Read Bandi TƐSALÓNIKA HESENDAA GƆLƆÍ 1 Bible Online

TƐSALÓNIKA HESENDAA GƆLƆÍ 1 - Bandi bible

TƐSALÓNIKA HESENDAA GƆLƆÍ 1

¹Nyɛ́i ngi ngáá Pɔ́ɔ í baha Sáilɔ wa ɛ́ɣɛ Tímoti, niỹa lɔ níwaa kɔlɔí sí vɔ́nɛ wú yéle wɛ́i wú ngáá Ngala fɛ́li mbélai taí sí h̃u taá náá lolí ngáá Tɛsalónika, wɛ́i wú mu Kɛ́ɛ́ɣɛ Ngalá fááw̃a ɛ́ɣɛ mu Lemɔ́i Jísu Kílisitii. Bɛ́lɛ Ngalángi háá bɔwɔí ɛ́ɣɛ ngí lííhei ti ɣɛ́ wú yɛ́.

²Niỹá lɔ́ nɔ́ɔ fɔ́ naá sɛ́ɣɛɛ gula Ngalá ma wú kpɛ́lɛɛ fááw̃a, ná vólu, kíya fíli naa ɣɛ́ náa Ngala fɛ́li, naá Ngala fɛ́li wú hááw̃a wá bɛ́lɛ.

³Ngalá lɛ́i í ngáá a mu Kɛ́ɛ́ɣɛ nápa ná naa ɣɛ́ naá fɛ́li, nɛ́i lééw̃a wú w̃a. Sífaa ní gí tɔ nɔɔ́ fɔ́ wú yéngengi h̃u áá gúla ndangí h̃u ɛ́ɣɛ ndongí wú su ngáá Ndemɔí Jísu Kílisitii, ná vólu, kíya wú gítongɔ mba kpáŋ kpáŋ.

⁴Ná vólu múl̃ɔ, mu mbála Yalá fɛ́li mbélaitii, naá sɛ́ɣɛɛ gula Ngalá ma sífaa ní kɔ́lɔ ngáá Ngála ndongɔ́ɔ́ lé ngáá wú ye aáva í wú yéɣenga ngáá ngi vóngaa.

⁵Naá vaangɔ́ wú yéle ngáá Ngala kééla wóo vandaí ni laa wóó h̃u nɔ́ɔ, kɛ́ ni Hɛ́ɛ́ma Ỹínangi yákpangi yaah̃ú ɣɛ́ngɔ bɛ́lɛ nɔ ngáá wú ye, aáva ní ngákɛngɔ ngáá wu ye kíya ni langɔ́ ngáá keela wói sí ni lúva velé h̃u ná h̃u ni ɣɛ́i wú lóów̃a. Aáva wú kɔ́lɔ ni ná ɣɛ́i nɔ́ɔ ngáá í ɣɛ́ ngáá kulasuunúma wú hááw̃a.

⁶Wú hítɛa ni gɔwɔ́ vó su naá Ndemɔí Jísu, aáva kíya bɛ́lɛ wú w̃áánɔw̃ɔngɔ kɛ́ wú lókoheingɔ keela wói wu ngáá kooh̃unɛ́i nuu áá mááhɔlɔ Hɛ́ɛ́ma Ỹínangi w̃áá véle w̃a.

⁷Wú híya véle lɔ náá ngáá tɔmaséi sítii faaw̃a ti lángɔ ngáá Jísu Kílisitii tí Mɛsedóniya lataí h̃u ɛ́ɣɛ Akáya lataí h̃u ngáá tiyá bɛ́lɛ ti ɣɛ́ taá ngí híí ɣɛ.

⁸Sífaa, wú híya velé vándai í kɛ́a ngáá háwu keela wói kɔwɔ́ato Ndemɔí Jísu wa áá gɛɛlɛngɔ́ nɔ́ɔ léi Mɛsedóniya ɛ́ɣɛ Akáya lataítii su, kɛ́ í híyanga hááli hááli ỹandá kpɛ́lɛɛ. Wú lángi wú su ngáá Ngalá maa woo i híyanga ndɔwɔlɔí h̃u kpɛ́lɛɛ, niỹá ɣéle p̃ɛ́ɛ́ nɛ́i mɔ́ɔ́ lo yɛpɛmá ti tá fíli ngéle kɔwɔ́ato wú lángi wa.

⁹Nungáitii kpɛ́lɛɛ tiyá lɔ́ɔ ndé kíya wú lókoheini ni wú ná h̃u ni vái wú yéle. Ná vólu, kíya wú vólu yáfengɔ kɔɔ kɔɔ́ ŋániaitii mba nungáá taa ti yeɣé ngáá ngalángaa wú pɛ́lɛ Ngalá fɛ́li ma, lɛ́i ngilaá kpé í ngáá tɔɔỹaá Yálangi laáva ndɛɛh̃u í su.

¹⁰Tiyá lɔ́ɔ ndé múl̃ɔ ngáá kíya wúwaa ngi H̃íỹɛndou Loí Jísu w̃áálɛlɛ náa, lɛ́i Ngala ngí mbuyoɣéni sái h̃u, ngáá í gúla ngelegóóh̃u í va. Ngi H̃íỹɛndou Loí ná vá tɔ í mú wumááwongɔ faa bá mai yáa Ngalá ngáá vá ndáma nuu kpɛ́lɛɛ má ti háá ỹɔítii faaw̃a.