Read Bandi HÍBULU 4 Bible Online

HÍBULU 4 - Bandi bible

HÍBULU 4

¹Náá hááw̃a, ná múỹa bɛ́lɛ Ngala ngí kuuló táálii sí wónga ngáá mu ye, ngáá aá lɔ́ɔ kɛ ngáá háwu mu lí ngi lɛ́ɛ́lɛmbomai, a w̃aah̃ú béle ngáá maa hái ngáá kɛinɔɔ́ wú tá fíli wálaa fáa ɣɛ́ ngáá áá kɛ ngáá háwu wɔ́i lí ngi lɛ́ɛ́lɛmbomai.

²Sífaa, Ngala kééla woo vandaí i lengá mú w̃a kíya nɔ́ɔ í léni mu káwalani ma. Tí Ngala kééla woí ná ỹɛ́nini, kɛ́ taá gulaní h̃úúnuma su bɔw̃álale, taá ɣɛ́i laí la.

³A muỹɛ́i mu langɔ́ ngáá Ngalá kééla woí a maá lí ngi lɛ́ɛ́lɛmbomai. Sí nɔ́ɔ Ngala ngí yɛ́pɛni kɔwɔ́ato naa wa ná í ɣɛ́i ta, “Ndííyaw̃al̃angɔ i ɣɛngɔ lá ti w̃a, ngí ndé ngí ɣɛ́ ta, ‘Kúnafɔ tɛ́i lí tɔɔ́ fólo ní lɛ́ɛ́lɛmbomai ngí náá ɣɛ kíli batɛngɔ́ tí haáw̃a.’ ” Ngala ngí ndɛɛlɛmbó fái sí léngɔ kíya bɛ́lɛ í ɣɛ́i náa viláni fáitii kɛ kíli batɛmá gi ma wɔ́lɔ kpɔ́lɔɔ ngélewu bátɛ táingi w̃a.

⁴A mú kɔ́lɔ nɔ́ɔ ngáá ná lɔ́ ngáá tɔɔỹaá bɔw̃álale, ỹandá tá lɔ́ na Ngala Kɔ́lɔi h̃u faa tá léngɔɔ lé na kɔwɔ́ato folói ngɔféla kélei wa, maa hái va mbaa ngáá sí, “Ngala ngí lɛɛlɛmbóni ngi yéngengi kpɛ́lɛɛ mbóndai h̃u folói ngɔféla kélei w̃a ndɔwɔ́i h̃u.”

⁵Ỹanda véka ta h̃u múl̃ɔ Ngala Kɔ́lɔi h̃u, ndengɔ́ɔ́ lé na ngáá sí í ɣɛ́ngɔ ta, “Kúnafɔ tɛ́i fólo tɔɔ́ lɛ́ɛ́lɛmbo mbéinda ngí náá ɣɛ kíli batɛngɔ́ ti hááw̃a.”

⁶Náá hááw̃a, Ngala ngí naa loá nungáá vékaa yɛ ngáá ti lɛ́ɛ́lɛmbo. Sítii pa tí ngí gééla woí ỹɛ́nii hése taá lɛ́ɛ́lɛmboi bɔw̃álale, ti goló lálangɔ i ɣɛi la ngáá Ngalá.

⁷Náá hááw̃a, Ngala ngí mɔ́ɔ́ lokoloí foló véka wá í tóli ngáá hááwɔ. Fowó bih̃í kpih̃i ngí gulaí sú í síɣe ná h̃úú w̃a siỹɛndópoi ná tɔ́ɔ́ ɣɛ́ ma Deevé laá bɛ́lɛ i yɛpɛí kɔwɔ́ato maa hóloi ná wa kíya nɔ́ɔ ndengɔ́ kílii kɔlɔí sí h̃u, ná í ɣɛ́i ta, “Ná hááwɔ wáá Ngala ngóó ỹɛ́ni, a waá ngoli h̃u bɔlɔ́ kúla.”

⁸Béle siỹɛndópoi ná tɔ́ɔ́ ɣɛ́ ma Jásuwa i ɣɛi kɛní ngáá háwu mu káwalani tí ndɛ́ɛ́lɛmbo mááhɔlɔ, Ngalá ngɛ́i belé mɔ́ɔ́ lo yɛpɛmá kɔwɔ́ato foló véka wa.

⁹Ná lɔ́ í kɛ́a ngáá kɛ ndɛɛlɛmbó tɔ́ nɛ́nɛ na kpɛ́ náá wutúwɔ Ngalángi vóngaitii fááw̃a kíya nɔ́ɔ Ngala ngí lɛ́ɛ́lɛmboni folói ngɔféla kélei w̃a.

¹⁰Sífaa, nuí fíli áá ndɛ́ɛ́lɛmbongi w̃ááhɔlɔ Ngala ngí maa gúúlo mboní, maa w̃ɔ́i aa lɛɛlɛmbó kpɔwɔ́ bɔ́wɔ yéngengi wá kíya nɔ́ɔ Ngala ngí lɛ́ɛ́lɛmboni ngi ndá yéngengi wa ná í vílani ngélewu bátɛma.

¹¹Náá hááw̃a, a mú yákpa gíte kɛ́ŋɛ kɛinɔɔ́ mú tá fíli málaa faa ɣɛ́ ngáá áá kɛ ngáá háwu a mɔí ndɛ́ɛ́lɛmbongi ná w̃ááhɔlɔ kíya nɔ́ɔ mu káwalani taá lɛ́ɛ́lɛmboni sífaa, ti kólo lála gúlai ngáá Ngala.

¹²Ngalá kééla woí gulangɔ́ɔ́ lé ngáá ŋani ndɛɛh̃u í su aáva ngakpá tɔ́ su áá fáá ɣɛ́. Ngi hái gúlangɔɔ lé ngáá ngandíngɔɔ lé í lɔ́ve mbowá hɔ́kpɔ wa ndaí áá ɣɛ́ mba féle. Aa hombó í wála ndɛɛh̃úi lówah̃u taá nuu h̃úúyafuw̃angi. Aa wala nuu gáálɛitii su. Aa hómbo í nuu gísiyaitii nga kpɛ́kpɛ ɛ́ɣɛ nuu líívo fáitii taa ɣɛ́ nuu líí h̃u, í ngákɛ ngáá ná wɔ́lii tiyá lɔ́ pele w̃a ɔɔ taá péle w̃a.

¹³Faa fíli aa ngeleí sí wu yɔ́ɔ́ ɣɛ́ maa lɔ́ɔ́wungɔɔ lé Ngála mba. Faa kpɛ́lɛɛ máá ɣɛngɔ́ɔ́ le kpál̃au ngeyá íwaa ti lɔ, aáva sítii kínɛi a máá ti ɣɛ́, a muỹa lɔɔ vá háwu ɣɛmá ti ɣɛ fááw̃a laá kákala.

¹⁴Ná náá Jísu lɛ́i í ngáá Ngalángi H̃íỹɛndou Loí í ngáá a mú Yála sááɣa gula mɔ́ɔ́ walaí i liingá naa wutúwɔɔ véle ngelegóóh̃u, faalɔ, a mú ndí ngu ma ngáá ndangí a máá ndé ngáá a muỹá lɔ́ su la.

¹⁵A mu Yála sááɣa gula mɔ́ɔ́ walaí Jísu aa ngáá nuu tá yɔ́ɔ́ ɣɛ́ ta ɛi mu yaah̃ú w̃ááw̃aanu hóu fái sítii su taa bɔ́lu mu la Ngala fái h̃u. Laá gite suugɔvɔ́ ngi woí la pele kpɛ́lɛɛ sú ngáá í fáá ỹɔ́u ɣɛ́ kíya nɔ́ɔ áá wó ngáá mu ye kɛ́ laá, aa faa ỹɔ́u ɣɛ́ni.

¹⁶Náá hááw̃a, a mu lí gíte ngáá ndiibá Ngalá kákala lɛ́i faa bɔ́wɔ í ngéya a mu hááw̃a kɛinɔɔ́ a mu ngaah̃u w̃aaw̃aanú w̃ááhɔlɔ ngeyá ɛ́ɣɛ ngi háá bɔwɔí ná a maa béɣe ma kpɔmba haáw̃a.