Read Bandi HÍBULU 6 Bible Online

HÍBULU 6 - Bandi bible

HÍBULU 6

¹Faalɔ, a mú lí náá ngáá naa gɔlɔ́ɔ́ vele. Ná wáá ngáá, a maayáá kalambongái sítii kála kɔwɔ́ato Kílisitii wa taá ngákɛ ngáá maá mɔ́ɔ́ ngáá ndopóa Ngala fái h̃u. A máálaa ɣɛ́ nɔ́ɔ maa híya kalambo ngílaangi h̃u nɔ́ɔ kélei. Ná wáá ngáá, kíya kalambongí sí í ná áá lí í tó ngangímba lála hái wa nuu áá kɛ ɛ́ɣɛ ndangí nuu áá ɣɛ́ sú ngáá Ngalá,

²ná vólu, nguya wóndai ɛ́ɣɛ nuu lóko vɛ́lɛndai nungáá w̃a Ngala fɛ́li fááw̃a ti w̃a, ná vólu, saa yelái ti yóóɣendai sái h̃u ɛ́ɣɛ Ngalangí gɔ́sɔngi áá vá mbóma.

³Kɛ́ áá ɣéle, ná Ngala ngáá ɣɛ́ lúw̃ai ma, niỹá lɔɔ ɣɛ́ naa wú gálambo ngáá naa wutúwɔɔ véle haítii.

⁴Aá lɔ ngáá faa tá ngáá ɛ́i hólowo kpósouŋ ngáá sítiini ti ɣɛ́ngɔ Ngala fái h̃u gíte ná taá gúla Ngala fái h̃u ngáá tɔɔ mɔ́ɔ́ yangáima sú. Ti ɣɛ́i lokohéini Ngala kééla woí wu ngáá tɔɔỹaá aáva ti ɣɛ́i Ngalángi haa bɔwɔí w̃ááhɔlɔni. Ná vólu mɔ́ɔ́, Hɛ́ɛ́ma Ỹínangi í ɣɛi ti volú.

⁵Ti ɣɛ́i kɔlɔ́ kíya Ngalángi gééla woí í váángɔ, aáva ti ɣɛ́i náá Ngalángi yákpangi lɔ́ni aá vá ɣɛ́ma ngetéya níínai h̃u í náá wutúwɔ.

⁶Ná taa gúla Ngala fái h̃u, ɛi ɣɛ ngáá solowo fáá ngáá tɔɔ mɔ́ɔ́ yangáima sú bɔw̃álale, sí taa ɣɛ́ kɛ́i kulangɔ́ aa ɣɛ nɔ́ɔ la ngáá kíya nɔ́ɔ taa ɣɛ́a Ngalángi H̃íỹɛndou Loí bakpá múl̃ɔ kulɔ́sii w̃a ngáá niina. Ná ná áá ɣɛ, kɛ ngangufé ngwála wul̃á taa ɣɛ́a njeí ma kpɔ́ ndííwaa.

⁷Nungáá lɛ́ingaa gúlangɔɔ lé ngáá ndɔwɔlɔ́ bá njɛ áá ɣɛ áá wá ma pɛ́lɛ pɛ́lɛ. Sii híí ŋániitii taa halé maa ndɔ́wɔlɔi ná w̃a, tí wa, ti sítii kula faa h̃ú taa ɣɛ́ tí hiní aáva Ngala ngáá hɛ́ɛ́ ndɔwɔlɔ́i ná w̃a.

⁸Kɛ́ nungáá lɛ́ingaa gúlangɔɔ lé ngáá ndɔwɔlɔ́i sí ngalí ngáli nguluítii ɛ́ɣɛ ngalí ngáli tufaítii taa hále ma aáva nga ngɛ́i ɣɛ́ maa lɔ́wɔlɔi wa, Ngalá tɔ́ɔ vá maa lɔ́wɔlɔi vélema. Ná ná vá ngáá ɣɛ́, ngɔmbuí áa maa lɔ́wɔlɔi ɣɛ́ kíli ỹaaní.

⁹Mu mbála vándaitii, kíya bɛ́lɛ níwaa yɛ́pɛ h̃íí ná wú yéle, kɛ́ ni gi tɔ́ na ngáá wá lɔ́ɔ vá faa vánda ɣɛ́ma sí nungái sítii ti wumááwongɔ taá kɛ.

¹⁰Ngála ngaa ngáá kahá gúla mɔ́ɔ́. Ɛi leéw̃a ngengengí w̃a wú mbóngɔ mbɛ́ ɛ́ɣɛ ndongí wú ngááh̃u ɣɛ́ngɔ lá ná wú bɔ́ngɔ ngi vóngaitii mba aáva wáá ndi nɔ́ɔ ngu ma kélei ngáá kpɔmbái wáá fé ti yɛ.

¹¹Ni liivó fái waa ngáá wú yílaa ngílaangi p̃ɛ́ɛ́ wú ndí ngú ma ngáá ngenge pándai sí wóndaa í ló su kpóloo ngakɛɛlɛmái í fólo ma. Sí vá í ngáá wú gítomai wú mááhɔlɔ.

¹²Naá lói wɔ́ɔ́ ɣɛ́ ngáá saɣá yélaa, kɛ́ aá ɣéle, wú ɣɛ́ kíli í ɣɛ́ ngáá nungáá nda ngáá ɣɛ́ ti h̃u, ti líílɔlɔngɔ. Ná vá kɛngɔ́ taá hómbo tí kuulóngi sítii maahɔ́lɔ Ngala ngí mbóngɔ ngáá ti ye.

¹³Ná h̃ú Ngala ngí siỹɛndópoi sí guulóni tɔ́ɔ́ ɣɛ ma Lébilah̃au, nuu fíli áá ɣɛi na ngakpángɔ ɔ́ɔ́ ɣɛ́ la ɔ́ɔ́ híti laá Ngalá su ngáá ɔ́ɔ́ véle[2] ma. Faalɔ, i veléni bɔ́wɔ w̃a.

¹⁴I ndení Lébilah̃au w̃a, i ɣɛ ma, “Nyá lɔɔ nɛ́ɛ́ma yéi í w̃a. Ná vólu, ngí kɛ́ ngáá háwu í láála lengáitiini ti ɣɛ́ bih̃í.”

¹⁵Aáva Lébilah̃au va i liilɔ́lɔni í naa w̃áálɛlɛ kuulóngi Ngala ngí mbói la í mááhɔlɔ.

¹⁶Ná nuu áá péle mbó, maa w̃ɔ́i aa velé nuu w̃a tɔvengɔ́ áá lá mba. Ná w̃áá vélengi ná ɣɛ́ kíli áá ndaahása kpɛ́lɛɛ mbááleve. Faí fíli pá áá ɣɛ́ tí lówah̃u taá nuu vékai ná maa hái na kpatɛngɔ́ aa ɣɛ́ ngáá ná.

¹⁷Ngala ngí ɣɛi loí í ngákɛ kpál̃au ngáá nungái sítii ti ɣɛ́i taá vá sí w̃ááhɔlɔma í mááguulo mbóni ngáá aa vaamá gi mái w̃aalóvima. Faalɔ, i hómboi í ngi gúúlongi w̃aah̃ú yíli ngáá pélengi í mbóni.

¹⁸Faa félengɔ lɔ́ náa áá ɣɛ na ti w̃áá ɛ́i lóvi aáva Ngalá ngɛ́i ndɛɛ gɔ́ɔ́la kɔwɔ́ato ti wa. Tiyá vá mbaa ngáá sí, Ngala ngɛ́i baah̃á ngi gúúlongi hítɛma nga, ɛ́ɣɛ ɛi gulá ngí véle mbongɔ wu. Náá hááw̃a, a muỹɛ́i mú vílinga Ngalángi nda gákai w̃a maah̃u belé fááw̃a, mu liiwúúlɛngɔɔ lé ngáá mú ndí ngu ma mú gítomai sí Ngala ngí fénga mu yɛ a máálaa gíkula su.

¹⁹Sí a mú yílingɔi mba kpáŋ kɛ kíli ɛ́i ỹááni aá waa ngáá kitomái í mú yɛ kɔwɔ́ato mu lɛ́ɛ́h̃ui wa. Nuí vá mu gitóngɔ mba aá wáá ngáá Jísu lɛ́i í líínga mu wutúwɔ mu haáw̃a. I liingá Hɛ́ɛ́ma Wála Ỹándai kula walái volú véle í Hɛ́ɛ́ma Yála Pɛ́lɛi wu í ngélegooh̃u. Naa lɔ í na ngáá Ngala sááɣa gula mɔ́ɔ́ wala kúnafɔ kíya nɔ́ɔ Ngala sááɣa gula mɔ́i Mɛlɛkésedɛ í ɣɛ́i na.