Read Bandi KƆ́L̃E GƆ́LƆI HELE KÉLEI 7 Bible Online

KƆ́L̃E GƆ́LƆI HELE KÉLEI 7 - Bandi bible

KƆ́L̃E GƆ́LƆI HELE KÉLEI 7

¹Mu mbála vandáitii, kuulóngi sítii kpɛ́lɛɛ tiyá lɔ na a mu haáw̃a. Mú luwúini ngaa mu h̃úúyafuw̃angai ti w̃ááw̃uỹangɔ í ɣɛ́ la fó faa ỹɔ́i yaa. Aáva faa ỹɔ́u álaa ɣɛ́ a mu h̃u kpósouŋ ngáá mu lɛ́ɛ́h̃ui maá suuhíya Ngalángi lúwambai h̃u.

²A ni haí yeɣé ngáá hɛmbɛ́ fíli liítii su. Naá nɛ́ɛ faa fíli kɛ́i áá pele w̃a ngáá nuu. Naa nɛ́ɛ nuu fíli kɛ́ kíli ỹaanií kɛlaa nɔɔ́ nuu gáha ngáá fáa fíli.

³Ngáá sí lé ma ngáá ngí wú h̃úúh̃andɛ, kɛ́ kɛ kíya nɔ́ɔ ngí ndéi hése ngáá ni longɔ́ɔ́ lé ngáá wú ye ngwala ngáá i ɣɛi ngáá ndɛɛh̃ú ɔɔ saí ta fíli ɛi mu lówah̃u kɔ́lɛ.

⁴Ndángɔɔ lé ngwala ngáá wú ye, kí mái kpál̃au kɔwɔ́ato wú wa. Aáva ngáá wú w̃ááyonga tevé. Aáva ni haa bɔ́lundaitii kpɛ́lɛɛ su nduwú h̃u lɔ́ mbá nɛ́nɛ, kóóh̃unɛɛngɔ ngwala.

⁵Ná ni vááni Mɛsedóniya lataí h̃u, naá ndɛɛlɛmbó maahɔ́lɔni. Ní faa bɔ́lundaa bih̃íw̃aa w̃ááhɔlɔni hááli hááli. Ndaahasá bih̃íw̃aa i ni w̃ááleni aáva nduwái í ɣɛi ni h̃úúlaahengɔ.

⁶Kɛ́ Ngalá lɛ́i áá ndúwuh̃ulɛ ngáá sítii ti liiỹááningɔ áá ɣɛ́ lá, i kɛí ngáá háwu Táitɔ vaalái í ndúwuh̃ulɛ ngáá ni ye.

⁷Laáva aa ɣɛi nɔ́ɔ léi ngáá Táitɔ vaalái ɔ́ɔ́ ɣɛ́ ndúwuh̃ulɛni ngáá ni ye, kɛ́ ngi vólu haa léngi kɔwɔ́ato wú wa ngáá kíya wú ndúwuh̃ulɛni la. I ndengɔ́ ni w̃a kɛ kíya bútei wú lóngɔ wú tɔ, kɛ kíya gítei wú w̃ááw̃aanungɔ, ɛ́ɣɛ kɛ kíya wú w̃ááhei wóngɔ ngáá wú mááɣawo. Faalɔ, kóóh̃unɛɛngɔ wala le náa.

⁸Belé bɛ́lɛ pá ní gɔ́lɔ vɔnɛngɔ́i áá ɣɛ́ wú lííỹaaningɔ, i nɛɛngɔ́ mbɛ́ ngáá ngí pɔ́nɛngɔ. Hése ndííỹaaningɔ i ɣɛi lá bɔw̃álale, i wú lííỹaaningɔ. Kɛ́ i wú lííỹaaningɔ nɔ́ɔ táiŋ suulukpúngɔ hááw̃a.

⁹Kɛ́ kóóh̃unɛɛngɔɔ lé náa. Kɛ́ kóóh̃unɛɛngɔ laa le sífaa ngí kɛ́ngɔ ngáá háwu wú w̃ááw̃aanungɔ. Kɛ́ kóóh̃unɛɛngɔɔ lé sífaa wú w̃ááw̃aanui i kɛ́a wú lúva veléitii ti w̃áa í lóvi. Wú w̃ááw̃aanungɔ i ɣɛngɔ lá aáva ná vá tɔ Ngalá ndóngɔ la. Faalɔ, naá faa ỹɔ́u ɣɛ́ngɔ ngáá wú ye ngáá sí ní kɛngɔ́.

¹⁰Faalɔ, wú w̃aaw̃áánui sí Ngala ndongɔ́ lá, aa kɛ ngáá háwu nuu ɣɛ́ kíli w̃aa í lóvi, wú ngumaawóngi w̃ááhɔlɔ. Laáva nuu fíli ɛi ná yeɣé ngáá faa ỹɔ́u. Kɛ́ ngeleí sí wu w̃ááw̃aanui aa kɛ ngáá háwu wú sáá w̃ááhɔlɔ.

¹¹Kɛ́ tɔ lɛ́ɛ sí Ngala ngí kɛ́ngɔ ngáá wú w̃ááw̃aanui. Wú w̃ááw̃aanumai i kɛ́a ngáá háwu wú lɔ́wɔbaɣangɔ í ɣɛ́ la wúwaa yákpa ngáá wú ngákɛ ngáá wáá faa ỹɔ́u ɣɛ́ngɔ. Wú lííyaw̃al̃angɔ i ɣɛ́ngɔ la, wáá lúwa. I kɛ́a wú lóngɔ wú tɔ́ ngwala. Wú gúlangɔ kɛlɛma fó fóndei Ngála mbɛ́, wú w̃ááhei wongɔɔ ngwala ngáá núi í faa ỹɔ́i ɣɛngɔ́ wú faa bá nda ma. Faí sí kpɛ́lɛɛ i ngakɛ́a ngáá kɛ faa fíli aa wú wá fái sí h̃u.

¹²Faalɔ, ná ngí kɔlɔí ná vɔ́nɛni, ngáá ɣɛ́i pɔ́nɛi ngáá ngí fáa vɛ́lɛ nuí sí w̃a í fáa ỹɔ́i ɣɛngɔ́ kɛlaa maa ngɔ́ɔ́ ló nuí sí vólu í fái sí í ɣɛ́ngɔ la. Kɛ́ ngí pɔ́nɛngɔ kɛinɔɔ́ wá gítei wú ngátɔ kpál̃au kíya wú gúlangɔ kɛlɛma ni yɛ. Aáva Ngalá tɔ́ ngáá maaheelé.

¹³Aáva maa hái sí lɔ náa gíte í ndúwuh̃ulɛngɔ ngáá ni ye. Í síɣe bɛ́lɛ ná wa, ni liilángɔ gíte le ngáá ni Táitɔ lɔngɔ́ kóóh̃unɛɛngɔɔ, sífaa wú kɛ́ngɔ ngáá háwu ndiiyá ngí lá.

¹⁴Ngí wú w̃ááyonga tevéngɔ ma laáva wáá pɛ́lɛngɔ. Nápa naá nɛ́ɛ́ ndɛɛ gɔ́ɔ́lai wú yáá. Ngimɔ́ɔ́ yongangí ní tévengɔ Táitɔ gakála kɔwɔ́ato wú wá aa ngáá ndɛɛ́.

¹⁵Táitɔ gi ngí lóngɔ su kɛ kíya wú wú nganjéini mbɛ ɛ́ɣɛ wú ngúfema héni mbɛ ná vólu, mɔ́ɔ kɛ kíya wú kpɛ́lɛɛ wú ɣɛ́ kíli batɛngɔ́ í ɣɛ́i lá goló fááw̃a ngi gálambongaitii mbu. Faalɔ, ngi lóngi wú hááw̃a suu lɔ ɣɛ́ nɔ́ɔ́ wɔ́ɔ́lɔ kélei.

¹⁶Kóóh̃unɛɛngɔ wálaa le kɛ kíya suu í na ngáá ngáá lókola wú w̃a ngwála.