Read Bandi GALÉSIYA 1 Bible Online

GALÉSIYA 1 - Bandi bible

GALÉSIYA 1

¹Nyɛ́i ngí ngáá Pɔ́ɔ, nyá lɔ́ ngáá kɔlɔí sí vɔ́nɛ wú yéle wɛ́i wú ngáá Ngala fɛ́li mbélai wú Galésiya lataí h̃u. Nuu búsa láá le ɔ́ɔ́ kɛ́ ngáá Ngalángi gééla kɛlaa maa ɔ́ɔ́ gúla nuu búsa háwu h̃u. Kɛ́ Jísu Kílisitii ɛ́ɣɛ Kɛɛɣɛí Ngála, lɛ́i í Jísu wuyoɣéngɔ sái h̃u, tiyá lɔ tí lókolongɔ mbá ngáá Ngala kééla. Wɛ́i wú Galésiya lataí h̃u ngáá Ngala fɛ́li mbélaa, ni há wú w̃á naá mu mbála Yála fɛ́li mbélaitii kpɛ́lɛɛ ni mbéinda.

³Bɛlɛ́ mú Kɛ́ɛ́ɣɛ Ngála ɛ́ɣɛ mu Lemɔ́i Jísu Kílisitii ti háá bɔwɔí ɛ́ɣɛ ti lííhei tí ɣɛ́ wú yɛ́.

⁴Jísu Kílisitii i lɛɛh̃úi gúlangɔ kɛ́lɛma mu háá ỹɔítii fááw̃a kɛinɔɔ́ í mú gúla nyaama yéteyangi sí yákpangi wu. Laáva sí vá tɔ a mu Yálangi lɛ́i múl̃ɔ í ngáá mu Kɛ́ɛ́ɣɛ í ɣɛ́i loí Jísu í kɛ.

⁵Bɛlɛ́ Ngalá ndaaw̃áá í lɛ́ kúnafɔ taá ngí nda gúnafɔ! Amíína.

⁶Kɔ́ɔ́lamba h̃ú háa lɔ ngáá sí wáá kɛ! Suu áá nɛ́ɛ gooh̃á kpú wú wáa vólu yáfe náa Ngalá mbá lɛ́i í wú lólingɔ Kílisitii háá bɔwɔí w̃áá véle w̃a, wáá wolílo keela woó véka w̃a nungáá táa ɣɛ́ tá pangɔ́ɔ́ lé.

⁷Laáva tɔɔỹáa hááw̃a, keela woó vánda veka fíli áá na, kɛ́ nungáá lɛ́ingaa tiyá lɔɔ wú gí máitii ngasúpu faítii su ɛ́ɣɛ tiyá lɔ́ɔ yákpa ngáá ti Kílisitii gééla woo vandaí w̃aalóvi ngáá peka.

⁸Kɛ́ níỹa ɣéle tɔ bɛ́lɛ, ɔɔ ngelegóóh̃u w̃áleka ɣele tɔ bɛ́lɛ ná náa kééla woó véka le wú w̃á í síɣe sí wa ní ndénga wú w̃a, bɛlɛ́ í lí njahááma fɔ́!

⁹Ní ndénga wú w̃a hése, laáva nyáá ngáá ndé múl̃ɔ wú w̃a. Ná nuu fíli áá keela woó véka le wú w̃á í síɣe sí wa ní ndénga wú w̃a, bɛlɛ́ í lí njahááma fɔ́!

¹⁰Ngáá sí ɣɛ́ma nungáá lííla fááw̃a kulo bɛ́lɛ! Sí ndóngɔ la, aá wáá ngáá sí ngáá kɛ áá Ngála ndiilá. Ngáá sí ɣɛ́ma kúlo bɛ́lɛ ngáá kɛinɔɔ́ tɔ́wɔ ɔ́ɔ́ lɛ́ ɔɔ nungáá ti ló ngáá ngé. Kɛbei ná lɔ́ nɔ́ɔ ngí ɣɛ́i loí ngí kɛ, ngɛ́i béle ɣɛ ɣɛi ngáá Kílisitii yénge mɔɔ.

¹¹Mu mbála Yalá fɛ́li mbélai, ndóngɔɔ lé wú ɣɛ́ kɔ́lɔ ngáá kɛ Ngala kééla woo vándai sí ngáá nde, aa gulangɔ́ nuu búsa yáa.

¹²Ngáá maahɔ́lɔngɔ nuu búsa yaá kɛlaa maa nuu ɔ́ɔ́ ɣɛ́ kálambongɔ la. Kɛ́ Jísu Kílisitii laa gíte lɔ í ngákɛngɔ ngáá ngé kpál̃au.

¹³Wú faa ỹɛ́ninga kɔwɔ́ato ndɛ́ɛ́h̃ui h̃u híya kílii wa ná h̃ú ngí ɣɛ́i ngáá Ngalá fɛli kíya Júsuai taá Ngalá fɛ́li. Ngí ɣɛ́i ngáá faa báma wála la sítii ma ti langɔ́ ngáá Jísu Kílisitii, ná vólu, ngáá yakpá gíte ngwala ngáá ngí tí h̃úúvaha kɛinɔɔ́ maa hái yángi wálamba.

¹⁴Naa sítii kínɛi ní ɣɛ́i laakáinga ngí ɣɛ́i ti wutúwɔ Júsuai ti Yála fɛli kílii w̃áa véle w̃a. Ngí ɣɛ́i golóni ngwala ni káwalani ti gálambongitii mbu.

¹⁵Kɛ́ Ngalángi háa bɔwɔí w̃áá vele w̃á fááw̃a, i lokoloní mbá p̃ɛ́ɛ́ tɔɔ́ ɣɛ́a ndé, aáva i tólingɔ ngáá ngí yénge mbɛ. Laáva ná í kpátɛi gí ma

¹⁶ngáá í ngí H̃íỹɛndou Loí ɣɛ́ ngáá ngé kɛinɔɔ́ ngí keela woó vándai lé kɔwɔ́ato mba sítii ma taa ngáá Júsua. Aáva ngáá nuu fíli mɔ́ɔ́nini ndaahi fááw̃a,

¹⁷kɛlaa maa ngɔ́ɔ́ lí Jɛlúsɛl̃ɛ taa walái h̃u sítii ngelé ti ɣɛ́i ngáá Ngala kéélaitii p̃ɛ́ɛ́ ngɔ́ɔ́ ɣɛ́a ɣɛ ngáá Ngalángi gééla. Kɛ́ laá ɣéle, ngí líini ngáma Aléébiya lataí h̃u, ná vólu, ngí yangáima Damásikɔ taa h̃u.

¹⁸Ná náa fowó sáángɔ í ɣɛ́i gulaní su, ngí lííni náa Jɛlúsɛl̃ɛ Pítɛ hei heíma ngáá ní yɛ́pɛ naá láa. Aáva ngí lói ndoow̃á foló púúngɔ maah̃ú ndɔ́ɔ́lungɔ hááw̃a.

¹⁹Aáva í síɣe Pítɛ wa, ngáá Ngalángi gééla veka fíli tɔ́ni kɛ nɔ́ɔ léi Jimisí, Ndemɔí Jísu ndéɣei.

²⁰Sí ngíwaa ndé wú w̃á, aá lɔ ngáá tɔɔỹáa. Aáva Ngalá kíte í suuwɔlɔ́ ngáá ndɛɛ láá le ngɔ́ɔ́ ɣɛ́ ngáá kɔɔlá.

²¹Ná ná í gúlani suu, ngí lííni náa Síliya lataí h̃ú ɛ́ɣɛ Silísiya lataí h̃ú.

²²Aáva táingi ná h̃u, Ngala fɛ́li mbélaitii ti lángɔ ngáá Kílisitii ti ɣɛ́i Judíya lataí h̃u taá ɣɛ́i nɛ́nɛ tɔ́ni tɔɔ ɣɛ́ kɔ́lɔ.

²³Tɔ́ɔ́ mɛni nɔ́ɔ léi sí nungáá lɛ́ingaa tɔ́ɔ́ nde sí tɔ́ɔ ɣɛ ta, “Siỹɛ́ngi sí ɔ́ɔ́ faa bá ndá mu w̃a laá lɔ náa áá Ngala ngóó le nungáá w̃a kɔwɔ́ato Jísu wa aáva ná lɔ́ wɔ́lɔ í ɣɛ́i áá yákpa ngáá í maa hái yambálamba.”

²⁴Faalɔ, ti ɣɛ́i taá sɛ́ɣɛɛ gula Ngalá má kɔwɔ́ato mbá.