Read Bandi KƆ́L̃E GƆ́LƆI HELE KÉLEI 6 Bible Online

KƆ́L̃E GƆ́LƆI HELE KÉLEI 6 - Bandi bible

KƆ́L̃E GƆ́LƆI HELE KÉLEI 6

¹Ni yéngengi h̃u naá Ngalá, niỹá lɔ́ɔ, wú w̃áánɛɛnɛ hɔ́ɔ, ngáá Ngalángi háá bɔwɔí wú mááhɔlɔnga, wálaa kɛ ɔ́ɔ́ ɣɛ́ ngáá faa ỹááka

²sífaa, Ngalá ngí ndeá, i ɣɛ ta, “Ngí í wóó ỹɛ́nini ná táingi í fóloni ma ngáá ngí ni háá bɔwɔí yaah̃ú ɣɛ́ ngáá í ye. Ngí bɔí í wá ná fóloi í fóloni ma ngáá ngí í wúmaawo.” Faalɔ, a wolílo! Sífaa, Ngalá ngí háá bɔwɔí yááh̃u ɣɛ́ táingi i foloá ma! Folói lɔ ngáá sí í fólonga ma ngáá Ngalá ngáá ngumaawóngi wó!

³Nɛí faa fíli kɛ́ áá kɛ ngáá háwu faa aa víli nuu fíli kɔ́wɔ h̃ú Ngala fɛ́lindai h̃u kɛinɔɔ́ nuu fíli álaa tɔmbema w̃áá lɔ́ ni yéngengi wa.

⁴Kɛ́ laá ɣéle, pele kpɛ́lɛɛ sú, niỹá lɔ naa ngákɛ ngáá niỹá lɔ́ ngáá Ngalángi yénge mbelaa. Naá líílɔlɔ ná faa bɔ́lunda áá vá, faa bángi, ná vólu, ná fáitii kpangɔ́ áá ɣɛ́ la.

⁵Tí ndéveni mbóa ngáá ni ye, tí ni víli kpindi vɛlɛ́ wu, nuu bɔ́ ngí w̃ɛɛ́nga ni w̃a ndiibándi w̃ááh̃u táá faa bá ndá ni w̃a, ná vólu, ní w̃áálɔve maa w̃ɔ́nɛ wóa ɛ́ɣɛ kuu bíh̃iw̃aa laa lówah̃u nɛí belé lóko w̃ááhɔlɔ nɔɔ́ ỹíí kɛlaa nɔ́ɔ lááỹɛ.

⁶Ní ngákɛa ngáá niỹá lɔ ngáá Ngalángi yénge mbélaa kɔwɔ́ato ni ɣɛ kíli wa séngei faa ỹɔ́i yaá, ɛ́ɣɛ sí ní kɔ́lɔ kɔwɔ́ato Ngalángi lɔ́ɔ́ỹai wa ɛ́ɣɛ ndiilɔlɔ́i ní su ɛ́ɣɛ ni háá nɛɛ ɣɛndái. Ná vólu, Hɛ́ɛ́ma Ỹínangi í ni vólu ɛ́ɣɛ tɔɔỹaá lóngi ní su

⁷ɛ́ɣɛ tɔɔỹaá gééla woí náa nde ɛ́ɣɛ Ngalángi yákpangi h̃u í ní yaá. Ni lélembongi ní su, laá lɔ í ní yaá ngáá ni gɔ́ɔ́ wɔ nyáákai naa lápi la ni mɔ́ɔ w̃aaɣawó la.

⁸Naá ngúfema w̃ááhɔlɔ, ni mɔ́ɔ mbɛlɛ ỹaaní w̃ááhɔlɔ. Naá ngɛɛlí mááhɔlɔ, ni mɔ́ɔ tɛ mááhɔlɔ. Taá ndé ngáá kɛ niỹá lɔ́ ngáá ndɛɛ yélaa, kɛ́ niỹá vá naa tɔɔỹái le.

⁹Taá ní wɔlɔ́ ngáá nuu fíli, kɛ́ ná fíli su, nuu kpɛ́lɛɛ tí ni wɔlɔ́. Niỹá lɔ nɔ́ɔ ngáá nuu háángɔ ɣɛ kíli, kɛ́ ná fíli su, niỹá lɔ ndɛɛh̃ú h̃u. Taá faa bá ndá ni w̃a, kɛ́ naá nɛ́ɛ́ haaní.

¹⁰Kɛ kíya bɛ́lɛ kulangɔ́ ngáá ni w̃ááw̃aanungɔɔ lé, kɛ́ hɔ́wɔ fíli ni góóh̃unɛɛngɔɔ lé. Kulangɔ́ɔ́ lé ngáá niỹá lɔ ngáá nyaani yélaa kɛ́ niỹá lɔ kɛ ngáá háwu nuu bíh̃iw̃aa táá ɣɛ́ ngáá kpatɛ yélaa. Kulangɔ́ɔ́ lé ngáá ŋani fíli áá ni yaá kɛ́ ná fíli sú, ŋani kpɛ́lɛɛ tɔ́ ní yaá.

¹¹Mu mbála Yalá fɛ́li mbélai wɛ́i wú Kɔ́l̃e taí h̃u, ni ngákɛnga ngáá wú ye kíya ni longɔ́ ngáá wú ye ngwala.

¹²Nápa naá nɛ́ɛ́ baní gɔ́lɔ sú ni lóngi yákɛ fááw̃a ngáá wú ye, kɛ́ wá lɔ́ wáá bá gɔ́lɔ sú wú lóngi yákɛ fááw̃a ngáá ni ye.

¹³Nyá lɔɔ yɛ́pɛ náa wú yéle kɛ kíya nɔ́ɔ kpéi wáá ɣɛ́ ngáá ní léngaa. Ndongí sí ní su ngáá wú ye laa lɔ́ nɔ́ɔ jɔ́ kule ma wú mbó ngáá ni ye.

¹⁴Wú háá álaa ɣɛ́ su yílaa wáá sítii taá lái ngáá Jísu Kílisitii sífaa, ná ɛ́i holowo. Aá ɣelé kɛ náa sí áá pele w̃a taá sí í pele w̃a taá ɣɛ́ ngáá faa yílaa? Aá ɣelé kɛ náa sítii ti ngáá kalá kála ma háitii ɛ́ɣɛ sítii ti ngáá kpindí h̃u háitii tí ɣɛ́ ỹanda yílaa?

¹⁵Bɛɛ́ lɔ í ngáá ngoo yiláángi í Kílisitii lówah̃u taá Ngutuwɔ́ Ỹína Nyɔí lɛ́i taá tolí múl̃ɔ ngáá Béliyɔ[1]? Bɛɛ́ lɔ sítii ti langɔ́ ngáá Jísu Kílisitii taa sítii taá lái ngáá Jísu Kílisitii ti bɔngɔ́ ma?

¹⁶Aa ɣéle kɛ náa Ngalángi vɛ́lɛini ngaa kɔɔ kɔ́ɔ́ ŋániaitii taa ti yeɣé ngáá ngalángaa ti bɔ́ faaw̃á? A muỹá lɔ mu ngáá pɛlɛ́ Ngalá ngí sí hááw̃a í ndɛɛh̃úi h̃u kɛ kíya Ngalá ngí í ndéngɔ, í ɣɛ́i ta, “Nyá lɔɔ ɣɛ́ ti loow̃áá ɛ́ɣɛ ngí híya hiyá ti liiwáá, aáva ngáá ɣɛ́ ngáá ti Yálangi, tiyá va tí ɣɛ ngáá ní vóngaa.”

¹⁷Ndemɔí Ngála i ndengɔ́, i ɣɛ ta, “Hiɣe ti volú, yí bɔ́wɔ béteve ti wa. Yaá faa fíli kɛ́ sí kpálo áá ɣɛ́ mba, laáva ngáá lókohei náa í wu.

¹⁸Ngáá ɣɛ ngáá wú kɛ́ɛ́ɣɛ aáva wáá ɣɛ ngáá ní léngaa. Nyɛ́i ngí ngáá Ndemɔí Ngála Ngakpa Ngálangi nyá lɔ́ ngí sí léngɔ.”