Read Bandi PÍTƐ HESENDAA GƆLƆÍ 1 Bible Online

PÍTƐ HESENDAA GƆLƆÍ 1 - Bandi bible

PÍTƐ HESENDAA GƆLƆÍ 1

¹Nyɛ́i ngí ngáá Pítɛ, ngí ngáá Jísu Kílisitii géélai, nyá lɔ ngáá kɔlɔí sí vɔ́nɛ wú yéle, wɛ́i Ngala ngí lókolonga wú wá ngáá ngi vóngaa wú maavelá véle h̃u tataí sítii su taá tí lolí ngáá Pɔ́tɔ, Galésiya, Kapadósiya, Ésiya ɛ́ɣɛ Bɛtíniya.

²Ngalá lɛ́i í ngáá Kɛɛɣɛí i lokolongɔ́ wú wá ngáá ngi vóngaa áá gúla kpɔwɔ́ bɔ́wɔ haa h̃uubatɛ su. Hɛ́ɛ́ma Ỹínangi vá tɔ náa í kɛ́ngɔ ngáá háwu wú ɣɛ́ kíli batɛngɔ́ fó Ngalángi yéngengi hááw̃a. I ná ɣɛ́ngɔ ngáá kɛinɔɔ́ wú gólo Jísu Kílisitii yɛ́, í ɣɛ́ mɔ́ɔ́ í wú háá ỹɔí wúya wú w̃a fó saáɣa haí w̃áá véle w̃a Jísu í mbóngɔ. Bɛlɛ́ Ngalángi háá bɔwɔí ɛ́ɣɛ ngi lííhei tí ɣɛ́ wú yɛ́ ngáá ngambɔ́ɔ́lɔngɔ.

³A mu sɛ́ɣɛɛ gula Ngalá má lɛ́i í ngáá Ngalángi ɛ́ɣɛ Kɛɛɣɛí a mu Lemɔ́i Jísu Kílisitii hááw̃a. Sífaa, ngi yááh̃u w̃aaw̃aanú walaí i kɛ́a ngáá háwu í ndɛ́ɛ́h̃u níína he mu yɛ ngáá mbuyóɣei í mbóni ngáá Jísu Kílisitii sái h̃u. Aá lɔ́ í kɛ́a mu gítomaa í na kúnafɔ.

⁴Aáva náá haáw̃a, a muỹá lɔɔ kulasuunúma walaní tuwɔ́ɔ béle Ngalangí ngandɔ́ɔ́lɔnga a mu háaw̃a a muỹɛ́i mu ngáá ngi vóngaitii. Aá lɔ́ɔ ti yandɔ́ɔ́lɔ ngelegóóh̃u mbéinda tɛí ỹááni na, ngaah̃ú ɛ́i gula tí wa na, kɛlaa tɔ́ɔ lúúla.

⁵Wú lángɔɔ lé ngáá Jísu, ná vá tɔ í kɛ́ngɔ Ngalángi yákpangi íwaa wú w̃ááh̃u béle í ló su kpóloo ngumaawóngi sí í na náa wú hááw̃a ngakɛ́ɛ́lɛ fóloi w̃á áá gúla kɛlɛ́ma.

⁶Náá hááw̃a, wú góóh̃unɛɛngɔ í ɣɛ́ la kíya bɛ́lɛ naa laa lówah̃u nɛ́nɛ wú w̃ááw̃aanungɔ waa w̃aanɔw̃ɔ́ ngáá suugɔvɔ́ lááli taalingái tíwaa wó ngáá wú ye.

⁷Faí sítii tiyá lɔɔ ɣɛ́ ngáá wú ye kɛinɔɔ́ nga ngí ɣɛ́ kpál̃au ngáá kɛ wú lángɔ gíte le ngáá Jísu Kílisitii ngáá wú líí kpɛ́lɛɛ. Góólii í ngáá ŋani tá áá ỹááni, taá kɔvɔ́ ngáá ngɔmbu kɛlaa maa wú lángi í wú h̃ú lɛ́i tɔvengɔ́ góólii wa. Kɛ nɔ́ɔ suugɔvɔ́ ngí wó ngáá wú ye ngáá kɛinɔɔ́ faa kpɛ́lɛɛ sú wú lángi ná álaa gúla wú h̃u. Ná lɔ́ áá kɛ wáá tɛ mááhɔlɔ ɛ́ɣɛ ngufema Jísu Kílisitii váá holói w̃a.

⁸Kíya bɛ́lɛ wáá nɛ́ɛ́ tɔní, wú lóngɔɔ lé la, ná vólu, kíya bɛ́lɛ wáá nɛ́ɛ́ tɔmá kíya suu í na, wú lángɔ lá, náá hááw̃a, wú góóh̃unɛɛngɔɔ wála le. Nuu ɛ́i hómbo p̃ɛ́ɛ́ ɔ́ɔ́ nde laa wóo h̃u kíya maa góóh̃unɛi yambɔ́ɔ́lɔngɔ.

⁹Wú góóh̃unɛɛngɔɔ lé sífaa, ndangí wú su ngáá Jísu Kílisitii, pólu hái waa ngáá ngumaawóngi sí wúwaa maahɔ́lɔ.

¹⁰Ngumaawóngi sí lɔ́ Ngala ndaa háá lé mbélaitii tí ndái ma tɔ́ tíwaa faa yá kpɛ́ kpɛ́ kɔwɔ́ato mba aáva tí Ngala ndaa háá léni kɔwɔ́ato sí wa Ngala ngí ɣɛ́i áá vá féma wú yɛ.

¹¹Kílisitii Ỹínangi í ɣɛ́i tí vólu, laá lɔ́ í ɣɛ́i áá ngákɛ ngáá ti ye kíya Kílisitii w̃aa í ɣɛ́i áá vá nɔ́w̃ɔma. Ná ná vá ngɔ́ɔ́ gúla sú, ɔ́ɔ́ ngufema wála wála w̃aahɔ́lɔ náa. Faalɔ, ti ɣɛ́i taa nga kpɛ́ kpɛ́ ti ɣɛ́ kɔ́lɔ ngáá ele gíte lɔ́ í ɣɛ́i áá vá ɣɛ́ ma la ɛ́ɣɛ táingi í ɣɛ́i áá vá vááma ma.

¹²Ngalá pá ngí kɛí ngáá háwu ndaa háá lé mbélai tí ɣɛ́ kɔ́lɔ ngáá kɛ taá ɣɛi taá ndaa wói nátii nde ti bɔwɔ́ bɔ́wɔ gúlasuunuma hááw̃a, kɛ́ aá ɣéle, i ɣɛi na ngáá í ɣɛ́ ngáá kulasuunúma wú hááw̃a. Sítii pa ti ɣɛ́i taa Ngala kééla woo vandaí ná lé wú w̃a ti ɣɛ́i taá ndé wú w̃a Hɛ́ɛ́ma Ỹínangi yákpangi w̃áa véle w̃a lɛ́i í híɣeni ngelegóóh̃u. Aáva Ngala kééla woí ná malékaitii kele tɔ taá ɣɛ́ loí tí ɣɛ́ faa wɔ́lɔ kɔwɔ́ato mba ngáá pangɔ.

¹³Náá hááw̃a, a héi gilí bátɛ ngáá wú gí maitii ti ɣɛ́ Ngala fáitii kɛ fááw̃a, wálaa lééw̃a, ná vólu, wú gítomai kpɛ́lɛɛ í ɣɛ́ nɔɔ́ náa Ngalángi háá bɔwɔí sí wa í ngeyá wú hááw̃a. Wá lɔɔ vá maahɔ́lɔma ngeyá ná h̃u Jísu Kílisitii íwaa vá yangáimama ngeleí sí wu.

¹⁴A ɣɛ́ ngáá koló mbélaa Ngalá mbɛ́, ná vólu, wálaa mɔ́ɔ́ sí ɣɛ wáá ɣɛ́ loí wú kɛ ɔ́ɔ́ kɛ́ wú ɣɛ kíya wú ɣɛ́i na, ná h̃u nɛ́nɛ wáá ɣɛ́i Jísu Kílisitii wɔ́lɔ.

¹⁵Kɛ́ laa ɣéle, faa ỹɔ́u fíli álaa ɣɛ́ wú h̃u kíya nɔ́ɔ Ngala ngí na, lɛ́i í wú lólingɔ ngáá ngi vóngaa faa ỹɔ́u fíli áá su. Kule lɔ wú w̃a, sí fíli wáá kɛ, faa ỹɔ́u fíli álaa ɣɛ́ mba,

¹⁶sífaa sí pɔ́nɛngɔi Ngalá Kɔ́lɔi h̃u aá wáá ngáá sí, “Faa ỹɔ́u fíli álaa ɣɛ́ wú h̃u, bɔw̃álale nyá bɛ́lɛ nɔ́ faa ỹɔ́u fíli aa sú.”

¹⁷Ná wáá ɣɛ́ wáá Ngalá fɛ́li, wáá ɣɛ́ ma Kɛ́ɛ́ɣɛ. Laáva laá lɔ́ áá nuu kpɛ́lɛɛ kɔ́sɔ. Ɛi to polú fíli mbó ngi gɔ́sɔngi h̃u, kɛ́ aá ɣéle, kíya fíli nuu nda gɛ́ɛ́ haí áá ɣɛ́ na, ngimɔ́ɔ́ áá í wááleve, faale, a ngufema hé mbɛ nduwá mba h̃ú kúnafɔ ná wu ngélewu.

¹⁸Wú kɔlɔ́ sí í wálangɔ wú vólu véle h̃u ngáá wú ngumaawóngi w̃ááhɔlɔngɔ, wáá mɔ́ɔ kulasuunúma lála hái nátii su wú káwalani ti ɣɛ́ngɔ taá kɛ wúndaa hóungɔ ti yaá. Sí í wú wúmaawongɔ aá ngáá ŋani tá ngáá áá ỹááni kíya kaní kóle ɔɔ góóli gapangí í na.

¹⁹Kɛ́ aá ɣéle, sí í wú wúmaawongɔ aá waa ngáá saáɣa hái Kílisitii í mbóngɔ kulɔ́sii w̃a lɛ́i ngangimbá ngwala. Laáva ngi hái gulangɔ́ í ɣɛ́ngɔ lá ngáá kíya saáɣa waala áá ɣɛ́ na faa fíli ɛ́i ɣɛ́ mba kɛlaa polí kúlo ɣéle tɔ ɔ́ɔ́ ɣɛ́ ma.

²⁰Ngalá ngɔ́ɔ́ ɣɛ́ p̃ɛ́ɛ́ í ngeleí sí wu bátɛ, i ɣɛi náa lokoloní Kílisitii wa ngáá ɔ́ɔ́ vá í wú wúmaawo. Kɛ́ ngapúmaa yeteyangi sí h̃u, i kulaá kɛlɛ́ma ngeleí sí wu wú hááw̃a.

²¹Kílisitii vá tɔ í kɛ́ngɔ ngáá háwu wú lángɔ ngáá Ngalá. Ngalá tɔ í Kílisitii wuyoɣéngɔ sái h̃u í kɛ ngáá háwu ngufema wála i mbɛ. Faale, wu lángɔɔ lé ngáá Ngalá wú gítongɔ mba.

²²Ná naá wú gólongɔ Ngalá mbɛ wúwaa híya ngáá tɔɔỹaá gééla wói, ná lɔ náa i kɛ́a wú w̃ááw̃uỹangɔ fó faa ỹɔ́i yaá, ná vólu, i mɔɔ kɛ́a wú lóngɔ ngáá wú mbála Yalá fɛ́li mbélaitii ngáá tɔɔỹaá. Faale, ná naá maa hái í h̃íí na, a ló ngáá ỹɔw̃ɔ́ ỹɔ́w̃ɔ ngáá lií kpɛ́lɛɛ álaa ɣɛ́ nɔ́ɔ ngáá wɔ́ɔ́ ndá yaah̃ú.

²³Ngalá kééla wói gúlangɔɔ lé ngáá ŋani ndɛɛh̃ú í su aáva aá lɔ na kúnafɔ fááw̃a. Ngalá kééla wói vá tɔ í kɛngɔ́ wú ndéngi w̃ááhɔlɔngɔ vólu. Lɛ́i vá í wú léngɔ, ɛi ha kúnafɔ kɛ́ aá lɔ́ ndɛɛh̃ú h̃ú kúnafɔ.

²⁴Pɔnɛngɔ́ɔ́ lé Ngalá Kɔ́lɔi h̃u, sí vá pɔ́nɛngɔ aá wáa ngáá sí, “Nuu búsa kpɛ́lɛɛ kúlangɔɔ lé nɔɔ́ ngáá kpitingí, ti hɛmbɛ́ma háá hina hinaí kpɛ́lɛɛ kúlangɔɔ lé nɔ́ɔ ngáá puwaí kpitingí áá mbo. Kpitingí aa ye, ngi vuwaí va í vu,

²⁵kɛ́ Ndemɔí Ngalángi gééla woí lɔ́ na kúnafɔ.” Keela woí sí va mbaa ngáá keela woó vándai na ti ndéni wú w̃a.