ná fíli su, Ngalá ngɛ́i beelé ní wa. Taá ỹánda héi hɔ́wɔ ta ní wa ngwala kɛ́ nɛí ha.

¹⁰Hɔ́wɔ fíli niỹá lɔ saa lowá la kɛ kíya Jísu í ɣɛ́i na. Kɛ́ tɔɔỹái waa ngáá, kɛ kíya bɛ́lɛ nɛ́nɛ ni ndɛɛh̃ú h̃u, aá lɔɔ́ áá ngákɛ ngáá kɛ Jísu bɛ́lɛ nɔ́ aá lɔ ndɛɛh̃ú h̃u.

¹¹Ni lɛ́ɛ́h̃ui laa lówah̃u kínɛi, niỹá lɔ nɔ́ɔ saa lowá la Jísu haaw̃a kɛinɔɔ́ ndúwui sí áá há maa véle w̃a ti tɔ́ ngáá kɛ Jísu lɔ ndɛɛh̃u h̃u.

¹²Niỹá lɔ́ saa lowá la aáva ná vá tɔ í kɛ́nga ngáá háwu wú ɣɛ́ ndɛɛh̃u h̃u.

¹³Pɔnɛngɔ́ɔ́ lé Ngalá Kɔ́lɔi h̃u ngáá sí, “Ndángɔɔ lé ngáá Ngalangí gúúlongi. Faalɔ, ngí yɛ́pɛngɔ.” Aáva nda ngílaangi ná lɔ́ nɔ́ɔ ní su niỹá bɛ́lɛ, faalɔ, naá yɛ́pɛ.

¹⁴Ní kɔ́lɔ ngáá Ngalá ngí Ndemɔí Jísu wuyoɣéni sái h̃u. Ní kɔ́lɔ múl̃ɔ ngáá kɛ laá lɔ́ɔ vá niỹá bɛ́lɛ nɔ́ ni wúyoɣema saí h̃u kɛ kíya í Jísu wuyoɣéni sái h̃u. Ná vólu, aa va ngáá ni ye kpahangɔ́ wú wá Jísu gakála.

¹⁵Sí kpɛ́lɛɛ tɔ́ na wú gúlasuunuma haáw̃a kɛinɔɔ́ nuu bíh̃iw̃aa tí sɛ́ɣɛɛ gula Ngalá ma ná ngi háá bɔwɔ́itii taá fólo nuu bíh̃iw̃aa w̃a. Sí vá aa kɛ náa Ngalá ngí tɛ mááhɔlɔ su.

¹⁶Faalɔ, a mu líí ɛ́i ỹááni kɛ kíya bɛ́lɛ mu luwú w̃áá véle a muỹá lɔɔ ỹááni. Kɛ́ ná fíli su, mu h̃uuyáfuw̃angi w̃áá véle w̃a, muỹá lɔ́ɔ lóóla foló yíla ngíla fíli ma.

¹⁷Faa bɔ́lunda gúlo guloái sítii táa vá ma lɛ́mbi má múwaa w̃áánɔw̃ɔ ti wu taa kɛ ngáá háwu mú ŋáni ta w̃ááhɔlɔ mbɔɔlɔngɔ́ ngwala lɛ́i áá ló mu yaá kúnafɔ fááw̃a.

¹⁸Mu gísiyaitii taa sítii mba a maa ti lɔ sífaa tɛí lɛ́mbi, kɛ́ aá ɣéle, tiyá lɔ sí wa a mɔí tɔ sífaa ná lɔ áá ɣɛ́ na kúnafɔ.