Read Bandi Ɛ́FƐSƆ 5 Bible Online

Ɛ́FƐSƆ 5 - Bandi bible

Ɛ́FƐSƆ 5

¹Ná wú ngáá Ngalá ndiivo ndéngaa, kule lɔ wú w̃á wú lúva veléitii ti ɣɛ́ ngáá Ngalángi ndá lúva veléi ɣɛ́ kíli.

²Wú gɛ́ɛ́ háitii taa wú híya veléitii ndo ngí ɣɛ́ ti h̃u kíya nɔ́ɔ Kílisitii í lóngɔ ngáá mu ye, í lɛɛh̃úi gúlangɔ kɛ́lɛma mu haáw̃a ngáá saáɣa vanda Ngalángi ndaahóungɔ.

³Ná wú ngáá Ngalángi vóngaitii náa, wú lúva veléi í kɛ ngáá nuu fíli ɛi gisíya ngáá kɛ wú tá fíli wáá kɔlɔsiyá mbó kɛlaa njeé sína w̃áá luvá, kɛlaa wɔ́ɔ́ ɣɛ́ ngáá mɔní mɔ́ni mbélaa.

⁴Aa pele w̃a ngáá ngufe tála woo ɔɔ tamál̃a ngóó ɔ́ɔ́ ɣɛ́ áá gúla wú lá kɛlaa seemɔɔ woo kɔwɔ́ato nyah̃áa taa siỹɛ fáa wa, kɛ́ laá ɣele, a waayaa sɛ́ɣɛɛ gula Ngalá má.

⁵Wú ɣɛ́ kɔ́lɔ ngáá kúnafɔ nuu fíli ɛi ɣɛ́ Kílisitii taa Ngalángi w̃ásandai wu ná áá kɔlɔsiyá mbó, ɔɔ í njeé sína w̃áá luvá wó, ɔɔ i ngáá mɔní mɔ́ni mɔ́ɔ́. Kɛ ngimɔ́ɔ́ nɔ́ɔ nuí fíli áá nungáá yáa wɔ́li kɛ ngáá liivó ngwála kɛ náá w̃ɔ́i ndá yála mil̃á.

⁶Wálaa kɛ nuu ɔ́ɔ́ wú yákpolowa ngáá ndɛɛ gɔ́ɔ́landaa wú yáá bɔw̃álale sítii kínɛi ngí yɛ́pɛa kɔwɔ́ato tí wá, tí hááw̃a lɔ áá kɛ Ngalá ngáá liiỹɔ́u sítii ma tɛi gólo mbɛ.

⁷Náá hááw̃a, wálaa bɔ́ faa fíli má wáá ná w̃áa yélaa laaláitii.

⁸Wú ɣɛ́ngɔ hése wɔ́lɔ kpíndi h̃ú, kɛ́ wú báhangɔɔ lé náa Ndemɔí Jísu wa. Wáá mɔ́ɔ kpindi h̃ú. Wá lɔ náa kala kala ma. Faalɔ, wú híya gilíítii ti ɣɛ́ náa ngáá kíya sítii taa ɣɛ kala kala ma.

⁹A yakpá wú sí ɣɛ Ndemɔí Ngalá ndóngɔ wú kɛ. Sífaa, ná nuu áá ɣɛ́ kala kala ma í gɛ́ɛ́ haítii taá ɣɛ́ ngáá faa vánda ɣɛ́ndai ɛ́ɣɛ telembongí ɛ́ɣɛ tɔɔỹái.

¹¹Wálaa báha sítii mba taá ngángimba lála háitii kɛ, fái sítii ti ngáá kpíndi h̃ú háitii. Kɛ́ laá ɣéle, wú maa háitii kula kala kala ma.

¹²Aa ɣɛ́ ngáá ngufe fáá wala ngáá nuu áá laa lúba bɛ́lɛ sí wa taá kɛ́ ndɔɔwu h̃u.

¹³Ná kpíndi bindí sú háitii kpɛ́lɛɛ taa gúla kala kala ma, nungáitii taá ɣɛ́ náa ti h̃úú háitii kái káingi wɔ́lɔ.

¹⁴Náá hááw̃a, sí fíli áá gúla kala kala ma maa áá ɣɛ́ kpál̃au. Háwui náá hááw̃a, pɔnɛngɔ́ɔ́ lé, ngáá sí, “Wɛ́i wú nyíí h̃u, wú sáa h̃u, a yooɣé. Kílisitii aa wú gúla kala kala ma.”

¹⁵Faalɔ, a w̃aah̃ú béle ngáá sí wáá nde ɛ́ɣɛ sí wáá kɛ, tí ɣɛ́ ngáá kele ɣéle faa. Wú lúva veléitii tálaa ɣɛ́ ngáá kíya sítii taa faa wɔ́lɔ.

¹⁶Faa ỹɔ́u hólo lɔ a mú su. Náá hááw̃a, sí í ngáá faa vánda ngáá wáá hómbo wú kɛ a kɛ.

¹⁷Wálaa ɣɛ́ ngáá faa yátɔ tála yelaa, kɛ́ laá ɣéle, wú yákpa wú ɣɛ́ kɔlɔ́ sí Ndemɔí Jísu longɔ́ wú kɛ.

¹⁸Ndɔɔ bɔ́lendai áá wú hóu, a bé ná wá bɔw̃álale aa wú ɣɛ́ kíli ỹaaní. Kɛ́ laá ɣéle, bɛlɛ́ Hɛ́ɛ́ma Ỹínangi í ɣɛ́ wú vólu hɔ́wɔ fíli.

¹⁹A waayaa yɛpɛ ỹɔw̃ɔ́ ỹɔ́w̃ɔ yéle Ngala ngúle gɛvɛlɛ kɛvɛlɛ su, wú Ndemɔí Jísu lɛ Ngala ngúle gɛvɛlɛ kɛvɛlɛ su ngáá líí kpɛ́lɛɛ.

²⁰Mu Lemɔ́i Jísu Kílisitii laahéingi h̃u, a mu ɣɛ́ nɔ́ɔ fɔ́ máa sɛ́ɣɛɛ gula Kɛɛɣɛí Ngala má faa kpɛ́lɛɛ su.

²¹Kílisitii wúfemai hááw̃a í wú yáa, a waayaa bɔwɔ́ gúla kɛlɛ́ma ỹɔw̃ɔ́ ỹɔ́w̃ɔ yɛ.

²²Wɛ́i wú ngáá nyah̃áitii, a waayaa bɔwɔ́ gúla kɛlɛ́ma wú h̃íỹɛngaitii mbɛ kíya nɔ́ɔ wáá bɔ́wɔ gúla kɛlɛ́ma ma Ndemɔí Jísu yɛ,

²³bɔw̃álale siỹɛ́ngi lɔ í ngáá ngi nyáh̃ai wútuwɔɔ w̃ɔ́i aá va tɔ ngoo í nda ngí ỹáh̃ai w̃ááh̃u kíya nɔ́ɔ Kílisitii í ngáá Ngala fɛ́li mbélaitii ti wutúwɔɔ w̃ɔ́i, aá va tɔ ti w̃áá woo í nda. Laá bútei va tɔ í ngáá Ngala fɛ́li mbélaitii ti Wúmaawo Mɔ́i.

²⁴Náá hááw̃a, nyah̃áitii kule lɔ wú w̃á wú bɔ́wɔ gúla kɛlɛ́ma wú h̃íỹɛngaitii mbɛ faa kpɛ́lɛɛ su kíya nɔ́ɔ Ngala fɛ́li mbélaitii taá bɔ́wɔ gúla kɛlɛ́ma Kílisitii yɛ.

²⁵Siỹɛngáitii pa wú ló ngáá wú ỹáh̃aitii kíya nɔ́ɔ Kílisitii í lóni ngáá Ngala fɛ́li mbélaitii í lɛ́ɛ́h̃ui gúlai kɛlɛ́ma tí hááw̃a.

²⁶Jísu Kílisitii i ná ɣɛ́ni kɛinɔɔ́ í Ngala fɛ́li mbélaitii kɛ kíli batɛ́ Ngalá mbɛ ndaa wói w̃aa véle w̃a, í tí wúya njɛ́i wu

²⁷ngáá ti ɣɛ́ váni, faa ỹɔ́u fíli álaa ɣɛ́ tí h̃u, ɛ́ɣɛ faa fíli álaa ɣɛ́ ti wa, aáva í tí yéɣe ngáá ngi vóngaa kíya nɔ́ɔ nyah̃a bélangi áá ɣɛ na faa fíli ɛ́i ɣɛ́ mba, taa mbala siỹɛ́ ngeyá.

²⁸Kule lɔ́ síỹɛngi w̃á í ló ngáá ngi ỹáh̃ai kíya nɔ́ɔ ndongɔ́ ngáá bɔwɔ́ lúwui. Siỹɛ́ngi ndongɔ́ ngáá ngi ỹáh̃ai ndongɔ́ɔ́ lé ngáá bɔwɔ́.

²⁹Nuu fíli ɛi hilí ngáá bɔwɔ́ lúwui, kɛ́ laá ɣéle, aa ndaa wɔ́ í mááh̃u béle ngáá pangɔ́ kíya nɔ́ɔ Kílisitii aa Ngala fɛ́li mbélaitii maah̃ú béle

³⁰bɔw̃álale a mu báhangɔɔ lé mba.

³¹Pɔnɛngɔ́ɔ́ lé Ngala Kɔ́lɔi h̃u ngáá sí, “Náá hááw̃a, siỹɛ́ngi aa gula ngi kɛ́ɛ́ɣɛni ngaa ngi njéé ti vɛ́lɛi wú, í báha ngi ỹáh̃ai wá, ti félengɔ ti ɣɛ́ ngáá nuu yílaa.”

³²Tɔɔỹaá wóó bikpi ngí ɣɛ́ngɔ ndɔɔwu h̃ú Ngala Kɔ́lɔi h̃u. Aáva ngí ngoí sítii ngatɔ́ngɔ mba ngáá kɛ aá lɔ́ɔ yɛ́pɛ kɔwɔ́ato Kílisitii wá taa Ngala fɛ́li mbélaitii.

³³Kɛ́ wá bɛ́lɛ aá lɔ wú hááw̃a jɔ́. Kule lɔ siỹɛ́ fíli má í ló ngáá ngi ỹáh̃ai kíya nɔ́ɔ ndongɔ́ ngáá bɔwɔ́ aáva kule lɔ nyah̃á fíli má i wúfe ngi h̃iỹɛ́ngi w̃a.