Read Bandi TƐSALÓNIKA GƆ́LƆI HELE KÉLEI 1 Bible Online

TƐSALÓNIKA GƆ́LƆI HELE KÉLEI 1 - Bandi bible

TƐSALÓNIKA GƆ́LƆI HELE KÉLEI 1

¹Nyɛ́i ngí ngáá Pɔ́ɔ í báha Sáilɔ wa ɛ́ɣɛ Tímoti, niỹá lɔ́ níwaa kɔlɔí sí vɔ́nɛ wú yéle wɛ́i wú ngáá Ngala fɛ́li mbélai taí sí h̃u taá náá lolí ngáá Tɛsalónika, wɛ́i wú mu Kɛ́ɛ́ɣɛ Ngalá fááw̃a ɛ́ɣɛ mu Lemɔ́i Jísu Kílisitii.

²Bɛlɛ́ mu Kɛ́ɛ́ɣɛ Ngalá ɛ́ɣɛ mu Lemɔ́i Jísu Kílisitii ti háá bɔwɔí ɛ́ɣɛ ti lííhei tí ɣɛ́ wú yɛ́.

³Mu mbála Yalá fɛ́li mbélai, kule lɔ nɔ́ɔ ni w̃a ni ɣɛ́ fɔ́ naa sɛ́ɣɛɛ gula Ngalá má wú hááw̃a. Aá lɔ́ pele w̃a ngáá ni ná ɣɛ́ bɔw̃álale, ndangí í wú h̃u Ngalá fááw̃a suu lɔɔ ɣɛ́ nɔ́ɔ wɔ́ɔ́lɔ. Ndongí vá í wú yíla ngílangi fíli su nungáá vékaitii faaw̃a nga tɔ́ɔ ɣɛ́ nɔ́ɔ wɔ́ɔ́lɔ kélei.

⁴Ná lɔ́ í kɛ́nga naa ɣɛ́a wú w̃aayónga téve Ngala fɛ́li mbélaa vekaítiini ma. Niỹá lɔ́ɔ yónga téve kɔwɔ́ato ndiibángi wá ɛ́ɣɛ ndángi wá wú su ngáá Ndemɔí Jísu, wáá ndi ngu ma kíya bɛ́lɛ nungáá táá faa bángi sí kpɛ́lɛɛ ndá wú w̃a ɛ́ɣɛ maanɔw̃ɔ́itii wúwaa ngéɣe.

⁵Sí vá tɔ́ áá maa hái yákɛ kpál̃au ngáá kɛ Ngalá ngɛ́i faa wááleve káha véle w̃a. Aáva maanɔw̃ɔ́i sítii kpɛ́lɛɛ wúwaa ngeɣé faaw̃a tiyá lɔ́ taá kɛ wú ɣɛ́ kulaɣɛí ngáá nungáá ngi w̃ásandai wú.

⁶Sí í péle w̃a, laá lɔ Ngalá ngáá vá kɛ́ma. Aá lɔɔ vá maanɔw̃ɔ́ vúma sítiini ma táá kɛ ngáá háwu wú w̃áá íwaa nɔ́w̃ɔ.

⁷Aáva wɛ́i wúwaa w̃áánɔw̃ɔ, aa wú gúla wú w̃áánɔw̃ɔi h̃u niỹá bɛ́lɛ nɔ́ aa ni gúla ni w̃áánɔw̃ɔi h̃u. Aá lɔɔ vá sí ɣɛ́ma ná Ndemɔí Jísu áá gúla ngelegóóh̃u í va taá ngi w̃áleka yakpangɔ́ wálaitii ngɔmbu hó ngwálai h̃u.

⁸Aá lɔɔ vá sítii maanɔw̃ɔ́ma taa béɣei Ngala fááw̃a, tiyɛ́i tɛi híya ngáá Ngala kééla wói kɔwɔ́ato mu Lemɔ́i Jísu wa.

⁹Maanɔw̃ɔí sí kɛɛlɛ́ ngáá mbá kúnafɔ aá lɔ́ Ngalá ngáá vá tí vílima su aáva ti betévengɔ aa ɣɛ lá Ndemɔí Jísu wa ɛ́ɣɛ ngí yákpa maanɛɛnɛɛ ngwálai wa.

¹⁰Ná áá ɣɛ́ fóloi ná w̃a Ndemɔí Jísu áá gúla ngelegóóh̃u í vá ngeleí sí wu, sítii kínɛi ti ngáá ngi vóngaitii taá ndaaw̃áálɛ. Ná wáá ngáá, sítii kínɛi ti langɔ lá taá ngúfema hé mbɛ. Wá bɛ́lɛ pá wáá ɣɛ́ ngáá nungái nátii tí tá bɔw̃álale, wú lánga ngáá keela wói ní ndéngɔ wú w̃a kɔwɔ́ato Jísu wa.

¹¹Ná lɔ́ í kɛ́nga hɔ́wɔ fíli naa ɣɛ́ náa Ngala fɛ́li wú hááw̃a ngáá Ngala ngí kɛ ngáá háwu wú gɛ́ɛ́ haítii ɛ́ɣɛ wú híya veléitii tí ɣɛ́ ngáá kíya Ngala ndóngɔ tí ɣɛ́ na. Niỹá lɔ́ɔ Ngala fɛ́li múl̃ɔ ngáá Ngalángi yákpangi i kɛ́ ngáá háwu sí kínɛi í wú gí ma ngáá faa vánda wú hómbo wú tí ɣɛ́. Í mɔ́ɔ kɛ ngáá háwu fái sítiini pa wúwaa ti ɣɛ wu lángi w̃áá véle w̃a, nátiini ngu ngí gúla.

¹²Ná vá tɔ áá kɛ mu Lemɔ́i Jísu laaw̃áá í lɛ́ wú w̃áá véle w̃a, wá bɛ́lɛ wú lááw̃aa í lɛ́ maa véle w̃a. Nátii taá ɣɛ́ nɔ́ɔ bɔw̃álale mu Yálangi ɛ́ɣɛ Ndemɔí Jísu Kílisitii tiyá lɔ ngáá faa bɔ́wɔ yelaa.