Read Bandi TÍMOTI GƆ́LƆI HELE KÉLEI 3 Bible Online

TÍMOTI GƆ́LƆI HELE KÉLEI 3 - Bandi bible

TÍMOTI GƆ́LƆI HELE KÉLEI 3

¹Ngáá ɣɛ́ loí yí ɣɛ́ kɔlɔ ngáá kɛ faa bámai yatɔ́ɔ́ vá ɣɛ́ma wɔ́ɔ́lɔ ngwala ngetéyangi yákɛɛlɛmai h̃u.

²Nungáitii taa ɣɛ́ nɔ́ɔ loí ngáá bɔwɔ́, naholói ɛ́ɣɛ kpátɛi w̃aa líí vilingɔ́ aa ɣɛ́ lá tí lii vólu, aáva ti yóngangɔ áá ɣɛ́ lá ti h̃úúwɔɔlɔngɔ múl̃ɔ. Taá ɣɛ́ ngáá ngɛɛlí píli mbélaa ɛ́ɣɛ ti goló lálangɔ ti lé mbélaitii mbɛ ɛ́ɣɛ ti ngáá faa bɔ́wɔ wúu wɔlɔ́ tála yelaa. Ngala fái ɛi ɣɛ ti w̃a.

³Tɛí ɣɛ́ ngáá faa nɛ́ɛ́ ɣɛ́ mbélaa, tɛí nuu yááh̃u w̃ááw̃aanu hóu, taá ɣɛ́ ngáá ndɛɛ vɛlɛ́ mba yélaa. Taá ɣɛ́ ngáá mal̃a kula mbélaa ngáá suulɔ́vengɔ ɛ́ɣɛ ti híli ngáá sí í ngáá faa vánda.

⁴Tɛí ɣɛ́ ngáá tokola ma yélaa kɛlaa tɔ́ɔ́ ɣɛ́ ngáá kisiya faah̃ú yélaa. Ti h̃úúwɔɔlɔngɔ aa ɣɛ lá ngwala ɛ́ɣɛ ti longɔ́ ngáá ndiivo kɛí í lɔ́ve Ngala mbá.

⁵Taá ɣɛ́ taá kúla ngáá tiyá lɔ́ ngáá Ngala fɛ́li mbélaa, kɛ́ ti híya veléi aa ngakɛ́ ngáá kɛ aa ngáá tɔɔỹaá. W̃aa ɣɛ́ gooh̃á nuu láálii nátii mba.

⁶Nungái sítii tɛingáá taá lí nungáá vɛ́lɛitii mbu, ti nyáh̃ai sítii ngakpólowa ngwala ti lángi h̃úú áá nɛ́ɛ́ baní Ngalá fái h̃u ngáá ti lɛ́ɛ́ galambongí. Nyah̃ái sítii tɔ ti liihɛ́lɛngɔ ngáá faa ỹɔ́itii tí kɛ́nga aáva ti bandángɔ ndiivo kɛɛ́ w̃ɔ́ni mɔni laali taalingí ya áa ɣɛ ti w̃a.

⁷Nyah̃ái sítii pa tiyá lɔ́ɔ kalambo níína wɔlí nɔ́ɔ hɔ́wɔ fíli kɛ́ nápa tɛ́i ɣɛ tɔɔỹái wɔlɔ́.

⁸Kíya nɔ́ɔ Janɛ ɛ́ɣɛ Jámbilɛ ti lói Muusé laa wú, ngimɔ́ɔ́ nɔ́ɔ ndɛɛ gálambo mbélai sítii ti lóngɔ tɔɔỹaá gálambongi laa wú. Ti gí maitii ngasáángɔɔ lé aáva Jísu Kílisitii lángi aa tí h̃u.

⁹Kɛ́ taá lííma góóh̃ama ngáá ti lámal̃a kalambongí nátii, bɔw̃álale nuu kpɛ́lɛɛ tɔ́ɔ́ vá ngátɔma mba ngáá kɛ tamál̃a péle wúl̃a tí ma. Ná vá tɔ nɔ́ɔ í ɣɛ́ni ngáá Janɛ ɛ́ɣɛ Jámbilɛ.

¹⁰Kɛ́ yá Tímoti, yí kɔ́lɔ kpál̃au kalambongí ngíwaa mbo ɛ́ɣɛ kíya ngíwaa híya. Yí kɔ́lɔ sí ngáá ɣɛ́ ngí kɛ ndɛɛh̃úi sí h̃u ɛ́ɣɛ sí ndángɔ lá. Yí kɔ́lɔ kíya ndíílɔlɔngɔ ɛ́ɣɛ kíya ndóngɔ ngáá nungáá ɛ́ɣɛ kíya ngí liibáni sítii su ngí híyani ti h̃u.

¹¹Yí kɔ́lɔ faa báma wálai ɛ́ɣɛ máánɔw̃ɔ wálaitii ngí tí yeɣéni taí sítii su taá náitii tóli ngáá Átiyɔ, Ekóniya ɛ́ɣɛ Lésitula. Kɛ́ Ndemɔí Jísu i mááɣawoni ti kpɛ́lɛɛ su.

¹²Sítii kínɛi ti báhangɔ Jísu Kílisitii wa aáva ti longɔ́ ti híya ngáá Ngala pélei, taá fáa bá nda ti w̃a.

¹³Kɛ́ faa ỹɔ́u yélaitii ɛ́ɣɛ sítii ti ngáá ndɛɛ yélaitii tiyɛ́i taa bɔwɔ́ yéɣe ngáá nuu vándaa, ti háá ỹɔu ɣɛndáitii nga tɔ́ɔ́ ɣɛ́ nɔ́ɔ áá ɣɛ wɔ́ɔ́lɔ pól̃ou. Taá ɣɛ taá núngai ngakpólowa tiyá bɛ́lɛ tí yakpólowangɔ.

¹⁴Kɛ́ yá Tímoti, ló kpáŋ kpáŋ faí sí h̃u yí kálanga aáva yí kɔ́lɔ ngáá kɛ tɔɔỹaá le sífaa yí kɔ́lɔ ngáá sítii ti i gálangɔ tiyá lɔ ngáá tɔɔỹaá gálambo mbo mbélaa.

¹⁵Yí kɔ́lɔ ngáá yí lói ngáá ndopo gúlo yí ɣɛ́ Hɛ́ɛ́ma Yála Kɔ́lɔi wɔ́lɔ. Kɔlɔí sí vá tɔ áá kɛ nuu áá ɣɛ́ faa wɔ́lɔ kɔwɔ́ato ngumaawóngi wa nuu áá mááhɔlɔ ndangí h̃u nuu áá ɣɛ́ su ngáá Jísu Kílisitii.

¹⁶Sí kínɛi pɔ́nɛngɔ Ngala Kɔ́lɔi h̃u, i gulangɔ́ Ngalá ngeyá aáva aá lɔ na tɔɔỹaá gálambo faaw̃a. Aá lɔ múl̃ɔ na ngáá na nuu áá faa ỹɔ́u ɣɛ́ yí téve kpé yí nde ma ɛ́ɣɛ ná nuu áá faa ỹɔ́u ɣɛ́ í ngákɛ ngáá nuu yé ɛ́ɣɛ sí kule í nuu w̃á nuu í ɣɛ́ áá kɛ í ngákɛ mɔ́ɔ ngáá nuu yé.

¹⁷Ná ná vá ngáá ɣɛ, nuí sí áá ɣɛ́ ngáá Ngala ngénge mɔɔ, kulaɣɛngɔ́ áá ɣɛ lá Ngala ngénge faaw̃a, maa w̃ɔ́i w̃aahéi wóngɔ ngáá pangɔ́ ngenge pánda fíli mbó fááw̃a.