Read Bandi PÍTƐ GƆ́LƆI HELE KÉLEI 1 Bible Online

PÍTƐ GƆ́LƆI HELE KÉLEI 1 - Bandi bible

PÍTƐ GƆ́LƆI HELE KÉLEI 1

¹Nyɛ́i ngí ngáá Sáimɔ Pítɛ, ngí ngáá Jísu Kílisitii yénge mɔɔ ɛ́ɣɛ mɔ́ɔ ngi géélai, nyá lɔ́ ngáá kɔlɔí sí vɔ́nɛ wú yéle wɛ́i wú nda pánda wálai w̃ááhɔlɔnga mu su. Mú kpɛ́lɛɛ mú nda ngílaa kpéngi sí w̃áahɔlɔngɔ Jísu Kílisitii lélembongi w̃áá véle w̃a lɛ́i í ngáá mu Yálangi ɛ́ɣɛ mu Wúmaawo Mɔ́i.

²Bɛ́lɛ ngi háá bɔwɔí ɛ́ɣɛ ngí lííhei tí ɣɛ́ wú yɛ́ ngáá ngwala. Ná aa ɣɛ h̃íí sífaa wú Ngala kɔ́lɔ ngáá ele gíte wáá ngáá laá taá a mu Lemɔ́i Jísu.

³Ngalángi yákpangi i mu ɣɛ kíli batɛngá péle kpɛ́lɛɛ su ngáá a mu lɛɛh̃úi h̃uuhíya kíya kule í ma í ɣɛ́ na. Ná vá tɔɔ gúla laá Jísu Kílisitii wɔ́lɔndai h̃u ngáá ele gíte wáá ngáá laá a mu yɛ, lɛ́i í kɛ́a ngáá háwu ngi yákpa maanɛɛnɛɛngí ɛ́ɣɛ ngi lúva vele vandaí í fólonga a mu w̃a muỹa bɛ́lɛ ná í mu lolíngɔ.

⁴Ná ná ɣɛ́ngɔ kɛ ngimɔ́ɔ́ ngi nɛ́ɛ́mai í fénga mú yɛ í ɣɛ́ngɔ mu guulóni la, aáva nga tɔ tí wa ngwala, ti w̃áánɛɛngɔ. Nɛ́ɛ́mai sítii maa véle w̃a, kíya Ngalá ngɛ́i faa ỹɔ́u ɣɛ́, wá bɛ́lɛ maa yákpangi aa ɣɛ wu h̃u aáva ndiivo kɛɛ́ ỹɔ́u ỹɔungai sítii tí ngeleí sí wu tɛ́i wú ɣɛ́ kíli ỹaaní.

⁵Ná lɔ́ í kɛ́a háwui sí kái kái fááw̃a kɛ wú kɛ́ ngáá hɛmbɛ́ fíli ngáá wú ndi ngu ma ngáá wú lángi wú sú lá, ná vólu, wú lúva veléi í ɣɛ́ vaní. Ná vólu, wú ɣɛ́ faa wɔ́lɔ kɔwɔ́ato sí wá Ngala ndóngɔ la.

⁶Ná ná áá gúla su, wááyaa h̃uuhóu w̃a faa kpɛ́lɛɛ sú, ná vólu, wááyaa liilɔ́lɔ faítii nga, ɛ́ɣɛ mɔ́ɔ wú ɣɛ́ kíya Ngala ndóngɔ wú ɣɛ́ na.

⁷Ná vólu, wú ló ngáá ỹɔw̃ɔ́ ỹɔ́w̃ɔ kíya njee lengaa taa ɣɛ́ na, ná vólu, ndo ngí ɣɛ́ wú h̃u.

⁸Ná faa vánda vándai sítii kpɛ́lɛɛ taa ɣɛ́ wú h̃u wáa ndi ngu ma ngáá ti ɣɛndáá, ná ná áá ɣɛ́, Ndemɔí Jísu Kílisitii wɔ́lɔndai wú yɛ́ ɛi ɣɛ nɔ́ɔ ngáá faa gbááma wɔ́i ɣɛ́ wáá maah̃ú háá ɣɛ.

⁹Kɛ́ nuí fíli faí sítiini tɛi ɣɛ́ su, maa w̃ɔ́i gúlangɔɔ lé ngáa nuí sí ɛí ỹánda lɔ́ góóh̃ama, mbolengɔ́ vóto, ná vólu, ndeew̃angɔ́ɔ́ lé ngáá ngí háá ỹɔí kpɛ́lɛɛ ti ɣɛ́i ma, ti wúyangɔɔ lé naá ma fó.

¹⁰Faale, mu mbála Yalá fɛ́li mbélai, a yakpá gíte kɛ́ŋɛ ngáá tolíngi ɛ́ɣɛ tokolómbai Ngalá ngí mbónga ngáá wú ye, í wú ɣɛ́ ngáá ngi vóngaa, maa hái ya ngí ɣɛ́ gíte kpál̃au ngáá aa siɣemá ma. Ná wáá ná ɣɛ́, kúnafɔ wɔ́i mɔ́ɔ lokogúla Ngala fái h̃u.

¹¹Ná vá tɔ áá kɛ naa áá ɣɛ́ gúlai kɛ́lɛma fó fóndei wú yɛ ngáá wá lɔɔ ɣɛ́ a mu Lemɔ́i Jísu Kílisitii w̃ásandai wu í na kúnafɔ lɛí í ngáá a mu Wúmaawo Mɔ́i.

¹²Háwui sí hááw̃a, nyá lɔɔ ɣɛ́ ngáá wú gísitɛ nɔ́ɔ faí nátiini mba kíya bɛ́lɛ wú tí wɔlɔ́ náá kílii aáva wú lóóni kpáŋ tɔɔỹái sí w̃ááh̃u wú maahɔ́lɔnga.

¹³Aá lɔ́ kí ma ngáá aá lɔ́ pele w̃a ngáá ngí ɣɛ́ ngáá wú gísitɛ nɔ́ɔ na fɔ́ ná nɔ́ɔ kái ngí ndɛɛh̃úi sí h̃ú nɔ́ɔ nɛ́nɛ,

¹⁴sífaa, ngí kɔ́lɔ ngáá suu áá mɔ́ɔ́ gooh̃á kɛ ngí háánga bɔw̃álale, mu Lemɔ́i Jísu Kílisitii i maa hái yakɛ́a ngáá ngé kpál̃au ngáá ná lɔɔ vá ɣɛ́ma h̃íí na.

¹⁵Kɛ́ nyá lɔ́ɔ kɛ ngáá hɛmbɛ́ ngáa kɛinɔɔ́ wú gíseingɔ í ɣɛ́ nɔ́ɔ la faí sítii ma kúnafɔ bele pá sáángɔ áá ɣɛ́ naá lá.

¹⁶Kpatɛ ngeyá háá laa le ni lókolangɔ ɔ́ɔ́ ɣɛ́ ɣɛi lá ma ná ní yɛ́pɛi wú yéle kɔwɔ́ato a mu Lemɔ́i Jísu Kílisitii yangáimandai wa ngakpa ngwála h̃u ngeleí sí wu, kɛ́ laá ɣéle, niỹá lɔ́ ngáá héélea ngáá ní ngí yákpa ngwalaí yaah̃ú lɔ́ni.

¹⁷Ni ɣɛ́i na ná h̃u í ngúfema wálai sí w̃aahɔ́lɔi ɛ́ɣɛ ngakpa máánɛɛnɛɛngi áá gúla Kɛɛɣɛí Ngalá ngéya. Ná wáá ngáá, ná Ngalá ngí yɛ́pɛi áá gúla ngelegóóh̃u ngakpa ngwála ỹandaí, ná í ɣɛ́i ta, “Sí lɔ í ngáá ní H̃íỹɛndou Loí ndóngɔ lá aa lɔ ndíílɛingɔ faaw̃a ngwala.”

¹⁸Niỹá gíte gitei ní ngoí sí ỹɛ́nini áá gúla ngelegóóh̃u, na h̃u ni ɣɛ́i ỹanda yílaa naá tiyéni hɛ́ɛ́ma yíhei wa.

¹⁹Faale, aá ɣéle ni langɔ́ɔ́ lé naá p̃ɛ́ɛ́ ngwala ngáá keela woí Ngalá ndaa háá lé mbélaitii tí ndéni wɔ́lɔ. Aáva aa ɣɛ́ gíte pele w̃a ngwala ngáá ná wɔ́lii wáa wólilo maa gééla woí w̃a kíya nɔ́ɔ nuu áá hítɛ lámbo fo polú kpíndi h̃u. A ná ɣɛ́ í ló su kpóloo ngele niinái í wo, ná vólu, Jísu Kílisitii lɛ́i kulangɔ́ ngáá ngelesú lémuleɣai í hólo wú w̃a.

²⁰A giséi sí w̃a ngáá pangɔ aá lɔ́ ngáá faá mbuuỹííngɔ ngwala, ná wáá ngáá, Ngalá ngóó fíli aa na Ngala Kɔ́lɔi h̃u Ngala ndaa háá lé mbélai tí ndení yɔ́ɔ́ ɣɛ́ nuu áá suugúla nɔ́ɔ ngáá wúmaa géle ɣele,

²¹sífaa, keela wói Ngalá ndaa háá lé mbélai tɔ́ɔ́ nde aa ɣɛi ngáá ti wúmaa wóó, ná waa ngáá, sí ɔ́ɔ́ nɛ́ɛ́ ti yɛ ngáá tí nde, kɛ́ Hɛ́ɛ́ma Ỹínangi lɔ ɔ́ɔ́ maa yélai sítii nguto táá Ngalá ndaa wói nátii nde.