Read Bandi TÁITƆ 3 Bible Online

TÁITƆ 3 - Bandi bible

TÁITƆ 3

¹Nde í mbála Yalá fɛ́li mbélaitii ma múl̃ɔ tí bɔ́wɔ gula kɛlɛ́ma ɛ́ɣɛ tí ngúfema hé sítii kpɛ́lɛɛ mbɛ tí ngakpá sú. Tí gólongɔ í ɣɛ́ lá ɛ́ɣɛ tí héi gilí bátɛngɔ í ɣɛ́ la kpɔmba hááw̃a faa kpɛ́lɛɛ sú.

²Tálaa ndɛɛ vɛlɛ nuu fíli mbá, tálaa ɣɛ́ táa w̃ááɣaali. Kɛ́ láá ɣéle, ti ɣɛ lúúỹaa, tí ɣɛ́ ngáá mbɛlɛheí yélaa nuu kpɛ́lɛɛ fááw̃a.

³Muỹá bɛ́lɛ mu ɣɛ́i wɔ́lɔ ngáá tamál̃aa mbélaa ɛ́ɣɛ kolo lála yélaa hése ɛ́ɣɛ mú yakpolowangɔ. Muỹá bɛ́lɛ mu ɣɛ́i kíya nduwɔá taa ɣɛ́ na ndiivo kɛ́i híí kpɛ́lɛɛ su ɛ́ɣɛ mu ɣɛ́i ngáá nyaama yélaa mu lólomangɔ, ná vólu, mu hilímangɔ, nungáá bɛ́lɛ tí hílingɔ ngáá mu ye.

⁴Kɛ́ ná Ngála lɛ́i í ngáá mu Wumááwo Mɔ́i í ngákɛni ngáá kɛ aá lɔ́ ngáá faa vánda ɣɛ́ mɔ́ɔ́, ɛ́ɣɛ kíya ndongɔ́ ngáá nuu kpɛ́lɛɛ,

⁵i mu wumááwoni. Aa ɣɛi ngáá mu bɔwɔ́ háá vanda w̃aa véle w̃a lɔ́ mú ngúmaawongi w̃aahɔ́lɔni faaw̃a, kɛ́ Ngalá ngi mu wumááwoni bɔw̃álale aá lɔ ngáá ngaah̃u w̃ááw̃aanu w̃ɔ́ɔ. I mu wumááwongɔ ngáá nguyaí sí áá kɛ nuu léngɔ áá ɣɛ́ lá volú ɛ́ɣɛ ndɛɛh̃u níínai sí áá gúla Hɛ́ɛ́ma Ỹínangi h̃u.

⁶Ngalá ngí kɛngɔ́ ngáá háwu ngi Hɛ́ɛ́ma Ỹínangi í mú volu mú ngi yákpangi bih̃íw̃aa w̃ááhɔlɔ Jísu Kílisitii w̃áa véle w̃a lɛ́i í ngáá mu Wumááwo Mɔ́i.

⁷I sí ɣɛ́ngɔ kɛinɔɔ́ mu kúnafɔ lɛ́ɛ́h̃ui w̃aahɔ́lɔ í ngáá mu gitómai sífaa ngi haa bɔwɔí w̃áá véle w̃a, í mu ɣɛ́a ngáá telembo mbélaa.

⁸Ngoí sí va í léngɔ, aá lɔ́ ngáá tɔɔỹaá woo. Ndóngɔɔ lé yí laabákpa fái sítii mba kalambo sú kɛinɔɔ́ sítii ti langɔ́ ngáá Ngalá taayáá faa vándaitii kɛ, ná vá tɔ í ngáá faa vándai maanɛ́ɛ́ngɔ nuu kpɛ́lɛɛ fááw̃a.

⁹Kɛ́ yálaa lókovili tamál̃a mááɣaali h̃u kɔwɔ́ato ndé njɔlí njɔ́li suugulandaa wa. Yálaa lókovili kpɔɔlɔ́ h̃u ɛ́ɣɛ mááɣaali kɔwɔ́ato Júsuaitii tí hávaitii mba. Nátii tɛ́i nuu gúla faa fíli sú aáva nga ngáá ti wa.

¹⁰Nuí fíli áá vá ngáá ndowah̃u kɔlɛ́ kpɔɔlɔ w̃áa véle w̃a, ɔɔ ndaahasá w̃áa véle w̃á, maa w̃ɔ́i laahíndaa ɣɛ́ féle. Kɛ́ ná ɛ́i ɣɛ́ béni, kpɛ volú.

¹¹Yí kɔ́lɔ ngáá nuu láálii ná aá lɔ ngáá faa ỹɔ́u w̃ɔ́ɔ́. Maá w̃ɔ́i háá ỹɔítii pá táá ngakɛ ngáá kɛ maa w̃ɔ́i aa veléi.

¹²Nyá ngáá Átema ɔɔ Tékekɔ lɔve í yéle. Ti félengɔ h̃u nuí fíli áá ɣɛ́ vááni, ngáá ɣɛ́ loí yí kɛ ngáá hɛmbɛ́ yí vá ngéle Nekɔpóle taí h̃u bɔw̃álale ngí kpátɛnga gí ma ngáá ngí kɔɔlɛ́ hɔ́wɔi h̃uuhíya ná.

¹³Sína lɛ́i í ngáá lɔ́yai ɛ́ɣɛ Apólo tiyá lɔ́ɔ lí siyamá, ngáá ɣɛ́ loí yí kpɔ́mba hé tí yɛ ngáá sí kínɛi taa ɣɛ́ lói lá siyangí h̃u tí mááhɔlɔ.

¹⁴Kule lɔ mu mbála Yalá fɛ́li mbélaitii ma tí ɣɛ ngáá faa vánda ɣɛ́ mbélaa ngáá taayaa kpɔmba hé sítii mbɛ maanɛ́ɛ́ngɔ áá ɣɛ́ la ngáá tí kpɔ́mba w̃ááhɔlɔ kɛinɔɔ́ ti lɛɛh̃úi í ɣɛ́ ngáá kulasuunúma.

¹⁵Mu mbála Yalá fɛ́li mbélai kínɛi tí mbéinda tí hááni í w̃á. Ni há mú mbála Yalá fɛ́li mbélaitii ma muỹɛ́i mu lángi ɣɛ kíli í yíla kpé. Bɛlɛ́ Ngalángi háá bɔwɔí í ɣɛ́ wú kpɛ́lɛɛ mbɛ́.