Read Bandi Ɛ́FƐSƆ 6 Bible Online

Ɛ́FƐSƆ 6 - Bandi bible

Ɛ́FƐSƆ 6

¹Wɛ́i wú ngáá ndengáitii wú ngáá Ngala fɛ́li mbélaa, kule lɔ wú w̃á wú gólo wú lé mbélaitii mbɛ. Ná vá tɔ́ í ngáá fái í pele w̃a ngáá wááyaa kɛ.

²Sí pɔ́nɛngɔ Ngala sávai h̃u aá wáá ngáá sí, “A wúfe wú njééni taa wú kɛ́ɛ́ɣɛni ma.” Saváitii Ngalá ngí féngɔ ná lɔ í ngáá hésendaa geléi guuló ngí mba.

³Maa gúúlongi waa ngáá sí, “Kɛinɔɔ́ sí fíli wáá loko víli sú í ɣɛ́ ngáá kulasuunúma háá wú yɛ́ aáva wú lɛ́ɛ́h̃ui h̃uu áá ɣɛ́ gooh̃a ngeleí sí wu.”

⁴Wɛ́i wú ngáá kɛɛɣɛ́aitii, wálaa faá ɣɛ́ ɔɔ wɔ́ɔ́ faá lé ɔ́ɔ́ kɛ wú léngaitii tɔɔ lúu, kɛ́ laá ɣéle, ná waayáa ti gúla su, a ti gálambo ngáá Ndemɔí Jísu galambongí í mbóni, wú ti laahí ngáá ngi lááhingi.

⁵Wɛ́i wu ngáá nduwɔáitii, a gólo wú w̃ááliɣiaitii mbu, wú wúfe ti w̃a ngwala ngáá ndiiwolé, kíya nɔ́ɔ wáa ɣɛ́ wáá yénge Kílisitii yɛ.

⁶A yenge ti yɛ ngáá pangɔ́ bele bɛ́lɛ taá na tɔɔ́ ɣɛ́ taa wú béle. Wálaa ɣɛ́ nɔ́ɔ wáá yénge tí yaah̃ú w̃á ngáá pangɔ́ kɛinɔɔ́ ti ló ngáá wú ye, kɛ́ laá ɣéle, a yenge ngáá hɛmbɛ́i kpɛ́lɛɛ kíya Ngalá ndóngɔ wú kɛ, bɔw̃álale wá lɔ́ ngáá Kílisitii lúwɔa ɣɛ kíli.

⁷Nduwɔ yengéngi wúwaa mbo, a mbo ngáá kooh̃unɛ́ɛ́ kíya nɔ́ɔ wáá ɣɛ́ wáá yénge Ndemɔí Jísu yɛ. Wálaa mbo nuu búsa wúfe má léikei su nɔ́ɔ.

⁸Yí ɣɛ́i ngáá nduwɔ ɔɔ yáá ɣɛ́i ngáá nduwɔ, wú ɣɛ́ kɔ́lɔ ngáá kɛ Ndemɔí Jísu lɔɔ wú w̃ááỹa fe wú yénge pandaí hááw̃a wáá mbo.

⁹Wɛ́i wú ngáá nduwɔ w̃ááliɣiaitii, wá bɛ́lɛ kɛ wááyaa wúfe wú lúwɔaitii ma. Wálaa ɣɛ́ wáá w̃aa ỹíki ti w̃a. Wú ɣɛ́ kɔ́lɔ ngáá kɛ wá bútei wú báha wú lúwɔaitii mba, wá lɔ nuu yílaa kpé mbú í ngáá wú W̃ááliɣii í ngelegóóh̃u lɛ́i áá nuu kpɛ́lɛɛ kɔ́sɔ ngáá kahá ɛ́i ɣɛ́ su.

¹⁰Ngapúmaa hái lɔ ngáá nde wú w̃a. Wú h̃úúbangɔ í ɣɛ́ la Ndemɔí Jísu yakpangí h̃u ngáá kpahaí wá wáá ɣɛ́ su mba.

¹¹Sí kpɛ́lɛɛ Ngalá ngíwaa fe wú yáa ngáá kɔɔ wɔ́ nyáákaitii, a w̃aahéi wo ngáá ti ye kɛinɔɔ́ wú hómbo wú ló ngáá pangɔ́ ngáá Ngutuwɔ́ Ỹína Nyɔí ɛi mɔɔ hombó wú w̃a ngáá ngi háá ỹɔi áá kpátɛ wú láá w̃á.

¹²Ndapií sí múwaa kɔ, a máa kɔ́ma ngáá a mú mbála nuú búsaa, kɛ́ a muỹá lɔ́ɔ kɔ ngáá ngakpa ŋáni ỹɔu ỹɔungáitii tí ngélewu tiyɛ́i tí h̃úúbangɔ, ti ngáá masangáá, ngakpá ngwála í ti yaa ngetéya súúbindingɔi sí h̃u.

¹³Ná hááw̃a, sí Ngalángi í kulangɔ́ kɛ́lɛma wú yɛ́ ngáá kɔɔ wɔ nyáákaitii a ngeɣé kɛinɔɔ́ mbéi hɔ́wɔi fíli wú wááhilima w̃ɔ́ɔ́ áá láá lɛ́ wú wú ngáá ndapi wú hómbo wú ló ngáá pangɔ́ wú lápi la, wálaa kúla mbu mbɛ, kɛ́ laá ɣéle, wú ló loow̃aá.

¹⁴Ná hááw̃a, a loo gíli bátɛ ngáá tɔɔỹaá gééla woí kɔwɔ́ato Ngalá mba ná áa ɣɛ́ ngáá bɛ́ti ɣɛ́ kíli ngilingɔ́ áá ɣɛ́ la wú líí h̃u ɛ́ɣɛ wú lélembongɔ í ɣɛ́ la Ngalá ngááh̃u ná áá ɣɛ́ ngáá kíya nɔ́ɔ nuu áá ŋáni vɛ́lɛ gaká h̃ú naa w̃ááh̃u béle fááw̃a.

¹⁵A ɣɛ́ kíli batɛ ngáá wú ndiihéi gééla woo vandaí lé ná aa ɣɛ́ ngáá kɔɔva ɣɛ́ kíli wú gɔ́wɔ yá.

¹⁶Ngalángi lángi í wú h̃ú í ɣɛ́ wú yáá hɔ́wɔ fíli kíya nɔ́ɔ ngɛí gbɛ́ɛ́lɛngi áá ɣɛ́ nuu yáá kɔɔ wɔ́mai. Aá lɔ wáá hómbo wú ngɔ́mbu lekpái yakpɛ́ lá nuí síí w̃ɔ́i taa ɣɛ́ ma Nyaama W̃ɔ́i áá ɣɛ́a pilí wú w̃á.

¹⁷A lokohéi ngumaawóngi wu Ngalá ngáá fé wú yáá í ɣɛ́ ngáá kɔlu wɔɔlɔ́ ɣɛ́ kíli wú wú mba. Ngalá ngói Hɛ́ɛ́ma Ỹínangi áá fe í ɣɛ́ wú yáá ngáá kɔɔ wɔ́ mbówa hɔ́kpɔ ɣɛ kíli.

¹⁸Sí kpɛ́lɛɛ sú, waayaa Ngala fɛ́li ngáá Ngalá ngí bɔ́ wú wá. Waayaa Ngala fɛ́li hɔ́wɔ fíli Hɛ́ɛ́ma Ỹínangi yákpangi h̃u. Náá hááw̃a, wálaa bɔ́lɔ Ngala fɛ́lindai wa. Waayaa Ngala fɛ́li Ngala fɛ́li mbélaitii kpɛ́lɛɛ mbɛ́ hɔ́wɔ fíli.

¹⁹Waayaa Ngala fɛ́li mbɛ́ nyá bɛ́lɛ ngáá ná ngáá yóóɣe yɛpɛmá Ngalá ngí kééla woo hé ngéya ngáá ngí ndé. Nduwa álaa ɣɛ́ sú sí í ngáá ndɔɔwu h̃ú hái kɔwɔ́ato keela woó vándai wá ngí nde nungáitii má.

²⁰Ngala ngí tɔ́vengɔ ngáá ngí ɣɛ́ ngáá Jísu Kílisitii yaah̃ú keela woó vándai sí lé fái w̃a kíya bɛ́lɛ háá ngí ngáá pelésina. A Ngala fɛ́li ngáá nduwá álaa ɣɛ́ sú ná ngáá ɣɛ́a yɛ́pɛ kɔwɔ́ato keela woó vándai wa kíya kule í má ngí kɛ.

²¹Tékekɔ lɛ́i í ngáá mú mbála Yála fɛ́li mɔ́i ta lɛ́i mu longɔ́ la, aá va tɔ múl̃ɔ ngáá Ndemɔí Jísu yenge mɔɔ vanda, ná áá vá aa mbéi haa kpɛ́lɛɛ súúɣɛ ngáá wú ye kɛinɔɔ́ wú ɣɛ́ kɔlɔ́ sí ngíwaa kɛ ɛ́ɣɛ sí áá híya ngáá ngé.

²²Ná háá va tɔ ngáá tɔvé ma wú yéle í vá í nde wú w̃á sí ní kpɛ́lɛɛ náá híya su ɛ́ɣɛ í wú lííba ngáá wálaa liihɛ́lɛ ngáá faa fíli.

²³Bɛlɛ́ a mu Kɛ́ɛ́ɣɛ Ngalá taá Ndemɔí Jísu Kílisitii tí mu kpɛ́lɛɛ kɔ́ ngáá ndiihéi, ndongí taá ndángi muỹɛ́i mu ngáá Ngala fɛ́li mbélaitii.

²⁴Bɛlɛ́ Ngalángi háá bɔwɔí í ɣɛ́ sítii kpɛ́lɛɛ mbɛ́ tiyɛ́i ti longɔ́ ngáá Ndemɔí Jísu Kílisitii kúnafɔ taá ngi ndá gúnafɔ.