Read Bandi TÍMOTI GƆ́LƆI HELE KÉLEI 4 Bible Online

TÍMOTI GƆ́LƆI HELE KÉLEI 4 - Bandi bible

TÍMOTI GƆ́LƆI HELE KÉLEI 4

¹Ngalá ɛ́ɣɛ Jísu Kílisitii lɛ́i áá vá sítii kɔsɔ́ma ti ndɛɛh̃ú h̃u ɛ́ɣɛ sítii ti háángɔ tiyá lɔ́ ti ngáá ní héélea kɔwɔ́ato ndaahíngi sítii mba ngáá mbo ngáá í ye. Jísu Kílisitii lɔɔ vá vaamá í ɣɛ́ ngáá ndɔwɔlɔ́ w̃ása ngwala, náá hááw̃a, nyá ngáá fái le í w̃a kpáŋ kpáŋ ngáá yí híya ngáá ti ye.

²Yaayaa Ngala kééla woí lé nungáitii ma laáva yí bákpa ndendái h̃u. I ɣɛi ngáá nde sɔ́wɔ ɔɔ aa ɣɛi ngáá nde sɔ́wɔ, nde nɔ́ɔ. Nungáitii sítɛ pele gíte w̃a ngáá ti háá ỹɔítii ngakɛ́ndai ngáá ti ye, yí mɔ́ɔ ti liiwúúlɛ. Kalambongí wo ngáá ndiilɔlɔ́ gite kɛinɔɔ́ nungáitii tí ngátɔ mba.

³Táingi lɔɔ vá fóloma ma nungáitii tɛí wólilo tɔɔỹaá Yála kalambongí w̃a. Kɛ́ laá ɣéle, taá ɣɛ́ loí tí wólilo kalambo péka w̃á áá ti liivó. Faalɔ, taá kálambo mbélaa wɔlí ngáá sítii taayáa mɔní mɔ́ni kɛ, nátii taayáá nde ti w̃a.

⁴Taá vólu yáfe tɔɔỹaá Yála kalambongítii mba, tí wólilo gbeléngitii ma.

⁵Kɛ́ yá Tímoti, yí bɔwɔ́ h̃úúhou w̃a faa kpɛ́lɛɛ su. Yálaa lúwa maanɔ́w̃ɔi wa yáá vá ngéɣema keela woó vándai sí lé fái w̃a, ndi ngu ma ngáá ndendáá. Sítii ti ngáá í yénge, yí tí wo ngáá pangɔ́ kíya nɔ́ɔ Ngala ngénge mɔɔ áá kɛ.

⁶Táingi i folónga ma ngáá ngí ɣɛ́ ngáá saáɣa. Ná wáá ngáá, ndɛ́ɛ́h̃ui yakɛ́ɛ́lɛ táingi i folónga ma.

⁷Ngí hómboa ngí maaɣaalí víliỹɛi sí wo ngáá hɛmbɛ́i kpɛ́lɛɛ ngí fólo lá ngukúlamai aáva ngáá vólu yaféngɔ Ngala tɔ́ɔ́ỹaa galambongí wa.

⁸Ná hááw̃a, Ngala ngí ní w̃aaỹángi yandɔ́ɔ́lɔngɔ, ná wáá ngáá, maaỹángi nuu áá mááhɔlɔ telembo pólu véle h̃u. Ndemɔí Jísu lɛ́i i ngáá Telembo Kɔ́sɔ Mɔ́i, áá fé ngéya Ngala Kɔsɔ́ Foloí w̃a ɛ́ɣɛ sítii kpɛ́lɛɛ ti yaah̃ú áá ɣɛ tuwɔ aáva ti góóh̃unɛɛngɔ ngáá paalaí.

⁹Ngáá ɣɛ́ loí yí kɛ ngáá hɛmbɛ́ ngáá yí fólo má h̃úmbuwa.

¹⁰Dímɔ í vólu yáfenga mbá. Sɛmbɛ lɔ́ naa ngetéyangi sí h̃úúbatɛitii su, i liingá Tɛsalónika taí h̃u. Kilɛsikɛ va i liingá Galésiya lataí h̃u, Táitɔ va i liingá Damésiya lataí h̃u.

¹¹Naa Lúu lɔ náá nɔ́ɔ ni mbéi. Faalɔ, ná yáá ɣɛ́a vá, wú vá waa Máa bɔw̃álale aa bɔ mbá ní yéngengi h̃u.

¹²Ngí Tékekɔ lɔvengɔ́ Ɛ́fɛsɔ.

¹³Ná yáá ɣɛ yáá vá, yí vá ngáá ní lóma maah̃u lómangi ngí ndongɔ́ Kápɔ yaá Túlowa taí h̃u. Yí vá múl̃ɔ ngáá kɔlɔ w̃ááɣalangɔitii í lí náá gíte í to sítii mba ti bátɛngɔ ngáá suwa gɔlɔ́ngi.

¹⁴Alɛsáánda lɛ́i í ngáá kɔlu yengé mɔ́i, i nímih̃angɔ ngwala. Kɛ́ Ndemɔí Ngála pá tɔɔ fáa báma la ma faí sítii fááw̃a í kɛ́nga.

¹⁵Kɛ yáá w̃ááh̃u béle lá, bɔw̃álale í longá mu laawú kpáálii mu gálambongi sí h̃u.

¹⁶Ná hése ti lii ngáá ngé kóótii h̃u, nuu fíli aa yɛpɛ́i fááw̃a. Kɛ́ ngáá Ngala fɛ́li ngáá Ngalá ngí ti w̃ááhaalo.

¹⁷Kɛ́ Ndemɔí Jísu i ɣɛi pólu aáva i kɔ́i ngáá ngakpá ngáá ngí hómbo ngí keela woó vándai le ngí ngúkula fó sítii ma taa ngáá Júsua. Aáva Ngalá ngí mááɣawoni naa saí yáa.

¹⁸Ndemɔí Jísu aa mááɣawo ngáá faa ỹɔ́u híí fíli ɛi la ma, ná vólu, í lí ngáá ngé lɛ́i lɛ́i ngi w̃ásandai h̃u í ngelegóóh̃u. Bɛlɛ́ ndaaw̃aa í lɛ kúnafɔ taa ngi ndá gúnafɔ! Amíína.

¹⁹Ngí há Pilesíla ɛ́ɣɛ Akúilani ma ɛ́ɣɛ Onɛ́sefɔlɔ vɛlɛ lowaí wúu yélaitii.

²⁰Ilásitɔ í longɔ́ Kɔ́l̃e taí h̃u. Ngi Túlofimɔ longɔ́ Míletɔ taí h̃u bɔw̃álale seebɛngɔ́ í ɣɛngɔ la.

²¹Kɛ ngáá hɛmbɛ́ yí vá p̃ɛ́ɛ́ kɔɔlɛ́ hɔ́wɔi ɔ́ɔ́ fólo ma. Yubɔlɔ, Pudɛni, Lanɔ, ɛ́ɣɛ Kulɔ́diya ɛ́ɣɛ Ngala fɛ́li mbélaa vekáitii kpɛ́lɛɛ ti hááni í w̃a.

²²Bɛlɛ́ Ndemɔí Jísu hɛ́ɛ́ í ɣɛ́ í w̃á ɛ́ɣɛ Ngalángi háá bɔwɔí í ɣɛ́ wú kpɛ́lɛɛ mbɛ́.