Read Bandi HÍBULU 12 Bible Online

HÍBULU 12 - Bandi bible

HÍBULU 12

¹Nungáá bíh̃i bih̃ingí sítii ti híya veléi ɛ́ɣɛ ti gɛ́ɛ́ haítii tɔ taá ngákɛ ngáá mu ye ngáá sí í ngáá ndangí. Faalɔ, a mú bé fái sítii mba taá kɛ́ ngáá háwu sí kule í mú w̃a mú kɛ a mɔí kɛ, ná vólu, faa ỹɔ́u ɣɛ́ndai lɛ́i ɛ́i lómbiya víli mu gɔwɔ́ h̃u. Kɛ́ áa ɣéle, Ngalángi yéngengi í mú wutúwɔ a mú mbó ngáá lií kpɛ́lɛɛ kpɛ́lɛɛ.

²A mu yaah̃ú í ɣɛ́ nɔ́ɔ́ Jísu wa lɛ́i áá kɛ ngáá háwu a máá lá ngáá Ngala aáva maa lángi ɛ́i gɛ́ɛ́lɛ pele h̃u. I liilɔ́lɔni maanɔw̃ɔ́i yaá í ngéɣeni ná h̃u tí kpákpani kulɔ́sii w̃a ɛ́ɣɛ maa wúfengi í yéini ma. I ná vá kɛní nɔ́ɔ kooh̃unɛɛ háá walaí sí hááw̃a í ɣɛ́i áá va maahɔ́lɔma naa vólu w̃ái. Aáva aá lɔ́ náá héini ngufema ỹándai Ngala kpéla masandáá h̃u.

³A gisíya nɔ́ɔ ngáá kíya Jísu í líílɔlɔni sílima wálai ya faa ỹɔ́u ɣɛ́ mbélaa tí tɛ́i ma aáva ná áá kɛ nduwúh̃u ɛi mɔɔ gula wú wá wɔ́ɔ́ lókogula ndangí h̃u wú su ngáá Ngalá.

⁴Faa bɔ́lundai wáá híya su, ná wáá ngáá, fáá ỹɔ́i ngeleí sí wúú yélai taa ɣɛ́ taa ndá wú w̃á wáá nɛ́ɛ́ loí lápima nga wɔ́ɔ́ fólo saa lowá la.

⁵Wú lééw̃anga ngoí sítii ma Ndemɔí Ngala ngí ndéngɔ wú w̃a ngáá aa wú lííwuulɛ ná wú ngáá ngi léngaa? Ná wáá ngáá, sí í ɣɛ́i ta, “Ní lóu, ná ngáá ngákɛ ngáá háwu ngáá yí maakɛ pánda w̃aahɔ́lɔ, wolí ɣɛ́ má. Ná ngáá kɛ ngáá háwu faa báma í lá í w̃a ngáá sífaa sí yáá ɣɛ́ kɛ́i ɛi ɣɛ péle w̃a, yaá liiỹááni náá hááw̃a.

⁶Bɔw̃álale, sítii kínɛi ndóngɔ ngáá ti ye, tiyá lɔ́ ngáá maakɛ pánda vu ti h̃u. Ɛ́ɣɛ múl̃ɔ sítii ngáá lókohei ti wu ngáá ní léngaa ngáá kɛ ngáá háwu faa báma í la ti w̃a ná taá faa ɣɛ́ ɛ́i ɣɛ́ pele w̃a.”

⁷Ná máanɔw̃ɔ áá lá wú w̃a, a liilɔlɔ́ nga, wú ngéɣe nɔ́ɔ́ ngáá kíya nɔ́ɔ ndou kɛ́ɛ́ɣɛ áá ɣɛ́a maakɛ pánda vú ngi lóu h̃u, sífaa maanɔw̃ɔ́i lɔ áá ngákɛ ngáá kɛ Ngalá tɔɔ wú h̃úúhou ngáá ngi léngaa. Ndoú fíli áá na ngi kɛ́ɛ́ɣɛ áá bááh̃aa maakɛ pánda vumá su.

⁸Ná Ngalá ngɛ́i ɣɛ́ maakɛ pánda vuí wú h̃u kíya áá kɛ ngáá ngi léngaa vékaitii, kɛ ná ná áá ɣɛ, wáá ngáá ngi léngaa gitea, kɛ wú gúlangɔ aa ɣɛ nɔ́ɔ́ la ngáá kɔlɔ́ ndéngaa.

⁹Sítii ti ngáá a mu kɛ́ɛ́ɣɛaitii tí ngélei sí wu taá maakɛ pánda vu mu h̃u aáva a maá wúfe ti w̃a kɛlaa Ngalá lɛ́i í ngáá mu Kɛ́ɛ́ɣɛi i ngelegóóh̃u, laá ɣéle p̃ɛ́ɛ́, kule lɔ́ ma a mu gúla kɛlɛ́ma mbɛ kɛinɔɔ́ mu ɣɛ́ ndɛɛh̃ú gítei h̃u.

¹⁰Mu kɛ́ɛ́ɣɛaitii ti ngeleí sí wu táá maakɛ pánda vu mu h̃u kuu h̃úúlukpɔngɔ laa lówah̃u. Aáva kíya ɔ́ɔ́ ɣɛ́ ti gi má ngáá aá lɔ pele w̃a ngáá tí kɛ, ngimɔ́ɔ́ tɔ́ɔ́ kɛ. Kɛ́ Ngalá táa aa kɛ mu bɔwɔ́ bɔ́wɔ gúlasuunuma haaw̃a ngáá kíya nɔ́ɔ faa ỹɔ́u vó fíli áá su muỹá bɛ́lɛ nɔ́ a mu ɣɛ́ kíli áá yáá ɣɛ h̃íí.

¹¹Ná táa maakɛ pánda vu mu h̃u, a maa w̃ááw̃aanu. Mu góóh̃unɛɛngɔ ɛi ɣɛ lá táingi ná h̃u, kɛ́ naa wútuwɔ véle muỹɛ́i maakɛ́ngi áá ɣɛ náá mu h̃u faa bámai w̃aa véle w̃á maa ɣɛ́ náá híyani su, ndiihéi ɛ́ɣɛ telembongí tiyá lɔ taá ɣɛ ngáá maa gúlasuunumai.

¹²Wú ndúwuh̃ugulaa wa, kɛ́ a nduwuh̃ulɛ́ ngáá wee.

¹³A wááyaa hiya ngáá pele vánda kɛinɔɔ́ nduwúh̃u ɔ́ɔ́ gúla wú wa, kɛ́ aá ɣéle, wú h̃úúbangɔ í ɣɛ́ la.

¹⁴A yakpá kɛ́ŋɛ wú ɣɛ́ ndiiheí h̃ú wáá núngaa vékaitii kpɛ́lɛɛ, wálaa ɣɛ́ faa ỹɔ́u ɣɛ́ndaa h̃u bɔw̃álale, nuu fíli áá ná ɣɛ́, ɛi ɣɛ Ndemɔí Ngála ngéle.

¹⁵A ndama ngáá kɛinɔɔ́ nuu fíli álaa vólu yáfe Ngalangí háá bɔwɔí wa. A w̃aah̃ú béle ngáá nuu fíli ndíí álaa ỹááni ɔ́ɔ́ nungáá wú ngapóte. Nuu lááli ná aa nungáá bih̃íw̃aa ɣɛ́ kíli ỹaaní.

¹⁶A naa w̃ááh̃u béle gíte ngáá kɛinɔɔ́ nuu fíli álaa ɣɛ́ kɔ́lɔsiya mbóndaa h̃u ɔɔ álaa ɣɛ́ ngáá nuí sí áá Ngalá fááw̃a kíya Ísɔ í kɛ́ni. Ná wáá ngáá, ná kpɔkɔ ỹɛ́ɛ́ni ỹɛ́ tái ngiláá í fóloni ma, Ísɔ í ndiyalaí w̃áá híyani ngí ndéɣe w̃a ngáá í ngi ndéɣe ỹɛ́ɛ́nii ỹɛ.

¹⁷Ná náá í fóloi ná h̃uu w̃á ti kɛ́ɛ́ɣɛ í ɣɛ́i áá vá hɛ́ɛ́ma ndiyaí yɛ, Ísɔ aa mɔɔ sɛ́i ná w̃ááhɔlɔni kíya bɛ́lɛ í wɔ́lɔni, í maa w̃áánɛɛnɛ mboí kɛ́ pele fíli aa mɔɔ ɣɛi na ɔ́ɔ́ mɔ́ɔ́ sí w̃áálovi ngáá í ɣɛ́i náá kɛi.

¹⁸Wú ndái ɣɛ́ kíli gulangɔ́ láá lé ngáá ŋani nuu áá tɔ yí lúba mba kíya Ísulɔ yeláitii tí ndái í ɣɛ́i na. Ná wáá ngáá, ná ti lííni ngihé ngwálai ná gákala taa tolí ngáá Sáinai, ngɔmbu hó ngwála í ɣɛ́i ma, kpindí yá sítɛngɔ wála i maayelé mbélengɔ, ná vólu, fɛfɛ ngákpangɔ wála i ma.

¹⁹Ti búlu wála woo ỹɛ́nini áá hɛ́, ti Ngalá ngoo ỹɛ́ni aáva sítii kpɛ́lɛɛ tí ngoo ỹɛ́nini tí maanɛ́ɛ́nɛ mbóni ngáá Ngalá ngálaa ndí ngu ma ngáá yɛpɛndáá kɛ́ í gɛ́ɛ́lɛ.

²⁰Bɔw̃álale, taa ɣɛ́i loí tɔɔ́ lokohéi savaí wú Ngala ngí ndáni, ná wáá ngáá sí, í ɣɛ́i ta, “Fulú ỹáni fíli í lúba maa yíhei wa kɛ tí ló sɔɔmá ngáá kɔtu í ló sú í há í bɔ́ɔ́ ɣɛ ngáá toŋaní.”

²¹Maa hái wála w̃aa ỹíkingɔ i ɣɛi la í ló su p̃ɛ́ɛ́ Muusé gíte i ɣɛ ta, “Súú lɔɔ bɛ́li ngáá nduwái.”

²²Kɛ́ aá ɣéle wú ndái ɣɛ kíli gulangɔ́ɔ́ lé nɔ́ɔ́ ngáá wú váánga ngihé ngwálai sí gákala taa tolí ngáá Sáỹa, wú vá taa walái sí h̃u taá náá lolí ngáá Jɛlúsɛl̃ɛ í ngáá ngelegóóh̃u gélei naa w̃álekaitii ti yambɔ́ɔ́lɔngɔ walaí. Jɛlúsɛl̃ɛi sí lɔ́ na Ngalá fááw̃a lɛ́i í ndɛɛh̃ú h̃u kúnafɔ.

²³Wú váánga Ngalángi léngaa liiwáá ndiyalaí ŋál̃aa gúlangɔɔ ti yɛ, tiyɛ́i ti laahéingaitii pɔ́nɛngɔ ngelegóóh̃u. Wú váánga naa Ngalá ngéle lɛ́i áá nuu kpɛ́lɛɛ kɔ́sɔ pele w̃a, ɛ́ɣɛ sítii ti h̃úúyafuw̃angaitii ti ngele tiyɛ́i ti ɣɛ́i ngáá telembo mbélaa Ngalá ngááh̃u tiyá lɔ́ na tiyɛ́i Ngala ngí ti ɣɛ kíli batɛngɔ́ fó fóndei.

²⁴Wú váánga náá Jísu yelé lɛ́i í kɛ́lɛ niinaí Ngala ngí ngeɣéngɔ tí lówah̃u taá ngi vóngaitii í kɛ́ kíli batɛngɔ́. Saáɣa haí sí Jísu Kílisitii í mbóni aa faa yakɛ́ ngáá mu ye ngáá pángɔ í lɔ́ve sái wá Éébɛ í mbóni.

²⁵Wú ndá gí su gíte ngáá wálaa léle wolilóndaa w̃a Ngalá ma lɛ́i áá yɛ́pɛ wú yéle. Sítii ti léleni ngáá tí wólilo ma ná h̃u í ngí lááhingi wóni ngáá ti ye ngelewu taá vélai maa háá bamaí wa í lái ti w̃a. Muỹa ɣéle p̃ɛ́ɛ́ pele guló áá ná mɔɔ́ w̃aavela ná maa léle ngáá a mú wólilo Ngalá ma lɛ́i ngi lááhingi áá gúla ngelegóóh̃u.

²⁶Ngala ngoi i kɛ́ni ngáá háwu ndɔwɔlɔ́i í bɛ́li wɔ́lɔ, kɛ́ sí h̃úi láá i kuuló mbónga, i ɣɛ ta, “Nyá lɔ́ɔ vá mɔ́ɔ́ kɛ́ma ngáá háwu ngeleí sí wu í bɛ́li, kɛ́ sí h̃úi láa ngeleya kéle tɔ nyá lɔ́ɔ́ kɛ ngáá háwu í bɛ́li.”

²⁷Ngoí sí ndengɔ́ ngáá “Nyá lɔ́ɔ vá mɔ́ɔ́” kɛma ngáá háwu laá lɔ́ áá ngákɛ kpál̃au ngáá ŋanií sítii ti bátɛngɔ taa lííka lííka, Ngalá tɔɔ vá ti híɣema vóma ngáá kɛinɔɔ́ sítii tɛ́i lííka lííka ti ló lóów̃aa.

²⁸A mú sɛ́ɣɛɛ gula hɔ́ɔ́ Ngalá ma ná a mú ngi w̃ásandai wu lɛ́i kulangɔ́ ngáá ŋani ɛ́i lííka vóma. A mú fɛ́li ngáá fɛli péle sí áá ndiivó, a mú kɛ́ ngufema wála h̃ú,

²⁹sífaa Ngalá lɛ́i í ngáá a mu Yálangi, ngi hái gulangɔ́ɔ́ lé ngáá ngɔmbu áá ŋani w̃ɔ kpái.