Read Bandi PÍTƐ HESENDAA GƆLƆÍ 5 Bible Online

PÍTƐ HESENDAA GƆLƆÍ 5 - Bandi bible

PÍTƐ HESENDAA GƆLƆÍ 5

¹Nyá lɔɔ yɛ́pɛ naa wú yéle wɛ́i wú ngáá kele ɣelé mbélaitii Ngala fɛ́li mbélai faaw̃a, nyɛ́i nyá bɛ́lɛ ngí ngáá kele ɣelé mɔ́ɔ Ngala fɛ́li mbélai faaw̃a. Nyá lɔ́ɔ yɛ́pɛ wú yelé ngáá lií kpɛ́lɛɛ. Ngí tɔ́i maanɔw̃ɔ́i í wói ngáá Kílisitii. Aáva maanɛɛ́ wálai ná í su, aá lɔɔ vá kɛmá ngáá háwu ngí ɣɛ ta h̃u naa hɔwɔ́i ná áá vá gúlama kɛ́lɛma. Wú w̃áánɛɛnɛngɔ gíte le,

²sí ngíwaa nde wú w̃a aá wáa ngáá sí, a ɣɛ́ wáá Ngala fɛ́li mbélaitii ti háá yeɣé ngáá loko félengɔ kíya nɔ́ɔ mbaala w̃ááh̃u béle mɔ́i áá mbaalaítii ti hái yeɣé. Ná wáá ngáá, sítii Ngalá ngáá ɣɛ kɛ́i ngáá háwu wáá ɣɛ́ ngáá ngutuwɔ́ yélaa ti hááw̃a. Laáva wú kɛ ndiiwolé w̃ááh̃u kíya Ngala ndóngɔ wú kɛ, kɛ́ wálaa kɛ́ kíya nɔ́ɔ taa ɣɛ́ wú bándangɔ nga ngáá wú kɛ. Wálaa ɣɛ́ wáá kɛ nɔ́ɔ ngáá wú ŋani hɔ́lɔ polú véle h̃u, Kɛ́ aá ɣéle, wú kɛ sífaa wú lóngɔ wú kɛ.

³Wálaa masandáá ɣɛ ti w̃ááh̃u, kɛ́ aá ɣéle, wú ɣɛ́ ngáá tɔmaseí ti hááw̃a ti hítɛ wú lúva veléi volú.

⁴Kílisitii lɛ́i ngi háá gulangɔ́ ngáá mbaala w̃ááh̃u béle mbélaa ti wutúwɔɔ w̃ɔ́ɔ́ wala, ná áá ɣɛ yangáimai, aa maaỹa pandá wala he náá wú yáa lɛ́i kúnafɔ ngaah̃ú ɛ́i gúla mba.

⁵Wɛ́i va wú na ngáá fóningeleaitii, a bɔwɔ́ gula kɛlɛ́ma kpakolongáitii mbɛ, wú kpɛ́lɛɛ pa wú wú nga njéi ỹɔw̃ɔ́ ỹɔ́w̃ɔ hááw̃a, wú ɣɛ́ wáá yénge ỹɔw̃ɔ́ ỹɔ́w̃ɔ yɛ, sífaa sí pɔnɛngɔ́i Ngala Kɔ́lɔi h̃u aá wáá ngáá sí, “Ngala ngááh̃u longɔ́ɔ́ lé sítii mba ti h̃úúwɔɔlɔngɔ, kɛ́ ngi háá bɔwɔí lɔ́ sítii mbɛ tí wú ngá njéingɔ.”

⁶A wu nga njéi Ngalá mbɛ lɛ́i ngwala yakpángɔ kɛinɔɔ́ í wú wú ngá mbúyoɣe ná h̃u áá ɣɛ́ loí í ná ɣɛ́.

⁷Sí kpɛ́lɛɛ áá ɣɛ́ wú líí wa, a kpɛ́lɛɛ túkpe Ngalá má bɔw̃álale kpeɣengɔ́ɔ́ lé ngáá wú ye.

⁸A w̃aah̃ú béle wú ɣɛ́ wáá wɔ́lɛ w̃a, wú wááhilima w̃ɔ́i Ngutuwɔ́ Ỹína Nyɔí aá lɔ nɔ́ɔ áá lɔ́ve tɔvé váá kíya njala í na, áá nuu wɔ́li ngáá í maa w̃ɔ́i ɣɛ kíli ỹaaní Ngala fái h̃u.

⁹A lá gíte ngwala ngáá Ngalá wú wópi wópi tó Ngutuwɔ́ Ỹína Nyɔí wa, bɔw̃álale wú suuwɔlɔ́ ngáá wú mbála Yalá fɛ́li mbélaitii kpɛ́lɛɛ tí ngeleí sí wu, tiyá bɛ́lɛ tiyá lɔ nɔ́ɔ faa bámai ná h̃u íwaa híya ngáá tí ye.

¹⁰Kɛ́ Ngála lɛ́i faa bɔ́wɔ kpɛ́lɛɛ áá gúla ngeya í wú lólingɔ ngáá wú ɣɛ́ mbu ngi w̃ásandaa w̃aanɛɛnɛɛngí wu í na kúnafɔ, wú báha gilíí wa wáá Kílisitii. Maanɔw̃ɔ́i íwaa wó ngáá wú ye suu aá ɣɛ́ ma gooh̃á ngwala kɛ Ngalá pá aa kɛ náa ngáá háwu faa kpɛ́lɛɛ í ɣɛ́ vaní wú yɛ, ná wáá ngáá, wú lángɔ áa ɣɛ́ gíte lá kpáŋ kpáŋ, ná vólu, wú lóó gíli bátɛngɔ aa ɣɛ lá pele kpɛ́lɛɛ su ngi hái h̃u kɛɛlɛ́ ngɛ́i ɣɛ́ mba.

¹¹Bɛlɛ́ Ngalángi w̃ásandai í ló na kái kúnafɔ taa ngi ndá gúnafɔ! Amíína.

¹²Siỹɛndópoi sí taa ɣɛ́ ma Sáilɔ, lɛ́i í ngáá mu mbála Yalá fɛ́li mɔ́i ta tɔwɔ́baɣangɔ, i bɔngɔ́ mbá kɔlɔ lukpúi sí vɔ́nɛ fái h̃u wú yéle. Ngí pɔnɛngɔ́ ngáá kɛinɔɔ́ nduwúh̃u í lɛ́ ngáá wú ye Ngala fɛ́li fái h̃u, ná vólu, kɛinɔɔ́ ngí faa lé gíte ngáá kɛ Ngalángi háá bɔwɔ́i kái kái tɔ ngáá sí a mú su. Faale, a ɣɛ́ su gíte wú lííbangɔ í ɣɛ́ la su kpáŋ.

¹³Mu mbála Yalá fɛ́li mbélai sítiini tí taí sí h̃u taá náa lolí ngáá Babél̃ɔ[1], tí hááni wú w̃a, tiyɛ́i tiyá bɛ́lɛ Ngalá ngi lókolongɔ ti wa ngáá ngi vóngaa. Ní híya polu w̃ɔ́i Máa bɛ́lɛ lɛí í ngáá ní lóu votó laá bɛ́lɛ nɔ i haaní wú w̃a.

¹⁴A laalí ỹɔw̃ɔ́ ỹɔ́w̃ɔ w̃a ndo sú, kíya Ngala fɛ́li mbélai a maá kɛ́. Bɛlɛ́ ndiihéi í ɣɛ́ wú yɛ́ wú kpɛ́lɛɛ wɛ́i wá bɛ́lɛ wú báhangɔ Kílisitii wa.