Read Bandi KƆ́L̃E GƆ́LƆI HELE KÉLEI 5 Bible Online

KƆ́L̃E GƆ́LƆI HELE KÉLEI 5 - Bandi bible

KƆ́L̃E GƆ́LƆI HELE KÉLEI 5

¹Ná mú luwúi sí í mú w̃a ngeleí sí wú kulangɔi ngáá pɛlɛ́ áá ỹááni, mú kɔ́lɔ ngáá Ngalá ngí pɛlɛ́ lónga mu yɛ ngelegóóh̃u mbéi laá bútei í naa bátɛa laáva naa bátɛngɔ áa lo kúnafɔ fááw̃a.

²Ná nɛ́nɛ a mú nduwúi sí h̃u ngeleí sí wu, a muỹá lɔ maaw̃aanú h̃u taá kooh̃unɛɛ́ma lála bɔw̃álale, mu longɔ́ɔ́ lé ngáá nduwú véka sí áá gúla ngelegóóh̃u í ɣɛ́ mu w̃a.

³Mu longɔ́ɔ́ lé mu ɣɛ́ nduwú níína h̃u aáva ná ɣɛ́ngɔ, nduwú áá ɣɛ́ nɔ́ɔ fɔ́ mu w̃a.

⁴Ná nɛ́nɛ a mú ngeleí sí wúu lúwui sí h̃u, mu w̃ááw̃aanungɔɔ lé, faa áá bɔlú mu la. Laáva ná aa kulaí náa ngáá kɛ mu longɔ́ɔ́ lé mu gúla ngeleí sí lúwui h̃u, kɛ́ mu longɔ́ɔ́ lé ngáá ngelegóóh̃u lúwui í ɣɛ mu w̃a kɛinɔɔ́ nduwúi sí áá há maa í lóvi ngáá nduwúi sí ɛ́i há.

⁵Ngalá pá tɔ í mú ɣɛ kíli batɛa háwui sí hááw̃a laáva i Hɛ́ɛ́ma Ỹínangi héa mu yaá. Ná vá tɔ áá ngákɛ kpál̃au ngáá sítii í suubátɛngɔ mu haáw̃a tiyá lɔ́ɔ vá hítɛma nga.

⁶Náá hááw̃a, kitomáá lɔ́ mu wa hɔ́wɔ fíli. Mú kɔ́lɔ ngáá suu í bɔ́ɔ́ ɣɛ gooh̃á ká ká, ná nɔ́ɔ léi ngeleí sí wuu lúwui lɔ́ mu w̃a ndɛɛh̃úi sí h̃u a mu w̃áá gooh̃ángɔɔ lé Ndemɔí wa.

⁷Kɛ́ ná fíli su, a maá lɛ́ɛ́h̃ui h̃uuhíya ndangí w̃ááh̃u í mu h̃u. Kɛ́ a mu lókolangɔ láá lé sítii ma a maá tɔ ngáá yaah̃ú.

⁸Faalɔ, nyá lɔ́ɔ nde búte ngáá kitomáá lɔ mu yɛ hɔ́wɔ fíli. Maa ɔ́ɔ́ ɣɛ́ nɛ́ɛ́ni ná a mɔ́i belé mɔ́ɔ ɣɛ ngeleí sí wúu lúwui sí h̃u, kɛ́ áa ɣéle, a mɔ́ɔ́ ɣɛ́ Ndemɔí Jísu lóów̃a nduwúi ná h̃u áá vá púma mu w̃a.

⁹Sí ní gi ngí mba aá wáa ngáá ni sí ɣɛ́ áá Ndemɔí liilá. I ɣɛi ngáá ndɛɛh̃úi sí h̃u ɔ́ɔ́ ndɛɛh̃úi ná h̃u áá vá vaamá,

¹⁰sífaa, a mu kpɛ́lɛɛ kɛ mú ló Kílisitii gakála mu gɔsɔ́ fááw̃a. Nuu yíla ngílangi fíli sí áá ɣɛ́ kɛ́ni ngeleí wu i ɣɛi ngáá ngi vánda ɔɔ ngi ỹɔ́u, aa polú háá w̃aahɔ́lɔ.

¹¹Sífaa ní kɔ́lɔ ngáá Ndemɔí Jísu lɔɔ vá mu gɔsɔ́ma, ná lɔ́ i kɛ́a ngi lúwa mbaí í mu h̃u. Ná lɔ í kɛ́a náa nduwúh̃ulɛ ngáá nungáitii ngáá ti lá la. Ngalá ngí ni wɔlɔ́ kpál̃au aáva ndángɔ la wá bɛ́lɛ wú ní wɔlɔ́ kpál̃au.

¹²Wálaa ni báálɛ hóu ngáá kɛ niỹá lɔ́ɔ yákpa ngáá ní bɔ́wɔ háa lɛ́nga múl̃ɔ. Kɛ́ laá ɣéle, sí níwaa yákpa ngáá ní kɛ, aá wáá ngáá niỹá lɔ́ɔ kɛ ngáá háwu faa í ɣɛ́ na ngáá wáá lokola ma wú ní w̃ááyonga tevé. Laáva wáá ɣɛ́ náa kɔlɔ́ kɛ kíya wáá nungái sítii ngoo yápote tiyɛ́i ti yónga tevéndai í lííngɔ í to nuí bátɛ gilí wa kɛ́ ɛi ɣɛ ngáá tuva velé.

¹³Ná wɔ́lii ni bolówangɔ áá ɣɛ́ la, ni bolówangɔ áa ɣɛ lá Ngalá fááw̃a. Kɛ́ ná wɔ́lii ni gi máitii pɔɔnángɔ áá ɣɛ́ la, aá lɔ ngáá wú gúlasuunuma.

¹⁴Kílisitii longí lɔ áá mú wú tó sífaa ni langɔ́ɔ́ lé lá ngáá i haangɔ́ núi kpɛ́lɛɛ fááw̃a. Ná ná áá ɣɛ́, kɛ mu kpɛ́lɛɛ tɔ́ mu háángɔ.

¹⁵Aáva i haangɔ́ nuu kpɛ́lɛɛ fááw̃a ngáá sítii tí ndɛɛh̃ú h̃u tálaa ɣɛ́ múl̃ɔ ndɛɛh̃ú h̃u bɔwɔ́ hááw̃a kɛ́ laá faaw̃a lɛ́i í háángɔ tí haáw̃a laáva í wúyoɣei sái h̃u múl̃ɔ ti haáw̃a.

¹⁶Faalɔ, í síɣe sí h̃úi w̃a í lí ngáá naa wutúwɔ, nɛí mɔ́ɔ nuu yéɣe ngáá ngeleí sí wúu gísiya w̃aa véle w̃a. Kɛ kíya bɛ́lɛ ná lɔ wɔ́lɔ ní kɛ́ni ngáá Kílisitii, nɛí mɔ́ɔ gisíya la h̃íi ná kúnafɔ.

¹⁷Ná nuu fíli áá báha Kílisitii wá, kɛ maa w̃ɔ́i ná lɔ́ náá ngáá nuu níína aáva tuva velé vɔ́lɔi aa ɣɛ náa lɔvéni, ngi níínai lɔ náá áá ɣɛ́ su.

¹⁸Aáva Ngalá tɔ í fái sí kpɛ́lɛɛ kɛ́a lɛ́i í mú lówah̃u bátɛnga maa tiyéni Kílisitii w̃áá véle w̃a. Ngalá ngí ngenge fénga ni yaá ngáá ní mbo aáva máá yéngengi waa ngáá ní kééla woí lé nungáá vékaitii ma kɔwɔ́ato ndówah̃u batɛ́ngi wa í mbóngɔ.

¹⁹Ní gééla woí waa ngáá, Ngalá ngí ti lówah̃u bátɛngɔ taá núi kpɛ́lɛɛ Kílisitii w̃aa véle w̃a. Ngalá ngáá ti háá ỹɔítii séini gi má ɔ́ɔ́ pɛlɛ́ ti wa ngáá faá aáva i keela wói sí hénga ní yaá áá ngákɛ kíya í tí lówah̃u bátɛngɔ taá núi kpɛ́lɛɛ.

²⁰Ná hááw̃a, niỹá lɔ ni ngáá Jísu Kílisitii yaah̃úi. Maá hái gúlangɔɔ lé ngáá kíya nɔ́ɔ kpéi Ngalá ngáá ɣɛ́ ngáá wú w̃áanɛɛnɛ ni w̃áá véle w̃a. Ná ni ngáá Kílisitii yaah̃ú, niỹá lɔ wú w̃áánɛɛnɛ ngáá Ngala ngí wú lówah̃u bátɛ wáá tiyéni.

²¹Faa ỹɔ́u fíli aa ɣɛi Kílisitii h̃u, kɛ́ a mu haáw̃a, Ngalá ngí i mu háá ỹɔítii njení ma ngáá kɛinɔɔ́ kpahaí á mú su laá Jísu wa, ná í mú ɣɛ́ ngáá telembo mbélaa Ngalá ngááh̃u.