Read Bandi TƐSALÓNIKA GƆ́LƆI HELE KÉLEI 3 Bible Online

TƐSALÓNIKA GƆ́LƆI HELE KÉLEI 3 - Bandi bible

TƐSALÓNIKA GƆ́LƆI HELE KÉLEI 3

¹Mu mbála Yalá fɛ́li mbélai, ngapúmaa haí waa náá ngáá sí, waayaa Ngala fɛ́li ni haáw̃a ngáá keela wói kɔwɔ́ato Ndemɔí Jísu wa í híya hiyá hááli ngáá maahulángɔ, aáva nungáá tí wúfe ma kíya nɔ́ɔ í ɣɛ́i wú ndái h̃u.

²Ná vólu, wú mɔ́ɔ ɣɛ́ wáá Ngala fɛ́li ni haáw̃a ngáá kɛinɔɔ́ Ngala ngí ní w̃ááh̃u béle faa ỹɔ́u ɣɛ́ mbélai ngeyá ɛ́ɣɛ nyaama yélaitii ngeyá, sífaa, nuí kpɛ́lɛɛ táá le yɛɛ́ tɔɔ ɣɛ́ lái ngáá Ndemɔí Jísu geela woí.

³Kɛ́ Ndemɔí Jísu va aá lɔ́ ngáá tokolá má w̃ɔ́ɔ́, aá lɔ́ɔ́ wú lííwuulɛ, í wú w̃ááh̃u béle faa ỹɔ́i yaa.

⁴Mu Lemɔ́i Jísu i kɛ́a ngáá háwu ni langɔ́ɔ́ lé lá ngáá wá lɔɔ sítii kɛ ní ndéngɔ wú w̃a ngáá wú ɣɛ́ wáá tí ɣɛ́ aáva wá lɔɔ́ ndí ngu ma ngáá ti ɣɛndáá.

⁵Bɛlɛ́ Ndemɔí í kɛ ngáá háwu wú ɣɛ́ Ngalángi lóngi wɔ́lɔ ɛ́ɣɛ wú ndí ngú ma ngáá ndiibángi Kílisitii áá kɛ́ ngáá háwu wáá maahɔ́lɔ.

⁶Mu mbála Yalá fɛ́li mbélai, niỹá lɔ́ɔ fái sí lé náa wú w̃a ngáá ndaahí ngóó bikpi Ndemɔí Jísu Kílisitii laahéingi h̃u ngáá sítii taa ɣɛ́ héi gbááma wú lííwaa tɛi ɣɛ́ lói tɔ́ɔ faa vaá fíli mbó ɛ́ɣɛ sítiini tɛí ɣɛ́ taa híya ngáá fái sítiini ní tí lengɔ́ wú w̃a, waa bɔ́ faa fíli má wáá tiyéni.

⁷Wá gíte wú súúwɔlɔ kpál̃au ngáá kule lɔ wú w̃a wú ɣɛ́ wáá sítii kɛ ni ɣɛ́ngɔ naá tí ɣɛ. Naá sáɣa gúlani ná h̃ú ni ɣɛ́i wú lóów̃a.

⁸Nuu fíli áá faa ɣɛ́ni ni yɛ yɔ́ɔ́ ɣɛ́ naá sɔ́w̃ɔ hení, kɛ́ laá ɣéle, ni ɣɛ́i naa yénge gíte ngwala folóni ngaa kpindí. Ni ɣɛ́i nɔ́ɔ́ fɔ́ naa yénge ngáá kɛinɔɔ́ ni háá ɔ́ɔ́ vá ɣɛ́ wú tá fíli mbá.

⁹Taá ɣɛ́i aa ɣɛi pele w̃a ngáá nɔɔ́ ni beɣéma wɔ́lingaitii maahɔ́lɔ wú yáa. Kɛ́ ní ná ɣɛ́i ngáá kɛinɔɔ́ ní ɣɛ́ ngáá tɔmaseí wú hááw̃a.

¹⁰Ná ni ɣɛ́i wú lóów̃a, ní ndéni wú w̃a, ni ɣɛ́ ta, “Nuí fíli ɛ́i ɣɛ́ yéngeni, maa w̃ɔ́i álaa lááỹɛ.”

¹¹Niỹá lɔ́ɔ ná lé bɔw̃álale, ní mɛ́ningɔ ngáá nungáá lɛ́ingaa lɔ́ wú h̃u ti ngáá saɣá yélaa, tɛ́i faa fíli kɛ kɛ nɔ́ɔ́ ti vílindaa nungáá hááni su.

¹²Niỹá lɔ́ɔ ndé gíte Ndemɔí Jísu Kílisitii laahéingi h̃u ngáá ndaahí ngóó bikpi nungái sítiini ma, maanɛɛnɛ́ su ngáá ti héi ngáá ti ɣɛ́ taa yénge kɛinɔɔ́ ti háá í ɣɛ́ bɔ́wɔ wa.

¹³Kɛ́ mu mbála Yalá fɛ́li mbélai, wálaa bɔ́lɔ ngáá fái sítii kɛ́ndaa tí péle w̃a.

¹⁴Ná nuu fíli áá ɣɛ́ na ɛ́i híya ngáá fái sítiini ní pɔ́nɛngɔ kɔ́lɔi sí h̃u, a gindó maa w̃ɔ́i h̃u, wálaa báha kpahá mba kɛinɔɔ́ í wúfe.

¹⁵Kɛ́ ná fíli su, wálaa ngéɣe ngáá waahílima w̃ɔ́ɔ́, kɛ́ aá ɣéle, a ndaahí kíya nɔ́ɔ wú mbála Yála fɛ́li mɔ́ɔ́ í na.

¹⁶Bɛlɛ́ Ndemɔí Jísu bútei, lɛ́i mu lííhei áá tɔkúla héi mba, í kɛ́ ngáá háwu ndiiheí í ɣɛ́ wú yɛ kúnafɔ pele fíli su nɔ́ɔ, ná vólu, í ɣɛ́ kái wú vólu wú kpɛ́lɛɛ.

¹⁷Sí nyá gíte ngáá pɔ́nɛ ngáá bɔwɔ́ lóko, aá wáa ngáá sí, nyɛ́i ngí ngáá Pɔ́ɔ, ngí há wú w̃a. Ngimɔ́ɔ́ ngáá laahéingi vɔ́nɛ kɔlɔí kpɛ́lɛɛ sú ngáá pɔ́nɛ.

¹⁸Bɛlɛ́ Ndemɔí Jísu Kílisitii háá bɔwɔí í ɣɛ́ wú kpɛ́lɛɛ mbɛ́.