Read Bandi HÍBULU 1 Bible Online

HÍBULU 1 - Bandi bible

HÍBULU 1

¹Wɔ́lɔ wɔ́lɔmai h̃u Ngala ngí njɛpɛ bih̃íw̃aa vúni mu káwalani ma pele bih̃íw̃aa h̃u ndaa háá lé mbélai maa véle w̃a.

²Kɛ́ muỹɛ́i náa mu ngapumáá yéteyangi sí h̃u, i yɛpɛngá mú yelé ngi H̃íỹɛndou Loí w̃áá véle w̃a. Ngala ngí mɔ́ɔ kɛngɔ́ ngáá háwu ngeleí sí wu í ɣɛ́ na ngi lói sí w̃áá véle w̃á. Laáva tɔ nɔ́ɔ múl̃ɔ Ngala ngí lókolongɔ mba ngáá faa kpɛ́lɛɛ í ngápu toko h̃u.

³Aá lɔ́ áá ngákɛ kíya Ngalá káámaangɔ aáva kíya nɔ́ɔ Ngala ngí ná, ngimɔ́ɔ́ nɔ́ɔ jɔ́ í na. Aa kɛ ngáá háwu faa kpɛ́lɛɛ tí ndi ngu ma ngelewu ndaa wóó yákpangɔ wálai w̃áá véle w̃a. Ná náa í faa ỹɔ́i wúyani nuu búsaa w̃a i héini náa ngufema ỹándai ngelegóóh̃u Ngakpa Ngála Ngwalaí bélaa masandáá h̃u.

⁴Ngala ngí kɛ́ni ngáá háwu ngi H̃íỹɛndou Loí ya ngí bá í lɔ́ve malékaitii mba kíya nɔ́ɔ toow̃aa mbá lááheingi í pɛ́lɛngɔ mba tɔvengɔ́ malékaitii ti ndái wa.

⁵A mú súúwɔlɔ ngáá Ngalángi H̃íỹɛndou Loí yakpangɔ́ɔ́ lé í lɔ́ve malékaitii mba, bɔw̃álale, nápa Ngalá ngáá nɛ́ɛ́ ɣɛi maléka w̃a, “Yá lɔ́ yí ngáá ní H̃íỹɛndou Lói, í séi hááwɔ w̃a, ngí ɣɛ́a ngáá í Kɛ́ɛ́ɣɛ.” Ná vólu, nápa Ngala ngáá nɛ́ɛ́ yɛpɛní kɔwɔ́ato maléka wa, ɔ́ɔ́ ɣɛ́ ta, “Nyá lɔ́ɔ ɣɛ́ ngáá ngí Kɛ́ɛ́ɣɛ, aáva aá lɔɔ ɣɛ́ ngáá ní H̃íỹɛndou Lou.”

⁶Ná Ngala ngí ɣɛ́i náá áá va ngi hésendaa H̃íỹɛndou Loí lɔ́vema ngeleí sí wu, i mɔɔ ndení, í ɣɛ ta, “Kɛ ní w̃álekaitii kpɛ́lɛɛ tí fɛ́li.”

⁷Sí Ngala ngí ndéi kɔwɔ́ato malékaitii mba, i ɣɛi ngáá sí, í ɣɛ́i ta, “Nyáá ngáá malékaitii kɛ ngáá kíya nɔ́ɔ fɛfɛ[1] ngáá ɣɛ́ na, ngí ní yénge mbeláitii kɛ ngáá kíya nɔ́ɔ ngɔmbu hó ngáá ɣɛ́ na.”

⁸Kɛ́ sí í ndéi kɔwɔ́ato ngi H̃íỹɛndou Loí wa, i ɣɛi ngáá sí, í ɣɛ́i ta, “Í w̃ásandai, yɛ́i yí ngáá Ngalá, áá lɔ́ɔ ɣɛ́ na kúnafɔ taá ngí ndá gúnafɔ. Yáá í w̃ásandai ɣɛ́ telembo sú sítii mááh̃u taá ɣɛ́ í wú.

⁹Í lóngɔɔ lé ngáá telembongí, í hílingɔ ngáá faa ỹɔ́i. Ná lɔ́ í kɛ́ngɔ nyɛ́i ngí ngáá Ngala ngí lókolongɔ í wá, ngí kɛ́ngɔ ngáá háwu í góóh̃u í nɛ́ɛ́. Ná wáá ngáá, ngí nguféma héngɔ í yɛ́ tɔvengɔ́ ngufémai wa ngí féngɔ í mbálangaitiini ngeyá.”

¹⁰Ngala ngí mɔ́ɔ́ ɣɛ ta, “Ndemɔí, ngetéyangi lɔ́kula héi máá wɔ́lɔ yí ngélewu bátɛni aáva ngeleya tɔ́ ngáá í bátɛ ngeyá wɔ́li.

¹¹Ti kpɛ́lɛɛ taá vááma ɣɛ́ma na, kɛ́ yá, yá lɔɔ ɣɛ́ na. Ti kpɛ́lɛɛ tiyá lɔ́ɔ́ vá vɔ́lɔma kíya nɔ́ɔ kulaí áá vɔ́lɔ.

¹²Ná ná vá ngáá ɣɛ́, yáá ti w̃ááɣala náa kíya nɔ́ɔ nuu áá kulaítii maaɣalá, yáá vá yáá tí w̃áálovi náá kíya nɔ́ɔ nuu áá kulaí w̃áálovi, kɛ́ yá í w̃áá ɛ́i lóvi kúnafɔ, aáva í yákɛɛlɛ máá aa na.”

¹³Nápa aa nɛɛ ɣɛi maléka ta fíli má, “Hei ngufema ỹándai kpéla ní w̃ásandai h̃u í ló su kpóloo ngí í wááhilima yélaitii kɛ ngáá í gɔ́wɔ lóów̃aa wɔ́lingaa.”

¹⁴Kɛ́mbɛ malékaitii kpɛ́lɛɛ tiyá lɔ́ nɔ́ɔ ngáá Ngalángi ỹínangaa ngáá tí ngáá ngi yénge mbelaa áá ti lɔ́ve ngáá ti bɔ́ sítiini mba taá ɣɛ́ náa taa vá ngumaawongí w̃ááhɔlɔma?