Read Bandi FÉLEPA 1 Bible Online

FÉLEPA 1 - Bandi bible

FÉLEPA 1

¹Nyɛ́i ngí ngáá Pɔ́ɔ í báha Tímoti wa niỹɛ́i ni ngáá Jísu Kílisitii yenge mbélaa, niỹa lɔ níwaa kɔlɔí sí vɔ́nɛ wú yele. Ní pɔ́nɛngɔ wú kpɛ́lɛɛ ngéle wɛ́i wú ngáá Ngalángi vóngaitii wú Félepa taa h̃u wú báhangɔ Jísu Kílisitii wa ngungi nda mɛ́ɛ Ngala fɛ́li mbélai ti wutúwɔaitii ma ɛ́ɣɛ ti bɔmba yeláitii.

²Bɛlɛ́ mú Kɛ́ɛ́ɣɛ Ngalá ɛ́ɣɛ mu Lemɔí Jísu Kílisitii ti háa bɔwɔí ɛ́ɣɛ ti lííhei tí ɣɛ́ wú yɛ́.

³Ngáá sɛ́ɣɛɛ gula Ngalá ma wú hááw̃a kíya fíli kí ngáá hítɛ wú wá.

⁴Laáva, kíya fíli ngáá Ngala fɛ́li wú kpɛ́lɛɛ mbɛ́, ngáá fɛli ngáá kooh̃unɛɛ kɔwɔ́ato wú bɔ́ kílii wa mbá ngengengí sí h̃u Ngalángi gééla woo vandaí hááw̃a, í séi hésendaa holoí w̃a wú Ngalángi gééla woo vandaí w̃áahɔlɔni, í ló su í foló sí h̃úi w̃á.

⁶Faalɔ, kí máá i kpál̃au ngáá Ngalá, lɛ́i í ngenge pándai sí lɔ́kula héinga wú lóów̃a, aá lɔɔ́ ndi ngu ma í ló su kpóloo í víla fóloi sí w̃a Jísu Kílisitii áá yangáima ma.

⁷Ngí bɔ́ɔ́ ɣɛ sou sú ɔɔ ngálaa ɣɛ́ sou sú, aá lɔ pele w̃a ngáá kóóh̃unɛɛngɔ í ɣɛ́ la kɔwɔ́ato wú wá. Sífaa nyá lɔ́ɔ Ngalángi gééla woo vandaí w̃ááɣawo aáva ngáá ngakɛ́ ngáá nungáitii ngáá kɛ tɔɔỹaá le. Laáva wú kpɛ́lɛɛ pá wá lɔ́ ngáá ndíívo mbélaa ngengengí sí h̃u Ngalá ngí fénga ngéya kpɔwɔ́ lúw̃ama h̃u.

⁸Ngalá ngi kɔlɔ́ ngáá kɛ kíya búte wú w̃ɔ́ni áá sóu ɛ́ɣɛ kíya ndóngɔ ngáá wú ye kɛ kíya nɔ́ɔ Jísu Kílisitii lóngɔ ngáá wú ye.

⁹Sí va tɔ í ngáá ní Yála fɛli ngói wú hááw̃a ngáá wú lóngi h̃uu í ɣɛ́ wɔ́ɔ́lɔ ngwala nungáá vékaa haaw̃a kɛinɔɔ́ wú ɣɛ́ tɔɔỹái wɔlɔ́, ná vólu, wú ɣɛ́ fáitii ngéɣe kíli wɔlɔ́.

¹⁰Ná lɔ́ áá kɛ wáá hómbo wáá fái sítii kɛ ti vangɔ́ wála áá ɣɛ́ la, aáva wú ɣɛ́ ngáá faa ỹɔ́u ɣɛ tála yelaa kɛinɔɔ́ wú w̃ááw̃uỹangɔ í ɣɛ́ lá ná Kílisitii áá vá vólu.

¹¹Wú gɛ́ɛ́ hái i ɣɛ́ nɔ́ɔ fɔ́ ngáá faa vándaitii kɛndáá Jísu Kílisitii yílaa kpé áá kɛ ngáá háwu wáa hómbo wáa ti ɣɛ́ kɛinɔɔ́ ngúfema í ɣɛ́ Ngála mbɛ ná vólu, ndaaw̃áá í lɛ́.

¹²Mu mbála Yalá fɛ́li mbélaitii, ndóngɔɔ lé wú ɣɛ́ kɔlɔ́ ngáá kɛ fái sítii ti híyangɔ ngáá ngé tiyá gíte lɔ tí kɛ́ngɔ ngáá háwu Ngalángi gééla woo vandaí lendáá yéngengi i híyanga su hááli hááli.

¹³Náá hááw̃a, masa pɛ́lɛ wálai w̃aah̃ú belé mbélaitii kínɛi ɛ́ɣɛ nungáá vékaitii kpɛ́lɛɛ ti mbéinda tí kɔ́lɔ ngáá kɛ nyá lɔ sou sú bɔw̃álale nyá lɔ ngáá Kílisitii yénge mɔɔ.

¹⁴Laáva sóu fái sí i kɛngá ngáá háwu Ngala fɛ́li mbélaa bih̃íw̃aa tí lá ngáá Ndemɔí Jísu Kílisitii ngwala. Faalɔ, nduwúh̃u í lɛa ngáá ti ye aáva nduwá áá ti h̃u Ngala ngóó le fááw̃a.

¹⁵Tɔɔỹaá le ngáá kɛ nungáá lɛ́ingaa tiyá lɔ́ɔ keela woó vándai lé kɔwɔ́ato Kílisitii wa ngáá tolóma ɛ́ɣɛ ndaahasá. Kɛ́ ti lɛ́ingaa va tiyá lɔ́ɔ kɛ ngáá ndiiwolé.

¹⁶Sítii pa táa Ngala ngói le ngáá ndiiwolé tiyá lɔ́ɔ kɛ ndo sú, bɔw̃álale tí kɔlɔ́ ngáá nyá lɔ mbéinda soú sú Ngalángi gééla woo vandaí w̃ááɣawo fááw̃a.

¹⁷Sítii pa táá fái sí ɣɛ ngáá tolóma taá kɛ́ma ngáá ndiiwolé á lɔ́ ti gi má ngáá kɛ taá fáa bángi h̃uu ɣɛ́ wɔ́ɔ́lɔ má ná ngí soungí h̃u.

¹⁸Ná aa ngáá faa fíli! Kóóh̃unɛɛngɔɔ lé kɔwɔ́ato mba kɛinɔɔ́ keela woó vándai í lé kɔwɔ́ato Kílisitii wa pele fíli sú nɔ́ɔ, ɔ́ɔ́ bɔ́ɔ́ ɣɛ ngáá faa ỹɔ́u ɔɔ faa vánda gísiya w̃aa véle w̃a. Laáva ngáá ndí ngú ma ngáá maa góóh̃unɛi,

¹⁹bɔw̃álale ngí kɔ́lɔ ngáá wú Yála fɛlindáitii ɛ́ɣɛ kpɔmbaí Hɛ́ɛ́ma Ỹínangi lɛ́i Jísu Kílisitii í máa gúúlo mboní táá fe mbɛ́ tiyá lɔɔ vá kɛmá ngáá háwu ngúmaa í wo.

²⁰Ndiivó fáá walaí ɛ́ɣɛ kítomai waa ngáá kúnafɔ ngálaa bááh̃aa sí wa kule í má ngí kɛ. Kɛ́ hɔ́wɔ fíli ngu ngí nda naa mɛ́ɛ́ sí h̃ui w̃á, ndííwuulɛngɔ i ɣɛ́ ngwala ngáá kɛinɔɔ́ túva velé h̃u kpɛ́lɛɛ, Kílisitii í ngufema w̃ááhɔlɔ máá véle w̃a i ɣɛi ngáá ndɛɛh̃úi ngi su ɔɔ ná bɛ́lɛ ngáá há i ngúfema w̃ááhɔlɔ su.

²¹Ní ndái h̃u, ndɛɛh̃úi sí ngí su, nyá lɔ́ su Kílisitii haaw̃a. Ná múl̃ɔ ngáá ɣɛ́ haaní, ná ɣéle aa ɣɛ ngáá kulasuunúma.

²²Kɛ́ ná wɔ́lii ndóndai ndɛɛh̃úi h̃u ná áá kɛ ngáá háwu ngí ngenge pánda wo Kílisitii yɛ, kɛ ná ná áá ɣɛ́, ngáá mɔɔ kɔlɔ́ hɔ́ɔ sí ngáá ngeɣé ngáá liivó faa félengɔi sítii su.

²³Kpálangɔɔ lé faa félengɔi sítii ndowah̃u. Ngáá mɔ́ɔ loí ngɔ́ɔ́ ló ngetéyangi sí h̃uu lɛ́ɛ́h̃ui h̃u. Kɛ́ ndóngɔɔ lé náa ngí ɣɛ́ ndɛɛh̃úi ná h̃u Kílisitii yelé. Ná w̃aanɛ́ɛ́ngɔɔ lé ngwala í lɔ́ve ndɛɛh̃úi sí wa ngí su.

²⁴Kɛ́ wú hááw̃a, aá lɔ pele w̃a ngwala ngáá ngí ló ndɛɛh̃úi h̃u í lɔ́ve sí wa ngáá há.

²⁵Ndángɔɔ lé la ngáá aá lɔ pele w̃a, laáva ngí kɔlɔ́ ngáá nyá lɔɔ ló ndɛɛh̃úi h̃u ngí bɔ́ wú wa wú góóh̃unɛi ɛ́ɣɛ wú lángi h̃úú í ɣɛ́ wɔ́ɔlɔ,

²⁶kɛinɔɔ́ ná ngáá ɣɛ́ vááni múl̃ɔ wú yéle, háwu i ɣɛ́ wú yaa wú góóh̃unɛi h̃u kpahai wa wáa ɣɛ́ su Jísu Kílisitii wa máá véle w̃a.

²⁷Faa fíli ɔ́ɔ́ bɔ́ɔ́ ɣɛ, a luva veléitii kɛ vaní kɛ kíya keela woó vándai kɔwɔ́ato Kílisitii wa í ndéngɔ ngáá ti ɣɛ́ na. Faalɔ, bele pá ngáá vá ngí wú héi heí ɔɔ ngɛ́i ɣɛ́ vaaní, ngi wú w̃áá woo ỹɛ́ni ngáá wá lɔ lóóni kpáŋ ngoo yílaa sú ɛ́ɣɛ kisiyá yílaa su aáva wáa lápi ngáá wú lángi í ɣɛ́ yíla kpé kɔwɔ́ato Ngalángi gééla woo vandaí wa.

²⁸Waa lúwa wú wááhilima yélaitii mba pele fíli sú. Ná wáá sí ɣɛ, aá lɔ áá ngakɛ́ ngáá ti ye ngáá kɛ ti ndái ɛi ndoma kɛ́ wáá vá, wú ndái lɔɔ va ndómama, bɔw̃álale Ngalá tɔ áá vá kɛ́ma ngáá háwu wú ndái í ndóma.

²⁹Naa gúlangɔɔ lé wú yɛ́ kɛlɛ́ma ngáá wááyaa yénge Kílisitii yɛ aa ngáá nɔ́ɔ léi ndangí wáá ɣɛ́ su lá, kɛ́ maanɔw̃ɔ́i múl̃ɔ bɛ́lɛ wáa ngéɣe fááw̃a.

³⁰A maa wúyeni ndapi híí yiláángi lɔ a máá kɔ. Ndapií sí wú tɔ́i ngíwaa kɔ wɔ́lɔ. Laáva ndapií sí lɔ nɔ́ɔ nɛ́nɛ ngáá kɔ kɛ kíya wáá mɛni.