Read Bandi TÍMOTI GƆ́LƆI HELE KÉLEI 2 Bible Online

TÍMOTI GƆ́LƆI HELE KÉLEI 2 - Bandi bible

TÍMOTI GƆ́LƆI HELE KÉLEI 2

¹Tímoti, yɛ́i yí ngáá kóó h̃u loú ɣɛ́ kíli, faa bɔwɔ́i a maá maahɔ́lɔ áá gula kpahái h̃u maa ɣɛ́ su Jísu Kílisitii wa, bɛlɛ́ ná í í h̃úúba.

²Kalambongí sí yí tɔ́ngɔ ngí mbóngɔ nuu bíh̃iw̃aa yaah̃u w̃a, maa galambongí ná lókoleve tokola ma yélaa w̃a, tiyɛ́i taa hómbo tí nungáá véka galambo la tiyá bɛ́lɛ.

³Ná yí ngáá tɔwɔbáɣa yénge mɔɔ vánda Jísu Kílisitii haaw̃a kíya nɔ́ɔ tokola ma hóya áá ɣɛ́ na, kɛ yá bɛ́lɛ yí í ndá w̃áánɔw̃ɔi yéɣe.

⁴Nuí fíli áá ɣɛ́ ngáá sóya w̃ɔ́ɔ vánda, aa ɣɛ nɔ́ɔ loí í ngí nuu walaí liilɛ́i ngénge mbo. Ná hááw̃a, ɛi lokovíli sítii ti hiya vele h̃u taa ngáá sóyaa.

⁵Nuí fíli áá ɣɛ́ loí ngi ndái í ndo ma maaɣaalí haítii su táa ɣɛ́ táá kɛ, kɛ maa w̃ɔ́i í híya ngáá saváitii taa ɣɛ́ maaɣaalí hái ná wá.

⁶Kpaalá lá mɔ́i fíli áá yénge ngwala ngi báálai h̃ú, aá hése tɔ́ kule í ma í kpaalaí h̃uu wɔ́lingaitii ngamba sɔ́lɔ ngáá kulasuunúma.

⁷Yaayaa gisíya fái sítii nga ngí ndéngɔ i w̃á, bɔw̃álale Ndemɔí Jísu aa kɛ ngáá háwu yí kpɛ́lɛɛ ngátɔ mba ngáá pangɔ́.

⁸Gisíya lɛ́ɛ ngáá Jísu Kílisitii, lɛ́i í ɣɛ́i ngáá Masangí Deevé lé kpámbi h̃uu w̃ɔ́i tá, Ngalá ngí mbuyoɣéni sái h̃u. Fái sítii pá tɔ ti ngáá keela wóo vándai ngíwaa nde.

⁹Keela wóo vándai sí ngáá nde, aa lɔ́ í kɛa máá áá nɔ́w̃ɔ, ngi njɔlɔwɔ ya kpindi vɛlɛ́i wu kíya nɔ́ɔ faa ỹɔ́u ɣɛ́ mɔ́ɔ wala. Kɛ́ Ngalá ngói aa njɔlɔwɔ yá kpindi vɛlɛ wu.

¹⁰Háwui náa haaw̃a, ngáá liilɔ́lɔ sítii kpɛ́lɛɛ ngá sítii faaw̃a ti ngáá Ngalángi vóngaitii kɛinɔɔ́ ti ngumaawóngi w̃ááhɔlɔ áá gula Jísu Kílisitii yaa, ná wáá ngáá, kúnafɔ lɛ́ɛ́h̃ui nuu áá ɣɛ su Ngalángi yákpa maanɛɛnɛɛngí h̃u.

¹¹Sí ngáá vá ndéma aa lɔ ngáá tɔɔỹáa woo. Ná wáá ngáá, ngoí sí ndengɔ ngáá sí, “Ná a maa báha Jísu Kílisitii wa a mu há, ngimɔ́ɔ́ nɔ́ɔ múl̃ɔ a maa báha mba a mu ɣɛ́ ndɛɛh̃ui h̃u.

¹²Ná a maa ndí ngu ma ngáá ndiilɔlɔí, ngimɔ́ɔ́ nɔ́ɔ a máá ɣɛ́ masandáá h̃u aa maa Jísu. Ná a maa bééle mba, áá bɛlɛ́ áá beele mu wa.

¹³Ná a mɔ́i ɣɛ́ lɔwɔbaɣái ngeyá, ɛi bɔwɔ́ ɣɛ́ ngáá tɔwɔbaɣá lála w̃ɔ́ɔ bɔw̃álale ɛi gula woo w̃a.”

¹⁴Fái sítii ndé í vóngaitii ma Ngalá pa í ɣɛ ngáá maa hééle ngáá yí ndénga ti w̃a ndaahi kpá kpá su ngáá tálaa ɣɛ́ taa ndaahása gula njɛpɛ woo wa. Ndaahásai ná vá ɛi nuu gula faa h̃u, kɛ́ aa sítii kɛ kíli ỹaani nɔ́ɔ taa wolílo ti w̃a.

¹⁵Yenge ngáá hɛmbɛ kpɛ́lɛɛ kɛinɔɔ́ yí Ngalá ndiilɛi. Ɣɛ́ ngáá Ngalá ngénge mɔ́ɔ vánda ngáá yɛi wúfe ngáá ngengengí yíwaa mbo, yí ɣɛ ngáá nuu áá tɔɔỹáa gálambongi wo ngáá pangɔ́.

¹⁶Léve njɛpí sítii polú tɛi ɣɛ́ ngáá Ngala njɛ́pɛ aáva pele áá ti h̃u, yí w̃ááɣɛ gooh̃á ti wa. Njɛpɛí sítii taa kɛ ngáá háwu nungáá ti w̃áá aa ɣɛ́ gooh̃á nɔ́ɔ Ngalá mba kélei.

¹⁷Njɛpɛi sítii tɔ́ ngáá pala ɣɛ́ kíli ngá ngáá ɣɛa ɣɛ́ nɔ́ɔ wɔɔlɔ pól̃ou. Siỹɛ félengɔi sítii pá taa ɣɛ́ ti w̃á Hamɛ́neeyɔ ɛ́ɣɛ Féletɔ tiyá lɔ tí njɛpɛ laalí nátii su.

¹⁸Tí vólu yáfea tɔɔỹáa gálambongi wa aáva tiyá lɔɔ kɛ ngáá háwu ndangi Ngalá fɛ́li mbélai ti su ngáá Ngalá taa suuỹááni ngáá sí taa ɣɛ́ tá mbuyoɣé saa h̃úi Ngala fɛ́li mbélaitii faaw̃a i ɣɛa naa kílii.

¹⁹Kɛ́ Ngala tɔɔỹáa geela woí gulangɔ́ɔ́ lé ngáá pɛlɛ́ gɔ́wɔ h̃úúbangɔ Ngalá ngí sítɛngɔ ɛi liilí. Ngói sítii pá pɔnɛngɔ́ pɛ́lɛ gɔ́wɔi sí w̃á tiyá waa ngáá sí í ɣɛ́ngɔ tá, “Ndemɔí Ngalá ngi kɔlɔ sítii tí ngáá ngi vóngaa” aáva “Nuí fíli áá ɣɛ́ ta aa lɔ Ngalá fááw̃a, kɛ maa w̃ɔ́i í vólu yáfe faa ỹɔ́u ɣɛ́ndai wa.”

²⁰Pɛlɛ́ wálai wu, pɛlɛ́ wu ỹáaka híí bih̃íngɔ aa ɣɛ́ ná. Tɛingáá bátɛngɔ aa ɣɛ lá ngáá kɔlu wolé, tɛingáá va tí bátɛngɔ ngáá góóli. Tɛingáá vá múl̃ɔ ti bátɛngɔ aa ɣɛ lá ngáá ngulu, tɛingáá ti ngáá pɔlɔ́ ỹáaka. Nyaakái sítii tɛingáá lɔ ná foló wála háaw̃a, tɛingaa va tɔ ná foló gbaama fááw̃a.

²¹Nuí fíli áá w̃aaɣɛ́ gooh̃á faa ỹɔ́i nátii kpɛ́lɛɛ mbá, maa w̃ɔ́i aa ɣɛ́ ngáá ngángimba w̃ɔ́ɔ́ Ngalá ngeyá sífaa aa ɣɛ Ngalá fááw̃a seɣé héɣe ngi W̃ááliɣii Ngala ngí yéngengi hááw̃a. Maá w̃ɔi w̃aahéi wóngɔ aa ɣɛ lá ngenge pánda fíli mbó fááw̃a.

²²W̃aa ɣɛ́ gooh̃á fóningele líívo faítii mba, yí hítɛ telembo fáitii polú. I lɔ́wɔbaɣangɔ í ɣɛ́ la Jísu Kílisitii yaa ɛ́ɣɛ yí ló ngáá í mbála Yalá fɛli mbélaitii, yí ɣɛ́ ndiihéi h̃ú wáá tiyéni. Sítii kpɛ́lɛɛ kɛ́ wáá sítii taa Ndemɔí Ngalá maalóli ndiiwóle w̃aah̃u kpɔ́mba haaw̃a.

²³Kɛ́ w̃aa ɣɛ́ gooh̃á tamál̃a mááɣaaliitii mba kele ɣele ngáá ti h̃u, yí kɔ́lɔ ngáá ngapumái aa ɣɛ ngáá kpɔɔlɔ́i.

²⁴Nuí fíli aá ɣɛ́ ngáá Ndemɔí Ngalángi yénge mɔɔ álaa ɣɛ́ kpɔɔlɔ́ ya, kɛ́ í ɣɛ́ ngáá nuu vánda nuu kpɛ́lɛɛ fááw̃a. Í ɣɛ́ ngáá nuu ngáá áá hómbo í kálambo mbó, í liilɔlɔ́ maanɔw̃ɔ́i ya mbaahílima yélaitii taa ndá ma.

²⁵Í mɔ́ɔ́ sítii kalambo ngáá ndiilɛi taa w̃aaɣaali ngáá ngí gálambo mbóndai. Tɛingaa Ngala ngáá kɛ ngáá háwu ti lii í vóte ti ɣɛ́ tɔɔỹái wɔlɔ.

²⁶Aáva ná aa kɛ ti géle ɣele ti gula sí h̃u kulangɔ ngáá ndɛndɛ́ Ngutuwɔ́ Ỹína Nyɔí í tí hóungɔ lá lɛ́i ti golongɔ́ í ɣɛ́ngɔ lá mbu.