Read Bandi Ɛ́FƐSƆ 4 Bible Online

Ɛ́FƐSƆ 4 - Bandi bible

Ɛ́FƐSƆ 4

¹Náá hááw̃a, nyɛ́i ngí ngáá pelésina bɔw̃álale nyáá lɔ́ɔ yénge Ndemɔí Jísu yɛ, nyáá lɔ́ɔ wú w̃áánɛɛnɛ ngáá wú gɛ́ɛ́ háitii ɛ́ɣɛ wú híya veléitii tí ɣɛ́ ngáá kíya Ngalá ndongɔ́ ti ɣɛ́ na ná h̃u í wú lólini.

²Kúnafɔ wálaa ɣɛ́ ngáá suuwɔɔlɔ́ yélaa, kɛ́ wú ɣɛ́ lúúỹaa, wú líílɔlɔngɔ í ɣɛ́ la faa fíli su. Wú wú lóngi yákɛ ngáá ỹɔw̃ɔ́ ỹɔ́w̃ɔ ngáá wú bɔ́wɔ háitii wáá kúmbo h̃u.

³A kɛ ngáá hɛmbɛ́ kíya Hɛ́ɛ́ma Ỹínangi í kɛ́a ngáá háwu wú báhangɔ su i ndí ngu ma ngáá ndiihéi w̃aa véle w̃a.

⁴Mu kpɛ́lɛɛ muỹá lɔ ngáá nuu yílaa aáva Hɛ́ɛ́ma Ỹína ngílaa kpéngi lɔ í mu volú kíya nɔ́ɔ Ngalángi í mú kpɛ́lɛɛ tólingɔ mu gítomai í yíla.

⁵Ndemɔí í yíla kpé aáva mu kpɛ́lɛɛ mu langɔ́ɔ́ lé la ngáá pele yílaa kpé, a maá ngúyai wo háwu yiláá kpé fááw̃a.

⁶Ngalángi í yíla kpé aáva tɔ í ngáá Kɛɛɣɛí ɛ́ɣɛ Masa Ngwálai nuu kpɛ́lɛɛ fááw̃a. Aa kɛ ngáá háwu nungáá tí ngí yéngengi wo aáva aa ɣɛ nuu kpɛ́lɛɛ pólu.

⁷Mu yilá ngíla p̃ɛ́ɛ́ mú fembɛ wɔlíngaa w̃ááhɔlɔnga kíya Kílisitii í féngɔ mu yaá.

⁸Kíya nɔ́ɔ pɔnɛngɔ́ Ngala Kɔ́lɔi h̃u ngáá sí, “Ná í lɛ́i ỹandá yá kóóh̃ama wálai, í líí ngáá sítii bih̃íw̃aa í tí hóuni ngáá pelésina, í fémbɛ wɔ́lingaa he nungáitii ngeyá.”

⁹Sí ndengɔ́i ngáá i lɛ́i ỹánda ya kóóh̃amaa walaí, ná wuí wáá bɛɛ́? Mbuí wáá ngáá, p̃ɛ́ɛ́ ɔ́ɔ́ lɛ́, í hiɣengɔ́ ngelegóóh̃u í yéi mbéi ngeleí sí wu.

¹⁰Nuí sí vá i yéingɔ aá va tɔ nɔ́ɔ múl̃ɔ í lɛ́ɛ́ngɔ ngelegóóh̃u kɛinɔ́ɔ faa kpɛ́lɛɛ í ỹanda kpɛ́lɛɛ í ɣɛ́ kíya ndongɔ́ í ɣɛ.

¹¹Aá gítei vá tɔ́ nɔ́ɔ í fémbɛ wɔ́lingaitii fengɔ́ nungáitii ngeyá ná wáa ngáá, ngenge tókoitii. I ti lɛ́ingaa ɣɛ́ngɔ ngáá Ngalángi géélaitii, í tí lɛ́ingaa ɣɛ́ ngáá Ngalá ndaa háá lé mbélaitii, í tí lɛ́ingaa ɣɛ́ ngáá Ngala ngóó le mbélaitii, í tí lɛ́ingaa ɣɛ́ ngáá Ngala fɛ́li mbélaitii tí w̃ááh̃u béle mbélaa, í mɔ́ɔ tí lɛ́ingaa ɣɛ́ ngáá Ngala Kɔ́lɔ ɣɛ mbélaitii.

¹²I sí ɣɛ́ni kɛinɔɔ́ í sítii kɛ kíli batɛ́ tí ngáá Ngalángi vóngaitii ngi yéngengi hááw̃a ngáá Ngala fɛ́li mbélaitii tí h̃úú í bá Ngala fái h̃u,

¹³í ló su kpóloo, a mu kpɛ́lɛɛ mu lángi ɣɛ́ kíli í ɣɛ yíla Ngalángi H̃íỹɛndou Loí h̃u, aáva a mu ɣɛ́ kɔ́lɔ pele yílaa su ngáá ele gíte wáá ngáá laá. A mu h̃úú áá bá náá Ngala fái h̃u kíya Kílisitii í na.

¹⁴A mɔ́i mɔ́ɔ ɣɛ ngáá ndopóa sítii ngeyá taá núngaa yakpólowa ngáá ndɛɛ gálambo mbondáitii táa núngaa wúnga póte voté la.

¹⁵Kɛ́ laá ɣéle, a mu tɔɔỹaá wói lé ndo sú. Ná aa kɛ a mu h̃úú í ba mu báha Kílisitii wa kpáŋ kpáŋ, a mu ɣɛ ngáá kɛ kíli lɛ́i í ngáá ngutuwɔ́ɔ w̃ɔ́i.

¹⁶Jísu Kílisitii i nungáitii tongɔ́ mbéi maanɛ́ɛ́ngɔ tí ɣɛ́ na Ngala ngéngengi h̃u. Ti yilá ngíla p̃ɛ́ɛ́ taá ɣɛ́ taá ngengengítii mbo maanɛ́ɛ́ngɔ tí mbó kíya nɔ́ɔ nuu búsai i na sítii kínɛi ti nduwúi wa ti yéngemaitii ti léélaa léélaa. Ná ná vá ngáá ɣɛ́, ti kpɛ́lɛɛ taa ló ngáá ỹɔw̃ɔ́ ỹɔ́w̃ɔ ti h̃úú í bá.

¹⁷Ndemɔí yákpangi h̃u, nyáá ngáá ndaahi kpá kpángi sí wó ngáá wú ye. Wú híya gílii ɛ́ɣɛ wú gɛ́ɛ́ haítii tálaa mɔ́ɔ ɣɛ ngáá kíya sítii taá Ngalá kɔ́lɔ ti gɛ́ɛ́ haítii tí na, tiyɛ́i pele áá tí gísiyaitii su

¹⁸ɛ́ɣɛ tɛ́i faa yátɔ mba. Tí ndá aa ndɛɛh̃u níínai sí wá Ngalá ngáá fe bɔw̃álale tí wolí h̃u bɔ́lɔngɔɔ lé, taá faá fíli kɔ́lɔ aáva taá lói tɔɔ́ ɣɛ́ faa wɔ́lɔ.

¹⁹Faa fíli ɛi mɔɔ ti wúfe, tɛ́i hómbo tɔɔ́ bɔwɔ́ h̃uuhóu w̃a faa ỹɔ́u gɛ́vɛlɛ kɛvɛlɛ kɛndáitii su.

²⁰Sí tí wú gálangɔ lá kɔwɔ́ato Kílisitii wa, aa ɣɛi h̃íí na.

²¹Ngí kɔ́lɔ ngáá wú faá ỹɛ́ninga kɔwɔ́ato Jísu wa wɛ́i wú ngáá polú yélaitii. Ti wú gálangɔ ngáá tɔɔỹaá gééla woo vandaí kɔwɔ́ato mba.

²²A bé wú gɛ́ɛ́ háá vɔ́lɔaitii mba sí í ɣɛ́ngɔ wú h̃u ngáá faa ỹɔ́itii hése ngáá sí í ɣɛ́ngɔ wú lói kaka péle w̃a, áá wú ɣɛ́ kíli ỹaaní, wáá tɔ ngáá ndiivo kɛɛ́ le.

²³A kɛ ngáá háwu wú líí h̃u ɛ́ɣɛ wú gí maa háitii ti ɣɛ́ ngáá niina.

²⁴Wú ɣɛ́ ngáá nuu níína ɣɛ́ kíli kíya Ngala ngí ná. Wú gɛ́ɛ́ háitii taa wú híya veléitii tí kɛ́ nuu kpɛ́lɛɛ tí ɣɛ́ kɔ́lɔ ngáá kɛ wá lɔ́ɔ híya ngáá Ngala pélei. Ná wáá ngáá, wú híya veléitii taa wú gɛ́ɛ́ háitii ti ɣɛ́ ngáá telembo péle ti Ngalá ndíílɛi.

²⁵Náá hááw̃a, ndɛɛ gɔ́ɔ́landaa aa mɔɔ su. A mu yilá ngíla p̃ɛ́ɛ́ a mu ɣɛ́ ngáá tɔɔỹaá wóó le mbélaa ỹɔw̃ɔ́ ỹɔ́w̃ɔ w̃a bɔw̃álale a mu kpɛ́lɛɛ mu báhangɔɔ lé su Jísu Kílisitii wa.

²⁶Ná wáá lúu, waa kɛ wú líí ỹɔi ɔ́ɔ́ kɛ wɔ́ɔ́ faa ỹɔ́u ɣɛ. Wálaa lúva túi ná h̃u.

²⁷Wálaa naa gúla kɛlɛ́ma Ngutuwɔ́ Ỹína Nyɔí yɛ́ ngáá ɔ́ɔ́ kɛ ngáá háwu wɔ́ɔ́ faa ỹɔ́u ɣɛ́.

²⁸Nuí fíli áá ɣɛ ngáá ŋuỹá w̃ɔ́ɔ́ í bé ŋuỹá wóndai wa. Aá ɣéle, í yénge kɛinɔɔ́ áá ɣɛ́a ŋani hɔ́lɔ sú áá ɣɛ́a bɔ́ la bɔwɔ́ wa ɛ́ɣɛ nyaani yélaitii mba.

²⁹Ngoo ỹɔ́u ỹɔ́u álaa ɣɛ́ áá gúla wú la. Wú láá wóitii ti ɣɛ́ ngáá ngoo vánda vándaa táingi fíli ma ngáá sítii taá mɛ́ni, í tí gúla faa h̃u.

³⁰Wálaa Ngalángi Hɛ́ɛ́ma Ỹínangi w̃ááw̃aanu ngáá ngoo ỹɔ́u ỹɔ́u ndendáá. H̃ɛ́ɛ́ma Ỹínangi lɔ áá ngakɛ́ ngáá kɛ wá lɔ ngáá Ngalángi vóngaa, í mɔ́ɔ ngakɛ́ ngáá kɛ táingi lɔ́ɔ fólo ma Ngalá ngí wú wúmaawo.

³¹Sí kpɛ́lɛɛ í wú h̃ú ngáá faa báálɛitii wú bé ti wa, wálaa ɣɛ́ wáá lúú múl̃ɔ kɛlaa maa wɔ́ɔ́ faa báálɛ héi gi má. Kpandɛ bandɛ́ mbóndaa ɛ́ɣɛ ngɛɛli pílindaa wú bé ti wa. Wálaa híli ngáá nuu fíli múl̃ɔ.

³²Kɛ́ laa ɣéle, a bɔ́ ỹɔw̃ɔ́ ỹɔ́w̃ɔ wá, wááyaa ỹɔw̃ɔ́ ỹɔ́w̃ɔ yaah̃ú w̃ááw̃aanu hóu wú wú háá ỹɔítii suuhaaló ỹɔw̃ɔ́ ỹɔ́w̃ɔ yɛ kíya nɔ́ɔ Ngalángi í mu háá ỹɔítii suuhaalóngɔ Kílisitii w̃áá véle w̃a.