Read Bandi HÍBULU 13 Bible Online

HÍBULU 13 - Bandi bible

HÍBULU 13

¹A ndi ngu ma ngáá ndongí ỹɔw̃ɔ́ ỹɔ́w̃ɔ hááw̃a ngáá kíya kule í Ngala fɛ́li mbélai ma tí kɛ.

²A waá sóta ndááw̃aavɛlɛndai gúla wolí h̃u wú vɛ́lɛitii mbu. Ná lɔ́ nungáá lɛingáá tí lói kɛ́ma í ló su tí malékaa laaw̃áá vɛ́lɛ taá ɣɛ́i faa wɔ́lɔ mba.

³A waa lééw̃a sítii ma tí kpíndi vɛlɛ́ wú, wú gísiya nɔ́ɔ ngáá ná wɔ́lii wɔ́ɔ́ ɣɛ́ kpíndi vɛ́lɛi wu wáá tiyéni. A waa lééw̃a sítii ma ti w̃áá áá nɔ́w̃ɔ, wú gísiya nɔ́ɔ́ ngáá ná wɔ́lii wú w̃áá ɔ́ɔ́ ɣɛ́a nɔ́w̃ɔ wáá tiyéni.

⁴Kɛmbɛheí í ɣɛ́ ngáá ngufema háá wu kpɛ́lɛɛ ngéya. Siỹɛngáitii taá tí ỹáh̃aitii ti lɔwɔ́baɣangɔ í ɣɛ́i la ỹɔw̃ɔ́ ỹɔ́w̃ɔ yáá. Sítii tɛ́i ɣɛ́ kɛmbɛheí h̃u ɛ́ɣɛ sítii taa ɣɛ́ kɛmbɛhéi h̃u tálaa kɔlɔsiyá mbó sífaa, Ngalá tɔɔ vá ti waalévema ngáá taá véleni.

⁵Kápa mɔní álaa víli wú líí vólu wú lɛ́ɛ́h̃ui sí h̃u wú wáá suuhíya. Sí áá ɣɛ́ wú yáá ná í wú lííla sífaa Ngala ngí ndengɔ́, i ɣɛ ta, “Kúnafɔ ngɛ́i béteve wú wa, kúnafɔ ngɛ́i lókogula wú h̃u.”

⁶Sí í ɣɛ́ hɔ́ɔ́ ngáá a mu lé ngóó a mu liibángɔ í ɣɛ́ la nga, ná wáá ngáá, sí ndéngɔi ngáá sí, “Ndemɔí Ngalá tɔ́ í ngáá ní bɔ́mba w̃ɔ́i, nduwá ɛ́i ɣɛ́ sú, nuu búsa yákpa ngáá mááh̃u ngáá ɔ́ɔ́ fáa ɣɛ́ ngáá ngé.”

⁷A giséi sítii ma ti ɣɛ́i hése ngáá wú wútuwɔaitii tɔ́ɔ́ Ngala ngói le wú w̃a. Wú gísiya ngáá kíya tí lɛ́ɛ́h̃uitii suuhíyani. Wá bɛ́lɛ wú la ngáá Ngalá kíya ti lángɔ í ɣɛ́i lá ngáá Ngalá.

⁸Jísu Kílisitii ɣɛ kíli w̃aa ɛ́i lóvi sí h̃úi, laá va maa áá lóvi wɔ́lɔ, maa vá ngɛi lovi kúnafɔ.

⁹Wálaa kɛ nungáá tɔɔ wú yákpolowa ngáá kalambo tááli tááli. Maa áá ɣɛ́ nɛɛni Ngalángi háa bɔwɔí í mu h̃úuba Ngala fái h̃u, kɛ́ maa laa h̃úúba ngáá maaỹɛɛ́ mba hááni kɛ́ndaa kɔwɔ́ato mɛɛní ỹɛ́ndaani mba bɛ́kpɛ sí ɛ́i faa fíli kɛ sítiini kele tɔ mbɛ taa híya ngáá maa hái nátii.

¹⁰Ngala sááɣa gula mbélaitii taa Ngala sááɣa gula ngéngengi wo Júsuai ti Yála fɛli pɛ́lɛi wu i ɣɛi pele w̃a ti haáw̃a ngáá ti sí ta ỹɛ taa kula ngáá saáɣai Ngala sááɣa gula tútui w̃a. Kɛ́ a mu ndá Yála saaɣa gula tútui laa, kule áá ti w̃a tɔ́ɔ sí ta ỹɛ taá kúla ma ngáá saáɣa.

¹¹Ngala sááɣa gula mbélai ti wutúwɔɔ w̃ɔ́ɔ́ walaí aa li ngáá toŋaní ỹááw̃ɔi ỹandái mbéi í ngáá Hɛ́ɛ́ma Wálai Ỹándai. Laá lɔ áá ɣɛ́ ngáá sááɣa nungáitii ti háá ỹɔítii fááw̃a, kɛ́ toŋaní búsai gíte táá gúla la mbéi wa nungáitii ti laa w̃áávɛlɛngɔ áá ɣɛ́ la na ti mɔ.

¹²Ná lɔ́ í kɛ́ni Jísu í gúlani taí wa í saa w̃ááhɔlɔ. Ná i ɣɛí kɛinɔɔ́ ngi hááɣai hái w̃áá véle w̃a sítii taa hítɛ polú ti wúyangɔ í ɣɛ́ la fó ti háá ỹɔítii ngeyá.

¹³Náá hááw̃a, muỹá bɛ́lɛ a mu báha mba, mu gula taí wa ngangufé ngí vú mú w̃a kíya ngangufé ngí vúni ma.

¹⁴Sífaa ngeleí sí wu taa walá fíli aa na mɔɔ ɣɛ su yɔ́ɔ́ ɣɛ́ aa ɣɛ́ na kúnafɔ, kɛ́ a muỹá lɔ́ɔ́ naa lúwɔɔ béle ngáá taa walái sí Ngalá ngáá vá kɛ́ma ngáá háwu í ɣɛ́ na a mu ɣɛ́ su, lɛ́i áá ló ná kúnafɔ.

¹⁵Jísu w̃aa véle w̃a a mu ɣɛ́ nɔ́ɔ fɔ́ a maá Ngalá tɛ́. Ná lɔ́ áá ɣɛ ngáá saáɣa ɣɛ kíli nuu áá kúla Ngalá ngéle. Sí lɔ́ í ngáá saáɣai áá gúla mu la ná á maa gáhe ngáá Jísu lɔ í ngáá mu Lemɔ́i.

¹⁶Aáva wálaa lééw̃a faa bɔ́wɔ ɣɛndái w̃a ỹɔw̃ɔ́ ỹɔ́w̃ɔ yɛ ɛ́ɣɛ wááyaa bɔ ỹɔw̃ɔ́ ỹɔ́w̃ɔ wa sífaa, ná lɔ́ í ngáá saáɣa ɣɛ kíli áá Ngalá ndiilá.

¹⁷A gólo wú wútuwɔaitii mbɛ, wú híya ngáá sí táa nde wú w̃a. Ndɛɛlɛmbó ngáá ti yaá wú w̃ááh̃u bélendai h̃u Ngala fái h̃u sífaa, tiyá lɔɔ vá kɔsɔ́ kúlama Ngalá kákala kɔwɔ́ato ti yéngengi wó kíli wa. Ná wáá gólo ti yɛ, taá ɣɛ́ taá tí yéngengi wo ngáá ndiiwolé, kɛ́ ná ná láá le, taá ɣɛ́ taá mbó ngáá maaw̃aanú aáva wɔ́i kpɔ́mba fíli mááhɔlɔ ná h̃u.

¹⁸A ndi ngu ma ngáá Ngala fɛ́lindai ni yɛ. Ni langɔ́ɔ́ lé la aáva ni gí mái ɣɛngɔ́ kpál̃au ngáá sí kule í ni w̃a ní kɛ laá lɔ níwaa kɛ nɔ́ɔ́ táingi fíli má.

¹⁹Aáva nyá lɔɔ wú w̃áánɛɛnɛ gíte ngáá wú kɛ ngáá hɛ́mbɛ fíli wú Ngala fɛ́li múl̃ɔ ngwala ngáá í mɔ́ɔ́ ngángaima wú yéle h̃úmbuwa.

²⁰Ngala ngí kɛ́a ngáá háwu a mu Lemɔ́i Jísu Kílisitii í yóóɣe sái h̃u. Jísui sí vá kulangɔ́ɔ́ lé ngáá mbaala w̃ááh̃u béle mɔ́ɔ́ yakpángɔ wála kɔwɔ́ato saáɣa haí wa í mbóni. Sái ná lɔ́ náa í kɛ́ngɔ ngáá háwu kɛ́lɛngi Ngala ngí ngéɣeni ti lówah̃u taá ngí vóngaitii í ndó ma. Bɛlɛ́ Ngalá lɛ́i áá ndiihéi gúla kɛ́lɛma í kɛ́ ngáá háwu wú ɣɛ́ kíli batɛ́ngɔ í ɣɛ́ la faa vánda híí kpɛ́lɛɛ kɛ́ fááw̃a ngáá kɛinɔɔ́ sí áá ɣɛ́ loí wú kɛ́ wú kɛ, aáva bɛ́lɛ Jísu Kílisitii w̃áá véle w̃a í mu ya ngengé kíya fíli áá ndiivó. Aáva maayáá Jísu Kílisitii lɛ máá wúfe ma kúnafɔ taá ngí ndá gúnafɔ! Amíína.

²²Mu mbála Yalá fɛ́li mbélai, wú w̃áánɛɛnɛngɔɔ lé ngáá wú kɛ́ ngáá ndiilɔlɔ́ wú wólilo keela wói sí w̃a áá nuu lííwuulɛ bɔw̃álale, kɔlɔí sí ngí pɔ́nɛnga wú yéle suu áá góóh̃a ngwala.

²³Ndóngɔɔ lé wú ɣɛ́ faa wɔ́lɔ mba ngáá a mu mbála Yalá fɛ́li mɔ́i sí taa ɣɛ́ ma Tímoti tí kulangá kpindi vɛlɛ́i wu. Ná áá vá h̃úmbuwa, ngáá ɣɛ lói ní vá naá láa wú yéle ni wú lɔ.

²⁴Ngí há wú wútuwɔaitii kpɛ́lɛɛ ma ɛ́ɣɛ Ngalángi vóngaa vekaítii kpɛ́lɛɛ. Mu mbála Yalá fɛ́li mbélai sítii ti Étɔli lɔwɔlɔí h̃u tí hááni wú w̃a.

²⁵Bɛlɛ́ Ngalángi háá bɔwɔí í ɣɛ́ wú kpɛ́lɛɛ mbɛ́.