Read Bandi JIMISÍ 4 Bible Online

JIMISÍ 4 - Bandi bible

JIMISÍ 4

¹Ndeé lɔ áá kɛ kpɔɔlɔ kpɔɔlɔ́ngi i wú lííwaa, wúwaa lápi ngáá ỹɔw̃ɔ́ ỹɔ́w̃ɔ? Kɛ́mbɛ aá lɔɔ gúla nɔ́ɔ mɔní mɔ́ningi h̃u íwaa wɔ́ ngáá kɔɔ ɣɛ́ kíli wú h̃úú véle kɔwɔ́ato ngetéyangi sí h̃uu líívo kɛi wa í wú líí vólu?

²Ŋani w̃ɔní aa ɣɛ wú w̃á kɛ́ wɔ́i maahɔ́lɔ, ná va ngáá kɛ náá ngáá háwu wu nuu váa. Nungáá wɔ́li mɔní í víli wu líí vólu kɛ́ wɔ́i maahɔ́lɔ wu kpɔɔlɔ vɛ́lɛ nungáá wa, wu laalɛ́ ti wu ngáá ndapi. Wɛ́i wú líívo fái w̃aahɔ́lɔ bɔw̃álale wɔ́i Ngalá mɔ́ɔ́ni faaw̃a.

³Ná wáá Ngalá mɔ́ɔni ngáá í ŋani he wu yáá, ɛi fe wú yáá bɔw̃álale sí wáá ɣɛ́ wú kɛ ngáá maa wɔ́lingi na ɛi ɣɛ pele w̃a. Wáá ɣɛ nɔ́ɔ́ wu maahɔ́lɔ kɛinɔɔ́ wú mbala wu líívo kɛi volú véle h̃u.

⁴Wú lɔ́wɔbaɣangɔ láá le Ngala ngéya! Wáá súúwɔlɔ ngáá na nuu áá ló ngáá ngetéyangi sí h̃u wɔ́lingaitii kɛ aa lɔ ngáá Ngalá mbaahílima w̃ɔ́ɔ? Nuí fíli áá ɣɛ́ lói ngáá ngetéyangi sí h̃uu wɔ́lingaitii kɛ maa w̃ɔ́i lɔɔ́ bɔwɔ́ ɣɛ ngáá Ngalá mbaahílima w̃ɔ́ɔ́.

⁵Aá lɔ wú gí ma ngáá kɛ sí pɔ́nɛngɔi Ngala Kɔ́lɔi h̃u faa fíli táá le? Ná wáa ngáá, sí í ɣɛ́ngɔ ta, “Ngalángi Hɛ́ɛ́ma Ỹínangi í fengɔ́, í mú volú, ndongɔ́ɔ́ lé a mú lelémbongɔ í ɣɛ́ la ngwala Ngalá ngeyá.”

⁶Kɛ́ sítii kele tɔ ti lɔwɔ́baɣangɔ láá lé Ngalá ngeyá, Ngalángi haa bɔwɔí áá fe suuwɔ́ɔ́lɔngɔɔ lé ngwala. Ná lɔ í kɛngɔ́ pɔnɛngɔ Ngala Kɔ́lɔi h̃u ngáá sí, “Ngalá ngaah̃u longɔ́ɔ́ lé sítii mba ti h̃úúwɔɔlɔngɔ kɛ́ ngi haa bɔwɔí lɔ sítii mbɛ ti wú nga njéingɔ.”

⁷Faalɔ, a bɔwɔ́ gula hɔ́ɔ kɛlɛ́ma Ngalá mbɛ, wú wópi wópi lo Ngutuwɔ́ Ỹína Nyɔí wa, aáva aa levé wú vólu.

⁸A vuuva Ngalá mba laá bɛ́lɛ aa vuuva wú wa, a yáa wúya wɛ́i wú ngáá faa ỹɔ́u yélaitii, ná vólu, wú lííwolengɔ í ɣɛ́ la fó wɛ́i wú gí má haa áá yíla.

⁹A w̃aaw̃áánu, wú wɔ́lɔ faa ỹɔ́itii faaw̃a wú kɛ́ngɔ. A wú yɛ́lɛi vóte ngáá ngɔlɔ́, wú wú góóh̃unɛi vóte ngáá maaw̃aanúi.

¹⁰A bɔwɔ́ wú nga njéi Ndemɔí Ngalá mbɛ laáva aa wú wú mbúyoɣe.

¹¹Mu mbála Yalá fɛ́li mbélai, a waa yɛ́pɛ ỹɔú ngáá ỹɔw̃ɔ́ ỹɔ́w̃ɔ. Nuí áá yɛ́pɛ ỹɔú ngáá ngi mbála Yalá fɛ́li mɔ́i ɔɔ i mbaaléve ngáá aa vélei, ná ná áá ɣɛ́, kɛ áá lɔ́ɔ yɛ́pɛ ỹɔ́u ngáá Ngalángi hávai aáva áá savaí wáágula. Ná wáá sávai wáágula, kɛ wáá góloma mbu kɛ́ wá lɔ héi mááh̃u ngáá mbaagúla mbélaa.

¹²Ngalá ngílaa kpé tɔ́ í ngáá sava la mɔ́i laáva tɔ áá nuu gɔ́sɔ. Laá lɔ́ áá hómbo í nuu wúmaawo ɔɔ í nuu lɔ́ve njahááma. Kɛ́ wá, ele wáá ngáá wú ye ngáá waa nungáá waaléve ngáá taá vélei?

¹³A wolílo náa wɛ́i wáá ɣɛ́ ta, “Hááwɔ ɔɔ díína niyá lɔɔ vá liimá taa walá tá h̃u. Naa lɔ naa ɣɛ́ na fowó yílaa fááw̃a, naá ní yáwo ɣɛ aáva naá náholo bátɛ.”

¹⁴Wáá kɔ́lɔ p̃ɛ́ɛ́ kíya wú lɛ́ɛ́h̃ui ɣɛ kíli áá va ɣɛ́ma na díína! Wu lɛ́ɛ́h̃ui gúlangɔɔ lé nɔ́ɔ ngáá nduuluí, áá gúla túú, wú ɣɛ́ wú lo, kɛ i bɔle kpɔlénga.

¹⁵Kɛ́ aá ɣéle, sí kule í wú w̃a wú kɛ, aa waa ngáá, wáá ɣɛ ta, “Ná wɔ́li Ndemɔí Ngalá ngáá lúw̃a ma, naa ló ndɛɛh̃ú h̃ú naa sí ɣɛ́, ni sí ɣɛ́, ni sí ɣɛ́.”

¹⁶Kɛ́ láa ɣéle, wáá ɣɛ wáá yongangi léve, wú bɔ́wɔ h̃uu ɣɛ́ wɔ́ɔ́lɔ. Yonga táálii ná kpɛ́lɛɛ aa pele w̃a.

¹⁷Faale, nuí fíli áá ɣɛ́ faa vándai wɔlɔ́ kule í ma í kɛ aáva ɛi kɛ, kɛ i faa ỹɔ́u ɣɛ́nga.