Read Bandi TÁITƆ 1 Bible Online

TÁITƆ 1 - Bandi bible

TÁITƆ 1

¹Nyɛ́i ngí ngáá Pɔ́ɔ, ngí ngáá Ngalángi yénge mɔɔ, ɛ́ɣɛ mɔ́ɔ́ Jísu Kílisitii géélai, nyá lɔ́ ngáá kɔlɔí sí vɔ́nɛ. Ngalá ngí lókolongɔ mbá, í tɔ́ve sítii ngelé í lókolonga ti wa ngáá ngi vóngaa ngáá ngí bɔ́ tí wa ti h̃úú í ba ti lángi h̃u. Ngí mɔ́ɔ́ bɔ ti wa ti ló tɔ́ɔ́ỹaa vélei gíte w̃á.

²Ná ná áá ɣɛ́, kitomái áá ɣɛ́ tí wa kúnafɔ lɛ́ɛ́h̃ui hááw̃a Ngala lɛ́i ɛ́i ndɛɛ gɔ́ɔ́la í máá gúúlombongɔ p̃ɛ́ɛ́ ngetéyangi ɔ́ɔ́ ɣɛ́a batɛ́.

³Kɛ́ kúi kái kái ma, Ngalá, lɛ́i í ngáá mu Wúmaawo Mɔ́i, i kɛngá mú ɣɛ́ faí sítii kɔ́lɔ keela wói sí w̃aa véle w̃a. Aáva í ndengɔ́ má ngáá ngí kééla wói sí le.

⁴Kɔlɔí sí lɔɔ vá í yéle Táitɔ yɛ́i yí ngáá kpɔ́wɔ lóu ɣɛ kíli mú lángi w̃áa véle w̃a Ngalá fɛ́lindai h̃u. Bɛlɛ́ Ngála lɛ́i í ngáá mu Kɛ́ɛ́ɣɛi ɛ́ɣɛ Jísu Kílisitii lɛ́i í ngáá mu Wúmaamo Mɔ́i, ti háá bɔwɔí ɛ́ɣɛ tí lííhei tí ɣɛ́ í yɛ́.

⁵Háwui ngí í lóngɔ ma Kíliti lɔwɔlɔí sí h̃u aa waa ngáá sítii tí ngáá ngenge ti wúkulangɔ láá lé nɛ́nɛ, yí tí wúkula ɛ́ɣɛ yí lókolo kele ɣéle mbélaitii mba Ngalá fɛ́li mbélaitii fááw̃a tí taítii su bɛ́kpɛ. Ngáá ɣɛ loí yí híya ngáá sí ngí ndénga í w̃á.

⁶Ná wáá ngáá, maa géle ɣelé mɔ́i fíli kɛ í ɣɛ́ ngáá nuí tɔmbema w̃áá fíli ɛi ɣɛ mbá aáva nyah̃ái í ɣɛ ngeyá yíla kpé. Kɛ maa w̃ɔ́i léngaitii ti ɣɛ́ laí ngáá Jísu ɛ́ɣɛ tɔwɔ́ vánda í ɣɛ́ ti wa ngáá kɛ taa ngáá kolo lála léngaa.

⁷Ngala fɛ́li mbélai ti wutúwɔɔ w̃ɔ́ɔ fíli aá lɔ́ ngáá Ngalá ngénge mɔ́ɔ. Faalɔ, tɔmbema w̃áá fíli álaa ɣɛ́ maa w̃ɔi wa. Maa w̃ɔ́i álaa ɣɛ ngáá suuwɔɔlɔ́ w̃ɔ́ɔ́ ɛ́ɣɛ ndiibándi bándi w̃ɔ́ɔ́, kɛlaa ɔ́ɔ́ ɣɛ́ ngáá nuu áá ɣɛ́ ndɔɔ hou h̃u ɔɔ, ɔ́ɔ́ ɣɛ́ ngáá ndapí gúla mɔ́ɔ́. Álaa ɣɛ́ ngáá kahá w̃ɔ́ɔ́ yawo wɔndaa híí fíli su.

⁸Kɛ́ laa ɣéle, í ɣɛ́ ngáá nuu áá lokohéi sotángaa wú ngi vɛ́lɛ lowaí wu ɛ́ɣɛ ndongɔ́ ngáá fáitii ti vangɔ áá ɣɛ́ la. Í ɣɛ́ ngáá nuu ngáá áá faa yátɔ mba. Sí fíli áá ɣɛ́ pele w̃á áá ɣɛ́a tí ɣɛ́ hɔ́wɔ fíli. Í ɣɛ́ ngáá nuu kulangɔ́ kɛ́lɛma Ngalá mbɛ ɛ́ɣɛ ndehé í ɣɛ́ bɔwɔ́ w̃á faa fíli sú.

⁹Kɛ maa w̃ɔ́i í hómbo í ló tɔɔỹaá gééla woí w̃á í mááhɔlɔngɔ kalambo sú kɛinɔɔ́ í kpɔmba hé nungáá vekáitii mbɛ ngáá kalambo pándai í mááhɔlɔngɔ ɛ́ɣɛ sítii taá w̃ááɣaali ngáá tɔɔỹaá gééla woí í ngákɛ ngáá kɛ taá vélei.

¹⁰Ngalá fɛ́li mbélaa bih̃íw̃aa lɔ Kíliti lɔwɔlɔí h̃u, ti golo lálangɔ tɔɔỹaá gééla woí wú aáva tiyá lɔɔ nungáitii ngákpolowa ngáá ndɛɛ gálambo mbondái. Júsuaitii tí lɛ́ingaa kái kái pá tí tí h̃u tiyá lɔ́ tíwaa sítii kɛ.

¹¹Kule lɔ í w̃á yí ti betéve nátii mba, bɔw̃álale tiyá lɔ́ɔ́ nde kpambíaitii ngú ngapóte ngáá kalambongí sí kule áá tí w̃a tɔɔ́ mbó. Tiyá lɔ́ɔ ngufe tála galambongí sítii mbo nɔ́ɔ naholó hɔ́lɔ fááw̃a.

¹²Kíliti w̃ɔɔ yílaa lɛ́i í ɣɛ́i ngáá kalambo mɔ́ɔ́ wála, áá bútei í ndéni, í ɣɛ ta, “Muỹɛ́i mu ngáá Kíliti yeláitii, muỹá lɔ́ ngáá ndɛɛ yélaa hɔ́wɔ fíli ɛ́ɣɛ mu ỹáámangɔɔ lé kíya nɔ́ɔ́ ndɔbɔ huwa ɣɛ kíli í ná. A mu haɣangɔ́ɔ́ lé aáva mú góóh̃angɔ.”

¹³Ngoí sí vá tɔ ngáá tɔɔỹaá. Ná hááw̃a, kɛ yáá teve kpésekele yí ndé ti w̃a kɛinɔɔ́ tí lángi í ɣɛ́ pele vanda w̃a,

¹⁴tálaa wolíɣɛ Júsuai sítii ti gbeléngaitii ma. Ná vólu, tálaa wolíɣɛ savaí sítii ma sítii ti béélenga tɔɔỹái wa taa nda ti yaa.

¹⁵Faa kpɛ́lɛɛ áá ɣɛ́ ngáá faa w̃ááw̃uỹangɔ nungaí sítii mbɛ ti liiwólengɔ áá ɣɛ lá faa kpɛ́lɛɛ sú. Kɛ́ nungaí sítii ti liibɔ́lɔngɔ áá ɣɛ lá aáva tɛi ɣɛ́ lái ngáá tɔɔỹái, faa kpɛ́lɛɛ aa ɣɛ́ ti yaá ngáá faa ỹɔ́u. Maa yélai ti gi mái ɛ́ɣɛ ti liítii súúlaahengɔ aa ɣɛ lá ngáá faa ỹɔ́u léé lée.

¹⁶Maa yélai taá ɣɛ taa ndé ngáá ti Ngalá kɔlɔ, kɛ́ tí lúva veléitii táá ngákɛ ngáá nuu í ɣɛ́ kɔ́lɔ ngáá kɛ táá ngáá Ngalá kɔ́lɔ mbélaa. Ngala ngáá loi ngáá tí lúva vélei kulo bɛ́lɛ ɛ́ɣɛ tí gólo lálangɔ aáva tɛí hómbo tɔ́ɔ́ faa vánda fíli kɛ́.