Read Bandi TƐSALÓNIKA HESENDAA GƆLƆÍ 3 Bible Online

TƐSALÓNIKA HESENDAA GƆLƆÍ 3 - Bandi bible

TƐSALÓNIKA HESENDAA GƆLƆÍ 3

¹Ngapúmai náa tɛ́ɛ́lɛ ni lii ɛ́i béle mɔ́ɔ́ longá, faalɔ, ní súúbatɛni ngáá niỹa léé léé ni ló Átɛ taa h̃u.

²Aáva mu mbála Yála fɛ́li mɔ́i Tímoti, lɛ́i naá tiyéni náa yénge Ngalá mbɛ́ Ngalángi gééla woo vandaí léndai h̃u kɔwɔ́ato Kílisitii wa, ní tɔ́veni wú yéle. Ní tɔ́vei ngáá í wú lííwuulɛ, í kɛ́ ngáá háwu wú h̃uu í bá wú lángi h̃u.

³Ni ná ɣɛ́i kɛinɔɔ́ faa bángai sítiini tálaa kɛ́ ngáá háwu wú tá fíli wɔ́ɔ́ liiỹááni Ngalá fái h̃u ngáá wɔ́ɔ́ yángaima vólu. Wá gíte wú suuwɔlɔ́ ngáá faa báma lááliai sítiini tiyá lɔ́ ngáá Ngalá túw̃ama h̃u háá a mu haáw̃a.

⁴Ná nɛ́nɛ ní ɣɛ́i wú lóów̃a, ní ndéi wú w̃á naa lúwɔ ngáá faa báma lɔɔ vá láma mu w̃a. Aáva kɛ kíya nɔ́ɔ wú kɔ́lɔ wá gíte kpál̃au ngimɔ́ɔ́ nɔ́ɔ jɔ́ í ɣɛ́ngɔ.

⁵Háwui ná vá tɔ í kɛ́ngɔ ngí Tímoti lɔvéngɔ wú yéle ngáá í vá í tɔ́ kíya wú lángi ɣɛ́ kíli í na sí h̃úi, sífaa ndíí ɛ́i belé mɔ́ɔ́ lónga. Ngí ɣɛ́ngɔ ngáá gísiya ngáá tɛ́ingaa suugɔvɔ́ mɔ́i Setána aa ɣɛ wú h̃úúgɔvɔnga aáva wáá ɣɛ́ bengá Ngalá fái wa. Ná ná vá ngɔ́ɔ́ ɣɛ́, kɛ ní yéngengi kpɛ́lɛɛ kulasuunúma fíli ɛ́i béle mɔ́ɔ́ ɣɛ́ su.

⁶Kɛ́ Tímoti vá i yangáimanga vólu ni yelé ngáá wú w̃áá woo vánda ná wáá ngáá, ndangí lɔ́ wú h̃u ɛ́ɣɛ ndongí. I ndengɔ́ ní w̃a ngáá ni gísiya lɔ nɔ́ɔ wú w̃á hɔ́wɔ fíli aáva wú lóngɔɔ lé gíte wú ni héi heí, kɛ kíya nɔ́ɔ ni longɔ́ niỹa bɛ́lɛ ni wú héi heí.

⁷Faalɔ, mu mbála Yalá fɛ́li mbélai, ni háá bamaí kpɛ́lɛɛ sú ɛ́ɣɛ ni w̃áánɔw̃ɔi, ndangí í wú h̃ú i ni liiwúúlɛnga.

⁸Aa lɔ́ ngáá ta báhangɔ ni lɛ́ɛ́h̃ui wa ngáá ní mɛ́ningɔ ngáá kɛ wáa lɔ́ɔ ndi ngu ma ngáá kpahaíi wu su Ndemɔí Jísu wa.

⁹Naá sɛ́ɣɛɛ gula nɔ́ɔ Ngalá ma ngwala wú hááw̃a. Kíya fíli naa ɣɛ́ naá fɛ́li, ni góóh̃unɛɛngɔ áá ɣɛ́ la kɔwɔ́ato wú wa. Faalɔ, naá sɛ́ɣɛɛ gulá ma náá hááw̃a.

¹⁰Foló bɔ́ngɔ kpíndi wa naá ɣɛ́ naá Ngalá fɛ́li ngáá hɛmbɛ́ kpɛ́lɛɛ ngáá í kɛ ngáá háwu kái á mu w̃ɛ́ɛ́ ỹanda yílaa, kɛinɔɔ́ sí fíli áá kɛ wú h̃úú í ba wú langí h̃u ngwála ni ná ɣɛ.

¹¹Bɛlɛ́ mú Kɛ́ɛ́ɣɛ Ngála kpútei ɛ́ɣɛ mu Lemɔ́i Jísu ti kɛ kái ngáá háwu ni vá ni wú héi heí.

¹²Bɛlɛ́ mu Lemɔ́i Jísu í kɛ kái ngáá háwu wú lóngi ỹɔw̃ɔ́ ỹɔ́w̃ɔ hááw̃a ɛ́ɣɛ nuu kpɛ́lɛɛ nga ngí ɣɛ nɔ́ɔ áá ɣɛ́ wɔ́ɔ́lɔ kélei. Aáva nga ngí ɣɛ́ wɔ́ɔ́lɔ kái í híti ni ndá lóngi h̃u ní su ngáá wú yé.

¹³Bɛlɛ́ í kɛ ngáá háwu wú h̃úu í bá kpé, kɛinɔɔ́ faa ỹɔ́u fíli ɛ́ɣɛ tɔmbema w̃áá fíli álaa ɣɛ́ wú wa mu Kɛ́ɛ́ɣɛ Ngála ngááh̃u folói ná w̃a mu Lemɔ́i Jísu áá vá vaama ma taá ngi w̃álekaitii.