Read Bandi TÍMOTI HESENDAA GƆLƆÍ 3 Bible Online

TÍMOTI HESENDAA GƆLƆÍ 3 - Bandi bible

TÍMOTI HESENDAA GƆLƆÍ 3

¹Sí ngáá vá ndéma áa lɔ́ ngáá tɔɔỹaá wóo. Nuí fíli naa w̃ɔní áá ɣɛ́ ma ngáá í ɣɛ́ ngáá ngutuwɔ́ w̃ɔ́ɔ́ Ngala fɛ́li mbélaitii mááh̃u, kɛ i ngenge pánda w̃ɔ́ni ɣɛ́a.

²Ngala fɛ́li mbélai ti wutúwɔɔ w̃ɔ́ɔ́ fíli kule lɔ ma í ɣɛ́ ngáá nuu tɔmbema w̃áá ɛ́i ɣɛ́ mba faa fíli su. I ɣɛ́ ngáá nyah̃á yílaa mɔ́ɔ́ nɔ́ɔ. Í ɣɛ́ ngáá nuú ngáá áá faa yátɔ mbá, ná vólu, í ɣɛ́ ngáá nuu áá hómbo í h̃úúhou w̃a faa fíli su aáva ngufema í mbɛ faa fíli su. Ná vólu, í ɣɛ́ ngáá nuú áá lókohei sotángaa wu ngi vɛ́lɛ lowaí wu, i ɣɛ́ ngáá nuu ngáá áá hómbo i kalambo mbó.

³Ngala fɛ́li mbélai ti wutúwɔɔ w̃ɔ́ɔ́ álaa ɣɛ́ ndɔɔ hoú h̃u, ɔɔ ɔ́ɔ́ ɣɛ́ ngáá ndapi gúla mɔ́ɔ́. Kɛ́ laá géle, í ɣɛ́ ngáá nuu kɛngɔ́ áá ɣɛ́ la lúúỹaa. Álaa ɣɛ́ ngáá ndaahasá w̃ɔ́ɔ. Álaa ɣɛ́ ngáá nuú naholó háá vílingɔ ɔ́ɔ́ ɣɛ́ lá ndii vólu.

⁴Maa w̃ɔ́ɔ́ í ɣɛ́ ngáá nuú ndehé áá ɣɛ́ ngí vɛlɛ lowaí wúú w̃a ngáá pangɔ́, ná vólu, ngi léngai kolóngɔ í ɣɛ́ lá mbɛ táa ngufema hé mbɛ hɔ́wɔ fíli.

⁵Ná núi lehé ɛí ɣɛ́ ngí vɛ́lɛ lowaí wúú w̃a, aa ɣelé hómbo náa í Ngala fɛ́li mbélaitii maah̃ú béle.

⁶Maa w̃ɔ́ɔ́ álaa ɣɛ́ ngáá nuu áá ɣɛ́ vílii Ngala fɛ́li fái h̃u nɔ́ɔ ngáá niina, sífaa, ná áá ɣɛ́ ngáá náá w̃ɔ́ɔ, aa bɔwɔ́ h̃uu ɣɛ́ wɔ́ɔ́lɔ ngwala aáva Ngalá ngáá fáá bá ndá ma kíya nɔ́ɔ í ndái Ngutuwɔ́ Ỹína Nyɔí w̃a.

⁷Maa w̃ɔ́ɔ́ í ɣɛ́ ngáá nuu sítii kele tɔ tɛí ɣɛ́ ngáá Ngala fɛ́li mbélaa ngufema í ɣɛ́ tí yaá laá fááw̃a kɛinɔɔ́ ngá ngɔ́ɔ́ va wúfe Ngutuwɔ́ Ỹína Nyɔí ɔ́ɔ́ hómbo ma.

⁸Ngala fɛ́li mbélai ti bɔ́mba yélaitii bɛ́lɛ kɛ ngufema í ɣɛ́ ti gɛɛ háitii ma. Ti vɔɔnángɔ í ɣɛ la, ná vólu, tálaa ɣɛ́ ngáá ndɔɔ bɔ́le mbélaa walá aáva naholó háá vílingɔ álaa ɣɛ́ la ti lii vólu.

⁹Ti ndi ngu ma ngáá tí lókolangi taa ɣɛ́ su ngáá tɔɔỹái ti gi máá ɣéngɔ kpál̃au, ná wáá ngáá, tɔɔỹái Ngalá ngí ngákɛngɔ ngáá mu ye kɔwɔ́ato ndangí wa mú su ngáá Jísu.

¹⁰Tí wɔ́lɛ maa yélai ti lúva véleitii mba ɛ́ɣɛ ti gɛ́ɛ́ haítiini ná tɔmbema w̃áá ɛ́i ɣɛ́ ti ta fíli mbá, kɛ taa ɣɛ kulaɣɛ́i ngáá ti ɣɛ́ ngáá kpɔmba yélaa Ngalá fɛ́lindai h̃u.

¹¹Ti ỹáh̃aitiini kele tɔ kɛ ngufema í ɣɛ́ ti gɛɛ háitii ma, tálaa ɣɛ́ ngáá ndɛɛ vɛlɛ́ mbá yélaa. Ti ɣɛ́ ngáá nungáá taá fáa yátɔ mba, ti ngáá tokolá ma yélaa fáá kpɛ́lɛɛ su taá kɛ.

¹²Ngála fɛ́li mbélai ti bɔ́mba yelái ti ɣɛ́ ngáá nyah̃á yíla ngíla mbélaa aáva ti lehé í ɣɛ́ ti léngaitiini ɛ́ɣɛ ti vɛ́lɛ lowaí wu bɛ́lɛ ma ngáá pangɔ́.

¹³Sítii taá tí bɔ́mba yéngengi wó ngáá pangɔ́, ndaahéi pánda aa ɣɛ́ ti wa. Laáva taá hómbo ti yɛ́pɛ kɔwɔ́ato ti lángi wá taa ɣɛ́ su ngáá Jísu Kílisitii nduwá fíli ɛi ɣɛ́ tí h̃u.

¹⁴Kíya ngíwaa kɔlɔí sí vɔ́nɛ í yéle aá lɔ́ kí ma ngáá ngí vá ngí i héi heí h̃úmbuwa.

¹⁵Kɛ́ ná ngɛ́i ɣɛ́ vái h̃umbuwa, kɔlɔí sí lɔ ná ngáá í ngákɛ kíya kule í ma mú lúva veléi í ɣɛ na ná mú ngáá Ngala fɛ́li mbélaa. Ngalá lɛ́i ɛ́i há kúnafɔ, a múỹa lɔ́ ngáá ngi vóngaa. Muỹɛ́i mú ngáá Ngala fɛ́li mbélai múỹa lɔ ngáá kpɛndɛ kɛ kíli ngí lɔ́ɔ́ỹai wú, maá maah̃ú béle.

¹⁶Kindaa vilí tɔ́ɔ́ỹai Ngala ngí ngákɛngɔ kɔwɔ́ato sí wa mú lángɔ lá, nuu fíli ɛ́i w̃aaɣaali lá. Jísu Kílisitii i vaí ngeleí sí wu i ngáá nuu búsa. Hɛ́ɛ́ma Ỹínangi í ngákɛi kpál̃au ngáá faa ỹɔ́u fíli aa ɣɛi Jísu h̃u. Malékaitii ti tɔ́i. Aáva nungáá ti kééla wóo vándai léni kɔwɔ́ato laá mba híí kpɛ́lɛɛ má. Nungáá tí lá la ỹandá kpɛ́lɛɛ. Aáva í lɛní ngelegóóh̃u, i ɣɛ na ngáá masa Ngalá mba.