Read Bandi PÍTƐ HESENDAA GƆLƆÍ 3 Bible Online

PÍTƐ HESENDAA GƆLƆÍ 3 - Bandi bible

PÍTƐ HESENDAA GƆLƆÍ 3

¹Ngimɔ́ɔ́ nɔ́ɔ maa hái í ná wá bɛ́lɛ nɔ wú hááw̃a wɛ́i wú ngáá nyah̃áitii wú kɛmbɛheí h̃u. A bɔwɔ́ gúla kɛlɛ́ma wú h̃íỹɛngaitiini mbɛ. A ná ɣɛ́ kɛinɔɔ́ ná ti lɛ́ingaa tɛi ɣɛ́ lái ngáá Ngalá kééla wói wú lúva velé vándai í kɛ ngáá háwu ti lá la. Wɔ́i lo múl̃ɔ p̃ɛ́ɛ́ yɛpɛmá ti yelé kɔwɔ́ato Ngalá mba kɛ́ wu lúva velé vándai ɛ́ɣɛ ngufemái wáá fé ti yɛ, laá lɔ nɔ́ɔ́ taa wɔ́lɛ mba tí lá ngáá Ngalá ná w̃aa véle w̃a.

³Wálaa bɔwɔ́ ɣɛ vaní ngáá faí sítii kɛndáá, ná wáá ngáá, wú wúngi wáá kpátɛ batɛ́ ngwala suu í lɔ́ve ɔɔ góóli yɔlɔwɔítii wáá ti yíli w̃a, ɔɔ ná ná láá le, kula vangɔ́ h̃uulɔ́vengɔitii wáá ti yíli w̃a.

⁴Kɛ́ laá ɣéle, wú vángi í ɣɛ́ ngáá kíya wú ná gíte wú líí h̃uu véle. Pangí sí kúnafɔ ngaah̃ú ɛ́i gúla mba, ná wáa ngáá, wú lúva veléi w̃aanɛ́ɛ́ngɔ í ɣɛ́ la, wú ɣɛ́ngɔ lúúỹaa. Ná lɔ́ Ngalá ngáá ngéɣe ngáá ngangímba háá.

⁵Nyah̃áitii wɔ́lɔ ti gítongɔ í ɣɛ́i la Ngalá mba, ti w̃ááyili vandaí tɔ́ɔ́ mbo i ɣɛi ngáá kíya tɔ́ɔ́ bɔwɔ́ gúla kɛlɛ́ma ti h̃íỹɛngaitii mbɛ.

⁶Ngimɔ́ɔ́ Lébilah̃au ỹah̃a Sééla í ɣɛ́i na. I golóni Lébilah̃au yɛ aáva ɔ́ɔ́ tolí ngáá w̃aalíɣii. Wá lɔ́ náa ngáá Sééla lengáitii ná wááyaa sítii kɛ taa ɣɛ́ pele w̃a aáva wɔ́i ɣɛ́ ngáá nduwá ndúwa nyáh̃aa.

⁷Wɛ́i vá wú ngáá siỹɛngáitii, ná wáá ɣɛ́ séi h̃u wáá nyah̃ái, giséi w̃a ngáá suu áá bái ɔ́ɔ́ híti í h̃u. Waayaa ngufema hé ti yɛ bɔw̃álale tiyá bɛ́lɛ wáá tiyéni tɔ wúwaa vá Ngalángi háá bɔwɔí w̃aahɔ́lɔma, ná wáá ngáá, kúnafɔ lɛ́ɛ́h̃ui. Waayaa ná ɣɛ kɛinɔɔ́ faa fíli álaa víli wú Yála fɛli ngói h̃u.

⁸Sí náa ngíwaa woo yakɛ́ɛ́lɛ mba aá wáa ngáá sí, ngáá wú kpɛ́lɛɛ wú ɣɛ́ ngáá nuu yílaa kpé. Wú ɣɛ́ wáá ỹɔw̃ɔ́ ỹɔ́w̃ɔ liilá faa kpɛ́lɛɛ su, wú ló ngáá wú mbála Yála fɛ́li mbélaitii, wú ɣɛ́ wáá ỹɔw̃ɔ́ ỹɔ́w̃ɔ yaah̃ú w̃ááw̃aanu hóu, wú wúnga njéi ỹɔw̃ɔ́ ỹɔ́w̃ɔ yɛ́.

⁹Wálaa faa ỹɔ́u h̃úúloo ngáá faa ỹɔ́u kɛlaa wɔ́ɔ́ ngɛɛlí súúloo ngáá ngɛɛlí. Kɛ́ aá ɣéle, nuí fíli áá ná ta ɣɛ ngáá wú ye, a hɛ́ɛ́ maa w̃ɔ́i yɛ. A ná ɣɛ bɔw̃álale sɛ́i lɔ Ngalá ngí wú gúúloni la ná í wú lólini ngáá ngi vóngaa.

¹⁰Pɔnɛngɔ́ɔ́ lé Ngala Kɔ́lɔi h̃u, sí vá pɔ́nɛngɔ aá wáá ngáá sí, “Nuí fíli áá ɣɛ́ loí í liivó kɛ ndɛɛh̃úi sí h̃u, ná vólu, ngi ndá yéteyangi í ɣɛ́ vái ma, kɛ maa w̃ɔ́i ɛ́i ɣɛ áá ngoo ỹɔ́u ỹɔ́u nde, ná vólu, í be ndɛɛ gɔ́ɔ́landai wa.

¹¹Kɛ maa w̃ɔ́i í be faa ỹɔ́u ɣɛndái wa íwaa fái sítii kɛ taa ɣɛ́ péle w̃a. Kɛ maa w̃ɔ́i í ɣɛ́ ngáá ndiilɛí wɔlí mɔ́ɔ́ faa h̃u, aáva í ɣɛ́ áá kɔlí ngáá lií kpɛ́lɛɛ.

¹²Sífaa Ndemɔí Ngalá ngááh̃u lɔ telembo mbélaitii mba aáva ngolílongɔɔ lé ti hɛ́li ngóitii ma taá mbó lá, kɛ́ ngaah̃ú lóngɔ sítii mba ti ngáá tuva velé ỹɔ́u yeláitii.”

¹³Ele lɔ náá áá kɛ ngáá háwu ỹandá áá héi wú wa ná nɔ́ɔ wú líí vílingɔ áá ɣɛ́ lá fáá vánda ɣɛ́ndaitii polú?

¹⁴Kɛ́ bele pá wú w̃áá áá nɔ́w̃ɔ sífaa wáá ɣɛ́ wáá híya ngáá telembo pélei, aa lɔ́ ngáá faa vánda wú hááw̃a. Wálaa lúwa maa nungáitii mba, kɛlaa ti háá ɔ́ɔ́ kɛ ngáá háwu wú líí ɔ́ɔ́ hɛ́lɛ.

¹⁵Kílisitii lúwamba í ɣɛ́ wú líí h̃u, wú ngufema hé mbɛ ná í ngáá Ndemɔí wú hááw̃a. Wú w̃ááhei wongɔ í ɣɛ́ la hɔ́wɔ fíli ngáá wú suugúla nuu fíli má áá wú w̃ɔ́ɔ́ni ngáá sí í kɛ́a wú gitóngɔ Kílisitii wa.

¹⁶Kɛ́ wáá suugúla maa w̃ɔ́i w̃a ngufema h̃ú ɛ́ɣɛ tuva véle w̃aanɛ́ɛ́ngɔ h̃u. Aáva wú gí mai í ɣɛ́ kpál̃au ngáá fáá ỹɔ́u aa wú lúva veleí h̃u kɛinɔɔ́ ná nuu áá ngoo ỹɔ́u le kɔwɔ́ato wú lɛ́ɛ́h̃ui wa wáá suuhíya ngáá pangɔ́ sífaa wú ngáá Kílisitii volú yelaa, ngufé ngí vɛ́lɛ maa yélaitii ma.

¹⁷Maanɛ́ɛ́ngɔɔ lé nuu w̃áá í nɔ́w̃ɔ faa vánda ɣɛ fááw̃a ná Ngalá ngáá ɣɛ́ loí í ɣɛ́ h̃íí í lɔ́ve sí wa nuu w̃áá áá nɔ́w̃ɔ faa ỹɔ́u ɣɛ fááw̃a.

¹⁸Sífaa, Kílisitii áá ɣɛi ngáá faa ỹɔ́u ɣɛ́ mɔ́ɔ́ kɛ́ i haaní faa ỹɔ́u ɣɛ́ mbélaitii faaw̃a. I haaní naa héiw̃aa i yíla kpé kɔwɔ́ato mu háá ỹɔítii mba. Aáva í ná ɣɛí ngáá kɛinɔɔ́ í mu lówah̃u í bátɛ maá Ngála. Tí paaní, kɛ́ Ngalángi Hɛ́ɛ́ma Ỹínangi kɛní ngáá háwu í vá mɔ́ɔ́ ndɛɛh̃ú h̃ú volú,

¹⁹aáva Hɛ́ɛ́ma Ỹínangi yákpangi w̃áá véle w̃a, Kílisitii i liiní í Ngala ngói le ngafuw̃angái sítii ma ti ɣɛ́i sou sú kíya nuu áá ɣɛ́ kpindi vɛlɛ́ wu.

²⁰Sítii ti ɣɛ́i Ngala mɔ́i Nówa ndá yéteyangi h̃u táingi ná h̃u Nówa í ɣɛ́i áá kele ngwálai bátɛ Ngalángi liilɔ́lɔni íwaa naa w̃áálɛlɛ ngáá ti gólo mbɛ kɛ́ taá ɣɛ́i kɛí tɔɔ́ gólo mbɛ, ti yáfuw̃angaitii tɔ laa Kílisitii í maa Yála ngoí ná léi ti w̃a. Nungái taá ɣɛ́i bih̃í, ti w̃áá í wáloni, ti ɣɛ́i nɔ́ɔ ngáá nuu ngwáhakpangɔ njɛ́i í kɛ́ni ngáá háwu ti w̃áá í waloni.

²¹Maa njɛ́hengi ná hái w̃áábale mbaa ngáá ngúyai a maá maahɔ́lɔ, áá kɛ ngáá háwu maá ngúmaawongi w̃ááhɔlɔ. Wáá ngúmaawongi sí w̃ááhɔlɔ sífaa, Jísu Kílisitii í yoɣénga sái h̃u. Aáva maa wúyai aa nɔ́ɔ ngáá sí a maá mbo léélaa, kɛ́ aá ɣéle, aá waa ngáá ná a maa Ngala fɛ́li ngáá í mu gí mai ɣɛ kpál̃au ngáá muỹá lɔ́ɔ lɛ́ɛ́h̃ui h̃uuhíya kíya ndongɔ́ mú suuhíya.

²²Lɛ́i va í ngáá Jísu Kílisitii, í liingá ngelegóóh̃u, aá lɔ héi ngufema ỹándai Ngalá kpéla masandáá h̃u. Ngi w̃ásandai vá tɔ malékaitii mááh̃u ɛ́ɣɛ ngakpa ŋániaitii kpɛ́lɛɛ.