Read Bandi HÍBULU 3 Bible Online

HÍBULU 3 - Bandi bible

HÍBULU 3

¹Faalɔ, wɛ́i wú ngáá mu mbála Yalá fɛ́li mbélai, wɛ́i wá bɛ́lɛ Ngala ngí wú lólinga ngáá wú vá ngelé, a wóliɣɛ Jísu w̃a. Ná wáá ngáá Jísu lɛ́i Ngala ngí tɔ́vengɔ, í ngáá Ngala sááɣa gula mɔ́ɔ walaí Ngalá fɛ́lindai sí w̃áá véle w̃a a mu langɔ́ la.

²Jísu í ɣɛngɔ́ ngáá tokola ma w̃ɔ́ɔ́ Ngalá ngeyá lɛ́i í lókolongɔ mba, kíya nɔ́ɔ Muusé í ɣɛ́ngɔ ngáá tokola ma w̃ɔ́ɔ́ Ngálangi yéngengi h̃u Ngalángi vóngaitii faaw̃a.

³Kule lɔ́ ma Jísu i ngufema w̃ááhɔlɔ í lɔ́ve Muusé wa kíya nɔ́ɔ pɛlɛ́ ló mɔ́i áá ngufema w̃ááhɔlɔ í lɔ́ve pɛlɛ́i wa áá to.

⁴Pɛlɛ́ fíli nuu lɔ́ nɔ́ɔ áá to aáva Ngalá tɔ́ í ngáá fáá kpɛ́lɛɛ kpátɛ mɔ́i.

⁵Muusé í ɣɛ́i ngáá tokola ma w̃ɔ́ɔ́ Ngalá ngeyá ná í ɣɛ́i ngáá Ngala ngí yénge mɔɔ áá yénge Ngalangí vóngaitii kpɛ́lɛɛ fááw̃a. Aáva fái sítii Ngala ngí ɣɛi áá vá tí ɣɛmá kúna Muusé í tí léni nungáitii ma.

⁶Kɛ́ Kílisitii lɛ́i í ngáá Ngalángi H̃íỹɛndou Loí, áá lɔ ngáá tokola ma w̃ɔ́ɔ́ ngi yéngengi h̃u Ngalángi vóngaitii mááh̃u. A múỹa lɔ́ ngáá Ngalángi vóngaa nɔ́ɔ léi ná ndiibángi ɛ́ɣɛ ndángi áá ɣɛ́ mú h̃u kɔwɔ́ato mu gítomai wa.

⁷Náá hááw̃a, kíya nɔ́ɔ Hɛ́ɛ́ma Ỹínangi áá nde, ná wáá ngáá, sí áá ɣɛ́ ta, “Ná hááwɔ wáá Ngala ngóó ỹɛ́ni,

⁸a waá ngoli h̃u bɔlɔ́ kula kíya wu káwalani tí kɛ́ni. Ná wáá ngáá, kíya tí Ngalá súúgɔvɔni, tí ló ndaa wú ngaalaí h̃u.

⁹Ngala ngí ɣɛ ta, ‘Wú káwalani ti súúgɔvɔni ngáá ti tɔ sí ngíwaa vá kɛ́ɛma kíya bɛ́lɛ ti ɣɛ́i náa naa h̃úú lɔí sí ngí ɣɛ́i kɛí ti yɛ fowó vúú nááningɔ laa lówah̃u.

¹⁰Ná lɔ́ í kɛ́i ndííyaw̃al̃angɔ í ɣɛ́i la ti w̃a, ngí ɣɛ́ ta, Nápa ti lelémbongɔ láá le ngéya, ná vólu, ti golo lálangɔɔ lé ngáá ngé.

¹¹Ndííyaw̃al̃angɔ í ɣɛ́ngɔ lá ti w̃a, ngí ndé, ngí ɣɛ́ ta, Kúnafɔ tɛ́i lí tɔɔ́ fólo ní lɛ́ɛ́lɛmbomai ngí náa ɣɛ kíli batɛngɔ́ ti haáw̃a.’ ”

¹²Mu mbála Yalá fɛ́li mbélai, a w̃aah̃ú béle ngáá nda tálai ɛ́ɣɛ faa ỹɔ́u líí álaa ɣɛ́ wú líí h̃u, ɔ́ɔ́ kɛ wɔ́ɔ́ vólu yáfe Ngalá mba lɛ́i ndɛɛh̃ú í su.

¹³Kɛ́ aá ɣéle, a wááyaa ỹɔw̃ɔ́ ỹɔ́w̃ɔ liiwúúlɛ ngele fíli áá wó ná nɛ́nɛ kpɛ́ a mu táingi sí h̃u taa ɣɛ́ ma hááwɔ kɛinɔɔ́ faa ỹɔ́u ɣɛ́ndai álaa wú yákpolowa, ɔ́ɔ́ kɛ wɔ́ɔ́ ɣɛ́ ngáá ngoli h̃u bɔ́lɔ mbélaa.

¹⁴A maá ɣɛ́ nɔ́ɔ léi ngáá ngenge mbélaa maa Kílisitiini ná á mɔ́i yɔ́ njɔ́ ndangí wa í ɣɛ́i mu h̃u tɔkúla héi mái, kɛ́ aá ɣéle, a mú ndí ngu ma í ló su ngakɛɛlɛmái í fólo.

¹⁵Kíya nɔ́ɔ pɔnɛngɔ́ Ngala Kɔ́lɔi h̃u ngáá sí í ɣɛ́ngɔ ta, “Ná hááwɔ wáá Ngalá ngoo ỹɛ́ni, a wáá ngóli h̃u bɔlɔ́ kúla kíya wú káwalani tí kɛ́ni, tí lo ndáá wú ngaalaí h̃u.”

¹⁶Elení tɔ́ Ngala ngí fáá léi ti w̃a tí lói ndaa wú? Kɛ́mbɛ í ɣɛi ngáá nungái nátii kpɛ́lɛɛ Ngala ngí kɛ́ni ngáá háwu Muusé í ti gúlani ndɔwɔlɔ́i ná wa taa naa lolí ngáá Íjepi?

¹⁷Elení tɔ́ Ngala ndííyaw̃al̃angɔ í ɣɛ́i lá ti yaá fowó vúú nááningɔ hááw̃a? Kɛ́mbɛ i ɣɛi ngáá nungái nátii tí fáa ỹɔ́i ɣɛ́i ngáá Ngalá tiyá vá ti há ngaalaí h̃u?

¹⁸Elení tɔ́ Ngala ngí ndéni ngáá kúnafɔ tɛ́i lí tɔ́ɔ fólo ngi lɛ́ɛ́lɛmbomai í naa ɣɛ kíli bátɛni ti haáw̃a? Kɛ́mbɛ i ɣɛi ngáá nungái nátii tí loi Ngala ndáá wú?

¹⁹Ná aa ngakɛ́ ngáá mu ye ngáá taá ɣɛi hómboi tɔɔ́ fólo kɛlaa tɔɔ́ lí ngi lɛ́ɛ́lɛmbomai í náa ɣɛ kíli batɛí ti haáw̃a kɔwɔ́ato nda tálai wa ti ɣɛ́i su ngáá Ngalá.