Read Bandi KƆ́L̃E GƆ́LƆI HELE KÉLEI 8 Bible Online

KƆ́L̃E GƆ́LƆI HELE KÉLEI 8 - Bandi bible

KƆ́L̃E GƆ́LƆI HELE KÉLEI 8

¹Mu mbála Yalá fɛ́li mbélai, ni longɔ́ɔ́ lé wú ɣɛ́ faa wɔ́lɔ Ngalángi haa bɔ́wɔi wá í kɛ́a Ngala fɛ́li mbélaitii ndiiwáá tí Mɛsedóniya lataí h̃u.

²Ti híyanga faa bɔ́lunda bákpani su, kɛ́ ná fíli sú, hɔ́wɔ fíli ti góóh̃unɛɛngɔ áá ɣɛ lá ngwala aáva, taá kɔ mbó ngáá ngambɔ́ɔ́lɔngɔ ndiiwolé w̃ááh̃u kíya bɛ́lɛ ti ỹááningɔ ngwala.

³Nyáá ngáá sí le wú w̃á bɔw̃álale taá tóko bɔ́mbai wó ngáá sí gɛ́ɣɛlai taa hómbo ma. Séimil̃a p̃ɛ́ɛ́, taá fe bih̃í í lɔ́ve sí wa ti yákpangi áá hómbo ma aáva taa ná kpɛ́lɛɛ kɛ́ ngáá wumaá.

⁴Tí ní w̃áánɛɛnɛi ngáá taalí fíli ngáá tiyá bɛ́lɛ ti ndá í ɣɛ́ kpɔ́mba héndai h̃u Ngala fɛ́li mbélai mba ti Judíya.

⁵Tí tóko bɔ́mbai héni ngáá ngambɔ́ɔ́lɔngɔ í lɔ́ve sí wa ni gi ngí ɣɛ́i mba. Hése tí bɔ́wɔ gúlai kɛ́lɛma Ndemɔí Jísu yɛ ɛ́ɣɛ mɔ́ɔ ti mɔ́ɔ́ bɔwɔ́ gúlai kɛ́lɛma ni yɛ Ngalángi lúw̃ama h̃u.

⁶Náá hááw̃a, ni Táitɔ w̃áánɛɛnɛni ngáá í ndi ngu ma ngáá ngengengí í tɔ́kula héinga wú lííwaa í ló su ngu ngí gúla, ná wáá ngáá, ndiiwolé lokó bɔmbaí wáá fe.

⁷Wú lóko h̃uulɔ́vengɔɔ lé faa kpɛ́lɛɛ su. Ná wáá ngáá, ndá ngi wú su ngáá Jísu Kílisitii ɛ́ɣɛ Ngalángi gééla woo lendái wú yɛ́ ɛ́ɣɛ kele ɣélengi wú kálangɔ ɛ́ɣɛ kíya kpɔmba wóndai í wú líí wa ngwala ɛ́ɣɛ ndóngi wú sú ngáá ni ye. Faalɔ, ndóngɔɔ lé wú lóko h̃uulɔ́vengɔɔ í ɣɛ́ la ndiiwolé lóko bɔmbaí háá h̃u.

⁸Nyáá ngáá yakpá gíte ngí nga kpɛ́ kpɛ́ ngí tɔ́ kíya wú lóngi í na ngáá suuw̃ándai sí wa nungáá vékaa tí kɛ́nga.

⁹Wú faa wɔ́lɔ kɔwɔ́ato mu Lemɔ́i Jísu Kílisitii háá bɔwɔí wa a mu yɛ. Ná wáá ngáá, kíya bɛ́lɛ kpatɛngɔ í ɣɛ́i la i bɔwɔ́ ɣɛ́i ngáá nyaani w̃ɔ́ɔ́ wú hááw̃a ngáá kɛinɔɔ́ wú bátɛ láa ngi ỹáánii w̃áá vélei w̃a.

¹⁰Faalɔ, ní ndá gí mái waa ngáá faí sí h̃u, ngáá wú sí wú kúla wú tɔkúla héini hówonɔ. Wá hése tɔ wú tɔkúla héini ngáá toko bɔ́mbai, ná vólu, i ɣɛi mɔ́ɔ́ gíte wú líi wa ngáá wú kɛ.

¹¹Faalɔ, a ndí ngú ma ngáá mbondáá kíya naa w̃ɔní í ɣɛ́ngɔ wú w̃a kɛ kíya wú suubátɛngɔ ngáá wú mbo wú ngúkula, aáva wú mbó ngáá sí í wú yáá.

¹²Ná wɔ́lii naa w̃ɔní áá ɣɛ́ wú w̃á ngwála ngáá wú tóko bɔ́mba wo, Ngalá ngáá lokohéi sí l̃ɔ́ingi wú áá ɣɛ́ wú yáá ngáá wú fé, sífaa, Ngalá ngɛ́i wú yáá béle ngáá sí ɛ́i ɣɛ́ wú yáá ngáá wú fe.

¹³Ngáá yakpá má ngáá ngí faa yéɣe ti lɛ́ingaa w̃áála ngáá ngí váá lá wú w̃a,

¹⁴kɛ́ aá ɣéle, ná táingi sí h̃u wú yáá láahengɔ maa áá ɣɛ́ nɛɛni wú bɔ́ sítii mba tí kpéɣe su náa. Ná ná áá ɣɛ́, ná wá bɛ́lɛ wáá ɣɛ́ kpéɣe su, tiyá vá ti yaá láahengɔ tiyá bɛ́lɛ taá bɔ́ náa wú wa. Ná vá kɛngɔ́, kɛ wú ỹɔw̃ɔ́ ỹɔ́w̃ɔ h̃úuhounga tɔ́iŋ.

¹⁵Kɛ kíya nɔ́ɔ pɔ́nɛngɔ Ngalá Kɔ́lɔi h̃u ngáá sí, “Nuí sí í mɛɛní bíh̃iw̃aa yatɛ́ni mba aa ɣɛi ngeyá bíh̃i ngwala. Nuí sí vá áá ngátɛni mba bih̃í aa ɣɛi ngeyá gúlo kw̃ɛ́ɛ́ ngwala.”

¹⁶Ngáá sɛ́ɣɛɛ gulá Ngalá ma lɛ́i í kɛ́ngɔ ngáá háwu naa w̃ɔní í Táitɔ w̃a ngwala ngáá í bɔ́ wú wa kɛ kíya nɔ́ɔ ní longɔ́ ní bɔ́ wú wa.

¹⁷Aa nɔ́ɔ ngáá tokohéi mbúi í mbói sí wu ní ndéi ma ngáá í kɛ, kɛ́ áa ɣéle, ndongɔ́ gíte lé ngwala ngáá í bɔ́ wú wa aáva i kpatɛngá gí ma laa gíte ngáá í vá wú yéle.

¹⁸Niyá lɔ́ɔ́ Ngala fɛ́li mɔ́ɔ yiláá pɛ́lɛ mba lɛ́i ngufema wála í mbɛ Ngala fɛ́li mbélaitii kpɛ́lɛɛ ndííwaa ngi yénge mbo kíli w̃a keela wóo vándai le fái h̃u.

¹⁹Aa nɔ́ɔ léi ngáá ná kɛ́ Ngalá fɛ́li mbélaitii tí lokolongɔ́ mba múl̃ɔ ngáá í ni laa ló ni híyangitii su. Aa bɔ́ ni wa í ndííwole lóko bɔmbaí sítii maah̃ú belé ni waá kula, sí áá vá ngáá ngufema Ndemɔí Jísu hááw̃a, ná vólu, sí áá ngákɛ ngáá kɛ mu hɛmbɛ́ héingɔɔ lé ngáá a mu kpɔ́mba hé mu mbála Yalá fɛ́li mbelái mba ti kpéɣe su.

²⁰Niỹá lɔɔ w̃aah̃ú béle kɛinɔɔ́ nuu fíli álaa wɔ́lɔ ngáá ni ye kɔwɔ́ato ndiiwolé lóko bɔmbaí sítii fáa h̃u.

²¹Ni lií h̃u hái waa ngáá ni sí ɣɛ́ áá ɣɛ́ pele w̃a Ndemɔí Ngála ngááh̃u ɛ́ɣɛ nuu búsaitii.

²²Faalɔ, niyá lɔ́ɔ mɔ́ɔ́ a mu mbála Yalá fɛ́li mɔ́ɔ́ veka lɔve taá tiyéni ní súúgɔvɔnga kuu bíh̃iw̃aa laa lówah̃u laáva ní tɔ́nga náa ngáá kɛ aá lɔ ndií h̃u ngwala hɔ́wɔ fíli ngáá í kpɔ́mba wo. Kɛ kíya suu í na, ndangɔ ngáá wú yé ngwala, laá lɔ ndií h̃u bútei ngáa í bɔ́ wú wa.

²³Táitɔ lɔ ngáá ní mbála naá laá náa yénge ngáá ni bɔ́ wú wá. Kɛ́ Ngala fɛ́li mbélaa veka félengɔitii taá tiyéni táá vá, nátii tɔ ngáá Ngalá fɛ́li mbélaitii ngááh̃u aáva ti yéngengi aa va ngáá ngufema Kílisitii yɛ.

²⁴Faalɔ, a wú lóngi yákɛ ngáá siỹɛngái sítii. Ná ɣɛ́ngɔ, Ngala fɛ́li mbélaitii kpɛ́lɛɛ taá lá náá ngáá yongangí ní tévengɔ kɔwɔ́ato wú wá ngáá kɛ tɔɔỹaá le.