Read Bandi TÍMOTI HESENDAA GƆLƆÍ 2 Bible Online

TÍMOTI HESENDAA GƆLƆÍ 2 - Bandi bible

TÍMOTI HESENDAA GƆLƆÍ 2

¹Sí ngáá ɣɛ́ ngí ndé í w̃a hése aá wáa ngáá, waayaa Ngala fɛ́li nuu kpɛ́lɛɛ fááw̃a, wú béɣema gɔ́lingaitii ɛ́ɣɛ faá vékaitii kpɛ́lɛɛ. Ná vólu, waayaa sɛ́ɣɛɛ gula Ngalá má.

²Wú Ngala fɛ́li ndɔwɔlɔ w̃ásangaitii mbɛ́ ɛ́ɣɛ tóów̃aa mba yélai kpɛ́lɛɛ kɛinɔɔ́ mú lɛ́ɛ́h̃ui h̃uuhíya lɛ́i lɛ́i ndiiheí h̃u, kɛinɔɔ́ mu ɣɛ́ maá fáitii kɛ Ngalángi lúwambai h̃u ɛ́ɣɛ ngufema véle h̃u.

³Sí vángɔɔ lé, aáva aa Ngalá ndíílɛi, lɛ́i í ngáá mu Wumááwo Mɔ́i.

⁴Ngalá pa ndongɔ́ɔ́ lé nuu kpɛ́lɛɛ tí ngúmaawongi w̃ááhɔlɔ, ti ɣɛ́ tɔɔỹái wɔlɔ́.

⁵Ngalá ngí yíla kpé aáva nuu yílaa tɔ áá kɛ́ ngáá háwu nuu lówah̃u áá bátɛ wáá Ngalá, nuí ná vá mbaa ngáá Jísu Kílisitii lɛ́i laá gíte í ngáá nuu búsa.

⁶Jísu va i lɛɛh̃úi gúlai kɛ́lɛma kɛinɔɔ́ nuu kpɛ́lɛɛ ngúmaa í wo faa ỹɔ́i yaá. Kpɔwɔ́ lɛ́ɛ́h̃ui sí i kulaí kɛ́lɛma ngáá saáɣa kuí kái kái má, laá lɔ́ í ngákɛi kpál̃au ngáá kɛ Ngalá ndóngɔɔ lé nuu kpɛ́lɛɛ ngúmaa í wo.

⁷Ná vá tɔ í kɛ́ngɔ Ngalá ngí tɔ́vengɔ ngáá Jísu Kílisitii gééla, ɛ́ɣɛ kalambo mɔ́ɔ́ nungái sítii fááw̃a taá ngáá Júsua, ná vólu, ngí kééla woó vándai lé kɔwɔ́ato ndangí wa nuu áá ɣɛ́ su ngáá Jísu Kílisitii ɛ́ɣɛ tɔɔỹái kɔwɔ́ato mba. Ndɛɛ láá le ngɔ́ɔ́ ɣɛ́ ngáá kɔ́ɔ́la, sí ngíwaa nde aá lɔ́ ngáá tɔɔỹaá.

⁸Ngala fɛ́limaa fíli, ndóngɔɔ lé siỹɛngáá taayaa Ngala fɛ́li na tiyɛ́i ti gúlangɔ kɛ́lɛma Ngalá mbɛ. Aáva taá lóko lɛ ngeleya Ngala fɛ́lindaa h̃u ngáá ɛi ɣɛ́ ngáá ndiibandí ɔɔ ndaahasá w̃ááh̃u.

⁹Ngáá ɣɛ́ loí nyah̃áitii taayáá w̃aayíli nɔ́ɔ kulo. Tálaa ngufe tála gula yíli w̃a. Tálaa ɣɛ taá ngu gɛ́vɛlɛ kɛvɛlɛ kpatɛ́ wú mba kɛlaa tɔɔ́ ɣɛ́ taá góóli wɔlingaa yilí w̃a. Tálaa ɣɛ́ taá kula h̃ɔ́w̃ɔ bangɔ́ni ngilí w̃a.

¹⁰Kɛ́ laá ɣéle, ti w̃ááyili walaí í ɣɛ́ ngáá tuva velé vándaitii táá ɣɛ́ ti h̃u kíya kule áá ɣɛ́ nyah̃ái sítii ma taa ɣɛ́ ta tiyá lɔ ngáá Ngala fɛ́li mbélaa taá kɛ.

¹¹Kule lɔ́ nyah̃áitii ma tí w̃ááɣɛngɔ í ɣɛ́ la ló kalambo mááhɔlɔma aáva ti gulángɔ í ɣɛ la kɛlɛ́ma kaamɔítii mbɛ.

¹²Ngɛ́i lúw̃a má ngáá nyah̃áitii tɔ́ɔ ɣɛ́ ngáá siỹɛngáá gálambo mbélaa Ngala fái h̃u ɔɔ ngakpá ngí ɣɛ́ ti yaá ti w̃ááh̃u, kɛ́ ti w̃ááɣɛngɔ í ɣɛ́ la ló Ngalá fɛ́limai,

¹³sífaa, Ádau hése tɔ Ngalá ngí kpátɛi ɔ́ɔ́yaa nyah̃ái Íífi batɛ́.

¹⁴Aáva Ádau aa ɣɛi lá Setána ɔ́ɔ́ ngakpólowa kɛ́ nyah̃ái lɔ Setána í ngakpólowai, í Ngalángi hávai ỹááni.

¹⁵Kɛ́ ná nyah̃ái áá ndí ngu ma ngáá ndangí áá ɣɛ́ sú ngáá Jísu Kílisitii, ná vólu, í ló ngáá ngi mbála Yalá fɛ́li mbélaitii, aáva tɔmbema w̃aa fíli ɛi ɣɛ́ mba, íwaa bɔ́wɔ h̃uuhóu w̃a, kɛ ngumáá áá wó ndou léndai w̃aa véle w̃a.