Read Bandi TƐSALÓNIKA HESENDAA GƆLƆÍ 5 Bible Online

TƐSALÓNIKA HESENDAA GƆLƆÍ 5 - Bandi bible

TƐSALÓNIKA HESENDAA GƆLƆÍ 5

¹Mu mbála Yalá fɛ́li mbélai, sí náá áá li í to Ndemɔí Jísu vaa holói ná wa ɛ́ɣɛ maa l̃áingi nɛ́i mɔ́ɔ lo kɔlɔ vɔ́nɛma wú yéle kɔwɔ́ato ná wa,

²sífaa, wá gíte wú súúwɔlɔ nɔ́ɔ ngáá Ndemɔí Jísu vaa gilíi gúlangɔɔ lé nɔ́ɔ ngáá kíya ŋuỹá w̃ɔ́i áá ɣɛ́a vá ŋúỹai wóma ngáá kpindíi wɔ́i ɣɛ́ faa wɔ́lɔ mba.

³Nungáitii taá ló nɔ́ɔ ndemá ngáá kɛ ti liihéingɔɔ lé ɛ́ɣɛ faa áa ti wa ngeleí sí wu, kɛ faa báma wálai áá ti ɣɛ kíli ỹaaní i yeingá ti w̃a aáva ti véla w̃aá ɛi ɣɛ lá mba kpósouŋ. Maa hái aa ɣɛ́ nɔ́ɔ ngáá ndoú lé kóóh̃ubaalɛi áá gɔ́ɔ́la koo ỹah̃ái wa.

⁴Mu mbála Yalá fɛ́li mbélai, wáá ngáá sítii kɛ kíli taá Ngala kɔ́lɔ, ti ngáá kpindi bindí súú háá ɣɛ mbélaa, faalɔ, kule áá ma Jísu vaalái sí ɔ́ɔ́ gɔ́ɔ́la wú wa kíya nɔ́ɔ ŋuỹá w̃ɔ́ɔ́ áá gɔ́ɔ́la nuu wa.

⁵Kɛ́ wá lɔ́ ngáá nungáá wu kala kala ma, ná wáá ngáá, wú lúva veléi yakɛngɔ́ɔ́ lé kpál̃au. Maa ngáá sítii kɛ kíli taa Ngala kɔ́lɔ ti ngáá kpindi bindí súú háá ɣɛ mbélaa.

⁶Faalɔ, a málaa ɣɛ́ ngáá nungái sítii kɛ kíli, ti ɣɛ kíli gulangɔ́ ngáá nungáá taá ɣɛ́ ỹíí h̃u. Kɛ́ a mu ɣɛ́ yááh̃u húluya, aáva mu ɣɛ́ bɔwɔ́ h̃úúhou kíli wɔlɔ́.

⁷Sítii taa nyíi, táa nyíi ngáá kpindíi, aáva sítii táa ɣɛ́ ndɔɔ hoú h̃u, taa ɣɛ́ ndɔɔ hoú h̃u ngáá kpindii.

⁸Kɛ́ ná a muỹɛ́i mu ngáá kala kala ma yélaa, a mu ɣɛ́ maá h̃úúhou w̃a. Ndangí ɛ́ɣɛ ndóngi tí ɣɛ́ mu h̃u kíya nɔ́ɔ sóya w̃ɔí áá ŋáni vɛ́lɛ gaka h̃u naa w̃ááh̃u belé fááw̃a. Ná vólu, a mu gitóngɔ í ɣɛ́ lá a mú wúmaawongi wa Ngalá ngáá fé mu yaá kíya nɔ́ɔ sóya w̃ɔí áá kɔlu wɔɔlɔí vɛ́lɛ wú mba.

⁹Bɔw̃álale, Ngála ngáá mú yéɣengɔ ngáá ngí vóngaa ngáá kɛinɔɔ́ ɔ́ɔ́ ngí háá bama lá mú w̃a mú háá ỹɔítii fááw̃a, kɛ́ aá ɣéle, i ná ɣɛ́ngɔ ngáá kɛinɔɔ́ a mú ngúmaawongi w̃ááhɔlɔ mu Lemɔ́i Jísu Kílisitii w̃áá véle w̃a.

¹⁰Jísu í haangɔ́ mu haáw̃a ngáá kɛinɔɔ́ ná áá vá bele pá a mu háángɔɔ lé ɔɔ a múỹa lɔ ndɛɛh̃ú h̃u, a mu ɣɛ́ lóów̃a a maá tiyéni ndɛɛh̃ú h̃ú.

¹¹Faalɔ, a ỹɔw̃ɔ́ ỹɔ́w̃ɔ liiwúúlɛ, wú bɔ ỹɔw̃ɔ́ ỹɔ́w̃ɔ wa wú h̃úú í bá Ngala fái h̃u kíya nɔ́ɔ p̃ɛ́ɛ́ wúwaa kɛ.

¹²Mu mbála Yalá fɛ́li mbélai, wú w̃áánɛɛnɛngɔ gítee le ngáá wú ɣɛ́ wáá wúfe sítiini ma tíwaa Ngalá ngéngengi wo wú lííwaa, sítii Ngalá ngí lókolonga ti wa ngáá wú wútuwɔai tiyɛ́i taa ɣɛ́ taa wú lááhi.

¹³A ti h̃úúhou ngáá ngufema wála ndó su kɔwɔ́ato ti yénge tokoí wá wú lííwaa. Wálaa ɣɛ́ kpɔɔlɔ w̃ááh̃u kɛ́ ndiiheí í ɣɛ́ wú lííwaa.

¹⁴Mu mbála Yalá fɛ́li mbélai, niỹá lɔ́ɔ́ ndé wú w̃á gíte ngáá sítii taa ɣɛ́ nɔ́ɔ héi gbááma tɛ́i ɣɛ́ lói ti lóko ɔ́ɔ́ ɣɛ́ faa fíli mbá, wú tí laahí, ti bé ná wa. Wú sítii ndiibá nduwá ndúwa ngáá ɣɛ́ tí h̃u. Sítii pa ngákpa ngɛ́i ɣɛ́ ti yɛ, wú bɔ́ ti wa. Wú líílɔlɔngɔ í ɣɛ́ lá nuu kpɛ́lɛɛ ngéya.

¹⁵Wálaa ló ná nuu fíli ɔ́ɔ́ faa ỹɔ́u vóto kúla ngáá fáá ỹɔ́u ɣɛ́ndaa, kɛ́ aá ɣéle, wú ɣɛ́ hɔ́wɔ fíli wáá faa bɔ́wɔ ɣɛ ỹɔw̃ɔ́ ỹɔ́w̃ɔ yɛ́ ɛ́ɣɛ nuu kpɛ́lɛɛ mbɛ́.

¹⁶Wú góóh̃unɛɛngɔ í ɣɛ la hɔ́wɔ fíli

¹⁷aáva wú ɣɛ́ nɔ́ɔ fɔ́ wáá Ngala fɛ́li.

¹⁸Wááyaa sɛ́ɣɛɛ gula Ngalá má faa híí fíli su nɔ́ɔ sífaa, ná lɔ́ Ngalá ndóngɔ lá wú yaa kpahaíi wa wú su Jísu Kílisitii wa.

¹⁹Wálaa lókola Hɛ́ɛ́ma Ỹínangi lúwɔ ngi yéngengi h̃u.

²⁰Wáálaa tókohiya ngu maah̃ú háá ɣɛ́ ngáá Ngalá kééla wói Ngalá ndaa háá lé mbélaitii taa ndé,

²¹kɛ́ waayaa faa kpɛ́lɛɛ ngásɔbɛ ngáá pángɔ sí áá ɣɛ́ pele w̃a, wú ɣɛ́ ná wa.

²²Aáva sí fíli ɛ́i ɣɛ́ pele w̃a, wú bé ná wa.

²³Bɛ́lɛ kái Ngalá kíte lɛ́i áá ndiihéi he nuu yɛ́ í wú w̃ááw̃uỹa fó, faa ỹɔ́u fíli álaa ɣɛ́ wú h̃ú pele fíli su. Í mɔ́ɔ kɛ́ kái ngáá háwu wú gísiyai, wú h̃úúyafuw̃angi ɛ́ɣɛ wú búsai tɔmbéma w̃áá fíli álaa ɣɛ́ ti tá fíli mbá folói ná w̃a a mu Lemɔ́i Jísu áá vá vaamá ma.

²⁴Laáva lɛ́i í wú lólingɔ, aá lɔ́ ngáá tókola ma w̃ɔ́ɔ, faalɔ, aá lɔɔ ná ɣɛ.

²⁵Mu mbála Yalá fɛ́li mbélai, a waayaa Ngala fɛ́li ni haáw̃a.

²⁶Ni há mú mbála Yalá fɛ́li mbélaitii kpɛ́lɛɛ má ngáá ndiiwolé.

²⁷Nyá lɔ́ɔ nde náá wú w̃a Ndemɔí Jísu laahéingi h̃u ngáá wú kɔlɔí sí gála a mu mbála Yalá fɛ́li mbélaitii kpɛ́lɛɛ kákala.

²⁸Bɛlɛ́ mu Lemɔ́i Jísu Kílisitii háá bɔwɔí í ɣɛ́ wú kpɛ́lɛɛ mbɛ́.