Read Bandi KƆLƆ́SE 1 Bible Online

KƆLƆ́SE 1 - Bandi bible

KƆLƆ́SE 1

¹Nyɛ́i ngí ngáá Pɔ́ɔ, nyɛ́i Ngalá ngí kɛ́ngɔ ngáá Jísu Kílisitii géélai, nyá ɛ́ɣɛ mu mbála Yála fɛ́li mɔ́i Tímoti niỹá lɔ náa kɔlɔí sí vɔ́nɛ.

²Kɔlɔí sí lɔ́ɔ́ vá wú yéle, wɛ́i wú ngáá Ngalángi vóngaitii Kɔlɔ́se taí h̃u, wɛ́i waa híɣengɔ tɔ́wɔbaɣa vélei sí wa wú lɛ́ɛ́h̃ui h̃u wú báhangɔ Kílisitii wá. Bɛlɛ́ mu Kɛ́ɛ́ɣɛ Ngala ngí háá bɔwɔí taá ngí lííhei ti ɣɛ́ wú yɛ́.

³Ná naa ɣɛ́a Ngala fɛ́li wú yɛ, hɔ́wɔ fíli naá sɛ́ɣɛɛ gula Ngalá má lɛ́i í ngáá mu Lemɔ́i Jísu Kílisitii Kɛ́ɛ́ɣɛ,

⁴sífaa, ní faa ỹɛ́ninga kɔwɔ́ato wú lángi wa wú su ngáá Jísu Kílisitii ɛ́ɣɛ ndóngi wú su ngáá Ngalángi vóngaitii kpɛ́lɛɛ.

⁵Táingi ná h̃u ti tɔɔỹaá gééla woí léni wú w̃a hése, ná wáá ngáá, keela woó vándai, wú faa ỹɛ́nini kɔwɔ́ato kitomái wa nuu áá mááhɔlɔ su. Ndangí ɛ́ɣɛ ndóngi wú su aá lɔ́ɔ́ gúla kitómai h̃u í wú wa, ná wáá ngáá, sí ngandɔ́ɔ́lɔngɔ wú hááw̃a ngáá pangɔ́ ngelegóóh̃u.

⁶Keela wóo vándai áá kɛ́ ngáá háwu nungáá táá nɛ́ɛ́ma w̃ááhɔlɔ ngeleí sí wú kpɛ́lɛɛ, maa woo lɔ́ɔ́ híya hááli haali. Aá lɔɔ ɣɛ́ kíya nɔ́ɔ wɔ́lɔ í ɣɛ́i ná wú lííwaa ná h̃u hése wú Ngalángi háá bɔwɔí w̃áá woo ỹɛ́nini wú ɣɛ́ kɔlɔ́ kíya gíte í na.

⁷Wú faa ỹɛ́ninga kɔwɔ́ato Ngalángi háá bɔwɔí wa mu mbála yengé mɔ́i Ɛpáfulɔ yaá lɛ́i mu longɔ́ lá, lɛ́i múl̃ɔ í ngáá Kílisitii yénge mɔɔ vanda ni haáw̃a.

⁸Ɛpáfulɔ i ndengɔ́ ní w̃a kíya Hɛ́ɛ́ma Ỹínangi í kɛ́nga ngáá háwu wú lóngɔ ngáá wú mbála Yalá fɛ́li mbélaitii.

⁹Háwui nátii kpɛ́lɛɛ fááw̃a, hɔ́wɔ fíli naá Ngála fɛ́li wú yɛ í séi ná h̃úú w̃á ni wú w̃áá woo ỹɛ́nini. Niỹa lɔ́ɔ́ Ngala fɛ́li ngáá í kɛ́ ngáá háwu sí ndongɔ lá nga ngi ɣɛ́ kpál̃au ngáá wú ye. Ná wáá ngáá, ngi Hɛ́ɛ́ma Ỹínangi í kɛ ngáá háwu wú géle ɣelengɔ í ɣɛ la, wúwaa fáitii ngatɔ́ mba.

¹⁰Ná ná áá ɣɛ́, wáá hómbo náa wú ɣɛ́ kíya Ndemɔí lóngɔ wú ɣɛ́ na, wúwaa sítii kɛ hɔ́wɔ fíli táá ndiilɛ́i. Wáá ɣɛ́ náa wáá faa vánda bih̃íw̃aa ɣɛ́ wú lɛ́ɛ́h̃uitii suuhíya kílii h̃u aáva wáá ɣɛ́ Ngalá kɔ́lɔ ngáá ele gíte waa ngáá laá ngáá pangɔ́.

¹¹Bɛlɛ́ Ngalá ngí wú h̃úúba gite kpáŋ, ná wáá ngáá, suubángi áá gúla Ngalángi yákpa maanɛɛnɛ́ɛ́ngɔi h̃u, kɛinɔɔ́ wú hómbo wu híya faa báma fíli su ngáá ndiibakpá ɛ́ɣɛ ndiilɔlɔ́. Aáva niỹá lɔ́ɔ Ngala fɛ́li ngáá wú ɣɛ́ wáá sɛ́ɣɛɛ gúla Kɛɛɣɛ́i Ngála má ngáá kooh̃unɛɛ, lɛ́i í kɛ́nga ngáá háwu wú hómbonga wú wú ndá yélendai w̃ááhɔlɔ. Ná wáá ngáá, sí í ngandɔ́ɔ́lɔnga ngi vóngaitii fááw̃a ngí w̃ásandai h̃u áá kpíndi h̃u.

¹³Ngalá ngí mu gúlanga kpíndi h̃u w̃ásandai wú, í vá ngáá mu ye lɛ́i lɛ́i ngi líívo Siỹɛndou Loí w̃ásandai wu.

¹⁴Ngi H̃íỹɛndou Loí sí w̃aa véle vá tɔ a mu ɣɛ́a ngáá ngumaawo mbélaa, ná wáá ngáá, mu háá ỹɔítii suuhaa í lónga.

¹⁵Nuu ɛ́i Ngala tɔ́, kɛ́ Kílisitii lɔ́ nɔ́ɔ jɔ́ kíya Ngala ngí na. Kílisitii i ɣɛngɔ na nɔ́ɔ fɔ́ ngetéyangi ɣéle tɔ ɔ́ɔ́ ɣɛ́a batɛ́, aáva tɔvengɔ́ɔ́ lé ŋáni kpɛ́lɛɛ mbá,

¹⁶sífaa Kílisitii w̃aa véle w̃a lɔ́ Ngalá ngi ŋáni kpɛ́lɛɛ kpátɛngɔ ma tí ngelegóóh̃u ɛ́ɣɛ ngélewu, sítii máá ti lɔ ɛ́ɣɛ sítii mɔ́i tí lɔ, í báha náá ngakpa ŋániaitii mba ɛ́ɣɛ ndɔwɔlɔ w̃ásangaitii. Ngalá ngí ŋani kpɛ́lɛɛ kpátɛngɔ Kílisitii w̃áá véle w̃a ɛ́ɣɛ laa Kílisitii í ngúfema w̃ááhɔlɔ ti w̃áá véle w̃a.

¹⁷Kílisitii i ɣɛngɔ na wɔ́lɔ kpɔ́lɔɔ p̃ɛ́ɛ́ Ngalá ngɔ́ɔ́ ɣɛ́a ŋani fíli kpátɛ. Ŋaniáitii tiyá lɔ loow̃áa Kílisitii w̃aa véle w̃a.

¹⁸Kílisitii lɔ́ í ngáá Ngalá fɛ́li mbélai ti wungí. Ngalá fɛ́li mbélai pa tiyá lɔ́ Kílisitii wa kíya nɔ́ɔ nuu lúwui áá ɣɛ nuu w̃a. Aá va tɔ áá kɛ́ ngáá háwu Ngalá fɛ́li mbélai táa ɣɛ́ ndɛɛh̃u gítei h̃u. Aá vá tɔ́ í ngáá hésendaa w̃ɔí Ngala ngí mbuyoɣéni sái h̃u, kɛinɔɔ́ ngilaá kpé ngoo í ɣɛ́ nda ŋani kpɛ́lɛɛ mááh̃u.

¹⁹Ngalá kpútei lɔ́ í suubátɛngɔ ngi nɛ́ɛ́mbɛ h̃u ngáá ngi H̃íỹɛndou Loí í ɣɛ́ nɔ́ɔ ngáá laá Ngala kɛ kíli pele kpɛ́lɛɛ sú.

²⁰Saaɣá haí Ngalángi H̃íỹɛndou Loí í mbóngɔ kulɔ́sii w̃á i kɛ́a ngáá háwu Ngalá ngí ndówah̃u batɛ́ wó ti lówah̃u taá ŋániitii kpɛ́lɛɛ. Máá hái lɔ í kɛ́ngɔ ngáá háwu Ngalá ngí váángɔ ngáá ndiihéi vólu í mɔ́ɔ́ kɛ ngáá háwu ŋaniáitii kpɛ́lɛɛ ti ngélewu ɛ́ɣɛ ngelegóóh̃u tí ɣɛ́ múl̃ɔ ngáá ngi ndá.

²¹Wú w̃aa gooh̃ángɔ i ɣɛ́i lá Ngala mbá hɔ́wɔ tá ɛ́ɣɛ wú ɣɛi ngáá mbaahílima yélaa, sífaa, wú lúva véleitii ɛ́ɣɛ wú gísiyaitii ti ɣɛ́i ỹɔu.

²²Kɛ́ sí h̃úi náa, Ngalá ngí wú lówah̃u bátɛnga saí w̃áa véle w̃a ngi H̃íỹɛndou Loí í mbóngɔ kɛinɔɔ́ ngi H̃íỹɛndou Loí í vá ngáá wú ye Ngalá ngéle tɔmbema w̃áá fíli álaa ɣɛ́ wú wa.

²³Kɛ́ a ndi ngu ma ngáá wu lángi wú su ngáá Kílisitii wú ló gite su kpáŋ kpáŋ. A waa híɣe nda pélei sí wa wɔ́ɔ́ gíkula wú gítomai h̃u wú maahɔ́lɔngɔ ná wú keela wóó vándai ỹɛ́nini. Nyɛ́i vá ngí ngáá Pɔ́ɔ, ngí ɣɛ́a ngáá ngenge mɔ́ɔ́ keela wóó vándai sí lé fááw̃a í lénga nungáitii kpɛ́lɛɛ má ngeleí sí wu.

²⁴Nyɛ́i ngí ngáá Pɔ́ɔ, kóóh̃unɛɛngɔɔ lé maanɔw̃ɔ́i sí hááw̃a ngíwaa ngeɣé wú yɛ. Maanɔw̃ɔ́i sí nuu áá ngéɣe Kílisitii háaw̃a, laá lɔ́ ngíwaa ngéɣe ngáá kɛinɔɔ́ ngí ngukúla Ngala fɛ́li mbélaitii faaw̃a tiyɛ́i ti báhangɔ Kílisitii wá kíya nɔ́ɔ nuu lúwui áá ɣɛ́ nuu w̃a.

²⁵Aáva Ngalá ngí kɛ́nga ngáá ngi yénge mɔɔ wú yɛ wɛ́i wú ngáá Ngala fɛ́li mbélaitii. I ngengengí sí héngɔ ngeyá ngáá ngí mbo kɛinɔɔ́ wú kulasuunúma w̃aahɔ́lɔ su. Aáva maa yéngengi waa ngáá ngí Ngala kééla woí lé wú w̃a ngáá pangɔ́.

²⁶Maa geéla woí sí w̃áálɔɔwungɔ i ɣɛngɔ la mbɛ wɔ́lɔ kpɔ́lɔɔ nuu kpɛ́lɛɛ mbá, kɛ́ í kɛ́nga ngáá háwu ngi vóngaitii ti ɣɛ́a náá faa wɔ́lɔ kɔwɔ́ato mba.

²⁷Ngalángi háá h̃uubatɛngí wáá ngáá í kɛ ngi vóngaitii ti ɣɛ́ fáá wɔ́lɔ kɔwɔ́ato ngi gééla woo w̃aanɛɛnɛɛngí wa í ɣɛ́ngɔ ndɔɔwu h̃ú ngeya nuu kpɛ́lɛɛ fááw̃a. Ndɔɔwu h̃ú hái sí wáa ngáá, Kílisitii lɔ wu líí h̃u, ná vá tɔ áá wú wɔ́ ngáá kitomaá ngáá kɛ wá lɔ́ɔ vá ɣɛ́ma Ngalángi yákpa ngwala w̃aanɛɛnɛɛngí h̃u.

²⁸Náá hááw̃a, naá Ngala ngói le nuu kpɛ́lɛɛ má kɔwɔ́ato Kílisitii wa ngáá kele ɣelé péle kpɛ́lɛɛ, ní ti laahí kalambo su, kɛinɔɔ́ ní kɛ ngáá háwu ti yilá ngíla fíli ti vá Ngala ngéle ti h̃úúbangɔ í ɣɛ́ la Ngala fái h̃u kpahaí wa taa ɣɛ́ su Kílisitii wa.

²⁹Ná lɔ́ í kɛ́a ngáá yénge buté ngwala ngáá ngakpángi Kílisitii áá fé ngeyá ngengengí sí wo fááw̃a.