Read Bandi KƆ́L̃E GƆ́LƆI HELE KÉLEI 9 Bible Online

KƆ́L̃E GƆ́LƆI HELE KÉLEI 9 - Bandi bible

KƆ́L̃E GƆ́LƆI HELE KÉLEI 9

¹Ngáá lói gíte ngɔ́ɔ́ kɔ́lɔ vɔ́nɛ wú yéle kɔwɔ́ato kpɔmbaí wa Ngala fɛ́li mbélaitii mbɛ tí Judíya lataí h̃u.

²Ngí kɔ́lɔ ngáá aá lɔ ngáá wú lúw̃ama h̃ú háa ngáá wú kpɔmba wó aáva ngí wú w̃ááyonga tevénga Ngala fɛ́li mbélaitii ma tí Mɛsedóniya lataí h̃u. Ngí ndéngɔ tí w̃a ngáá, tiyɛ́i ti ngáá mu mbála Yalá fɛ́li mbélaitii Akáya lataí h̃u, tí w̃ááhei wónga hówonɔ ngáá ti kpɔ́mba wó. Faalɔ, kíya naa w̃ɔní í wú w̃á ngwala ngáá wú kpɔ́mbai sí wó, i kɛ́a ngáá háwu ti bih̃íw̃aa nduwúh̃u í lɛngá ngáá ti ye ngáá tí tóko bɔ́mbai sí ta wo.

³Nyáá ngáá mu mbála Yalá fɛ́li mbélai sítii tɔve wú yéle kɛinɔɔ́ ní yónga tevengɔ́i kɔwɔ́ato wú wa faí sí h̃u álaa gɛ́ɛ́lɛ nɔ́ɔ njɛpɛ gbááma mbá. Kɛ́ áa ɣéle, kíya nɔ́ɔ ngáá nde, wú maa hái hítɛ nga wú w̃ááhei wongɔ í ɣɛ́ la wú lóko bɔmbaítii fé fááw̃a.

⁴Ná láá lé, ná náa ɣɛ́ vaaní naá Ngala fɛ́li mbélaa lɛingáá ti gúlangɔ Mɛsedóniya lataí h̃u, ngáá loí maa hái ɔ́ɔ́ gúla ngáá kɛ wú w̃ááhei wóngɔ láá lé wú lóko bɔmbaítii fe fááw̃a. Ná ná áá ɣɛ́, ngáá wúfe ngáá ndangí sí hááw̃a ngí mbóngɔ ngáá wú ye, kɛlaa p̃ɛ́ɛ́ wú ndá wúfengi suu áá ɣɛ́ wɔɔlɔ.

⁵Faalɔ, ngí gísiyangɔ lá ngáá kɛ maa áá ɣɛ́ nɛɛni ngáá ngí Ngála fɛ́li mbélai sítii tɔve wutúwɔ ti wú lóko bɔmbaítii kɛ kíli batɛ́ wú maa gúúlo mbongɔ́. Ná ɣɛ́ngɔ kɛ kíli batɛngɔ́ áá ɣɛ́ náa lá ná ngáá vá laáva aa ngakɛ́ náa ngáá wú féngɔ sífaa wú lóngɔɔ lé wú fe kɛ́ ɛi ɣɛ ngáá sífaa í ngáá wú w̃áágule ngáá wú fé.

⁶Faalɔ, sí lɔ ngí ma ngáá nuí áá kpáála guló la ɛi ŋani bíh̃iw̃aa w̃ááhɔlɔ su. Nuí va áá kpaala walá la aa ŋani bíh̃iw̃aa w̃ááhɔlɔ su.

⁷Nuí fíli í ngi ndá lóko bɔmbaí hé ngáá sí l̃ɔ́ingi áá ɣɛ́ kpatɛí gí ma ngáá í fé ngáá ndiiwolé, sífaa nuí áá fe ngáá ndiiwolé aá lɔ Ngalá ndongɔ́ lá.

⁸Aáva Ngalá ngáá nɛ́ɛ́ma yéi wú w̃a kɛinɔɔ́ hɔ́wɔ fíli sí kpɛ́lɛɛ wú béɣengɔ ma wú maahɔ́lɔ bih̃í bɔwɔ́ haaw̃a laáva aa ɣɛ fení ngáá wú ɣɛ́ wáá faa bɔ́wɔ hii fíli kɛ́ lá.

⁹Kɛ kíya nɔ́ɔ pɔnɛngɔ́ Ngalá Kɔ́lɔi h̃u ngáá sí, “I ngi háá bɔwɔí gúlanga kɛ́lɛma ngáá ngambɔ́ɔ́lɔngɔ nyaani yélaitii fááw̃a, ngi háá nɛí vá maa ɛ́i léve kúnafɔ fááw̃a.”

¹⁰Ngalá tɔ áá ŋani huwúi he sí mɔ́i yaá ɛ́ɣɛ mɛɛní mɛ fááw̃a. Faalɔ, Ngalá ngáá wú wɔ́ ngáá sí fíli wáá sí ngí húwui í kɛ ngáá háwu ti bátɛ tí wá ngwala kɛinɔɔ́ wú hómbo wú sítii kɔ ngwala taa ɣɛ́ kpéɣe su.

¹¹Ngalá ngáá kɛ wú bátɛ ngwala pele kpɛ́lɛɛ sú ngáá wú hómbo wááyaa faa vánda ɣɛ hɔ́wɔ fíli kɛinɔɔ́ nuu bíh̃iw̃aa tí sɛ́ɣɛɛ gula Ngalá ma wú lóko bɔmbaítii fááw̃a taá mááhɔlɔ ni yaá.

¹²Toko bɔ́mbai sí wú féngɔ, aa bɔngɔ́ nɔ́ɔ léi Ngala fɛ́li mbélaitii mba ngáá ɔ́ɔ́ ti gúla tí bɛ́ndɛma háitii su, kɛ́ í kɛngɔ́ ngáá háwu nuu bíh̃iw̃aa tí sɛ́ɣɛɛ gula Ngalá ma.

¹³Faalɔ, toko bɔ́mbai sí wú féa, aá lɔ́ áá ngákɛ ngáá kíya wú ɣɛ́ kíli í na, í kɛ́ nungáá tí Ngála tɛ́ kolóngi hááw̃a wú sú mbɛ áá gúla wú lé ngói h̃u ngáá wú lángɔɔ lé ngáá keela woó vándai kɔwɔ́ato Kílisitii wa, ɛ́ɣɛ wú háá bɔwɔ wala ɣɛndái Ngala fɛ́li mbélaitii mbɛ ɛ́ɣɛ nungáá vékaitii.

¹⁴Ná vólu, tiyá lɔ Ngala fɛ́li wú yɛ́ ngwala ndo su sífaa wú Ngalángi háá bɔwɔí w̃ááhɔlɔnga ngáá suulɔ́vengɔ.

¹⁵A mú sɛ́ɣɛɛ gula Ngalá ma ngi háá bɔwɔí hááw̃a ngáá nuu ɛ́i hómbo p̃ɛ́ɛ́ nuu ɔ́ɔ́ súúgula kíya ngangímba.