Read Bandi TÍMOTI GƆ́LƆI HELE KÉLEI 1 Bible Online

TÍMOTI GƆ́LƆI HELE KÉLEI 1 - Bandi bible

TÍMOTI GƆ́LƆI HELE KÉLEI 1

¹Nyɛ́i ngí ngáá Pɔ́ɔ, nyá lɔ ngáá Jísu Kílisitii gééla áá gúla Ngalángi háá h̃uubatɛ su. Ngalá ngí tɔ́vengɔ ngáá ngí ngi gúúlongi sí w̃áá heehé wo kɔwɔ́ato ndɛɛh̃úi sí wá a mu su kpahái wa a mú su Jísu Kílisitii wa.

²Nyá lɔ ngáá kɔlɔí sí vɔ́nɛ í yéle, Tímoti, yɛ́i yí ngáá ndíívo ndóu Ngalá fɛli fái h̃u. Bɛlɛ́ Kɛɛɣɛí Ngalá ɛ́ɣɛ mu Lemɔ́i Jísu Kílisitii ti háá bɔwɔ́i ɛ́ɣɛ tí yááh̃u w̃ááw̃aanui ɛ́ɣɛ tí lííhei tí ɣɛ́ í yɛ́.

³Ngáá sɛ́ɣɛɛ gula Ngalá ma lɛ́i ngáá yénge mbɛ kí máa yakɛ́ngɔ kpál̃au kíya ni káwalani ti kɛ́ni. Kíya fíli ngáá ɣɛ́a Ngalá fɛ́li folóni ngaa kpindí ngáá sɛ́ɣɛɛ gúla Ngalá ma í hááw̃a.

⁴Ná ngáá gísiya ngáá kíya yí ɣɛ́i yáá wɔ́lɔ, aa kɛ ngáá háwu í w̃ɔ́ni í sóu ngwala ngáá ngi í lɔ. Ná ngáá í lɔ, ná lɔ áá kóóh̃unɛɛ.

⁵Kí ngí lóngɔ tɔɔỹaá lángi h̃u yí su ngáá Jísu aáva maa lángi lɔ nɔ́ɔ í máma Lowe ɛ́ɣɛ í njéé Yúne ti ɣɛ́i su ngáá Jísu. Ngí kɔ́lɔ maa lángi vá tɔ nɔ́ɔ yáá ndi ngu ma la.

⁶Ná hááw̃a, ngenge tókoi Ngalá ngí féni í yáa ngáá yí mbo ná h̃u ngí lóko vɛ́lɛi i w̃á ngí Ngalá fɛ́li, ngáá ɣɛ́ loí yí ndí ngu ma ngáá maa yénge pandaí wóndaa.

⁷Hɛ́ɛ́ma Ỹínangi Ngalá ngí kɛ́ngɔ ngáá háwu í mú volú ɛi nduwá vú mu h̃u. Kɛ́ laá ɣéle, aa mu h̃úúba ɛ́ɣɛ í kɛ ngáá háwu ndo ngí ɣɛ́ mu h̃u í mɔ́ɔ kɛ ngáá háwu a mú bɔ́wɔ h̃úúhou w̃a.

⁸Ná hááw̃a, yálaa wúfe ngáá yɛpɛndáá kɔwɔ́ato a mu Lemɔ́i Jísu Kílisitii wa, kɛlaa yɔ́ɔ wúfe ngáá ní hái sífaa ngí kpíndi vɛlɛ́ wu bɔw̃álale nyá lɔ ngáá Kílisitii yénge mɔɔ. Kɛ́ laá ɣéle, í w̃ááhei wóngɔ í ɣɛ́ la yá bɛ́lɛ í nda w̃áánɔw̃ɔi yeɣé fááw̃a kɔwɔ́ato keela woó vándai lé fááw̃a aáva Ngalá ngáá i h̃úúba ngáá yí híya su.

⁹Ngalá ngí mu wúmaawongɔ, í mú lolí ngáá mu ɣɛ́ ngáá ngi vóngaa. Aa ná ɣɛ́ngɔ mu lúva velé vánda haaw̃a. Kɛ́ Ngalá ngí kpatɛí ngáá í sí ɣɛ́ kpɔwɔ́ bɔ́wɔ háá h̃uubatɛ su ɛ́ɣɛ sífaa, faa bɔwɔ́ngɔ aáva i faa bɔ́wɔi sí ɣɛ́ngɔ mu yɛ Jísu Kílisitii w̃áá véle w̃a p̃ɛ́ɛ́ ngetéyangi ɔ́ɔ́ bátɛ.

¹⁰Kɛ́ a mu Wumááwo Mɔ́i Jísu Kílisitii váálai ngeleí sí wu i kɛ́a a mú ɣɛ Ngalángi háá bɔwɔí wɔ́lɔ. Keela woó vándai w̃áá véle w̃a, mu ɣɛ́a kɔlɔ́ ngáá kɛ Jísu Kílisitii i kɛ́a ngáá háwu ngáá ngákpa ngáá mɔ́ɔ saí yáa mu w̃ááh̃u. Í mɔ́ɔ kúnafɔ lɛ́ɛ́h̃ui yakɛ́ ngáá mu ye.

¹¹Ngalá ngí lokolongɔ́ mbá ngáá keelá ɛ́ɣɛ kalambo mɔ́ɔ ngáá ngí kééla woó vándai lé.

¹²Ná háá vá tɔ ngáá maanɔw̃ɔ́i sí yéɣe ma. Kɛ́ ná fíli su, ndííỹaaningɔ láá lé bɔw̃álale ngí kɔ́lɔ nuí ndángɔ lá aáva ngí kɔ́lɔ kpál̃au ngáá kɛ ngakpá tɔ́ ngeyá ngáá áá hómbo í kééla woí sí w̃aah̃ú béle í féngɔ ngéya í ló su kpóloo í fólo ngápumai w̃a.

¹³Ló tɔɔỹaá gálambongi sí w̃a ngí í gálangɔ la aáva í ɣɛ́ ngáá tɔmaseí ngáá yááyaa híya la. Ndangí ɛ́ɣɛ ndóngi a maá mááhɔlɔ kpahái wa a maa ɣɛ́ su Jísu Kílisitii wá, í ló í h̃u.

¹⁴Hɛ́ɛ́ma Ỹínangi í mú volú, ngi yákpangi w̃aa véle w̃a hómbo yí kálambo pándai sí w̃ááh̃u béle yí mááhɔlɔngɔ.

¹⁵Yí kɔ́lɔ ngáá mu mbála Yalá fɛ́li mbélaitii kpɛ́lɛɛ ti Ésiya lataí h̃u tí volú yáfenga mbá í báha naa Fegɛlɔ wa ɛ́ɣɛ Hɛmɔjeni.

¹⁶Bɛlɛ́ Ngalángi yááh̃u w̃ááw̃aanui í ɣɛ́ Onɛ́sefɔlɔ vɛlɛ lowaí wúu w̃a, bɔw̃álale i nduwúh̃ulɛni ngáá ngé kuu bíh̃ingɔ laa lówah̃u. Aa wufeí ngáá ní hái kíya bɛ́lɛ ngí ɣɛ́i kpindi vɛlɛ́i wu.

¹⁷Kɛ́ ná nɔɔ́ léi í fóloi Lóómi taa walaí h̃u, i loí kɔ́lima í ló su í tɔ́.

¹⁸Wá gíte wu súúwɔlɔ kpál̃au ngáá i bɔní mbá ngwála ná h̃u ngí ɣɛ́i Ɛ́fɛsɔ taa h̃u. Bɛlɛ́ Ndemɔí Ngála ngí ngaah̃ú w̃ááw̃aanu hóu Ngalá kɔ́sɔ foloí w̃á!