Read Bandi HÍBULU 10 Bible Online

HÍBULU 10 - Bandi bible

HÍBULU 10

¹Ngalángi hávaitii í féni Muusé yáá ti gúlangɔɔ lé nɔ́ɔ ngáá faa vándai sítii táá vá vaamá ti w̃áábale. Kɛ́ tiyá gíte laa le tɔɔ ɣɛ́ ɣɛi ngáá maa háá vandaí nátiini. Faalɔ, saáɣa gulandái ná fówo fíli su nápa ɛi hómbo ɔ́ɔ́ kɛ ngáá háwu sítii taa lí Ngalá kákala ti ɣɛ kíli ɔ́ɔ́ bátɛ fó fóndei.

²Bele saáɣa gulandái nátiini tɔ́ɔ́ kɛ ngáá háwu sítii taa Ngala fɛ́li ti w̃áá í w̃úỹa fó fáá ỹɔ́u ɣɛ́ndai yaá, ti gi máá í ɣɛ́ kpál̃au, kɛ bele maa hááɣa gulandái í gɛɛlɛngá hɔ́ɔ́.

³Kɛ́ aa ngáá sólowo fáá ngáá nikani taá njéé ŋááw̃ɔni taa hómbo tí nuu búsa háá ỹɔu h̃uuhaaló. Kɛ́ aá ɣéle, saáɣa gulandái nátiini tiyá lɔ́ nɔ́ɔ fɔ́ maa núngai nátiini kisítɛ ma ti háá ỹɔítii mba fowó fíli su.

⁵Ná lɔ́ í kɛ́ni ná Kílisitii í vááni ngélewu, í ndéni Ngala ma, i ɣɛ ta, “Yáá lói ngáá saáɣa wɔlingái nátii ɛ́ɣɛ fembɛ wɔ́lingaitii. Náá hááw̃a, yí hómboa yí kɛ ngáá háwu nuu búsa lúwui í ɣɛ́ má.

⁶Toŋaní búsai taá mɔ ngáá sááɣai ɛ́ɣɛ sááɣai sí taá kúla faa ỹɔ́itii fááw̃a ti tá fíli taa í líílangɔ.

⁷Kɛ ngí ɣɛ́a ta, ‘Nyá béle tɛ, Ngalá, mááhei wóngɔɔ lé, ngáá ngí sí ɣɛ́ í lóngɔ ngí kɛ kíya nɔ́ɔ pɔnɛngɔ́ kɔwɔ́ato mbá Ngala Kɔ́lɔi h̃u.’ ”

⁸Hése Kílisitii i ndení, í ɣɛ ta, “Yáá ɣɛ́i loí ngáá saáɣa wɔlingáitii ɛ́ɣɛ fémbɛ wɔ́lingaitii, ná vólu, toŋaní búsai taá mɔ́ ngáá saáɣai ɛ́ɣɛ mɔ́ɔ́ sááɣaitii faa ỹɔ́itii fááw̃a tɛ́i í lííla.” I ná léni kíya bɛ́lɛ nátii tɔ kule í ma ti ɣɛ́ Ngala sávai laa wói w̃a.

⁹Kɛ Kílisitii i mɔɔ ɣɛa ta, “Nyá béle tɛ Ngalá, mááhei wóngɔɔ lé, ngáá ngí sí ɣɛ í lóngɔ ngí kɛ.” Ngala ngí hésendaa haaɣa gulandái lɔ́vei ngáá naa volú véle ngáá kɛinɔɔ́ í náá vólu w̃áá gélei héi gilí bátɛ.

¹⁰Sífaa Jísu Kílisitii í sí ɣɛ́ni Ngalá ndóngɔ í ɣɛ́i lá ngáá í kɛ. Ná wáá ngáá, i ɣɛi ngáá saáɣa a mu kpɛ́lɛɛ fááw̃a naa héiw̃aa i yíla kpé kúnafɔ fááw̃a, ná vá tɔ náa í kɛ́a tɔmbema w̃áá fíli áá mu wa Ngala ngááh̃u.

¹¹Ngele fíli ɔ́ɔ́ wó, Ngala sááɣa gula mbélai ti yilá ngíla fíli kɛ tɔ́ɔ́ lí táá ti Yála sááɣa gula ngéngengitii mbo na. Saáɣa gulandáá yiláá kpéngi sí hɔ́wɔ fíli kɛ tɔ́ɔ́ kɛ, kɛ́ ná fíli sú, saáɣai sítii tɛ́i belé kɛ́ ngáá háwu nuu háá ỹɔítii suuhaa ɔ́ɔ́ ló.

¹²Kɛ́ Kílisitii láa ngi ndá hááɣa gulandái faa ỹɔ́itii faaw̃a, naa héiw̃aa i ɣɛngɔ́ nɔ́ɔ yíla kpé aáva kúnafɔ maa hááɣai nga ngɛ́i wála mba aáva ná ná í gúlai su, i heiní náa ngufema ỹándai Ngala kpélaa masandáá h̃u.

¹³Naa vá tɔ náá áá ló na í ló su kpóloo Ngala ngí mbaahílima yélaitii kɛ ngáá kɔ́wɔ lóów̃aa wɔ́lingaa.

¹⁴Saáɣa yiláá kpéngi ná w̃áá véle w̃a, aá lɔ́ɔ́ kɛ́ ngáá háwu sítiini áá ti w̃ááw̃uỹa faa ỹɔ́i yaá faa ỹɔ́u vó kéle tɔ ɛi ɣɛ́ tí w̃a kúnafɔ.

¹⁵Hɛ́ɛ́ma Ỹínangi ɣéle tɔ í faa léi mú w̃a kɔwɔ́ato maa hái sí wa. Hése i ndéi, i ɣɛ ta,

¹⁶“Sí Ndemɔí Ngala ngí ndéngɔ aá wáá ngáá sí í ɣɛ́i ta, ‘Kuu tá lɔɔ vá fóloma ma, kɛ́lɛngi ngáá vá ngéɣema náa ni lówah̃u naa sítii ngáá ɣɛ́ tí w̃a ní vóngaitii, aa wáá ngáá, ngáá kɛ ngáá háwu ní hávaitii táa ɣɛ́ ti liítii su, tí héi ti gi má.’ ”

¹⁷Í mɔ́ɔ́ ɣɛ ta, “Kúnafɔ ngɛ́i mɔ́ɔ ti háá ỹɔítii ɛ́ɣɛ ti ỹááma háitii sei gi ma.”

¹⁸Ná faa ỹɔ́i h̃uuháálongɔ áá ɣɛ́ la h̃íí na, kɛ ná ná áá ɣɛ, saáɣa veka gula fáá ɛi mɔ́ɔ ɣɛ́ su faa ỹɔ́u h̃úúhaalo fááw̃a.

¹⁹Mu mbála Yalá fɛ́li mbélai, a maa lí náa Hɛ́ɛ́ma Wála Ỹándai nduwá ɛ́i mɔ́ɔ ɣɛ́ mu h̃u saáɣa haí w̃áá véle w̃a Jísu í mbóni mu haáw̃a.

²⁰Saí ná w̃áá véle lɔ́ Jísu í ndɛ́ɛ́h̃u véle niinaí ɣɛ́ngɔ ngáá a maa lɔ́ve la kula walaí volú véle a mú fólo Ngalá ma.

²¹Ná lɛ́i í ngáá Jísu í ngáá Ngala sááɣa gula mɔ́ɔ́ wala a mu haáw̃a lɛ́i Ngalángi vóngaitii kpɛ́lɛɛ tí tóko h̃u,

²²a mú lókola Ngalá ma, a mú lí kakála ngáá ndiiwóle. A maa ná ɣɛ́ sífaa, Jísu í mu gi mái ɣɛ́nga kpál̃au ngáá faa fíli aa mu wa, a mu w̃aaw̃úỹangɔɔ lé fó ngáá njɛ vanda.

²³Sí a máá nde ngáá aá lɔ́ ngáá a mu gitómaa, a mu hóu mba gíte kpé bɔw̃álale, kuulóngi Ngala ngí mbóngɔ a maá lá lá ngáá aá lɔɔ vá sítɛma nga.

²⁴A mu béɣe ngáá ỹɔw̃ɔ́ ỹɔ́w̃ɔ, a mu ỹɔw̃ɔ́ ỹɔ́w̃ɔ liiwúúlɛ ngáá a máa hómbo mú ndó ngááh̃u ɣɛ́ ngáá ỹɔw̃ɔ́ ỹɔ́w̃ɔ, ná vólu, a mu ɣɛ́ maá faa bɔ́wɔ ɣɛ ỹɔw̃ɔ́ ỹɔ́w̃ɔ yɛ.

²⁵A mu w̃ɛɛ́ndai Ngala fɛ́li fái w̃a kumbongɔ́i mu h̃u a mál̃aa lokogúla su kíya nungáá lɛ́ingaa táá kɛ. Kɛ́ laá ɣéle, a mú ỹɔw̃ɔ́ ỹɔ́w̃ɔ liiwúúlɛ ngwala gíte ná náa áá ɣéle p̃ɛ́ɛ́ Ndemɔí Jísu yangáimandai ngelewu íwaa bɛ́ɛ́ mba kíya wú kɔlɔ.

²⁶Ná náa tɔɔỹái yákɛngɔ ngáá mu ye kpál̃au ná a maayaá nda gi sú a máá faa ỹɔ́uni kɛ, kɛ ná ná áá ɣɛ, saáɣa fíli ɛi mɔɔ ɣɛ́ ná faa ỹɔ́i nátii fááw̃a maa ɣɛ́ máá tí ɣɛ.

²⁷Kɛ́ aá ɣéle, nduwái lɔ nɔ́ɔ́ náá áá ɣɛ mu h̃u kɔwɔ́ato sí wa áá vá ɣɛ́ma. Ná wáá ngáá, Ngalángi gɔ́sɔngi ɛ́ɣɛ ngɔmbu bandí bándii sí áá vá ɣɛ́ma áá nungái sítiini mɔ taa ló Ngalá ndáá wu.

²⁸Savaí Ngala ngí féni Muusé yáá nungái faaw̃a nuí fíli ɔ́ɔ́ ta ỹááni kɛ tɔ́ɔ́ í váá, ná nɔ́ɔ léi hééle félengɔ ɔɔ sáángɔ tɔ́ɔ́ nyaaní í w̃á. Ngaah̃u w̃aaw̃aanú hóu fáá fíli aa ɣɛi ná h̃u.

²⁹Kɛlaa nuí sí áá Ngalángi H̃íỹɛndou Loí háá h̃uuh̃ándɛ ɛ́ɣɛ saáɣa haí Jísu í mbóni í kɛ́lɛngi w̃ááh̃u yílini Ngala ngí ngéɣengɔ ti lówah̃u taá ngi vóngaitiini áá mú w̃ááw̃uỹa fó faa ỹɔ́i yaá nuí áá ná yéɣe ngáá faa gúlo múl̃ɔ, í mɔ́ɔ́ Hɛ́ɛ́ma Ỹínangi sí h̃úúhalata lɛ́i í ngáá faa bɔ́wɔ w̃ɔɔ, maa w̃ɔ́i ndá háá bamaí ɣéle aa ɣɛ́ wɔɔlɔ í lɔ́ve kpɛ́lɛɛ kpɛ́lɛɛ mba.

³⁰Sífaa a mú kɔ́lɔ ngáá Ndemɔí Ngala ngí ndengɔ́, i ɣɛ ta, “Nyá lɔɔ vá faa ỹɔ́u yélaitii máánɔw̃ɔma. Nyá lɔɔ vá fáitii poto kúlama nungáitii ma.” I mɔɔ ndeí, i ɣɛ ta, “Nyá lɔɔ vá ní vóngaitii kɔ́sɔma.”

³¹Aá lɔ́ ngáá faa h̃úúỹɔungɔ wála ngáá Ngalángi lɛ́i ndɛɛh̃ú í su áá lókovɛlɛ nuu w̃á.

³²A gisíya lɛ́ɛ́ ngáá ná h̃u Ndemɔí Ngalángi í tɔɔỹái yakɛ́i ngáá wú yé hése, wú lɔ́vei maanɔw̃ɔ́ bíh̃i bih̃i su laáva wú liilɔ́lɔ ngá.

³³Hɔ́wɔ ta tɔ́ɔ́ wú h̃úúhalata, tí fáá bá ndá wú w̃á kpɔ ndííwaa. Hɔ́wɔ tá vá wɔ́ɔ́ báha sítii mba ngáá ndiiwolé tɔ́ɔ́ ɣɛ́a ti h̃úúhalata táa fáá ỹɔ́u ɣɛ́ ngáá ti yé.

³⁴Sítii tɔ́ɔ́ ɣɛ́ kpindi vɛlɛ́ wú wɔ́ɔ́ báha ti wa ti w̃áánɔw̃ɔi h̃u. Ná tɔ́ɔ́ wú yáá wɔ́lingaitii kula wú yáá, wɔ́ɔ́ lokogúla ti h̃u ɛ́i belé báálɛ wú wa bɔw̃álale, wú ɣɛ́i nɔ́ɔ́ kɔlɔ́ ngáá ŋani lɔ́ ná maanɛ́ɛ́ngɔ í lɔ́ve ná wa aá vá mbaa ngáá kúnafɔ géle.

³⁵Náá hááw̃a, wú lííbangɔ i ɣɛ nɔ́ɔ́ la bɔw̃álale, wú w̃ááỹangi wáá vá maahɔ́lɔma i wɔɔlɔ ngwala.

³⁶Kule lɔ́ wú w̃a wú líílɔlɔngɔ í ɣɛ́ la kɛinɔɔ́ wááyaa Ngalá fáitii kɛ́, aáva kuulóngai sítii pa Ngalá ngí mbóngɔ ngáá wú yé aa kɛ ngáá háwu ti hítɛ nga.

³⁷Kíya nɔ́ɔ pɔnɛngɔ́ Ngala Kɔ́lɔi h̃u ngáá sí í ɣɛ́ngɔ ta, “Naa guló laa lówah̃u nɔ́ɔ lɛ́i kule í ma í vá, aá lɔɔ vá vaamá aáva aá lɔɔ vá h̃úmbuwa.

³⁸Ní vóngaitii ti lélembongɔ, tiyá lɔ́ɔ vá ndɛɛh̃u gitei h̃uuhíyama ngáá ndangí taa ɣɛ́ su ngáá ngé. Kɛ́ ná táa vólu yáfe ní hái wa, ndíílangɔ ɛi ɣɛ́ lá ti haáw̃a.”

³⁹A maa ngáá nungái sítii taá vólu yáfe Ngalángi hái wa aáva Ngalá ngáá ti ɣɛ kíli ỹaaní. Kɛ́ a muỹá lɔ ngáá nungáá mu langɔ́ ngáá Ngalá aáva í mu wúmaawonga.