Read Bandi KƆLƆ́SE 4 Bible Online

KƆLƆ́SE 4 - Bandi bible

KƆLƆ́SE 4

¹Wɛ́i wú ngáá maaliɣíaitii nduwɔ lopoáitii mááh̃u, a waayaa tí h̃úúhou ngáá pangɔ́. Wálaa ti gahá. A giséi ma ngáá kɛ wa bɛ́lɛ nɔ́ wú W̃ááliɣi lɔ́ na lɛ́i í ngelegóóh̃u.

²A ɣɛ́ nɔ́ɔ fɔ́ wáá Ngala fɛ́li, aáva wálaa lééw̃a w̃a ná wááyaa Ngala fɛ́li, ná vólu, waá sɛ́ɣɛɛ gula Ngalá má.

³A waayaa Ngala fɛ́li ni haáw̃a niỹá bɛ́lɛ kɛinɔɔ́ Ngalá ngí naa gúla kɛlɛ́ma ni yɛ naa ɣɛ́a ngi gééla woí lé kɔwɔ́ato Kílisitii wa. Ná wáá ngáá, keela wói sí í ɣɛ́ngɔ ndɔɔwu h̃u. Aáva nyá lɔ́ kpindí vɛ́lɛ wu keela wói sí lé fái w̃a.

⁴A Ngala fɛ́li fááw̃a kái ngáá ngí kééla woí sí lé nga ngí ɣɛ́ kpál̃au kíya kulé í má ngí nde.

⁵Wú gɛ́ɛ́ háitii wú lówah̃u wáá sítii taa lái ngáá Jísu Kílisitii í ɣɛ́ ngáá kele ɣéle péle. Mbéi hɔ́wɔi fíli wáá lóko w̃ááhɔlɔ sí í ngáá faa vánda wáá hómbo wú kɛ ti yɛ, a kɛ ti yɛ.

⁶A waayaa yɛ́pɛ nɔ́ɔ fɔ́ ngáá pangɔ ááyaa la nungáá woli h̃u. Ná nuu fíli áá wú w̃ɔ́ɔ́ni, a ngoo yápote ngáá pangɔ ngáá tɔɔỹaá véle.

⁷Mu mbála Yalá fɛ́li mɔ́i sí taa ɣɛ ma Tékekɔ, lɛ́i mu longɔ́ lá, lɛ́i í ngáá tɔwɔbaɣa w̃ɔɔ ɛ́ɣɛ mu mbála yengé mɔ́ɔ Ndemɔí Jísu yengengí h̃u, aa lɔɔ vá faa kpɛ́lɛɛ ndéma wu w̃a kɔwɔ́ato mbá.

⁸Ná lɔ́ í kɛngá ngíwaa tɔve wú yéle, kɛinɔɔ́ í wú lííwuulɛ ngáá í nde wu w̃a kíya ní kpɛ́lɛɛ náá híya.

⁹Mu mbála Yalá fɛ́li mɔ́i sí taa ɣɛ́ ma Onɛsímɔ, lɛ́i mu longɔ́ la, í mɔ́ɔ́ ngáá wú gúúwu h̃uu w̃ɔ́i ta, aáva í ngáá tɔ́wɔbaɣa w̃ɔ́ɔ́, taa Tékekɔ lɔ táa vá. Tí félengɔ p̃ɛ́ɛ́ tiyá lɔ́ɔ vá ndema wú w̃a ngáá sí kpɛ́lɛɛ í híya mbéi.

¹⁰Siỹɛndópoi sí taa ɣɛ ma Alesitáákɔ, naá láa ní kpíndi vɛlɛ́i wu ɛ́ɣɛ Bánaba yaabeí Máa tí hááni wú w̃a. Ngí ndengá wú w̃a kílii ngáá kɛ ná Máa áá vá wú héi heíma, wú nɛ́ɛ́nɛɛ, wú lókohei mbu.

¹¹Jásuwa lɛ́i taa ɣɛ́ ma múl̃ɔ Júsutɔ aá bɛ́lɛ nɔ i haaní wú w̃a. Júsuaitii ti langɔ́ ngáá Jísu Kílisitii, sítii sáángɔ lɔ nɔ́ɔ léi naá tiyéni níwaa Ngalángi w̃ásandai w̃ááyenge mbo, aáva tí bɔ́nga mbá ngwala.

¹²Siỹɛndópoi sí taa ɣɛ́ ma Ɛpáfulɔ, lɛ́i í ngáa mú mbalá Yalá fɛ́li mɔ́i ta wú gúúwui h̃u ɛ́ɣɛ Jísu Kílisitii yénge mɔɔ aa bɛlɛ́ i haaní wú w̃a. Aá lɔ́ nɔ́ɔ fɔ́ áá Ngala fɛ́li wú hááw̃a ngáá lií kpɛ́lɛɛ ngáá Ngalá ngí kɛ ngáá háwu wú h̃úú í bá wú lángi h̃u, wú ɣɛ suuwɔlɔ́ kpál̃au ngáá kɛ wú lángi wú su ngáá Jísu Kílisitii kɛ tɔɔỹaá le ɛ́ɣɛ wú gólongɔ í ɣɛ́ la Ngalá mbɛ ngáá hɛmbɛ́ fíli.

¹³Nyá bútei ngáá hómbo ngí ndé wú w̃á ngáá kíya Ɛpáfulɔ í yéngenga wu yɛ ngwala ɛ́ɣɛ nungáitii mbɛ tí taí sítii su taá náitii tóli ngáá Leyodésiya ɛ́ɣɛ Hiyalapóle.

¹⁴A mu lɔ́kitai Lúu, lɛ́i mu longɔ́ lá, ɛ́ɣɛ siỹɛndópoi sí taa ɣɛ́ ma Dímɔ tí hááni wú w̃a.

¹⁵Ni láálimai í fólo mu mbála Yála fɛ́li mbélaitii ma ti Leyodésiya taí h̃u. Í fólo nyah̃ápoi sí w̃a taa ɣɛ́ ma Nemufɔ ɛ́ɣɛ Ngála fɛ́li mbélaitii taa w̃ɛ́ɛ́ ngi vɛ́lɛi wú.

¹⁶Ná wáá víla kɔlɔí sí galáma, a kɛ ngáá háwu í folo Ngala fɛ́li mbélaitii ma tí Leyodésiya taí h̃u. Aáva kɔlɔí sí bɛ́lɛ nɔ́ áá gúla ti yaá wú mɔɔ kalá.

¹⁷A nde siỹɛndópoi sí w̃a taa ɣɛ ma Ákipɔ ngáá í yákpa í víla ngengengí sí w̃a Ndemɔí Jísu í féngɔ ngeyá.

¹⁸Sí nyá gíte ngáá pɔ́nɛ ngáá bɔwɔ́ lóko aá wáa ngáá sí, nyɛ́i ngí ngáá Pɔ́ɔ, ngí há wú w̃a. A waa lééw̃a ngáá kɛ nyá lɔ kpindi vɛ́lɛ wu! Bɛlɛ́ Ngalángi háá bɔwɔí í ɣɛ́ wú yɛ.